NSASE NE NNIPA
El Salvador Nsrahwɛ
BƐYƐ mfe 500 ni, bere a Spainfo baa baabi a ɛnnɛ yɛfrɛ hɔ El Salvador no, na ɛhɔfo no frɛ hɔ Cuscatlán. Saa din no kyerɛ “Agude Asase.” Ɛnnɛ, El Salvadorfo dodow no ara yɛ ɛhɔfo ne Europfo a wɔbɛtenaa hɔ no asefo.
El Salvadorfo pɛ adwuma na wɔn anim te. Wɔn ani abue na wobu adeɛ nso. Ansa na wɔne obi bedi nkɔmmɔ anaa wɔbɛhyɛ ase ayɛ adwuma no, wɔto wɔn bo ase kyea sɛ, “Buenos días” (maakye) anaa “Buenas tardes” (maaha). El Salvadorfo a wɔtete nkuraase ne nkuro nketewa mu mpo deɛ, sɛ wuhyia obi na woankyea no a, na ɛkyerɛ sɛ wummu adeɛ.
Ade a El Salvadorfo dua no kɛse paa ne kɔfe
Nnuane a El Salvadorfo pɛ paa baako ne pupusa. Saa aduane no, wɔde aburoosiam (anaa ɛmo) na ɛyɛ; wɔde kyiis ne adua ne prakonam ne nneɛma foforo hyehyɛ mu. Wɔtaa de ntoosi abomu ne curtido na edi saa pupusa no. Curtido yɛ kabegyi, karɔt, gyeene, ne viniga bi na wɔde afra. Ɛwom sɛ ebinom de atere ne fɔk na edi pupusa deɛ, nanso ɛhɔfo no deɛ, wɔn nsa na wɔde di.
Pupusa yɛ nnuane a El Salvadorfo pɛ paa no mu baako
Los Tercios Aworoeɛ, Suchitoto
SO NA WUNIM? El Salvador yɛ ɔman bi a ɛhɔ mmepɔ taa pae gya. Mmepɔ bɛboro 20 na apae gya pɛn, na ebi da so pae gya. Los Tercios Aworoeɛ no bu fa abotan akɛse a mmepɔ a ɛpae gya ayiyi no so.
Yehowa Adansefo bɛboro 38,000 na ɛwɔ El Salvador, na wɔwɔ asafo bɛyɛ 700 mu. Wɔka Bible mu asɛm kyerɛ nnipa bɛyɛ 43,000 wɔ Spanish kasa, Borɔfo kasa ne El Salvador Mum Kasa mu.