KRISTOFO ABRABƆ
Asɛnka Ne Ɔkyerɛkyerɛ—Ɛho Hia Ma Asuafoyɛ Adwuma No
Yesu maa n’akyidifo ahyɛde sɛ wɔnkɔ na wɔnkɔyɛ asuafo. (Mt 28:19) Wei hwehwɛ sɛ yɛka asɛm no na yɛkyerɛkyerɛ. Ɛwom ara ɛsɛ sɛ yɛn nyinaa bisa yɛn ho sɛ, ‘Dɛn na metumi ayɛ na matu mpɔn wɔ asuafoyɛ adwuma afã horow a ehia yi mu?’
ASƐNKA
Sɛ́ anka yɛbɛtwɛn sɛ nkurɔfo mmra yɛn nkyɛn no, ɛsɛ sɛ yɛde nsi hwehwɛ wɔn a ‘wɔfata.’ (Mt 10:11) Sɛ yɛkɔ asɛnka a, ɛyɛ a yɛma yɛn ani da hɔ sɛnea ɛbɛyɛ a yɛde hokwan no bedi ‘wɔn a yebenya wɔn no’ adanse? (Aso 17:17) Nea ɛmaa Lidia bɛyɛɛ osuani ne sɛ ɔsomafo Paulo de nsi kaa asɛm no.—Aso 16:13-15.
“Gu w’aba anɔpa, na nyi wo nsa mfi ho kosi anwummere” (Ɔsɛ 11:6)
HWƐ VIDEO A YƐATO DIN KƆ SO KA ASƐMPA NO A ‘WUNNYAE’ DA—BƆNNƆ SO NE AFIE AFIE, NA BUA NSƐMMISA A EDIDI SO YI:
Dɛn na da biara na Samuel yɛ de kyerɛ sɛ ɔde nsi hwehwɛ ɔkwan a ɔbɛfa so agu nokware aba no?
Adɛn nti na ɛsɛ sɛ yemia yɛn ani de yɛn ho hyɛ akwan horow a yɛfa so ka asɛm no nyinaa mu?
Wo nkɔree ne wo mmae mu no, henanom na wubetumi aka Ahenni ho asɛm no bi akyerɛ wɔn?
ƆKYERƐKYERƐ
Sɛ yebetumi ayɛ asuafo a, ɛnsɛ sɛ yegyaw nhoma ma nkurɔfo kɛkɛ; mmom ɛsɛ sɛ yɛyɛ pii ka ho. Sɛ yebetumi aboa wɔn ama wɔanya nkɔso honhom fam a, ehia sɛ yɛyɛ sankɔhwɛ ne Bible adesua. (1Ko 3:6-9) Nanso mmɔden a yɛbɛbɔ sɛ yɛde Ahenni no ho nokwasɛm bɛkyerɛkyerɛ obi no ansow aba papa biara nso ɛ? (Mt 13:19-22) Ɛsɛ sɛ yɛkɔ so ara hwehwɛ wɔn a wɔn koma te sɛ “asase pa” no.—Mt 13:23; Aso 13:48.
“Me de, miduae, Apolo guguu so nsu, nanso Onyankopɔn na ɔma enyinii” (1Ko 3:6)
HWƐ VIDEO A YƐATO DIN KƆ SO KA ASƐMPA NO A ‘WUNNYAE’ DA—WƆ BAGUAM NE ASUAFOYƐ ADWUMA NO MU, NA BUA NSƐMMISA A EDIDI SO YI:
Sɛn na Solomon ne Mary guguu nokware aba no so nsu wɔ Ezekiel ne Abigail koma mu?
Botae bɛn na ɛsɛ sɛ yɛde si yɛn ani so wɔ asɛnka adwuma no afã horow nyinaa mu ne bere a yɛreyɛ baguam adansedi?
Yɛbɛyɛ dɛn ama yɛn ani aku nokware no a yɛde bɛkyerɛkyerɛ nkurɔfo no ho?