Adwuma a Asafo Mu Asomfo Yɛ No Som Bo Paa

KRATAA a ɔsomafo Paulo kyerɛw kɔmaa asafo a na ɛwɔ Filipi no, ɔkaa wom sɛ: “Paulo ne Timoteo, Kristo Yesu nkoa, de kɔma akronkronfo a wɔwɔ Kristo Yesu mu a wɔwɔ Filipi nyinaa, ne ahwɛfo ne asafo mu asomfo.” (Filip. 1:1) Sɛ wohyɛɛ no nsow a, wubehu sɛ okyiaa asafo mu asomfo nso. Wei kyerɛ sɛ mmarima yi yɛɛ adwuma titiriw bi de boaa mpanyimfo a na wɔwɔ asafo no mu saa bere no. Saa ara na ɛte nnɛ. Asafo mu asomfo yɛ nnwuma pii de boa ahwɛfo no, na ɛma nneɛma kɔ so wɔanowɔano wɔ asafo no mu.

² Asafo mu asomfo a wɔwɔ w’asafo mu no, wunim wɔn anaa? Nnwuma pa a wɔyɛ de boa wo ne asafo mũ no nyinaa no, wuhu? Yehowa ani sɔ mmɔden a saa mmarima no bɔ no paa. Paulo kyerɛwee sɛ: “[Mmarima] a wɔsom yiye no renya gyinabea pa, na wotumi de ahotoso kasa wɔ gyidi mu, Kristo Yesu mu.”—1 Tim. 3:13.

KYERƐWNSƐM A WOGYINA SO PAW ASAFO MU ASOMFO

³ Ɛsɛ sɛ asafo mu asomfo ma obiara hu sɛ wɔyɛ Kristofo a wɔbɔ bra pa, wɔtoto wɔn nneɛma yiye, na wɔma wɔn ani kũ wɔn nnwuma ho. Sɛ yesusuw nsɛm a Paulo kyerɛw kɔmaa Timoteo no ho a, yehu saa nokwasɛm yi. Ɔkyerɛɛ nea ɛma obi fata sɛ asafo mu somfo. Ɔkaa sɛ: “Saa ara na asafo mu asomfo nso ani so nna hɔ, wɔnnyɛ ano nta, wɔmmfa wɔn ho nnhyɛ asanom bebree mu, wɔnnyɛ adifudepɛfo apoobɔfo, na wɔmfa ahonim a emu tew nkura gyidi no ho ahintasɛm kronkron no mu. Afei nso, ɛsɛ sɛ wɔsɔ eyinom hwɛ sɛ wɔfata ansa, na sɛ asɛm biara nni wɔn ho a, wɔama wɔasom. Ma asafo mu ɔsomfo nyɛ okunu a ne yere yɛ biako, a odi ne mma ne n’ankasa fie so sɛnea ɛsɛ.” (1 Tim. 3:8-10, 12) Sɛ asafo mu asomfo de nea Kyerɛwnsɛm ka fa wɔn ho no bɔ wɔn bra a, ɛbɔ asafo no ho ban ma enti obiara ntumi mmɔ asafo no sobo sɛ mmarima a wɔmfata na wɔde asɛyɛde a emu yɛ duru ahyɛ wɔn nsa.

⁴ Sɛ asafo mu somfo yɛ aberante oo, n’ani afi oo, ɛsɛ sɛ ɔyɛ obi a ɔkɔ asɛnka bosome biara. Asafo mu asomfo de nsi yɛ asɛnka adwuma no de suasua Yesu. Wɔnam saa kwan yi so suasua Yehowa a ɔpɛ sɛ ogye adesamma nkwa no.—Yes. 9:7.

⁵ Mmarima a wɔsom sɛ asafo mu asomfo no yɛ nhwɛso pa wɔ wɔn ntadehyɛ, ahosiesie, kasa, suban, ne abrabɔ mu. Wɔn adwenem da hɔ na ɛma afoforo bu wɔn. Afei wɔma wɔn ani kũ abusuabɔ a ɛda wɔne Yehowa ntam no ho, na ɔsom hokwan a wɔwɔ wɔ asafo no mu nso, wɔmfa nni agorɔ koraa.—Tito 2:2, 6-8.

⁶ Asafo mu asomfo yɛ mmarima a ‘wɔasɔ wɔn ahwɛ sɛ wɔfata.’ Ansa na wɔrepaw wɔn mpo no, wɔdaa wɔn ho adi sɛ nnipa a wɔahyira wɔn nkwa so ama Yehowa. Wɔama ada adi sɛ wɔde Ahenni nneɛma di kan wɔ wɔn asetena mu, na ɔsom hokwan biara a wobenya no, wobeso mu yiye. Anokwa, wotwa sa pa ma afoforo a wɔwɔ asafo no mu.—1 Tim. 3:10.

SƐNEA WƆSOM

⁷ Asafo mu asomfo yɛ nnwuma a mfaso wɔ so de boa wɔn nuanom. Wei ma mpanyimfo no nya bere pii de yɛ ɔkyerɛkyerɛ ne nguanhwɛ adwuma no. Sɛ mpanyimfo no de dwumadi ahorow rehyɛ asomfo yi nsa a, wosusuw asafo no ahiade ne nea asomfo no mu biara betumi ayɛ ho.

⁸ Susuw nnwuma a wɔyɛ no bi ho hwɛ: Wobetumi ama asafo mu somfo bi ahwɛ asafo nhoma so sɛnea ɛbɛyɛ a yɛn nsa bɛka nhoma a yebesua ne nea yɛde bɛkɔ asɛnka. Wɔma afoforo nso hwɛ asafo no sikasɛm anaa asasesin kyerɛwtohɔ so. Mpanyimfo no ma asomfo binom hwɛ akasam ne mfiri ahorow so, na wɔma ebinom nso yɛ atɛndant a wɔgye ahɔho ma wɔn baabi tena. Wɔyɛ nneɛma afoforo pii nso de boa mpanyimfo no. Nnwuma pii wɔ hɔ a ɛsɛ sɛ wɔyɛ de siesie Ahenni Asa no na wɔma ɛhɔ tew, enti wɔtaa ma asafo mu asomfo boa ma wɔhwɛ di ho dwuma.

⁹ Asafo ahorow bi mu no, asomfo no dɔɔso, enti ebia wɔde nnwuma yi bi bɛhyɛ wɔn mu biara nsa. Baabi nso wɔ hɔ a, esiane sɛ asomfo no nnɔɔso nti, wobetumi de nnwuma pii ahyɛ ɔsomfo baako nsa. Ɛtɔ da nso a, ebehia sɛ asafo mu asomfo mmienu anaa nea ɛboro saa hwɛ adwuma baako so. Sɛ nnwuma yi boro asomfo no so a, mpanyimfo kuw no betumi ama anuanom mmarima a wɔabɔ asu a wɔyɛ nhwɛso pa aboa. Wei bɛma wɔanya osuahu na sɛ akyiri yi wɔfata sɛ wɔsom sɛ asafo mu asomfo a, aboa wɔn. Sɛ anuanom mmarima nni hɔ, na onuawa bi a ɔyɛ nhwɛso pa wɔ hɔ a, wobetumi ama waboa ayɛ nnwuma yi bi, nanso wɔrempaw no sɛ asafo mu somfo. Yɛka obi a ɔyɛ nhwɛso pa a, ɔno ne obi a afoforo betumi ahwɛ ne som ne n’abrabɔ asuasua. Ɛsɛ sɛ ɔyɛ obi a ɔmfa n’adesuakɔ ne n’asɛnka nni agorɔ. Sɛ ɛba n’abusua asetena, nneɛma a ɔde gyigye n’ani, ne ntadehyɛ, n’ahosiesie, ne nea ɛkeka ho a, asɛm biara nni ho, na afoforo betumi ahwɛ asuasua.

¹⁰ Asafo bi wɔ hɔ a, emu mpanyimfo nnɔɔso. Enti sɛ ɔdawurubɔfo bi pɛ sɛ ɔbɔ asu a, mpanyimfo no betumi ama asafo mu somfo a ne ho akokwaw ne no asusuw asubɔ nsɛmmisa a ɛfa nea yegye di ho no. Nea yɛreka yi wɔ Nkekaho afã a wɔato din “Ɔfã 1: Nea Kristofo Gye Di.” Nanso, “Ɔfã 2: Kristofo Abrabɔ” no de, ɛfa onii a ɔpɛ sɛ ɔbɔ asu no asetenam nsɛm ho tẽẽ, enti ɛbɛyɛ papa sɛ asafo mu panyin di ɛno ho dwuma.

¹¹ Sɛ mpanyimfo no hu sɛ eye sɛ wɔsesa adwuma a ɛhyehyɛ asafo mu asomfo no bi nsa a, wɔyɛ saa. Nanso, sɛ wɔde adwuma bi hyɛ wɔn nsa na wɔma wɔyɛ kyɛ a, mfaso wɔ so paa efisɛ ɛbɛma wɔn nsa atɔ so na wɔayɛ no yiye.

¹² Asafo mu mpanyimfo betumi ahwɛ sɛnea nneɛma te wɔ wɔn asafo mu na wɔde nnwuma bi ahyɛ asafo mu asomfo a wɔn “nkɔso ada adi nnipa nyinaa anim” no nsa. (1 Tim. 4:15) Sɛ asafo mu mpanyimfo nnɔɔso a, wobetumi ama ɔsomfo bi asom sɛ kuw sohwɛfo boafo, anaasɛ kuw somfo, na wayɛ adwuma wɔ mpanyimfo no akwankyerɛ ase. Wobetumi nso ama asafo mu asomfo ayɛ Abrabɔ ne Asɛnka Adesua dwumadi ahorow no bi. Sɛ ɛho hia a, wobetumi ama wɔahwɛ Asafo Bible Adesua so na wɔama baguam ɔkasa. Sɛ asafo no hia mmoa pɔtee bi na sɛ asafo mu asomfo fata sɛ wodi ho dwuma a, asafo mu mpanyimfo no betumi de hokwan no ama wɔn. (1 Pet. 4:10) Asafo mu asomfo reboa mpanyimfo no a, ɛsɛ sɛ woyi wɔn yam.

¹³ Ɛwom, ɛsono asomfo adwuma na ɛsono mpanyimfo adwuma, nanso ne nyinaa ka ɔsom kronn a yɛde ma Onyankopɔn no ho, na ɛho hia na ama nneɛma akɔ so pɛpɛɛpɛ wɔ asafo no mu. Sɛ asafo mu asomfo yɛ adwuma a wɔde ahyɛ wɔn nsa no yiye na wɔfata sɛ wɔsom sɛ nguanhwɛfo ne akyerɛkyerɛfo a, wobetumi akamfo wɔn akyerɛ ma wɔasom sɛ asafo mu mpanyimfo.

¹⁴ Sɛ woyɛ aberante a woabɔ asu anaa ɔbarima a w’ani afi a wobɔɔ asu nkyɛe a, worebɔ wo ho mmɔden sɛ wobɛfata sɛ asafo mu somfo? (1 Tim. 3:1) Afe biara nnipa pii ba nokware no mu, enti yehia mmarima a wɔfata ma wɔadi nneɛma anim wɔ asafo no mu. Wopɛ sɛ wofata ma adwuma a ɛte saa a, ɛnde sua sɛ wobɛboa afoforo. Ɔkwan baako a wubetumi afa so ayɛ saa ne sɛ wubedwinnwen nhwɛso pa a Yesu yɛe no ho. (Mat. 20:28; Yoh. 4:6, 7; 13:4, 5) Sɛ woyɛ nneɛma ma afoforo a, ɛbɛma w’ani agye, na ɛbɛkanyan wo ama woayɛ pii. (Aso. 20:35) Enti tu wo ho ma na yɛ nneɛma boa afoforo. Boa ma yensiesie Ahenni Asa so, anaa siesie wo ho na sɛ obi ammɛyɛ asuafo dwumadi a wɔde hyɛɛ ne nsa wɔ Abrabɔ ne Asɛnka Adesua no mu a, woasi n’ananmu ayɛ. Sɛ wopɛ ɔsom hokwan a, ɛsɛ sɛ woyɛ nhyehyɛe pa sua ade nso, na woatumi ada Kristofo su ahorow adi. (Dw. 1:1, 2; Gal. 5:22, 23) Bio nso, sɛ onua bi pɛ sɛ ɔsom sɛ asafo mu somfo a, ɛnde sɛ wɔma no dwumadi wɔ asafo no mu a, ɛsɛ sɛ ɔyɛ. Ɛno bɛkyerɛ sɛ ɔyɛ ɔnokwafo na asafo no betumi de wɔn ho ato no so.—1 Kor. 4:2.

¹⁵ Honhom kronkron na ɛma wɔpaw asafo mu asomfo ma wɔboa asafo no. Sɛ obiara a ɔwɔ asafo no mu boa ma asomfo no yɛ nnwuma a wɔde ahyɛ wɔn nsa no yiye a, ɛbɛkyerɛ sɛ wɔn ani sɔ adwumaden a wɔyɛ no. Ɛbɛkyerɛ nso sɛ, nhyehyɛe pa a Yehowa ayɛ sɛnea ɛbɛyɛ a biribiara bɛkɔ so pɛpɛɛpɛ wɔ asafo no mu no, wɔn ani sɔ.—Gal. 6:10.