NSASE NE NNIPA

Ireland Nsrahwɛ

Republic of Ireland ne Northern Ireland asase mfonini

AMAN mmienu na ɛka bom yɛ Ireland: kɛse no yɛ Republic of Ireland, ɛnna ketewa no nso yɛ Northern Ireland, na ɛka United Kingdom ho.

Ireland din baako nso ne ‘Emerald Isle,’ efisɛ nsu a ɛtɔ wɔ hɔ nti ahabammono atwa wɔn ho ahyia. Atare ne nsubɔnten akɛse, mpoano mmepɔw nketewa ne akɛse no nyinaa ka bom ma ɛhɔ yɛ fɛ.

Abakɔsɛm kyerɛ sɛ Irelandfo afa abɛbrɛsɛ pii mu pɛn. Ebi ni: Ebinom kyerɛ sɛ efi afe 1845 kosi 1851 no, nnipa bɛyɛ ɔpepem baako na ɔkɔm ne yare kunkum wɔn; ne nyinaa fi sɛ yare bi tew sii wɔn ntɔmmɔ so sɛee no. Ohia buruburoo nti, Irelandfo pii tu kɔtenaa Australia, Britain, Canada, ne United States. Ɛnnɛ, Amerikafo bɛyɛ ɔpepem 35 na wɔn akyi fi Ireland.

Irelandfo anim tew na wɔpɛ nnipa. Nneɛma a ɛma wɔn ani gye paa no bi ne pɔnkɔ so tena, bɔɔlbɔ, ne nea ɛkeka ho. Mmea no nso di agorɔ bi a ɛte sɛ hɔki.

Irelandfo ho ade baako ne sɛ, nkɔmmɔ yɛ wɔn dɛ, na wɔnkɔ nnya nnwom koraa. Irelandfo wɔ asaw bi, na nkurɔfo nim saa asaw no wɔ wiase nyinaa. Wɔntoto wɔn nsa; wɔde wɔn nan na ɛsaw.

Yehowa Adansefo nso wɔ Ireland; wɔkɔɔ hɔ mfe ɔha atwam. Seesei a yɛrekasa yi, Adansefo bɛboro 6,000 na wɔte hɔ na wɔde ahokeka ka Bible mu asɛm kyerɛ nkurɔfo.

1. Celticfo sanku; 2. Irelandfo atɛntɛbɛn; 3. seberewa; 4. adakabɛn; 5. abɛn; 6. akyene — Nneɛma a Irelandfo de bɔ nnwom no bi na ɛwɔ ase hɔ no. Efi benkum kɔ nifa: Celticfo sanku, Irelandfo atɛntɛbɛn, gyitar ahama nnan, sanku, abɛn, ne akyene

NÁ WUNIM?

Wokɔ Northern Ireland atifi mpoano a, wubehu sɛ abo bi ayiyi sisi hɔ bebree; ebi yɛ akɛse, ebi yɛ nteaanteaa na ebi nso sam fam bebree. Wɔkyerɛ sɛ bepɔw bi na epuw biribi.