Numeri Nhoma Hyɛ Nkuran Sɛ, Nya Obu Ma Yehowa

YEHOWA NYANKOPƆN fata obu a efi koma nyinaa mu a n’asomfo de bɛma no. Ɛsɛ sɛ wotie no na wɔde nokwaredi ne n’asomfo a wapaw wɔn bom di dwuma. Hwɛ sɛnea wosi eyi so dua yiye wɔ Numeri nhoma a ɛwɔ Bible mu no mu!

Nhoma no din gyina Israel man no mufo a wɔkan wɔn dodow mpɛn abien a wɔakyerɛw ato hɔ wɔ ti 1 kosi 4 ne 26 no so. Mose na ɔkyerɛw Numeri nhoma no wɔ Moab sare no so, wɔ 1473 A.Y.B mu, na ɛka mfe 38 ne asram 9 mu nsɛm, efi 1512 A.Y.B.​—Numeri 1:1; Deuteronomium 1:3.

Numeri kyerɛwtohɔ a wɔakyɛ mu abiɛsa no yɛ nsɛm a esisii wɔ Bepɔw Sinai ho (1:1-10:10) , nea esisii akyiri yi wɔ sare no so (10:11-21:35) ne nea esisii wɔ Moab sare no so (22:1-36:13) . Nanso dɛn na saa nsɛm a esisii yi betumi akyerɛ yɛn? So nnyinasosɛm ahorow bi wɔ Numeri nhoma no mu a ɛho betumi aba Yehowa Adansefo mfaso nnɛ?

Emu Nsɛm Hyɛ Obu Ma Onyankopɔn Ho Nkuran

Ná Israelfo akogyina Bepɔw Sinai ase bɛyɛ afe bere a Yehowa hyɛ Mose sɛ ɔnkan wɔn dodow. Lewifo no akyi no, wɔkan mmarima a wɔadi efi mfe 20 rekɔ, na wɔn dodow yɛ 603,550. Mmakan no ananmu no, Onyankopɔn fa Lewifo no ma ntamadan no mu dwumadi. Wɔde akwankyerɛ ma wɔ aprententu no ho, a na ɛsɛ sɛ Yuda, a ɛne abusua a emufo dɔɔso, no di anim. Bere a Onyankopɔn hyɛe no, afei wɔkan Lewifo no de dwumadi kronkron hyehyɛɛ wɔn nsa.​—Numeri 1:1-4:49.

Yehowa ahyɛde a ɛfa tebea horow a sɛ obi kɔ mu a ɛsɛ sɛ ofi asafo no mu kɔ ban no akyi no akyi no, ɔde mmara horow a ɛfa ɔyere nokwaredi ne Nasirifo bɔhyɛ ahorow ho mae. Afei wɔde ntamadan mu dwumadi ho nsɛm ahorow bi ma. Bere a wɔresi ntamadan no, ne bere a wɔrehyira afɔremuka no so no, mmusua horow mu abirɛmpɔn de nneɛma a ɛsom bo mae. Sɛnea wɔdaa no adi wɔ anisoadehu bi a Yehowa de mae mu no, Mose ma wɔyɛɛ kaneadua. Bere a wɔsosɔɔ akanea a a esisi so no na Lewifo no hohoroo wɔn ho no, na wobetumi afi ase asom.​—Numeri 5:1-8:26.

Wotii Twam afahyɛ ho akwankyerɛ horow no mu. Omununkum bi a ɛyɛ nwonwa a na ɛwɔ ntamadan no atifi no kyerɛ bere a ɛsɛ sɛ wɔtra faako ne bere a ɛsɛ sɛ wotu. Ɛdenam “[Yehowa] anom asɛm so” na ɔman no gyina anaasɛ wotu. Dwetɛ torobɛnto abien so na wɔnam frɛɛ ɔman no boaa ano, na wɔde dii atirimpɔw afoforo ho dwuma nso.​—Numeri 9:1-10:10.

Wofii Misraim no akyi afe a etia abien no ɔsram a etia abien no da a ɛto so 20 no, omununkum a ɛwɔ ntamadan no atifi no fii ase maa ne ho so, na Israelfo tui. Anwiinwii bi a ɛmfata ba. Biako ne ɛnam a wosu hwehwɛ, nanso adifudepɛ da ne ho adi bere a Yehowa ma wɔn mmoko no. Miriam ne Aaron nwiinwii tia wɔn nuabarima Mose, na sɛ asotwe no, kwata ba Miriam so bere tiaa bi. Hwɛ sɛnea ɛsɛ sɛ eyi ka yɛn ma yɛkyerɛ obu ma tumidi a Onyankopɔn de ma!​—Numeri 10:11-12:16.

Wɔsoma akwansrafo dumien kɔ Bɔhyɛ Asase no so, na nnafua 40 akyi no wɔde nnuaba a ɛyɛ dɛ san ba. Nanso akwansrafo no mu du ka akɛse a asase no sofo yɛ ne wɔn nkurow a wɔatoto afasu atwa ho ho asɛm araa ma Israelfo a wɔn abasam atu no pɛ sɛ wɔsan kɔ Misraim. Akwansrafo anokwafo Yosua ne Kaleb “hyɛ wɔn nkuran sɛ wɔnkyerɛ Yehowa mu gyidi, nanso enkosi baabiara. Bere a nkurɔfo no ka sɛ wobesiw Mose, Aaron ne Kaleb abo no, Onyankopɔn ka sɛ ɔbɛdwerɛw ɔman no nyinaa ayi wɔn afi hɔ. Nanso Mose srɛ ma wɔn na Yehowa hyɛ sɛ ɔman no bɛnantenantew sare no so mfe 40, kosi sɛ wɔn a wɔadi efi mfe 20 rekɔ nyinaa bewuwu. Ná wɔn a eyi renka wɔn nkutoo ne Yosua, Kaleb ne Lewi abusua no. Nea edi hɔ no, Israelfo bɔ mmɔden sɛ wɔbɛkɔ akɔfa Bɔhyɛ Asase no, na wodi nkogu a ɛyɛ awerɛhow.​—Numeri 13:1-14:45.

Wɔde mmara ahorow a ɛfa ayeyɛdema, Homeda sobu ne ntade ano nnwow ahorow a na ɛsɛ sɛ wɔde di dwuma ho ma afei. Kora, Datan ne Abiram, On ne mmapɔmma 250 kasa tia Mose ne Aaron. Dɛn na animtiaabu kɛse yi de bae? Yehowa de ogya sɛe Kora ne 250 a wɔka ne ho no, na ɔtɔre atuatewfo a aka no ase bere a asase mu pae na ɛmene wɔn ne wɔn abusuafo ne wɔn ho nneɛma no. N’adekyee no Israelfo nwiinwii hyɛ Mose ne Aaron, na esiane saa animtiaabu yi nti Yehowa sɛe wɔn mu 14,700. Sɛnea ɛbɛyɛ na anwiinwii no to atwa na ada adi sɛ ɔno na ɔpaw Aaron abusua a efi Lewi mu no, Onyankopɔn ma Aaron poma gu nhwiren. Afei ahyɛde horow a ɛfa asɔfo ne Lewifo no dwumadi ahorow ne ɔman no ahodwira ho dii akyi.​—Numeri 15:1-19:22.

Wɔ Kades no wosu hwehwɛ nsu. Esiane sɛ Mose ne Aaron nhyɛ Yehowa anuonyam sɛ ɔnam anwonwa kwan so de mae nti, ɔka kyerɛ wɔn sɛ wɔrenkɔ Bɔhyɛ Asase no so. Wofi Kades no ɔman no bedu Bepɔw Hor ho, faako a Aaron wu na wɔyɛ ne ba Eleasar ɔsɔfo panyin no. Afei Israelfo di Arad hene so nkonim. Akyiri yi, wɔkasa tia Onyankopɔn ne Mose, na saa bere yi Onyankopɔn ma awɔ bɔne ba wɔn so sɛ asotwe. Wɔn a awɔ no keka wɔn no, bere a wɔama wɔn ti so ahwɛ kɔbere wɔ a Onyankopɔn ma Mose yɛ de sɛn dua so no akyi nkutoo na wonya nkwa. Ɛno akyi no Israel di Amorifo hene Sihon ne Basan hene Og so nkonim, fa wɔn nsase.​—Numeri 20:1-21:35.

Afei wɔka nsɛm a esisii wɔ Moab sare no so kyerɛ. Moab hene Balak bɔ Bileam paa sɛ ɔnnome Israelfo, nanso mprɛnsa no ohyira wɔn mmom. Bileam yɛ ma mmea a wɔsom Baal no twetwe Israelfo kɔ ahohwibɔ ne ahonisom mu. Yehowa sɛe nnebɔneyɛfo 24,000 ansa na Pinehas ma ɔhaw ba awiei denam Israelni barima ne Mideani bea aguamammɔfo bi a okum wɔn no so.​—Numeri 22:1-25:18; 31:15, 16.

Bere a wɔasan akan nnipa no bio na wɔayɛ mmabea adedi ahorow ho nhwɛso no, Mose gyina baabi hwɛ Bɔhyɛ Asase no na ɔpaw Yosua sɛ n’adedifo. Wɔde da biara, dapɛn biara, ɔsram biara ne afe biara ayɛyɛdema ne bɔhyɛ ahorow ho akwankyerɛ ma. Afei wotua Mideanfo ka wɔ bɔne a wɔmaa Israel yɛ tiaa Onyankopɔn no ho.​—Numeri 26:1-31:54.

Wɔmaa Reuben, Gad ne Manase mmusua no asase wɔ Yordan apueifam, nanso na ɛsɛ sɛ wɔboa ma wodi asase a ɛda asubɔnten no atɔefam no so nkonim. Nea edi hɔ no, wɔyɛ mmeae horow a Israel bɔɔ nsra, efi Misraim besi Moab sare no so no ho kyerɛwtohɔ. Afei Israelfo no nsa ka ahyɛde horow a ɛfa Bɔhyɛ Asase no so asetra ho. Nea ɛka nneɛma afoforo ho no, na ɛsɛ sɛ wɔsɛe atoro som ho biribiara a ɛwɔ asase no so no na wotu ɛsotefo no fi so. Wɔkyerɛ asase no ahye ahorow, wɔpaw abirɛmpɔn na wɔaboa Yosua ne Eleasar ma wɔakyekyɛ, na woyi nkurow 48 ma Lewifo no. Wɔde guankɔbea nkurow asia si hɔ na wɔde akwankyerɛ ma wɔ sɛnea ɛsɛ sɛ wodi obi a obekum onipa mpofirim a wanhyɛ da ho dwuma no ho. Awiei koraa no, wɔde mmea adedifo aware ho mmara horow ma.​—Numeri 32:1-34:13.

Bere a wokenkan Numeri no, ebia wubehu sɛnea esi obu a yebenya ama Yehowa ne wɔn a wapaw wɔn de dwumadi ahyehyɛ wɔn nsa wɔ ne nkurɔfo mu no so dua. Nanso ebia w’adwene mu bɛyɛ wo nãa wɔ nsɛm bi ho. Enti ebia w’ani begye nsemmisa ahorow ne mmuae a edidi so yi ho.

Nea Esisii Wɔ Bepɔw Sinai Ho

• 5:11-31​—Dɛn na ɛbaa ɔyere a ɔsɛee aware no so ankasa?

Nsu no ankasa amfa ɔhaw bi amma no so. Na mmom ɔnom no Yehowa a na onim sɛ ebia ɔbea no asɛe aware anaa ɛnte saa no anim. Sɛ ná wasɛe aware a, ɔbɛma ne yafunu ahono, na n’asrɛ anaasɛ n’asen atotɔ mu. Ɛda adi sɛ wɔde n’asrɛ anaasɛ n’asen no dii dwuma de gyinaa hɔ maa n’awode. (Fa toto Genesis 46:26 ho.) Sɛ ‘ɛbɛtotɔ mu’ no kyerɛ sɛ saa nkwaa yi bewu, a ɛremma ontumi nnyinsɛn. Eyi ne nokwasɛm no behyia sɛ, sɛ ɔbea no nni fɔ a, ɛsɛ sɛ ne kunu ma onyinsɛn.

• 8:25, 26​—So mmara a ɛfa mfe dodow a sɛ Lewini di a ɛsɛ sɛ ofi ɔsom adwuma no mu ho nnyinasosɛm no fa Yehowa nkurɔfo ho nnɛ anaa?

Mmarima a wofi Lewi mmusua atitiriw abiɛsa no mu a wɔfata nyinaa boaa asɔfo no. Bere bi akyi no na Lewifo no bɛdɔɔso, nanso na ɔsom adwuma hokwan ahorow a ɛwɔ asɔrefi hɔ no sua. Enti, akyinnye biara nni ho sɛ, esiane mfe dodow a onii adi ho a wosusuw ne sɛnea ɛbɛyɛ na nnipa no annɔɔso dodo wɔ dwumadi a ɛtete sɛɛ mu nti, Yehowa hyɛe sɛ Lewini barima a wadi mfe 50 no ɛsɛ sɛ ofi ɔsom adwuma a wɔyɛ no daa no mu, ɛwom sɛ obetumi afi ne pɛ mu aboa de. Nanso, eyi nhyɛ mmara biara mma honhom mu Israelfo ne wɔn nnamfonom efisɛ wonni Mmara no ase. (Romafo 6:14; Efesofo 2:11-16) Sɛ mpanyinyɛ ma obi mmɔdenbɔ kɔ fam a ontumi nni asɛyɛde pɔtee bi ho dwuma a, wobetumi de adwuma foforo a obetumi ayɛ no yiye ahyɛ ne nsa. Yehowa Adansefo fam de gyae a obi gyae Ahenni ho asɛmpaka adwuma no esiane mfe a wadi biara nni hɔ.

Mmae Horow A Wokyinikyinii

• 12:1​—Dɛn nti na Miriam ne Aaron kasa tiaa Mose esiane ne yere Kusni no nti?

Ná ɛnyɛ pɛ ara kwa a wɔmpɛ Mose yere no ntia. Na ɛyɛ tumi kɛse a wɔpɛ ntia, titiriw wɔ Miriam fam. Ná Mose yere Sipora atu kwan bere tenten bi, nanso na wasan abɛka ne ho, na Miriam suroe sɛ ɔbɛba abegye ne dibea sɛ ɔbea a odi kan wɔ nsra no mu. (Exodus 18:1-5) Enti onyaa Aaron ma ɔkaa ne ho wɔ kasa a wɔkasa tiaa Mose sɛ waware Kusni bea no ho ne sɔre a wɔsɔre tiaa ne dibea soronko wɔ Onyankopɔn anim no mu. Esiane eyi nti, Yehowa kaa Miriam ne Aaron anim, nanso esiane sɛ Miriam nkutoo na kwata baa no so nti no kyerɛ sɛ ɔno na ofii ase. Aaron suban pa no daa adi denam ne bɔne a ɔka kyerɛe na ɔsrɛ maa Miriam a kwata ayɛ no no so. (Numeri 12:10-13) Sipora de, na ɔyɛ Midiani Reuel babea. (Genesis 25:1, 2; Numeri 10:29) Wɔ Habakuk 3:7 no wɔka “Midian asase” no ho asɛm sɛ Kusan, a ɛkyerɛ sɛ na ɛyɛ din foforo a wɔde frɛ Midian, anaasɛ ɛyɛ ɔman foforo a ɛbɛn hɔ ara. Nanso, na wɔfrɛ Arab mmusua horow bi Kusi anaa Kushim. Enti ɛda adi sɛ na “Kusfo” nyɛ Ham asefo a wɔnam Kus so nkutoo, na mmom na wɔfrɛ Midian asase no sofo binom nso saa. Ná wobetumi afrɛ Sipora Kusni.

• 21:14, 15​—Ná dɛn ne “[Yehowa] akodi nhoma” no?

Akyinnye biara nni ho sɛ na eyi yɛ Yehowa nkurɔfo akodi ho abakɔsɛm kyerɛwtohɔ a ɛyɛ nokware. Ebetumi aba sɛ ahene baanan a wɔfaa Lot ne ne fifo dommum a Abraham dii wɔn so nkonim no na wɔde fii ase. (Genesis 14:1-16) Kyerɛwnsɛm no ka nkyerɛwee ahorow a emfi honhom mu ho asɛm, a Bible akyerɛwfo a honhom kaa wɔn no de ebinom mu nsɛm dii dwuma.​—Yosua 10:12, 13; 1 Ahene 11:41; 14:19, 29.

Moab Sare No So

• 22:20-22​—​—Esiane sɛ Yehowa ka kyerɛɛ Bileam sɛ ɔne Balak mmarima no nkɔ nti, dɛn nti na Ne bo fuwii bere a odiyifo no ne wɔn kɔe?

Yehowa ka kyerɛɛ Bileam sɛ ɔrentumi nnome Israelfo no, nanso odiyifo odifudepɛfo no ne wɔn kɔe a na n’adwene ne sɛ ɔbɛyɛ saa na ne nsa aka akatua afi Moab hene Balak nkyɛn. (2 Petro 2:15, 16; Yuda 11) Ne saa nti Onyankopɔn bo fuw Bileam. Ampa, Yehowa ampene nnome biara a ɛbɛba Israel so so. Nanso, Bileam, te sɛ Kain no, pirim ne koma, na obuu Yehowa apɛde animtiaa. (Genesis 4:6-8) Bere a Yehowa maa nnome a ɔpɛe sɛ ɔde ba no mu biara dan nhyira no, Bileam adifudepɛ no kaa no ma ɔhyɛɛ Balak nyansa sɛ ɔmfa Moab ne Midian mmea nni dwuma mfa nnaadaa Israelfo no ntwetwe wɔn nkɔ Baal som mu. (Deuteronomium 23:5; Numeri 31:15, 16; Adiyisɛm 2:14) Eyi de Onyankopɔn abufuw baa Israel so na ɛmaa wɔn mu 24,000 wuwui. Akyiri yi odifudepɛfo Bileam wui wɔ wɔn a ɔpɛe sɛ ɔdome wɔn no nsam. (Numeri 25:1-9; 31:8) Adifudepɛ ho kɔkɔbɔ bɛn ni!

• 25:10-13​—Ɔkwan bɛn so na bɔhyɛ a ɛfa asɔfodi ho no nyaa mmamu?

Ɛkame ayɛ sɛ ɔsɔfo panyin dibea no kɔɔ so traa Pinehas asefo mu kosii sɛ Ɔsɔfo Panyin Eli, a na ɔyɛ Itamar aseni, no bae. Ebetumi aba sɛ wɔyɛɛ saa nsakrae yi esiane fata a Pinehas abusua no amfata wɔ bere tiaa bi mu nti. Nanso, ɔhene Salomo de ɔsɔfo panyin Sadok a ɔyɛ Pinehas aseni sii Itamar aseni Abiatar ananmu. (1 Ahene 1:1-14; 2:26, 27, 35) Sɛnea abakɔsɛm kyerɛwtohɔ kyerɛ no, ɛda adi sɛ ɔsɔfo panyin dibea no kɔɔ so traa Pinehas asefo mu mfe pii wɔ eyi akyi.

• 30:6-8​—So Kristoni bea kunu betumi atwa ɔbea no bɔhyɛ ahorow mu anaa?

Dabi, efisɛ Yesu akyidifo nni Mmara no ase. Yehowa ne nnipa nkorɛnkorɛ di wɔ bɔhyɛ ahorow ho, na wɔmmaa okunu Kristoni kwan sɛ ontwa mu. Nanso ɛnsɛ sɛ ɔyere Kristoni hyehyɛ bɔ ahorow a ɛne Onyankopɔn Asɛm anaa ne Kyerɛwsɛm mu asɛyɛde ahorow wɔ ne kunu ho bɔ abira.​—Ɔsɛnkafo 5:2-6.

Ɛsom Bo Kɛse Ma Yɛn

Wɔde nsɛm bi a ɛsom bo a ɛfa Onyankopɔn Ahenni a na wɔde besi hɔ ho ma wɔ Numeri nhoma no mu. Ɛde adwene kɔ Yesu Kristo so nso. Sɛ nhwɛso no, emu afɔre horow ne dwuma a wɔde nantwi kɔkɔɔ nsõ dii no de adwene kɔɔ nsiesiei kɛse a wɔnam so tew nnipa ho denam Yesu afɔrebɔ no so no so. (Numeri 19:2-9; Hebrifo 9:13, 14) Ɔwɔ a wɔde kɔbere yɛe no yɛɛ nsiesiei kɛse a Yehowa nam Kristo so ye maa daa nkwa no ho mfonini.​—Numeri 21:8, 9; Yohane 3:14, 15.

Numeri nhoma no betumi aboa yɛn ma yɛatwe yɛn ho afi ahonisom ne aguamammɔ ho. Ɛma yehu asiane a ɛwɔ anwiinwii a etia Onyankopɔn, ne nkurɔfo a wapaw wɔn ne nsiesiei horow mu no. Na nokwarem no, saa kyerɛwtohɔ a ɛyɛ anigye yi ka yɛn ma yɛkyerɛ obu ma Yehowa yɛn Nyankopɔn a ɔwɔ ɔdɔ no.

[Kratafa 28 mfonini]

Ɛsɛ sɛ asotwe a ɛbaa Miriam so no ka yɛn adwene wɔ tumi a Onyankopɔn de ama ho dɛn?