KRISTOFO ABRABƆ
Sɛnea Yɛde Yɛn Video a Ɛka Bible Adesua Ho Asɛm No Bɛyɛ Adwuma
Yɛwɔ video ahorow nnan a ɛka Bible adesua ho asɛm a yeyi kyerɛ nkurɔfo wɔ asɛnka mu. Emu biara atirimpɔw ne sɛn?
Adɛn Nti Na Ɛsɛ Sɛ Wusua Bible?—Tenten. Yɛyɛɛ saa video yi sɛ, ɛmfa ho ɔsom a obi wom no, ɛmmoa no mma n’ani mmegye Bible no ho. Obi hwɛ a, ɛhyɛ no nkuran sɛ, nsɛmmisa a ɛkyere nkurɔfo adwene paa no, ɔnhwehwɛ ho mmuae wɔ Bible mu. Video no ma yehu sɛnea Bible no bua saa nsɛmmisa no mu baako, na wuhu sɛ mmuae no tɔ asom paa. Afei nso, sɛ obi ani gye ho sɛ obesua Bible a, video no ma ohu sɛnea obenya obi a ɔne no besua ade.
Adɛn Nti Na Ɛsɛ Sɛ Wusua Bible? (nea wɔatwa no tiaa) Ɛte sɛ tenten no ara, nanso wei de, ɛyɛ tia koraa. Sɛ yɛde yɛ adwuma wɔ mmeae a nkurɔfo nni adaagye a, ebetumi aboa paa.
Yɛne Obi Sua Bible a, Yɛyɛ no Sɛn? Bible adesua a yɛne nkurɔfo yɛ a yennye sika biara no, yɛyɛɛ saa video yi sɛ, ɛmmoa nkurɔfo ma wonhu sɛnea ɛte na wɔn ani mmegye ho. Afei nso, nsɛm a nkurɔfo taa bisa fa Bible adesua ho no, video no yi ano. Sɛ obi ani gye ho sɛ obesua Bible nso a, video no boa no ma ohu sɛnea obenya obi a ɔne no besua ade.
Yɛn Ani Agye Sɛ Wopɛ Sɛ Wusua Bible. Saa video yi, yɛayɛ no sɛ yenyi nkyerɛ yɛn Bible asuafo. Wohwɛ Wubetumi Anya Anigye Daa! nhoma no kratafa mmienu a, ɛhɔ na wɔto nsa frɛ Bible suani no sɛ ɔnhwɛ video yi, nanso sɛ yɛne obi resua Wubetumi Anya Anigye Daa! nhomawa no mpo a, yebetumi ayi akyerɛ no. Video no ma osuani no hu nhoma no mu nsɛm, na ɛkyerɛ no sɛnea adesua no bɛkɔ.
Ɛwom, video no mu biara wɔ n’atirimpɔw, nanso emu biara a yɛhwɛ a ɛbɛboa obi no, yebetumi ayi akyerɛ no anaa yɛde asɛnde no. Yɛhyɛ adawurubɔfo nyinaa nkuran sɛ, wonhu video no nyinaa ani so yiye na wɔatumi de ayɛ adwuma wɔ asɛnka mu.