Nea Ɛbɛma Yɛatu Mpɔn wɔ Asɛnka Mu—Nkurɔfo a Wobɛma Wɔn Nsɛmma Nwoma Daa

Nea Enti a Ɛho Hia: Nnipa pii ani gye ho sɛ wɔbɛkenkan yɛn nsɛmma nwoma, nanso Bible adesua deɛ wɔmpɛ sɛ wobɔ so koraa. Ebia wɔpɛ wɔn asɔre saa ara, anaa wɔte nka sɛ wɔnni bere a wɔde bɛtena ase asua ade. Nanso bere a wɔgu so rekenkan yɛn nsɛmma nwoma yi deɛ, ɛwom ara a, wɔn ani bɛgye Onyankopɔn Asɛm ho. (1 Pet. 2:2) Ebia asɛm bi a wɔbɛkan afi Ɔwɛn-Aban anaa Nyan! mu no bɛpem wɔn, anaa wɔn tebea bɛsesa. Sɛ yɛtaa kɔsra wɔn a, wɔn anim bɛkokwa yɛn anim, na ɛbɛma yɛahu nea wɔn ani gye ho ne nea ɛhaw wɔn. Wei bɛtumi abɔ kwan ama Bible adesua.

Ɔkwan a Wobɛfa so Ayɛ:

Bosome biara hwɛ sɛ wobɛkɔ akɔma wɔn Ɔwɛn-Aban ne Nyan! a aba foforo no bi. Ɛwom ara a, wobɛtumi akɔsra wɔn abisa wɔn nsɛmma nwoma no mu nsɛm bi. Ɛbɛyɛ yie a, fa nwoma a yɛde reyɛ adwuma bosome no mu no baako kɔma wɔn. Yɛ kyerɛwtohɔ na wo werɛ amfi.—Hwɛ Yɛn Ahenni Som a ɛbae January 2014, kratafa 3.
Bere biara a wobɛkɔ hɔ no, siesie wo ho. Mfa nsɛmma nwoma no nkɔma no nsan w’akyi. Ɛyɛ a wo ne no mmɔ nkɔmmɔ na ɔnhu wo yie. Ɛba saa a, wobɛtumi de nokware no adua ne mu nkakrankakra.
Sɛ hokwan bi bue a, bɔ mmɔden sɛ wo ne no bɛfi adesua ase. Sɛ wɔn a woma wɔn nsɛmma nwoma no bisa asɛm bi a, pɛ asafo nwoma a ɛfata na mommom nsusu ho. Ansa na wobɛfi hɔ no, fa asɛmmisa bi si hɔ na bere foforo moabɔ ho nkɔmmɔ. Sɛ wotaa kɔ hɔ na wo ne no bɔ Bible mu nkɔmmɔ kakra anaa mosusu nwoma bi ho tiawa mpo a, na Bible adesua ara na woreyɛ no. Adɛn na womfa Asɛmpa nwomawa no nkyerɛ no sɛnea yɛyɛ Bible adesua? Wobɛtumi ayi video ahorow yi akyerɛ no: Adɛn Nti na Ɛsɛ sɛ Wusua Bible? ne Yɛne Obi Sua Bible a, Yɛyɛ no Sɛn? Sɛ kan no na n’ani nnye ho sɛ ɔne wo bɛsua Bible mpo a, nneɛma bɛtumi asesa. Adɛn nti na wonsan nsɔ nhwɛ?

Sɔ Wei Hwɛ Bosome Yi Mu:

Nnipa bɛn na wosusu sɛ wɔn ani bɛgye ho sɛ wɔn nsa bɛka nsɛmma nwoma no daa? Kyerɛw wɔn din. Ma wɔn nsɛmma nwoma a aba foforo no bi na ka kyerɛ wɔn sɛ bosome a ɛdi hɔ no, wode foforo bɛba.