Fa Wubetumi Anya Anigye Daa! Nhoma No Yɛ Adwuma Wɔ Asɛnka Mu

Yɛn ani agye paa sɛ yɛanya nhoma ne nhomawa foforo a yɛde rebɛyɛ Bible adesua! Yɛsrɛ Yehowa sɛ, mmɔden a yɛrebɔ sɛ yɛbɛyɛ nnipa pii asuafo no, onhyira so. (Mt 28:18-20; 1Ko 3:6-9) Nanso sɛn na yɛde nhoma ne nhomawa foforo yi bɛyɛ adwuma?

Ɔkwan a yɛbɛfa so ne nkurɔfo asua Wubetumi Anya Anigye Daa! nhoma no yɛ soronko koraa. Ɛbɛma yɛatumi ne nkurɔfo abɔ Bible mu nkɔmmɔ yiye. Enti sɛ woresiesie wo ho akɔyɛ Bible adesua, anaa wo ne obi resua nhoma no a, di akwankyerɛ a edidi so yi akyi.a

• Monkenkan nkyekyɛm ahorow no, na munsusuw nsɛmmisa no ho

• Kyerɛwnsɛm a wɔakyerɛ sɛ “monkenkan” no, monkenkan, na boa osuani no ma onhu sɛnea ɔde bɛyɛ adwuma

• Monhwɛ video ahorow no, na momfa ɛho nsɛmmisa a ɛwɔ nhoma no mu nsusuw ho

• Da biara a mubesua ade no, bɔ mmɔden sɛ mubewie adesua baako

Sɛ wopɛ sɛ wo ne obi fi Bible adesua ase a, di kan fa nhomawa no ma no, na hwɛ sɛ n’ani begye adesua no ho anaa. (Hwɛ adaka a yɛato din “Wokɔ Obi Nkyɛn Bere a Edi Kan a, Wobɛyɛ Dɛn De Wubetumi Anya Anigye Daa! Nhomawa No Ama No?”) Musua nhomawa no wie na osuani no pɛ sɛ ɔtoa adesua no so a, fa nhoma no ma no, na mumfi ase wɔ adesua nnan no mu. Wo ne obi resua Dɛn na Yebetumi Asua nhoma no anaa Onyankopɔn Dɔ nhoma no a, munnyae na monkɔtoa so wɔ Wubetumi Anya Anigye Daa! nhoma no mu. Ɛyɛ a hwɛ baabi a mudui wɔ nhoma dedaw no mu, na woahu baabi a mobɛtoa so.

HWƐ VIDEO A YƐATO DIN YƐN ANI AGYE SƐ WOPƐ SƐ WUSUA BIBLE NO. WUWIE A, BUA NSƐMMISA A EDIDI SO YI:

• Sɛ wo ne obi sua nhoma foforo yi a, nneɛma bɛn na obehu?

• Wufi ase ne obi sua ade a, adɛn nti na ɛsɛ sɛ wuyi video yi kyerɛ no?

• Botae ahorow bɛn na wubetumi aboa wo Bible suani no ma ɔde asisi n’ani so nkakrankakra na wadu ho?—Hwɛ adaka a yɛato din “Nea Ɔfã Biara Bɛka Ho Asɛm Ne Botae a Ɛsɛ Sɛ Osuani No De Si N’ani So”