TI 35
Mepɛ Sɛ Meyɛ Onyankopɔn Adamfo—Dɛn Na Menyɛ?
Asɛm bi too Jeremy, na ɛma ohui sɛ, sɛ Onyankopɔn yɛ w’adamfo a eye paa. Ɔkaa sɛ: “Bere a midii mfe 12 no, me papa guan gyaw yɛn abusua. Anadwo bi a merebɛda no, mebɔɔ mpae ka kyerɛɛ Yehowa sɛ ɔmma me papa nsan mmra fie.”
Ná Jeremy werɛ ahow paa, enti ofii ase kenkan ne Bible. Ogu so rekenkan no ara na okopuee Dwom 10:14. Asɛm a ɛwɔ hɔ no wuraa ne mu paa. Ɛhɔ ka Yehowa ho asɛm sɛ: “Wo na agyanka mmɔborɔni de ne ho to wo so. Ne boafo ne wo.” Jeremy kaa sɛ: “Mihui sɛ Yehowa ne me rekasa, na na ɔreka akyerɛ me sɛ ɔbɛboa me, na ɔyɛ me Papa. Papa sei deɛ, hena na ɔmpɛ?”
NEA ɛtoo Jeremy no, sɛ ebi ato wo oo, sɛ ebi ntoo wo oo, Bible ka sɛ Yehowa pɛ sɛ woyɛ n’adamfo. Nea ɛwom ne sɛ, Bible se: “Mommɛn Onyankopɔn na ɔbɛbɛn mo.” (Yakobo 4:8) Wo deɛ dwen asɛm no ho hwɛ. Ɛwom sɛ wunhu Yehowa Nyankopɔn, na yɛreka nso a, ɛnyɛ wo tipɛn koraa ne no, nanso ose ɔpɛ sɛ woyɛ n’adamfo!
Nanso sɛ wubetumi afa Onyankopɔn adamfo a, ehia sɛ woyɛ ho adwuma. Wo deɛ fa no sɛ woadua biribi. Wunim sɛ ɛnyɛ sɛ wuduae ara na anyin. Sɛ ebenyin yiye a, gye sɛ wode si baabi pa na wode nsu gugu so da biara. Saa ara na Onyankopɔn adamfofa te. Ɛdɛn na woyɛ a ɛbɛma wo ne Onyankopɔn adamfofa no anyin anaa atim?
Ehia Sɛ Wusua Ade
Nnamfo deɛ, baako rekasa a, na baako ayɛ dinn retie no, n’ano si a na baako nso aka bi. Saa na yɛne Nyankopɔn adamfofa nso te. Sɛ yɛkenkan Bible na yesua a, ɛkyerɛ sɛ yɛretie nea Onyankopɔn pɛ sɛ ɔka kyerɛ yɛn.—Dwom 1:2, 3.
Ɛwom, ebia na w’ani nhyɛ da nnye adesua ho. Mmerante ne mmabaa pii wɔ hɔ a, wobesua ade deɛ, anka wɔbɛhwɛ TV, wobedi agorɔ, anaa wɔne wɔn nnamfo bɛkɔ akokyin. Nanso sɛ wopɛ sɛ wo ne Onyankopɔn fa adamfo a, gye sɛ woyɛ ho adwuma. Ɛsɛ sɛ wutie no. Na sɛ wubetumi atie no nso a, gye sɛ wusua n’Asɛm.
Nanso mma wo yam nnhyehye wo. Bible a wubesua no, ɛnyɛ den saa. Sɛ wonyɛ obi a wopɛ adesua mpo a, w’ani betumi agye ho. Ade a ɛsɛ sɛ wudi kan yɛ ne sɛ wobɛhyɛ da apɛ bere a wode besua Bible. Abaayewa bi a yɛfrɛ no Lais kaa sɛ: “Mewɔ bere a mede sua Bible. Anɔpa biara mesɔre fi kɛtɛ so a, mekan Bible no ti baako ansa na mɛyɛ biribi a mayɛ.” Maria adi mfe 15. Ɔno deɛ, ɛsono sɛnea ɔyɛ ne de. Ɔkaa sɛ: “Anadwo biara, mekan Bible kakra ansa na mada.”
Sɛ wopɛ sɛ wuhu sɛnea wo ara nso wubesua Bible a, hwɛ adaka a wɔato din “hwehwɛ wo Bible mu na hu nea ɛwom.” Wuwie a, kyerɛw bere a wubenya simma 30 bi de asua Onyankopɔn Asɛm no wɔ ase ha.
․․․․․
Wuhu bere a wode bɛkan Bible no a, ɛno deɛ ɛyɛ ahyɛase kwa. Sɛ wohyɛ ase sɛ woresua a, ebia wubehu sɛ ɛnyɛ da biara na Bible akenkan yɛ mmerɛw. Nea Jezreel a wadi mfe 11 kae yi, ebia wo ne no bɛyɛ adwene. Ɔkaa no pen sɛ, “Bible no baabi yɛ den, na ɛnyɛ anika nso.” Sɛ ɛyɛ wo saa a, mpa abaw. Bere biara a wobɛkenkan Bible no, fa yɛ w’adwene sɛ ɛyɛ bere a wode retie w’adamfo Yehowa Nyankopɔn. Ɛbɛyɛ kakra no, wubehu sɛ Bible sua yɛ dɛ na mfaso wɔ so; nanso ne nyinaa gyina wo so!
Ehia Sɛ Wobɔ Mpae
Mpae ne kwan a yɛfa so ka yɛn asɛm kyerɛ Nyankopɔn. Mpaebɔ yɛ akyɛde a ɛyɛ nwonwa paa! Awia oo, anadwo oo, wubetumi ne Yehowa Nyankopɔn akasa bere biara a wopɛ. Wayɛ krado bere nyinaa sɛ obetie wo. Na nea ɔpɛ paa ne sɛ wobɛka w’asɛm akyerɛ no. Ɛno nti Bible tu yɛ fo sɛ: “Momfa mpaebɔ ne nkotɔsrɛ ne aseda so mfa mo adesrɛ nto Onyankopɔn anim ade nyinaa mu.”—Filipifo 4:6.
Bible mu asɛm yi ma yehu sɛ nneɛma pii na wubetumi aka ho asɛm akyerɛ Yehowa. Ebi betumi ayɛ wo haw ne w’adwennwene. Ebi nso betumi ayɛ nneɛma a Nyankopɔn ayɛ ama wo. Sɛ wo nnamfo yɛ biribi ma wo a, sɛ ɛyɛ a woda wɔn ase? Yehowa ayɛ nneɛma bebree ama wo sen w’adamfo biara, enti ɛsɛ sɛ woda no ase.—Dwom 106:1.
Kyerɛw nneɛma a Yehowa ayɛ ama wo no bi wɔ ase ha.
․․․․․
Ɛwom ara a, ehu ne adwennwene betumi ahyɛ wo so. Dwom 55:22 ka sɛ: “Dan w’adesoa to Yehowa so, na obeso wo mu. Ɔremma ɔtreneeni nhinhim da.”
Biribiara a ɛhaw wo a wopɛ sɛ wobɔ ho mpae no, kyerɛw wɔ ase ha.
․․․․․
Nea Ɛkɔ So Wɔ W’abrabɔ Mu
Biribi foforo wɔ hɔ a ɛno nso betumi aboa wo ama woabɛyɛ Onyankopɔn adamfo, na ɛnsɛ sɛ woma wo werɛ fi saa ade no. Odwontofo Dawid kyerɛw: “Monka nhwɛ na munhu sɛ Yehowa ye.” (Dwom 34:8) Biribi a ɛyɛ hu too Dawid, na ankyɛ koraa na ɔhyehyɛɛ Dwom 34 no. Ná Dawid reguan sɛnea ɛbɛyɛ a Ɔhene Saul wudifo no rennya no nkum no. Ná ɛnna fam mma Dawid koraa. Nanso anso hɔ ara. Baabi a oguan kɔe no, na Filistifo na ɛwɔ hɔ. Ná Filistifo no yɛ Dawid atamfo. Dawid hui sɛ, nea adu no deɛ, wawu awie, enti ɔyɛɛ ne ho sɛ ɔbɔdamfo, na onyaa ne ti didii mu.—1 Samuel 21:10-15.
Dawid anka sɛ ne nyansa na ɛma otumi nyaa ne ho tetewee. Mmom ɔkaa sɛ Yehowa na ɔboaa no. Ansa na odwontofo Dawid reka asɛm a ɛwɔ Dwom 34:8 no, na wadi kan akyerɛw sɛ: “Mede abisade too Yehowa anim, na obuaa me, na ogyee me, m’ahude nyinaa mu.” (Dwom 34:4) Nea Dawid ankasa faa mu wɔ n’abrabɔ mu nti, otumi ka kyerɛɛ nkurɔfo sɛ “monka nhwɛ na munhu sɛ Yehowa ye.”a
Wo deɛ kaakae wo tirim hwɛ sɛ biribi asi wɔ w’abrabɔ mu a ɛma wuhu sɛ Yehowa dwen wo ho anaa. Sɛ wokae biribi saa a, kyerɛw wɔ ase ha. Wei bɛboa wo ama woahu nea wobɛkyerɛw: Nea wopɛ sɛ wokyerɛw no, enhia sɛ ɛyɛ nneɛma akɛse a Yehowa ayɛ ama wo. Ɛyɛ a dwen ho hwɛ nhyira nketenkete a da biara yenya wɔ yɛn abrabɔ mu a anhwɛ a yebebu yɛn ani agu so.
․․․․․
Ebia wo maame ne wo papa ne wo asua Bible. Sɛ ɛte saa a, ɛnde ɛyɛ nhyira. Nanso ɛsɛ sɛ wo ankasa nso, wo ne Onyankopɔn fa adamfo. Sɛ wo ne Nyankopɔn nnya mfaa adamfo a, nsɛm a yɛaka yi betumi aboa wo ama woafi ase ne no afa adamfo. Biribiara a wobɛyɛ a ɛbɛma woatumi ne Yehowa afa adamfo no, obehyira so. Bible se: “Monkɔ so mmisa, na wɔde bɛma mo; monkɔ so nhwehwɛ, na mubehu.”—Mateo 7:7.
KENKAN WEI HO NSƐM PII WƆ PO 1, TI 38 NE TI 39
Ɛyɛ den ma wo sɛ wobɛka Onyankopɔn ho asɛm akyerɛ nkurɔfo anaa? Hwɛ nea ebetumi aboa wo ama woakyerɛkyerɛ wo gyidi mu.
[Ase hɔ asɛm]
a Bible binom kyerɛ asɛm, “monka nhwɛ na munhu” no ase sɛ, “wo ankasa hwɛ,” “wo ara hwehwɛ mu hwɛ,” ne “wosɔ hwɛ a, wubehu.”—Contemporary English Version, Today’s English Version, ne The Bible in Basic English.
KYERƐWNSƐM TITIRIW
“Anigye ne wɔn a wonim wɔn honhom mu ahiade.”—Mateo 5:3.
WEI BƐBOA WO
Wo deɛ, kan Bible nkratafa nnan pɛ da biara, na ebedi bɛyɛ afe no, na woakan Bible no nyinaa awie.
SO WUNIM . . . ?
Nhoma yi a worekan ne Bible afotu a ɛwom a wode reyɛ adwuma no kyerɛ sɛ wo ho hia Yehowa.—Yohane 6:44.
NEA MEPƐ SƐ MEYƐ NI!
Mepɛ sɛ misua Bible ma ɛboa me paa. Enti nea mɛyɛ ne sɛ, ․․․․․
Mepɛ sɛ mitumi bɔ mpae daa. Enti nea mɛyɛ ne sɛ, ․․․․․
Mepɛ sɛ mema me maame anaa me papa kyerɛkyerɛ me saa asɛm yi mu ․․․․․
WUDWEN HO SƐN?
● Wobɛyɛ dɛn ama Bible a wusua no ayɛ wo dɛ?
● Yehowa pɛ sɛ otie nnipa a bɔne wɔ yɛn ho no mpaebɔ. Adɛn ntia?
● Ɛbɛyɛ dɛn na matumi abɔ mpae yiye?
[Asɛm a wɔafa aka]
“Bere a na misua no, merebɔ mpae a, asɛnkoro no ara na na meka. Seesei deɛ, sɛ merebɔ mpae a, mebɔ mmɔden ka papa ne bɔne a ɛkɔɔ so saa da no. Ɛda biara ne emu nsɛm, enti minya biribi foforo bɔ ho mpae da biara.’’—Eve
[Adaka/Mfoni]
Hwehwɛ Wo Bible Mu Na Hu Nea Ɛwom
1. Pɛ Bible mu asɛm bi a wopɛ sɛ wokan. Bɔ mpae srɛ nyansa a wode bɛte nea worebɛkan no ase.
2. Kenkan asɛm no yiye. To wo bo ase kenkan Bible mu asɛm no. Sɛ worekan a, twa ho mfoni wɔ w’adwene mu, na fa no sɛ: Wuhu nea ɛrekɔ so wɔ hɔ, wote nkurɔfo a ɛwɔ hɔ no nne, wote hua a ɛwɔ hɔ no, na wote aduan a ɛwɔ hɔ no dɛ, ne nea ɛkeka ho. Fa no sɛ na wugyina hɔ bi na weinom nyinaa rekɔ so!
3. Wokan wie a, dwinnwen ho. Bisa wo ho nsɛm bi te sɛ nea edidi so yi:
● Adɛn nti na Yehowa de asɛm yi baa Bible mu?
● Henanom na ɛsɛ sɛ misuasua wɔn, na henanom na ɛnsɛ sɛ misuasua nea wɔyɛe no?
● Nea makan yi, ɛdɛn na ɛwom a metumi de abɔ me bra?
● Ɛdɛn na asɛm yi kyerɛ me wɔ Yehowa ho ne ɔkwan a ɔfa so yɛ ne nneɛma?
4. Bɔ Yehowa mpae tiaa. Nea wusua fii Bible mu no, ka kyerɛ no, na ka sɛnea wopɛ sɛ wode yɛ adwuma wɔ w’abrabɔ mu no nso kyerɛ no. Ɛyɛ a da Yehowa ase daa sɛ ɔde n’Asɛm Bible a ɛyɛ kronkron no akyɛ wo!
[Mfoni]
“W’asɛm yɛ me nan ase kanea, ne me kwan so hann.”—Dwom 119:105.
[Adaka/Mfoni]
Yɛ Nea Ehia Ansa Na Woayɛ Nea Ɛfata
Wunni adagyew a wode bɔ mpae? Wunni bere a wode sua Bible? Nneɛma a ehia wo no na ɛbɛkyerɛ.
Sɔ wei hwɛ: Fa bokiti na fa abo akɛse bebree gu mu. Wuwie a, fa anwea gu mu ma ɛnyɛ ma. Seesei wowɔ bokiti a abo ne anwea ayɛ no ma.
Afei, hwie abo ne anwea no fi bokiti no mu; ntow ngu. San fa abo ne anwea no gu bokiti no mu bio. Nanso saa bere yi deɛ, di kan fa anwea no gu mu ansa na wode abo no agu mu. Abo no nyinaa ankɔ mu, meboa? Anwea no a wudii kan de guu bokiti no mu no ntia.
Yɛreka akosi sɛn? Bible se: ‘Mompɛɛpɛɛ mu nhu nneɛma a ehia paa no.’ (Filipifo 1:10) Sɛ wode nneɛma nketenkete bi te sɛ nneɛma a wode gyigye w’ani di kan wɔ w’abrabɔ mu a, ɛbɛyɛ wo sɛ wunni adagyew a wode bɛyɛ nneɛma akɛse no, kyerɛ sɛ, nneɛma a ɛfa Onyankopɔn som ho. Nanso sɛ wode afotu a ɛwɔ Filipifo 1:10 no yɛ adwuma a, wubehu sɛ woanya bere a wode bɛyɛ nneɛma a ɛfa Onyankopɔn som ho, ɛne bere a wode begye w’ani kakra. Ne nyinaa ne nea wubedi kan de agu wo bokiti mu!
[Mfoni]
Yɛne Onyankopɔn adamfofa te sɛ biribi a yɛadua. Sɛ ebetumi anyin a, gye sɛ yɛhwɛ no yiye