Hwɛ Yiye Na Woantrɛw Atosɛm Mu

Ɛnnɛ nnipa pii nam radio, television, intanɛt anaa nneɛma a wɔatintim so de nsɛm mena ntɛmntɛm. Yɛn a yɛsom “nokware Nyankopɔn” no de, sɛ́ yenim anaa yennim no, yɛmpɛ sɛ yɛbɛyɛ biribiara a ɛbɛkyerɛ sɛ yɛretrɛw atosɛm mu. (Dw 31:5; Ex 23:1) Sɛ obi trɛw atosɛm mu a, ebetumi apira afoforo paa. Sɛ wopɛ sɛ wuhu sɛ asɛm bi yɛ nokware a, bisa wo ho sɛ:

• ‘Ɛhe na metee asɛm no fii?’ Nea ɔreka asɛm no akyerɛ wo no, ebia onnim nokware a ɛwɔ mu nyinaa. Sɛ obi te asɛm, na ɔno nso ka kyerɛ obi a, mpɛn pii no, nsɛm no bi sesa. Enti, sɛ wunnim nokware a ɛwɔ asɛm bi mu a, hwɛ yiye na woantrɛw mu. Wɔn a wɔwɔ hokwan wɔ asafo no mu paa na ɛsɛ sɛ wɔhwɛ yiye wɔ nsɛm bi a wonnim emu nokware nyinaa no ho. Nea enti a ɛte saa ne sɛ, anuanom bu nsɛm a wɔka no sɛ ɛyɛ nokware

• ‘Asɛm a woate no betumi asɛe obi din?’ Sɛ asɛm a yɛate no betumi asɛe obi din a, ɛnsɛ sɛ yɛtrɛw mu.—Mme 18:8; Flp 4:8

• ‘Asɛm no yɛ nokware?’ Sɛ yɛte nsɛm anaa osuahu ahorow bi a wɔagugu mu sɛnea ɛbɛyɛ a yɛn ho bedwiriw yɛn a, ɛsɛ sɛ yɛhwɛ yiye na yɛantrɛw mu

HWƐ VIDEO A YƐATO DIN MƐYƐ DƐN AGYAE NSEKURO NO? WUWIE A, BUA NSƐMMISA A EDIDI SO YI:

• 

  Sɛnea Mmebusɛm 12:18 kyerɛ no, dɛn na nsɛm a yɛka betumi ayɛ?

• 

  Sɛn na Filipifo 2:4 bɛboa yɛn ama yɛahu nsɛm a yebetumi aka afa afoforo ho?

• 

  Sɛ yehu sɛ nkɔmmɔ a yɛrebɔ reyɛ adan nsekuro anaa ɛreyɛ asɛe obi din a, dɛn na ɛsɛ sɛ yɛyɛ?

• 

  Ansa na yɛbɛka afoforo ho nsɛm no, nsɛm bɛn na ɛsɛ sɛ yebisa yɛn ho?