Nhyiam a ‘Ɛkanyan Yɛn Kɔ Ɔdɔ Ne Nnwuma Pa Mu’

EFI tete nyinaa, Yehowa nkurɔfo hyiam som no. Afe biara, na Israel mmarima nyinaa kɔ Yerusalem kodi afahyɛ atitiriw mmiɛnsa. (Deut. 16:16) Ná tete Kristofo nso taa hyiam som Onyankopɔn; mpɛn pii no, na wɔyɛ saa wɔ nkurɔfo fie. (Filem. 1, 2) Ɛnnɛ nso, yɛkɔ asafo nhyiam ne amansin ne amantam nhyiam. Adɛn nti na Onyankopɔn nkurɔfo bom hyiam? Ɛno ara ne sɛ, ɛka yɛn som ho paa.—Dw. 95:6; Kol. 3:16.

² Bio nso, sɛ yɛkɔ nhyiam a ɛte saa a, yɛn ara na yenya so mfaso. Yɛhwɛ tete Israelfo sei a, Onyankopɔn maa wɔn ahyɛde sɛ Asese Afahyɛ a ɛto so nson biara wonhyia. Ɔkaa sɛ: “Mommoaboa ɔman no nyinaa ano, mmarima ne mmea ne mmofra ne ahɔho a wɔwɔ mo kurom nyinaa, na wontie na wonsua na wonsuro Yehowa mo Nyankopɔn, na wonni mmara yi mu nsɛm nyinaa so.” (Deut. 31:12) Enti yɛbɛka a, ade titiriw nti a yehyiam ne sɛ ‘Yehowa bɛkyerɛkyerɛ’ yɛn. (Yes. 54:13) Wei da nkyɛn a, yɛn nhyiam ahorow no boa ma yehu yɛn ho yiye, na yetumi hyɛ yɛn ho nkuran ma yɛn gyidi yɛ den.

ASAFO NHYIAM AHOROW

³ Pentekoste afe 33 Y.B. akyi no, asuafo no hyiaam tiee asomafo no nkyerɛkyerɛ, na “wɔde koma koro kɔɔ asɔrefie hɔ da biara da.” (Aso. 2:42, 46) Akyiri yi, sɛ Kristofo hyiam a, na wɔkenkan Onyankopɔn Asɛm ne nkrataa a asomafo no ne asuafo bi akyerɛw. (1 Kor. 1:1, 2; Kol. 4:16; 1 Tes. 1:1; Yak. 1:1) Bio nso, na asafo no hyiam bɔ mpae. (Aso. 4:24-29; 20:36) Mmere bi wɔ hɔ a, na wɔka osuahu a wɔanya wɔ asɛnka mu kyerɛ anuanom. (Aso. 11:5-18; 14:27, 28) Ɛtɔ da nso a, na wosusuw Bible nkyerɛkyerɛ ne nkɔmhyɛ ho. Ná wɔkyerɛ wɔn sɛnea wɔbɛbɔ wɔn bra sɛ Kristofo na wɔayi wɔn yam asom Onyankopɔn. Afei na wɔhyɛ wɔn nyinaa nkuran ma wɔde nsi ne ahokeka ka asɛmpa no.—Rom. 10:9, 10; 1 Kor. 11:23-26; 15:58; Efe. 5:1-33.

⁴ Ɛsa a Kristofo no twa too hɔ wɔ asomafo no bere so no, ɛno ara na yedi akyi nnɛ. Yɛde afotu a ɛwɔ Hebrifo 10:24, 25 no yɛ adwuma. Ɛhɔ ka sɛ: “Momma yensusuw yɛn ho yɛn ho ho . . . , na mommma yɛnnkwati sɛ yɛne yɛn ho behyiam sɛnea ayɛ ebinom su no, na mmom yɛnhyehyɛ yɛn ho nkuran, titiriw bere a muhu sɛ ɛda no rebɛn no.” Nkuranhyɛ a yenya wɔ asafo nhyiam ase no, ɛho hia paa, efisɛ yɛte nna a edi akyiri a emu yɛ den mu. Enti sɛ yɛkɔ asafo nhyiam daa a, ɛbɛboa yɛn ama yɛakɔ so anya gyidi kɛse na yɛasom Onyankopɔn nokware mu. (Rom. 1:11, 12) Yɛte awo ntoatoaso a akɔntɔn na akyea mu nnɛ, nanso yɛbɔ mmɔden sɛ yɛbɛpo bɔne ne wiase akɔnnɔ biara. (Filip. 2:15, 16; Tito 2:12-14) Sɛ yɛankɔ Kristofo nhyiam na yɛne Yehowa nkurɔfo ammɔ fekuw a, ɛhe bio na yɛbɛkɔ? (Dw. 84:10) Dɛn paa na mfaso wɔ so sen sɛ yɛne yɛn nuanom behyiam asua Onyankopɔn Asɛm na yɛasusuw ho? Momma yensusuw yɛn nhyiam ahorow no ho na yɛnhwɛ mfaso a yenya fi so.

ASAFO NHYIAM A YƐYƐ NO NNAWƆTWE AWIEI

⁵ Asafo nhyiam a yɛyɛ no nnawɔtwe awiei no, ne fã a edi kan yɛ Bible mu kasa; wɔn a wɔnyɛ Adansefo na wɔhyɛ da siesie ma wɔn. Wɔn a wobetie ɔkasa no mu bi wɔ hɔ a, ebia saa nhyiam no ne nea edi kan a wɔaba ase. Baguam kasa no boa adawurubɔfo a wɔwɔ asafo no mu ne wɔn a wɔafi ase ne asafo no rebɔ nyinaa ma wɔn gyidi yɛ den.—Aso. 18:4; 19:9, 10.

⁶ Kristo Yesu ne n’asomafo no ne asuafo bi maa baguam kasa te sɛ nea Yehowa nkurɔfo a wɔwɔ hɔ nnɛ yɛ wɔ wɔn asafo ahorow mu no. Sɛ yɛreka obi a na otumi kasa ma epusuw nkurɔfo a, obiara nni hɔ a ɔbɛto Yesu. Bere a nnipa bi tee ne kasa no, wɔkaa sɛ: “Obiara nkasae saa da.” (Yoh. 7:46) Yesu kasae te sɛ obi a ɔwɔ tumi, na wei maa nkurɔfo ho dwiriw wɔn. (Mat. 7:28, 29) Wɔn a wotiee n’asɛm guu aso pa mu no nyaa so mfaso pii. (Mat. 13:16, 17) Asomafo no suasuaa Yesu nhwɛso no. Sɛ yɛkan Asomafo Nnwuma 2:14-36 a, yehu tumi a Petro de kasae wɔ Pentekoste afe 33 Y.B. Ɔkasa a ɔmae no kaa nnipa mpempem koma. Akyiri yi, bere a Paulo nso kasae wɔ Atene no, nnipa a wotiee no no bi bɛyɛɛ gyidifo.—Aso. 17:22-34.

⁷ Ɛnnɛ nso, baguam kasa a wɔma wɔ asafo no mu ne baguam kasa ahorow a wɔma wɔ ɔmansin ne ɔmantam nhyiam ase no aboa nnipa ɔpepem pii. Ɔkasa no boa ma yɛte Kristofo nkyerɛkyerɛ ase yiye, na yɛde bɔ yɛn bra. Bio nso, ɛhyɛ yɛn den ma yɛde nsi yɛ Ahenni adwuma no. Sɛ yɛto nsa frɛ anigyefo ne ɔmanfo nyinaa ba baguam kasa ase a, na yɛreboa wɔn ama wɔahu nea Bible kyerɛkyerɛ.

⁸ Nsɛm a wɔkyerɛkyerɛ mu wɔ baguam kasa ahorow mu no gu ahorow. Ebi yɛ Bible nkyerɛkyerɛ ne nkɔmhyɛ, Bible nnyinasosɛm ne afotusɛm a ɛfa abusua ne aware ho, tebea a mmabun refa mu, ne Kristofo abrabɔ. Ɔkasa no bi fa adebɔ ne Yehowa anwonwadwuma ho. Ebi nso ma yehu gyidi, akokoduru, ne nokwaredi a nnipa bi a wɔn ho asɛm wɔ Bible mu daa no adi ne nea yebetumi asua afi mu nnɛ.

⁹ Ɛnde, yɛbɛyɛ dɛn anya baguam kasa ahorow no so mfaso kɛse? Ɛsɛ sɛ yɛyɛ aso tie ɔkasa no yiye na yebue yɛn Bible mu di ɔkasafo no akyi bere a ɔrekenkan kyerɛwsɛm bi anaa ɔrekyerɛkyerɛ mu no. (Luka 8:18) Sɛ yɛde yɛn adwene si ɔkasa no so a, yebesua nneɛma pii, na yɛde abɔ yɛn bra.—1 Tes. 5:21.

¹⁰ Mmeae a akasafo pii wɔ no, nnawɔtwe biara, wonya obi ma ɔma baguam kasa wɔ asafo no mu. Mpɛn pii no, nea ɛma wei tumi yɛ yiye ne sɛ, ɛyɛ a, asafo no to nsa frɛ akasafo fi asafo ahorow a ɛbɛn wɔn mu. Nanso sɛ akasafo nnɔɔso wɔ beae bi a, ɛnde wɔbɛma baguam kasa mpɛn dodow biara a wobetumi.

¹¹ Asafo nhyiam a yɛyɛ no nnawɔtwe awiei no fã a ɛto so mmienu no ne Ɔwɛn-Aban Adesua. Ɛyɛ nsɛmmisa ne mmuae, na nsɛm a yesusuw ho no wɔ Ɔwɛn-Aban a adesua nsɛm wom no mu. Yehowa nam Ɔwɛn-Aban no so ma yenya honhom fam aduan wɔ bere a ɛsɛ mu.

¹² Ɔwɛn-Aban no mu nsɛm boa ma yɛde Bible mu nsɛm bɔ yɛn bra daa. Ɛkyerɛkyerɛ yɛn ma yɛtwe yɛn ho fi “wiase honhom” ne afide biara ho. (1 Kor. 2:12) Ɔwɛn-Aban ma yɛte Bible nkyerɛkyerɛ ne nkɔmhyɛ ahorow ase yiye, na nokware hann no hyerɛn ma yɛn. Wei nyinaa ma yɛne Yehowa ahyehyɛde no bom nantew trenee kwan no so. (Dw. 97:11; Mmeb. 4:18) Sɛ yɛkɔ Ɔwɛn-Aban Adesua na yɛde yɛn ho hyem a, ɛma yenya anidaso sɛ wiase foforo a trenee te mu a Yehowa de ahyɛ yɛn bɔ no bɛba ampa. (Rom. 12:12; 2 Pet. 3:13) Yɛne yɛn nuanom Kristofo bɔ fekuw a, ɛboa ma yɛsow honhom no aba, na ɛhyɛ yɛn den ma yɛde nsi som Yehowa. (Gal. 5:22, 23) Afei ɛhyɛ yɛn den ma yegyina sɔhwɛ ano, na ‘yɛto fapem pa sie ma daakye na ama yɛatumi aso nkwa ankasa no mu denneennen.’—1 Tim. 6:19; 1 Pet. 1:6, 7.

¹³ Dɛn na ɛbɛma yɛn nsa aka honhom fam nnepa a ɛwɔ Ɔwɛn-Aban Adesua mu no? Ɛno ara ne sɛ yɛn mu biara bedi kan asua Ɔwɛn-Aban no na yɛakenkan kyerɛwnsɛm a wɔatwe adwene asi so no ansa na yɛaba adesua no ase. Sɛ yɛwɔ mmusua a, yebetumi abom asua. Sɛ yɛrema mmuae nso a, ɛbɛyɛ papa sɛ yɛde yɛn nsɛm bɛma. Yɛyɛ wei nyinaa a, nokware no besian akɔ yɛn komam tɔnn, na afoforo nso benya yɛn mmuae so mfaso, efisɛ wobehu sɛ yegye nea yɛreka no di. Sɛ yɛyɛ aso tie afoforo mmuae wɔ adesua no ase a, yebesua nneɛma pii nnawɔtwe biara.

ASAFO NHYIAM A YƐYƐ NO NNAWƆTWE NO MU

¹⁴ Nnawɔtwe biara asafo no hyiam wɔ Ahenni Asa so yɛ adesua a wɔato din Kristofo Abrabɔ Ne Yɛn Asɛnka. Nhyiam yi kura afã mmiɛnsa, na ɛboa yɛn ma “yɛfata” sɛ Onyankopɔn asomfo. (2 Kor. 3:5, 6) Bosome biara, wɔde adesua no ho nhyehyɛe ne nea yebesusuw ho no bɛba Kristofo Abrabɔ Ne Yɛn Asɛnka—Adesua Nhoma no mu. Wohwɛ Abrabɔ Ne Asɛnka Adesua Nhoma no mu a, wubehu nea yebetumi aka wɔ asɛnka mu.

¹⁵ Adesua yi fã a edi kan no, wɔato din Bible Mu Akorade, na ɛma yɛte Bible no ase hu sɛnea yɛde emu nsɛm bɛbɔ yɛn bra. Yebetie ɔkasa ne Bible akenkan, na atiefo nso benya kwan aka nea wɔasua afi nnawɔtwe no Bible akenkan mu. Mfoni ahorow wɔ Abrabɔ Ne Asɛnka Adesua Nhoma no mu. Afei nso mmeae bi wɔ hɔ a wɔakyerɛw nsɛmmisa bi agu hɔ, na wɔagyaw kwan nso ato hɔ a yebetumi akyerɛw yɛn mmuae ahyɛ hɔ. Weinom nyinaa boa ma yɛdɔ Bible no mu asukɔ. Ɛma yehu sɛnea yɛde Bible mu nsɛm bɛbɔ yɛn bra, na ɛma yɛn nkyerɛkyerɛ tu mpɔn. Ɛno ma yɛyɛ nnipa a ‘wɔfata koraa na wɔasiesie yɛn yiye ama adwuma pa biara.’—2 Tim. 3:16, 17.

¹⁶ Adesua no fã a ɛto so mmienu ne Ma W’ani Nku Asɛnka Ho. Ɛma yenya hokwan a yɛde bɛbobɔ nsɛm a yɛbɛka wɔ asɛnka mu no so, na ɛboa yɛn ma yetu mpɔn wɔ asɛnka ne ɔkyerɛkyerɛ adwuma no mu. Asuafo dwumadi ahorow no da nkyɛn a, yɛhwɛ nea yebetumi aka wɔ asɛnka mu ho video ahorow, na yesusuw ho. Enti adesua no fã yi boa ma yenya “asuafo tɛkrɛma” na ama ‘yɛahu asɛm a yɛde bebua nea wabrɛ.’—Yes. 50:4.

¹⁷ Adesua no fã a ɛto so mmiɛnsa ne Kristofo Abrabɔ. Ɛma yehu sɛnea yɛde Bible mu nnyinasosɛm bɛbɔ yɛn bra da biara da. (Dw. 119:105) Saa nhyiam yi fã titiriw ne Asafo Bible Adesua. Ɛyɛ nsɛmmisa ne mmuae te sɛ Ɔwɛn-Aban Adesua no.

¹⁸ Bosome biara, sɛ asafo no nsa ka Abrabɔ Ne Asɛnka Adesua Nhoma no a, mpanyimfo ntam nkitahodifo no anaa ɔpanyin bi a ɔreboa no tɔ ne bo ase hwɛ mu, na ɔhyehyɛ dwumadi no. Nnawɔtwe biara, ɔpanyin a onim nkyerɛkyerɛ a mpanyimfo kuw no apene no so na ɔbɛyɛ guamtenani. Ɔbɛhwɛ ama yɛahyɛ adesua no ase bere ano na wahwɛ ama yɛawie bere ano. Afei nso, ɔde nkamfo ne afotu bɛma wɔn a wɔyɛ asuafo dwumadi no.

¹⁹ Sɛ yesiesie yɛn ho daa ansa na yɛakɔ Abrabɔ Ne Asɛnka Adesua no ase na yɛde yɛn ho hyem a, yenya mfaso pii. Ɛma yenya Kyerɛwnsɛm no mu nimdeɛ, na ɛma yɛte Bible mu nnyinasosɛm ase yiye. Afei nso, ɛma yenya akokoduru ka asɛmpa no, na yɛn ho kokwaw wɔ asuafoyɛ adwuma no mu. Wɔn a wɔmmɔɔ asu a wɔba nhyiam yi bi nso nya kwan ne anuanom bɔ, na ɛhyɛ wɔn nkuran. Afei adesua no boa wɔn ma wonya nkɔso wɔ Onyankopɔn som mu. Sɛ yɛresiesie yɛn ho aba adesua yi ne adesua foforo biara ase a, yebetumi ayɛ nhwehwɛmu wɔ Watchtower Library, JW Library^®, Ɔwɛn-Aban INTANƐT SO NHOMAKORABEA^™ (sɛ ebi wɔ wo kasa mu a), ne nhomakorabea a ɛwɔ yɛn Ahenni Asa so. Nhomakorabea a ɛwɔ yɛn Ahenni Asa so no, wokɔ hɔ a, wubehu nhoma ahorow a Yehowa Adansefo atintim no bi, Watch Tower Publications Index anaa Nhoma a Yehowa Adansefo De Yɛ Nhwehwɛmu, Bible nkyerɛase ahorow, concordance, nsɛm asekyerɛ nhoma (dictionary), ne nhoma afoforo. Obiara tumi kɔyɛ nhwehwɛmu wɔ hɔ ansa na yɛahyɛ asafo nhyiam ase anaa bere a yɛapɔn.

ASƐNKA NHYIAM

²⁰ Memeneda ne Kwasida ne nnawɔtwe no mu nna a aka biara, adawurubɔfo hyia yɛ asɛnka nhyiam tiawa. Yɛtaa yɛ nhyiam yi wɔ nkurɔfo fie ne mmeae foforo. Yetumi nso hyia wɔ Ahenni Asa so. Sɛ yɛkyekyɛ yɛn mu akuwakuw na yehyia wɔ mmeae ahorow a, ɛmma adawurubɔfo ntwa kwantenten nkɔ asɛnka nhyiam ne wɔn asasesin mu. Afei ɛma yetumi kyekyɛ adawurubɔfo no ntɛm ma wɔkɔ asasesin no mu. Bio nso, kuw sohwɛfo no tumi hwɛ kuw no mufo so yiye. Sɛ kuw biara yɛ n’asɛnka nhyiam a, ɛboa paa. Nanso ɛtɔ da a, biribi nti ɛho behia sɛ kuw ahorow bi bom hyia. Baabi wɔ hɔ a nnipa a wɔkɔ asɛnka Dwoda kosi Fida no nnɔɔso, enti mpanyimfo no tumi yɛ nhyehyɛe ka akuw bi anaa asafo no nyinaa bom ma wɔyɛ asɛnka nhyiam wɔ Ahenni Asa so anaa baabi foforo. Wei ma adawurubɔfo nya anuanom ne wɔn nantew. Edu nnapɔnna a, asafo no nyinaa tumi hyia wɔ Ahenni Asa so yɛ asɛnka nhyiam. Afei nso, sɛ asafo no pɔn Ɔwɛn-Aban Adesua a, wɔn nyinaa betumi abom ayɛ asɛnka nhyiam.

²¹ Sɛ asɛnka kuw biara hyiam a, kuw sohwɛfo no na ɔbɛhwɛ so. Ɛwom ara a, kuw sohwɛfo no betumi ama ne boafo anaa onua bi a ɔfata ahwɛ nhyiam no so. Ɛsɛ sɛ nea ɔhwɛ so no siesie ne ho ne anuanom susuw asɛm bi a ɛbɛboa wɔn wɔ asɛnka mu ho. Wɔkyekyɛ anuanom ma wɔn asasesin wie a, na baako abɔ mpae. Owiei ara pɛ, na wɔkɔ asasesin no mu. Yɛde simma nnum kosi nson na ɛyɛ asɛnka nhyiam, nanso sɛ yɛyɛ no asafo nhyiam akyi a, ɛnde ɛnsɛ sɛ edu saa mpo. Ɛsɛ sɛ wɔn a wɔhwɛ asɛnka nhyiam so no hwɛ sɛ nhyiam no bɛhyɛ adawurubɔfo nkuran, na wɔanya nyansahyɛ ne akwankyerɛ a wɔde bɛyɛ asɛnka adwuma no. Wɔn a wofii asɛnka ase nkyɛe ne adawurubɔfo a wohia mmoa benya kwan ne wɔn a wɔn ho akokwaw akɔ asɛnka, na wei bɛboa ama wɔn nso ho akokwaw.

NHYIAM A ASAFO A ƐYƐ FOFORO ANAA ASAFO NKETEWA YƐ

²² Nnipa pii reba Yehowa fie, enti daa wɔtew asafo foforo. Mpɛn pii no, sɛ wɔbɛtew asafo foforo a, ɛyɛ ɔmansin sohwɛfo na ɔde ho akwammisa krataa kɔ Betel. Nanso ɛtɔ da a, ɛbɛyɛ papa sɛ akuw nketewa de wɔn ho bata asafo a ɛbɛn wɔn paa no ho.

²³ Ɛtɔ da a, wobɛhwɛ na anuanom mmea nko ara na ɛwɔ asafo ketewaa bi mu. Sɛ ɛba saa na onuawa bi rebɔ mpae anaa ɔrehwɛ adesua so a, ɔbɛkata ne ti sɛnea Bible kyerɛ no. (1 Kor. 11:3-16) Mpɛn pii no, ɔbɛtena ase de n’anim akyerɛ kuw no mufo. Ɛnsɛ sɛ anuanom mmea gyina asafo no anim ma ɔkasa. Mmom wɔbɛkenkan nea asafo no de ama sɛ yensusuw ho no na wɔakyerɛkyerɛ mu. Ɛtɔ da nso a, anuanom mmea mmienu betumi atena ase abɔ nea asafo no de ama sɛ yensusuw ho no ho nkɔmmɔ, na wɔn a wɔaka no atie. Wobetumi nso ayɛ dwumadi no sɛ ɔyɛkyerɛ de asesa mu. Betel bɛpaw anuanom mmea no mu baako ma wahwɛ nkrataasɛm ne adesua no so. Akyiri yi, sɛ wonya anuanom mmarima a wobetumi adi kuw no anim a, na wagyae ama wɔatoa so.

ƆMANSIN NHYIAM

²⁴ Asafo ahorow a ɛwɔ ɔmansin biara mu de da koro yɛ ɔmansin nhyiam; wɔyɛ no mprenu afe biara. Ɛba saa a, obiara nya kwan ne ne nuanom Kristofo bɔ, na wei ma ‘wɔtrɛw wɔn komam.’ (2 Kor. 6:11-13) Nneɛma a ɛho hia a ɛso bɛba Yehowa asomfo mfaso no, asafo no gyina Kyerɛwnsɛm no so hyehyɛ nsɛmti ne ɔkasa ahorow de ka ho asɛm wɔ nhyiam ahorow yi ase. Wɔma ɔkasa, wɔyɛ ɔyɛkyerɛ ahorow, na wobisabisa anuanom binom nsɛm. Dwumadi a ɛte saa hyɛ atiefo nyinaa nkuran ma wɔn gyidi yɛ den. Asuafo foforo bɔ asu de kyerɛ sɛ wɔahyira wɔn ho so ama Yehowa.

ƆMANTAM NHYIAM

²⁵ Afe biara, wɔka amansin bi bom ma wɔyɛ ɔmantam nhyiam. Yɛtaa de nnansa na ɛyɛ saa nhyiam no. Aman a adawurubɔfo nnɔɔso no, Betel tumi yɛ nhyehyɛe ma asafo a ɛwɔ ɔman no mu nyinaa hyia faako yɛ nhyiam. Mmeae bi wɔ hɔ a, tebea a ɛwɔ ɔman no mu ne akwankyerɛ a Yehowa ahyehyɛde no de bɛma na ɛbɛkyerɛ sɛnea wɔbɛyɛ nhyiam no. Ɛwom ara a, wɔyɛ amanaman ntam nhyiam anaa nhyiam titiriw wɔ aman bi so. Adansefo mpempem pii fi aman ahorow so kɔ saa nhyiam yi bi. Yehowa Adansefo rebɛyɛ nhyiam akɛse saa a, wɔbɔ ho dawuru; wei aboa ama nnipa bebree ate Ahenni ho asɛmpa no.

²⁶ Ɔmantam nhyiam yɛ anigye bere ma Yehowa nkurɔfo nyinaa; wonya hokwan ne wɔn nuanom bom som. Esiane sɛ hann no kɔ so hyerɛn nti, edu saa bere no a, yenya Bible mu nkyerɛkyerɛmu pii ma yɛte nokware no ase yiye. Amantam nhyiam bi wɔ hɔ a, woyi nhoma foforo adi wɔ ase. Nhoma no bi wɔ hɔ a, wɔhyɛ da yɛ ma yesua wɔ fie anaa asafo nhyiam ase, na ebi nso wɔ hɔ a, wɔhyɛ da yɛ ma yɛde kɔ asɛnka. Ɔmantam nhyiam nso yɛ bere a wɔbɔ nkurɔfo asu. Nhyiam akɛse a ɛte saa so wɔ mfaso paa efisɛ ɛboa ma yenya nkɔso wɔ Yehowa som mu. Ɛyɛ adanse a ɛkyerɛ sɛ Yehowa nkurɔfo yɛ abusua kɛse wɔ wiase nyinaa, na wɔyɛ Yesu Kristo asuafo ampa.—Yoh. 13:35.

²⁷ Sɛ Yehowa asomfo kɔ asafo nhyiam, ɔmansin nhyiam, ne ɔmantam nhyiam a, ɛhyɛ wɔn den ma wɔyɛ n’apɛde. Afei wiase no nkɛntɛnso bɔne a ebetumi asɛe gyidi a yɛwɔ sɛ Kristofo no, nhyiam ahorow no boa ma yɛtwe yɛn ho fi ho. Yɛn nhyiam ahorow no ma yɛkamfo Yehowa na yɛhyɛ no anuonyam. (Dw. 35:18; Mmeb. 14:28) Yɛda Yehowa ase paa sɛ wayɛ nhyehyɛe ama n’asomfo de anigye bom som no wɔ awiei bere yi mu.

AWURADE ANWUMMEDUAN

²⁸ Afe biara, Yehowa Adansefo asafo a ɛwɔ wiase nyinaa kae Yesu Kristo wu no. Wɔfrɛ saa afahyɛ no Awurade Anwummeduan anaa Kristo wu Nkaedi. (1 Kor. 11:20, 23, 24) Yehowa nkurɔfo bu Nkaedi no sɛ ɛno ne nhyiam titiriw paa wɔ afe no mu; nhyiam foforo biara nni hɔ a ɛkyɛn no. Yesu ankasa kaa sɛ yɛnkae ne wu no.—Luka 22:19.

²⁹ Wohwɛ Bible mu a, wubehu sɛ Nkaedi da no ne da a na wodi Twam afahyɛ no hyia. (Ex. 12:2, 6; Mat. 26:17, 20, 26) Ná Israelfo di Twam afahyɛ no afe biara de kae bere a Yehowa gyee wɔn fii Egypt afe 1513 A.Y.B. no. Saa bere no, Yehowa hyɛe sɛ edu bosome a edi kan no da a ɛto so 14 a, wonkum Twam guammaa no na wɔnwe, na womfi Egypt nkoasom mu. (Ex. 12:1-51) Ɛnde, na wɔyɛ dɛn hu bere a ɛsɛ sɛ wodi Twam no? Sɛ ɔsram foforo pue Yerusalem wɔ March ne April ntam hɔ a, na wɔakan nnafua 13; ɛda a ebesi no ne Twam da no. Yɛreka a, sɛ ɔsram no nyinaa pue anaa etwa puruw wɔ March ne April ntam hɔ a, saa da no ne Nkaedi no.

³⁰ Yesu ankasa akyerɛ sɛnea yɛnkae ne wu no wɔ Mateo 26:26-28. Ɛnyɛ afahyɛ a wɔyɛ nyankomade anaa asumanne wɔ ase, mmom ɛyɛ adidi a wɔn a wɔne Yesu Kristo bedi ade wɔ ne soro Ahenni mu no nya mu kyɛfa. (Luka 22:28-30) Weinom da nkyɛn a, Kristofo a wɔahyira wɔn ho so nyinaa ne wɔn a wɔkyerɛ asɛm no ho anigye nyinaa, yɛhyɛ wɔn nso nkuran sɛ wɔnkɔ Awurade Anwummeduan no ase. Yɛkɔ de kyerɛ sɛ yɛn ani sɔ nhyehyɛe a Yehowa Nyankopɔn nam ne Ba Yesu Kristo so ayɛ ama adesamma nyinaa no. Ansa na yɛbɛyɛ Nkaedi no, wɔma baguam kasa titiriw bi de hyɛ nkurɔfo nkuran ma wɔba Nkaedi no ase. Afei nso, wɔma ɔkasa no de kanyan nkurɔfo ma wosua Bible.

³¹ Bere nyinaa Yehowa Adansefo de anigye hwɛ yɛn nhyiam ahorow kwan; ɛhɔ na yenya kwan ‘susuw yɛn ho yɛn ho ho, kanyan yɛn ho yɛn ho kɔ ɔdɔ ne nnwuma pa mu.’ (Heb. 10:24) Akoa nokwafo ne ɔbadwemma no de n’ani to fam hwɛ nea yehia wɔ Onyankopɔn som mu na wayɛ nhyiam ahorow ho nhyehyɛe. Sɛ yɛahyira yɛn ho so ama Yehowa dedaw oo, sɛ afei na yɛresua ade oo, wɔhyɛ yɛn nyinaa nkuran sɛ yɛmmɔ mmɔden sɛ yɛbɛkɔ saa nhyiam ahorow yi nyinaa bi daa. Sɛ yɛda no adi sɛ yɛn ani sɔ nea Yehowa nam n’ahyehyɛde no so asiesie ama yɛn no a, ɛbɛma yɛde baakoyɛ asom no. Nea ɛsen ne nyinaa no, ɛyɛ hokwan a yɛde kamfo Yehowa na yɛhyɛ no anuonyam.—Dw. 111:1.