Atoyerɛnkyɛm Bi Si a, Yɛbɛyɛ Dɛn Aboa?

Nnansa yi, gye sɛ ade ankye, na atoyerɛnkyɛm bi asi. Sɛ atoyerɛnkyɛm si na wɔde mmoa rema wɔn a wɔakɔ ahokyere mu no a, ɛsɛ sɛ wɔtoto nneɛma yiye sɛnea ɛbɛyɛ a biribiara bɛkɔ so wɔanowɔano. Wei nti, Akwankyerɛ Kuw no ama Betel biara atew Dwumadibea a Ɛde Mmoa Ma Wɔ Atoyerɛnkyɛm Bere Mu.

Sɛ anuanom a ɛwɔ saa dwumadibea yi mu no te sɛ atoyerɛnkyɛm bi asi a, ntɛm ara wɔbisa asafo mu mpanyimfo a ɛwɔ baabi a asɛm no asi no sɛ, dɛn na anuanom hia. Ɛtɔ da a, wobɛhwɛ na nneɛma a asɛe no dɔɔso ara ma ɛho adwuma boro anuanom a ɛwɔ hɔ no so. Ɛba saa a, Betel bɛpaw anuanom bi a wɔfata ama wɔadi anim aboa wɔn a wɔn ho aka mu no. Saa anuanom yi betumi aka sɛ wɔrepɛ atuhoamafo a wɔbɛba abɛboa wɔn; wɔbetumi nso akyerɛ nneɛma pɔtee bi a wɔpɛ sɛ anuanom de bɛboa. Ɛtɔ da nso a nneɛma a wɔhia no, wɔbetumi atotɔ bi wɔ mpɔtam hɔ baabi na wɔakyekyɛ ama anuanom.

Sɛ atoyerɛnkyɛm bi si na yɛma kwan ma anuanom a ɛho adwuma hyɛ wɔn nsa no di ho dwuma a, ɛboa paa. Sɛ obiara sɔre na ose ɔno ara rekɔyɛ biribi de aboa anuanom a wɔakɔ ahokyere mu no a, etumi ma nneɛma yɛ basaa, etumi sɛe sika, etumi ma nneɛma a wɔde rebɛboa anuanom no sɛe, na afei adwuma a obi ayɛ no, wobɛhwɛ na obi foforo akɔyɛ ade koro no ara, na asɛe bere ne adaagye.

Anuanom a Betel apaw wɔn no betumi asese ahu sika a wɔbehia ne atuhoamafo dodow a wɔbehia na wɔatumi aboa anuanom a wɔwɔ ahohia mu no. Afei nso, nea ɛbɛyɛ a adwuma a wɔbɛyɛ de aboa anuanom no bɛkɔ ntɛm no, wɔbetumi ne aban mpanyimfo a ɛwɔ mpɔtam hɔ no adi nkitaho. Enti yɛsrɛ wo, ɛnsɛ sɛ wo ara wosɔre ka sɛ woregyigye sika akɔma wɔn a wɔakɔ ahohia mu no, worekɔtotɔ nneɛma amena wɔn, anaa worebesim akɔ hɔ akɔboa, gye sɛ anuanom a edi adwuma no anim no aka akyerɛ wo sɛ yɛ saa.

Ne nyinaa mu no, sɛ atoyerɛnkyɛm si a, ɛyɛ a yɛpɛ sɛ yɛboa yɛn nuanom. (Heb 13:16) Nea enti a ɛte saa ne sɛ, yɛdɔ wɔn paa. Ɛnde dɛn na yebetumi ayɛ de aboa wɔn? Ade a ehia paa a yebetumi ayɛ ne sɛ yɛbɛbɔ mpae ama wɔn a atoyerɛnkyɛm ato wɔn no, ne wɔn a wɔreboa wɔn no nyinaa. Yebetumi nso ayi ntoboa de akɔboa wiase nyinaa adwuma no. Betel ahorow no na wɔnim kwan pɔtee a wɔde sika no bɛyɛ adwuma ama aboa anuanom paa; wɔyɛ wei wɔ Akwankyerɛ Kuw no akwankyerɛ ase. Sɛ yɛn ankasa yɛpɛ sɛ yɛkɔboa a, yebetumi ahyehyɛ Local Design/Construction Volunteer Application (DC-50) fɔɔm no bi. Ɛbɛma Betel ahu sɛ, sɛ mmoa bi ho behia a, yɛwɔ hɔ.

HWƐ VIDEO A YƐATO DIN NSU AYIRI ASƐE NNEƐMA PII WƆ BRAZIL. WUWIE A, BUA ASƐMMISA A EDI SO YI:

Nsuyiri a ɛsɛee nneɛma wɔ Brazil afe 2020 no, wohwɛ nea Yehowa Adansefo yɛ de boaa wɔn a wɔn ho kae no a, dɛn na ɛyɛ wo fɛ paa wɔ ho?