Hena Na Wubetumi De Wo Ho Ato No So?—Dɛn Na Bible Ka Fa Ho?

Sɛ obi a wugye no di daadaa wo anaa odi wo huammɔ a, etumi yɛ yaw paa. Wɔn a edidi so yi, seesei nnipa bebree nnye wɔn nni bio:

• amanyɔfo a wɔn yafunu ho hia wɔn sen ɔman no.

• wɔn a wɔma kaseɛbɔ ne nsɛnkyerɛwfo a wɔnka nokware; wɔtumi kogyina ebinom akyi ka wɔn nsɛm dɛdɛɛdɛ, na wɔaka afoforo de yayaayaw.

• nyansahufo a wɔyɛ nneɛma a akyiri yi ɛkɔfa ɔhaw brɛ ɔmanfo.

• asɔfo a wɔde Onyankopɔn adwuma ato nkyɛn na wɔde wɔn ho awura amanyɔsɛm mu.

Enti nnipa bebree wɔ hɔ a, ɛnyɛ obiara kɛkɛ na wɔgye no di. Na ntease wom. Bible bɔ yɛn kɔkɔ sɛ:

• “Mommfa mo ho nnto ɔdehye anaa onipa ba so, efisɛ ɔrentumi nnye obiara nkwa.”—Dwom 146:3.

Obi a wubetumi de wo ho ato no so

 Bible ma yehu obi a wubetumi de wo ho ato no so. Ɔno ne Yesu Kristo. Ɛnyɛ sɛ na ɔyɛ nipa papa a ɔtenaa ase wɔ tete mmere mu ara kɛkɛ. Onyankopɔn apaw Yesu sɛ ‘onni hene, na n’Ahenni remma awiei da.’ (Luka 1:32, 33) Yesu na odi Onyankopɔn Ahenni no so hene. Yɛka Onyankopɔn Ahenni a, ɛyɛ aban bi a ɛwɔ soro.—Mateo 6:10.

• Sɛ wopɛ sɛ wuhu nea enti a wubetumi de wo ho ato Yesu so a, kenkan asɛm a yɛato din, “Hena Ne Onyankopɔn Ahenni No So Hene?” ne “Dɛn na Onyankopɔn Ahenni Bɛyɛ?”