Nhoma a Yɛde Bɛma Wɔ Asasesin a Wɔka Kasa Pii Wom Mu

1. Dɛn nti na asafo ahorow pii hia nhoma a ɛwɔ aman foforo so kasa mu?

¹ Wɔ mmeae pii no, asasesin no abɛyɛ baabi a nnipa a wofi nsase foforo so abɛtra hɔ. Eyinom mu pii sua nokware no ntɛmntɛm na wɔte ase yiye bere a wɔde wɔn ankasa kasa kyerɛkyerɛ wɔn no. Nhyehyɛe ahorow bɛn na wɔayɛ a wɔde bɛma anigyefo anya nhoma ahorow a egyina Bible so a ɛwɔ kasa a wɔte no yiye mu?

2. Biakoyɛ bɛn na ehia bere a asafo abien anaa nea ɛboro saa a ɛsono kasa a wɔka yɛ asasesin biako mu adwuma no?

² Bere a Wode Nhoma Bɛma: Sɛ asafo ahorow abien anaa nea ɛboro saa a ɛsono kasa a wɔka yɛ asasesin biako mu adwuma a, mpanyimfo akuw no bɛfa ɔsom adwuma so ahwɛfo no so ayɛ nhyehyɛe a wɔn nyinaa gye tom na ama wɔadi nnipa a wɔka kasa biara no adanse fefeefe. Sɛ adawurubɔfo reka asɛm wɔ afie afie a, wɔntaa mfa nhoma a ɛwɔ kasa a asafo afoforo ka mu mma. Nanso, sɛ adawurubɔfo no di adanse bɔnnɔ so anaa wɔ mmeae a ɔmanfo hyia a, wobetumi de kasa a ɛhɔfo ka no mu nhoma ama.—Hwɛ November 1990 Yɛn Ahenni Som mu Asɛmmisa Afã hɔ.

3. Bere bɛn na asafo bi bɛkra ɔman foforo kasa mu nhoma agu hɔ?

³ Bere a Ɛsɛ sɛ Wonya Nhoma Gu Hɔ: Sɛ nnipa a wɔdɔɔso a wɔka ɔman foforo so kasa te beae bi nanso asafo biara nka saa kasa pɔtee no a, dɛn na wobetumi ayɛ? Wɔ saa tebea no mu no, asafo ahorow no betumi akra saa kasa no mu nhoma, te sɛ nkratawa, Ahwehwɛde ne Onyankopɔn Adamfo nhomawa no ne Nimdeɛ nhoma no kakra. Adawurubɔfo betumi de nhoma yi ama bere biara a wohyia nkurɔfo a wobetumi akenkan saa kasa no.

4. Ɔkwan bɛn so na wobetumi anya nhoma a ɛwɔ kasa a asafo no nkra mu nhoma no?

⁴ Sɛnea Wɔkra Nhoma: Sɛ asafo no nkra nhoma a ɛwɔ kasa a onigyeni bi kenkan mu a, ɔkwan bɛn so na wobetumi anya saa kasa no mu nhoma? Ɛsɛ sɛ ɔdawurubɔfo no kohu nhoma sohwɛfo no na ama wahu nhoma ahorow a ɛwɔ saa kasa no mu na wakra nneɛma a ohia no aka asafo no nhoma a edi hɔ a wɔbɛkra no ho.

5. Dɛn ne yɛn botae wɔ ma a yɛbɛma afoforo nsa aka yɛn Kristofo nhoma ahorow no bi no mu?

⁵ Ɛmmra sɛ yɛde Kristofo nhoma ahorow bedi dwuma yiye de aboa “nnipa ahorow nyinaa” a wɔn kasa a wɔka no mfa ho, na ‘wɔanya nokware nimdeɛ na ama wɔagye wɔn nkwa.’—1 Tim. 2:3, 4.

Nea Yɛbɛka Afa Nsɛmma Nhoma Ho

Ɔwɛn-Aban July 15

“Nnipa pii ahu su a nnipa dodow no renya sɛ wɔbɛtew wɔn ho afi afoforo ho no. So wususuw sɛ eyi yɛ ade a nyansa wom? [Twɛn ma ommua.] Hyɛ nyansasɛm a wɔka fa mfaso a ɛwɔ ayɔnkofa so ho no nsow. [Kenkan Ɔsɛnkafo 4:9, 10.] Nsɛmma nhoma yi ka nea enti a yɛn nyinaa hia afoforo ne sɛnea wobetumi adi tew a nkurɔfo tew wɔn ho ho haw no ho dwuma no ho asɛm.”

Nyan! Aug. 8

“Nnipa pii haw wɔ bu a nguamansɛm abu so no ho. So wususuw sɛ eyi yɛ biribi a ɛsɛ sɛ ɛhaw yɛn? [Twɛn ma ommua.] Afotu a mfaso wɔ so a ɛwɔ Bible mu no betumi abɔ yɛn ho ban. [Kenkan Efesofo 5:3, 4.] Nsɛmma nhoma yi kyerɛ sɛnea yebetumi abɔ yɛn ho ban afi asiane a ɛyɛ hu yi ho.”

Ɔwɛn-Aban Aug. 1

“So wunim sɛ sɛnea amanneɛbɔ bi kyerɛ no, sika a wiase nnipa mu bɛboro fã de hwɛ wɔn ho da biara no nnu dɔla 2? So wususuw sɛ yebetumi ayɛ biribi de adi eyi ho dwuma? [Twɛn ma ommua.] Saa Ɔwɛn-Aban yi twe adwene si ohia ano aduru koraa a wɔada no adi wɔ Bible mu no so.”—Kenkan Dwom 72:12, 13, 16.

Nyan! Aug. 8

“Nnansa yi, asiane a wim tebea de ba asɛe ade kɛse wɔ wiase nyinaa. Wususuw sɛ dɛn na wobetumi ayɛ de abrɛ amanehunu a eyi de ba no ase? [Twɛn ma ommua.] Nsɛmma nhoma yi pɛɛpɛɛ ɔhaw a wim tebea mu nsakrae de ba ne ano aduru a wɔada no adi wɔ Bible mu no mu.”—Kenkan Yesaia 35:1.