Mmeae a Yehyiam Som

YEHOWA de ahyɛde ama n’asomfo sɛ wonhyiam ntie n’asɛm na wɔnhyehyɛ wɔn ho nkuran. (Heb. 10:23-25) Ná wɔfrɛ baabi a edi kan a Onyankopɔn man Israel hyiam som no “ahyiae ntamadan.” (Ex. 39:32, 40) Akyiri yi, Dawid ba Solomon sii ofie anaa asɔrefie de hyɛɛ Onyankopɔn anuonyam. (1 Ahe. 9:3) Wɔsɛee saa asɔrefie no afe 607 A.Y.B. Enti Yudafo no yɛɛ nhyehyɛe hyiae wɔ adan bi mu som Onyankopɔn. Ná wɔfrɛ hɔ hyiadan. Akyiri yi wɔsan sii asɔrefie no bio, na ɛhɔ na na wohyiam som Onyankopɔn. Yesu kyerɛkyerɛɛ nkurɔfo wɔ asɔrefie no ne hyia adan ahorow mu. (Luka 4:16; Yoh. 18:20) Yesu yɛɛ nhyiam bi mpo wɔ bepɔw so.—Mat. 5:1–7:29.

² Yesu wu akyi no, na Kristofo hyiam wɔ anuanom fie ne mmeae foforo sua Kyerɛwnsɛm no hyehyɛ wɔn ho nkuran. (Aso. 19:8, 9; Rom. 16:3, 5; Kol. 4:15; Filem. 2) Ɛtɔ da a, na ɛho abehia sɛ wohyiam wɔ kokoam na atamfo anhu wɔn. Wei nyinaa ma yehu sɛ, Onyankopɔn asomfo a wɔtenaa ase tete no, ná wɔn ani gye ho paa sɛ wobehyiam ama ‘Yehowa akyerɛkyerɛ’ wɔn.—Yes. 54:13.

³ Ɛnnɛ nso, yetumi gye baabi yɛ Kristofo nhyiam. Yetumi hyiam nso wɔ anuanom fie. Yɛtaa yɛ asɛnka nhyiam wɔ anuanom fie. Wɔn a yehyiam wɔ wɔn fie no bu no sɛ ɛyɛ hokwan kɛse. Wɔn mu pii hu sɛ aboa wɔn paa wɔ Yehowa som mu.

AHENNI ASA

⁴ Beae titiriw a Yehowa Adansefo hyiam som ne Ahenni Asa so. Yɛtaa tɔ asase si Ahenni Asa foforo wɔ so. Ɛtɔ da nso a, dedaw bi a ɛwɔ hɔ no, yetumi siesie no kama. Mmeae bi wɔ hɔ a, asafo pii hyiam wɔ Ahenni Asa baako so. Ɛno ma yetumi sie sika, na ɛma yɛde Ahenni Asa no yɛ adwuma yiye. Baabi nso de, gye sɛ yɛhan baabi hyiam. Sɛ yesi Ahenni Asa foforo a, yehyira so ma Yehowa. Yesiesie Ahenni Asa dedaw bi nso a, yehyira so ma Yehowa. Nanso sɛ adwuma a yɛyɛɛ wɔ ho no nyɛ kɛse a, ɛho nhia sɛ yehyira so.

⁵ Sɛ yesi Ahenni Asa a, ɛnsɛ sɛ yesi no konkuronn de pɛ din. Ɛsono sɛnea yesisi Ahenni Asa wɔ mmeae pii, nanso ne nyinaa yɛ adan a yɛsom Yehowa wom a ɛyɛ yiye. (Aso. 17:24) Baabi a yɛresi dan no na ɛbɛkyerɛ sɛnea yebesi no. Nanso ɛsɛ sɛ ɛyɛ baabi a yebetumi ayɛ Kristofo nhyiam ama obiara ho atɔ no.

⁶ Ahenni Asa biara, Yehowa Adansefo asafo a ehyiam wɔ hɔ no, wɔn na ɛho ka, ɛhɔ asiesie, ne ɛsohwɛ hyɛ wɔn nsa. Yennyigye kɔlɛhyen, na yɛnsrɛsrɛ sika nso. Wokɔ Ahenni Asa biara so a, wubehu sɛ ntoboa nnaka sisi hɔ. Sɛ obi ba asafo nhyiam na ɔpɛ sɛ oyi ntoboa a, ná ɔde atom. Sika a yenya fi ntoboa nnaka mu no na yɛde tuatua Ahenni Asa no ho aka. Yɛnhyɛ obiara sɛ onyi ntoboa. Obiara fi ne komam na ɛyɛ saa.—2 Kor. 9:7.

⁷ Anuanom nyinaa nim sɛ, ɛyɛ hokwan kɛse na wɔanya sɛ wobetu wɔn ho ama asiesie Ahenni Asa no so kamakama, na wɔde wɔn sika aboa ama yɛahwɛ so. Mpɛn pii no, asafo mu panyin anaa ɔsomfo na wɔpaw no ma ɔyɛ nhyehyɛe a yedi akyi de siesie asa no so. Mpɛn pii no, asɛnka akuw no na wosiesie asa no so. Edu kuw biara so a, kuw no sohwɛfo anaa ne boafo na odi anim ma wosiesie hɔ. Ɛsɛ sɛ Ahenni Asa no so ne ɛho nyinaa hyɛ Yehowa ne n’ahyehyɛde no anuonyam.

⁸ Sɛ asafo mmienu anaa nea ɛboro saa na ehyiam wɔ Ahenni Asa baako so a, mpanyimfo a wɔwɔ asafo ahorow no mu na wohyiam paw Boayikuw a Ɛhwɛ Ahenni Asa So. Boayikuw no na ɛhwɛ toto Ahenni Asa no ho biribiara. Asafo ahorow a ehyiam wɔ asa no so no, emu mpanyimfo no yi onua baako ma ɔyɛ boayikuw no ntam nkitahodifo. Boayikuw no hyɛ mpanyimfo akuw no ase. Wɔhwɛ sɛ Ahenni Asa no bɛyɛ kama, na ɛhɔ atew. Nneɛma a yɛde siesie hɔ nso, wɔhwɛ sɛ ebi mpa hɔ. Wei kyerɛ sɛ, ɛsɛ sɛ asafo a ehyiam wɔ asa no so nyinaa ka wɔn ti pam ho hwɛ ma nneɛma kɔ yiye.

⁹ Sɛ asafo mmienu anaa nea ɛboro saa hyiam wɔ Ahenni Asa baako so a, ɛwom ara a, ebia asafo biara bɛsesa da ne bere a wɔde yɛ wɔn nhyiam. Sɛ mpanyimfo no hyia na wɔrehwɛ da a asafo biara de bɛkɔ ne nhyiam a, wɔde ɔdɔ ne adwenkoro na ɛyɛ saa. (Filip. 2:2-4; 1 Pet. 3:8) Ɛnsɛ sɛ asafo baako toto Ahenni Asa no ho nneɛma bere a wɔmmɔɔ asafo a ehyiam wɔ hɔ nyinaa amanneɛ. Sɛ asafo mmienu anaa nea ɛboro saa na ehyiam wɔ Ahenni Asa baako so, na ɔmansin sohwɛfo bɛsra emu baako a, saa nnawɔtwe no, sɛ ɛho behia a, asafo a aka no bɛsesa bere a wɔde kɔ asafo nhyiam.

¹⁰ Yebetumi ayɛ ayeforo ne ayi wɔ Ahenni Asa so. Nanso, ɛsɛ sɛ Asafo Ɔsom Boayikuw no pene so ansa. Anuanom a wɔwɔ boayikuw no mu no bɛtɔ wɔn bo ase asusuw ho. Akwankyerɛ a Betel de ama wɔn no, ɛno na wɔde bɛyɛ adwuma.

¹¹ Sɛ Boayikuw no pene so sɛ yɛ ayeforo anaa ayi wɔ Ahenni Asa so a, ehia sɛ woyɛ w’ade sɛ Kristoni amapa. Ɛnsɛ sɛ woyɛ biribi wɔ Ahenni Asa no so a ɛbɛhaw anuanom anaa woyɛ biribi a ebegu Yehowa din ho fĩ na asɛe asafo no din. (Filip. 2:14, 15) Ɛtɔ da a, Betel betumi aka sɛ yɛnyɛ Ahenni Som Sukuu, Akwampaefo Ɔsom Sukuu, ne dwumadi a ɛtete saa wɔ Ahenni Asa so.

¹² Ɛsɛ sɛ asafo biara di baabi a wohyiam som no ni efisɛ yɛde ɔsom kronn ma Yehowa wɔ hɔ. Enti sɛ yɛkɔ hɔ a, ɛsɛ sɛ yɛma yɛn nneyɛe, yɛn ntade, ne yɛn ahosiesie nyinaa hyɛ Yehowa anuonyam. (Ɔsɛnk. 5:1; 1 Tim. 2:9, 10) Sɛ yɛyɛ saa a, ɛkyerɛ sɛ yɛn ani sɔ Kristofo nhyiam a yɛyɛ wɔ hɔ no.

¹³ Sɛ asafo nhyiam rekɔ so a, ɛnsɛ sɛ obiara yɛ biribi a ɛbɛtwetwe afoforo adwene. Ne papa mu no, ɛsɛ sɛ mmofra tena wɔn awofo nkyɛn. Awofo a wokura mmofra nkumaa no, ɛyɛ a wɔtaa de wɔn pue kɔyɛ biribi ma wɔn anaa wɔkɔteɛ wɔn so. Enti yebetumi ama wɔatena baabi a sɛ ɛho behia sɛ wɔsɔre a, ɛrentwetwe afoforo adwene.

¹⁴ Sɛ yehyiam wɔ Ahenni Asa so a, wɔahyɛ da apaw anuanom bi a wɔfata sɛ wɔnyɛ atɛndant. Ɛsɛ sɛ atɛndant biara ma n’ani da hɔ, ɔyɛ obi a ɔpɛ nnipa, na n’adwene mu da hɔ. Atɛndant nnwuma no bi ni: Ɔde anigye gye ahɔho ba Ahenni Asa no so, wɔn a wɔamma ntɛm no, ɔpɛ baabi ma wɔtena, ɔkan nnipa dodow a wɔbaa asafo nhyiam no, na ɔhwɛ ma mframa fa Ahenni Asa no so sɛnea ɛsɛ. Sɛ awɔw ba nso a, ɔhwɛ sɛ ɛhɔ yɛ hyew sɛnea ɛsɛ. Baabi wɔ hɔ a, ansa na yɛbɛhyɛ asafo nhyiam ase ne bere a yɛapɔn nyinaa, wobɛhwɛ no, na mmofra de mmirika nenam asa no so, anaa wɔredi agorɔ wɔ asɛnka agua no so mpo. Ɛba saa a, ɛsɛ sɛ anuanom a wɔyɛ atɛndant no ka kyerɛ awofo no ma wɔhwɛ mmofra no yiye. Sɛ abofra bi rehaw adwene a, atɛndant no betumi aka akyerɛ n’awofo bɔkɔɔ sɛ wɔmfa no mpue sɛnea ɛbɛyɛ a ɔrentwetwe anuanom adwene. Anuanom a wɔyɛ atɛndant no boa paa ma obiara nya adesua no so mfaso. Ɛbɛyɛ yiye a, asafo mu mpanyimfo ne asomfo na ɛsɛ sɛ wɔyɛ atɛndant.

SƐNEA YESISI AHENNI ASA

¹⁵ Asomafo no bere so no, ná Kristofo binom di yiye sen afoforo. Enti ɔsomafo Paulo kyerɛwee sɛ: “Sɛnea ɛbɛyɛ a nneɛma bɛkyɛ pɛ ama nea aboro mo so no akogu wɔn hia mu, na nea aboro wɔn so no nso abegu mo hia mu, na nneɛma akyɛ pɛ.” (2 Kor. 8:14) Ɛnnɛ nso, biribi a ɛte saa kɔ so “sɛnea ɛbɛyɛ a nneɛma bɛkyɛ pɛ.” Ɛne sɛ, asafo a ɛwɔ wiase nyinaa yi ntoboa. Yɛboaboa saa ntoboa no ano yɛ no baako, na ɛma yenya sika de sisi Ahenni Asa foforo de bi nso siesie nea ayɛ dedaw. Yehowa ahyehyɛde no ani sɔ ntoboa a anuanom a wɔwɔ wiase nyinaa yi no. Asafo ahorow a wonya ntoboa no so mfaso no nso ani sɔ paa.

¹⁶ Betel ayɛ nhyehyɛe a wɔnam so kyerɛ Ahenni Asa a asafo biara behyiam wɔ so. Betel nso na ɛkyerɛ bere ne beae a ɛsɛ sɛ wosi Ahenni Asa foforo ne nea ehia sɛ wosiesie wɔ ɔman anaa aman a ɛhyɛ n’ase no mu. Sɛ atoyerɛnkyɛm bi si na sɛ Ahenni Asa bi ho ka a, Betel hwɛ ma wosiesie. Ɛtɔ da a, wosiesie anuanom adan a asɛe nso ka ho.

¹⁷ Betel de anuanom a wɔatu wɔn ho ama yɛ nnwuma pii. Ebinom boa ma yenya nsase a yɛde besi Ahenni Asa ne adan a yebetumi atɔ de ayɛ Ahenni Asa. Ebinom boa ma yɛdrɔ Ahenni Asa no plan. Ebi nso boa ma yenya tumi krataa a yɛde besi Ahenni Asa no. Asa no si ne ɛso hwɛ nyinaa, atuhoamafo yi boa ma yɛyɛ. Yehia Ahenni Asa bebree wɔ aman pii so. Ɛno nti yehia atuhoamafo bebree. Sɛ woabɔ asu na wofata sɛ woyɛ adwuma yi bi na wopɛ sɛ wutu wo ho ma a, wubetumi ahyehyɛ ho akwammisa krataa de ama Asafo Ɔsom Boayikuw no. Sɛ asafo bi resi Ahenni Asa anaa wɔresiesie a, adawurubɔfo a wɔmmɔɔ asu a wɔwɔ saa asafo no mu mpo betumi aboa.

NHYIAM ASA

¹⁸ Tete no, na Kristofo kyekyɛ wɔn mu akuw nketewa hyiam. Nanso ɛtɔ da a, ná “nnipadɔm pii” tumi hyiam. (Aso. 11:26) Ɛnnɛ nso, Yehowa nkurɔfo hyiam kutuu yɛ ɔmansin ne ɔmantam nhyiam. Ɛyɛ a yɛtaa han baabi yɛ saa nhyiam akɛse yi. Nanso sɛ baabi saa nni hɔ a yebetumi agye a, ɛnde yebesi asa a yebehyiam wɔ hɔ asom; yɛfrɛ hɔ Nhyiam Asa.

¹⁹ Ɛtɔ da a, yɛtɔ dan siesie de yɛ Nhyiam Asa. Nanso, nea yɛtaa yɛ paa ne sɛ yɛbɛtɔ asase asi bi. Nhyiam Asa no bi yɛ akɛse; ebi nso susua. Egyina baabi a wɔresi no no so. Sɛ yɛbɛtɔ dan de ayɛ Nhyiam Asa oo, sɛ nso yebesi bi oo, Betel di kan sẽsẽ ɛho ka, ne mpɛn dodow a yɛbɛyɛ nhyiam wɔ hɔ.

²⁰ Betel paw anuanom ma wɔhwɛ Nhyiam Asa no so. Wɔsan nso yɛ nhyehyɛe ma asafo a ɛwɔ ɔmansin no mu siesie asa no so bere a wɔayɛ wɔn mansin nhyiam awie. Abosome nsia biara nso, asafo a ɛwɔ ɔmansin no mu siesie asa no so. Ɛnyɛ ɛno nko. Wɔn nsa da ho daa, enti da biara asa no wɔ ahoɔden. Sɛ anuanom tu wɔn ho ma yɛ saa nnwuma yi a, ɛboa paa. Enti yɛsrɛ anuanom nyinaa sɛ, nhyehyɛe a yɛde agu akwan mu de siesie Nhyiam Asa no, munyi mo yam ntaa akyi.—Dw. 110:3; Mal. 1:10.

²¹ Ɛtɔ da a, wɔyɛ nneɛma foforo wɔ Nhyiam Asa no so. Ebi ne Bible sukuu ahorow ne nhyiam atitiriw a wɔyɛ ma amansin so ahwɛfo. Nhyiam Asa no te sɛ Ahenni Asa. Yɛahyira so de som Yehowa. Enti sɛ yɛkɔ Nhyiam Asa so a, ɛsɛ sɛ yɛma yɛn nneyɛe, yɛn ntade, ne yɛn ahosiesie nyinaa hyɛ Yehowa anuonyam te sɛ nea yɛakɔ Ahenni Asa so ara pɛ.

²² Seesei, aka kakraa bi na awiei no aba. Nnipa pii resen yuu ba Onyankopɔn ahyehyɛde no mu. Wei kyerɛ sɛ Yehowa rehyira n’ahyehyɛde no. (Yes. 60:8, 10, 11, 22) Enti nhyehyɛe a yɛde agu akwan mu a ɛma yenya baabi pa som Yehowa, na ɛma yesiesie hɔ kama no, momma yɛntaa akyi. Yɛyɛ saa a, ɛkyerɛ sɛ ɛyɛ yɛn dɛ paa sɛ yɛwɔ adan a yetumi hyiam hyehyɛ yɛn ho yɛn ho nkuran, titiriw bere a yehu sɛ Yehowa da no rebɛn no.