Ɔwɛn-Aban INTANƐT SO NHOMAKORABEA

INTANƐT SO NHOMAKORABEA

mwb16 April kr. 3
Ka Nsɛm a Ɛyɛ Dɛ Fa Hyɛ Afoforo Nkuran na Hyɛ Wɔn Den

Kristofo Abrabɔ ne Yɛn Asɛnka—Adesua Nhoma (2016)

mwb16 April kr. 3

BIBLE MU AKORADE | HIOB 16-20

Ka Nsɛm a Ɛyɛ Dɛ Fa Hyɛ Afoforo Nkuran na Hyɛ Wɔn Den

Ɛsɛ sɛ ɔfotufo nsɛm hyɛ afoforo den

Hiob botowee na odii awerɛhow, enti na ehia sɛ afoforo boa no na wɔhyɛ no nkuran
Hiob nnamfo mmiɛnsa no anka awerɛkyekyesɛm biara ankyerɛ no. Mmom wɔbɔɔ no sobo, na ɛmaa ne haw yɛɛ kɛse

Nsɛm a ɛyɛ yaw a Bildad kae no teetee Hiob

Hiob su frɛɛ Onyankopɔn sɛ ɔmma ne ho ntɔ no—ɔpɛe sɛ owu mpo
Hiob de n’ani sii owusɔre ho anidaso a na ɔwɔ no so, na ɔkɔɔ so gyinaa n’amanehunu no ano

Elifas rekasa kyerɛ Hiob, na Bildad ne Sofar rehwɛ wɔn

WƆN A WƆBƆƆ HIOB SOBO NO

Elifas:

Ebetumi aba sɛ na ofi Teman a na ɛwɔ Edom. Wɔka Teman ho asɛm wɔ Yeremia 49:7 sɛ Edomfo anyansafo kurow
Ɛbɛyɛ sɛ Elifas ne “awerɛkyekyefo” mmiɛnsa no mu panyin ne wɔn mu nipa titiriw. Ɔno na odii kan kasae. Ɔkasae mprɛnsa, na na ne kasa no ware kyɛn mmarima mmienu a aka no de no

Sobo a enni nnyinaso:

Odii Hiob mũdi mu a okurae no ho fɛw, na ɔkae sɛ Onyankopɔn nnye n’asomfo nni (Hio 4, 5)
Ɔkae sɛ Hiob yɛ ahantan, ne tirim yɛ den na onsuro Onyankopɔn (Hio 15)
Ɔkae sɛ Hiob yɛ oniberefo, obu atɛnkyea, na onipa so nni mfaso mma Onyankopɔn (Hio 22)

Bildad:

Ná ofi Suha. Ebetumi aba sɛ na ɔte bɛn Asubɔnten Eufrate
Ɔno ne nea ɔto so mmienu a ɔkasae. Mprɛnsa a ɔkasae no nyinaa, na ne nsɛm no yɛ tiawa nanso na ɛyɛ yaw paa kyɛn Elifas de no

Sobo a enni nnyinaso:

Ɔkyerɛe sɛ na Hiob mma no ayɛ bɔne, na ɛfata sɛ ɔhaw no baa wɔn so, na ɔkae sɛ Hiob nsom Onyankopɔn (Hio 8)
Ɔkyerɛe sɛ Hiob yɛ ɔbɔnefo (Hio 18)
Ɔkae sɛ mfaso biara nni so sɛ onipa bekura ne mũdi mu (Hio 25)

Sofar:

Naamani a ɛbɛyɛ sɛ ofi Arabia atifi fam
Ɔne ɔbarima a otwa to a ɔkasae, na ɔno na ɔkasa tiaa Hiob paa. Ɔkasae mprenu pɛ

Sobo a enni nnyinaso:

Ɔkae sɛ Hiob keka nsɛnhunu, afei onnyae bɔne yɛ (Hio 11)
Ɔkyerɛe sɛ Hiob tirim yɛ den na n’ani gye bɔne ho (Hio 20)