Asɛnka Boa ma Yenya Boasetɔ

¹ Onyankopɔn Asɛm tu yɛn fo sɛ “yɛmfa boasetɔ ntu mmirika a ɛda yɛn anim no.” (Heb. 12:1) Sɛnea mmirikatufo hia boasetɔ na watumi adi akansi mu nkonim no, saa ara na yɛn nso yehia boasetɔ na yɛatumi anya daa nkwa abotiri no. (Heb. 10:36) Ɔkwan bɛn so na Kristofo som adwuma no betumi aboa yɛn ma yɛde nokwaredi agyinam akodu awiei?—Mat. 24:13.

² Honhom mu Denhyɛ: Sɛ yɛkɔ so bɔ wiase foforo a Bible hyɛ ho bɔ no dawuru a, yɛn anidaso no mu kɔ so yɛ den. (1 Tes. 5:8) Sɛ yɛkɔ asɛnka daa a, ɛma yenya hokwan ka nokware a yɛasua afi Bible mu no kyerɛ afoforo. Yɛsan nya kwan kyerɛkyerɛ yɛn gyidi mu, na ɛno nso hyɛ yɛn den honhom mu.

³ Ehia sɛ yɛte Bible mu nokwasɛm no ase paa na yɛatumi akyerɛkyerɛ nkurɔfo yiye. Ɛsɛ sɛ yɛyɛ nsɛm no mu nhwehwɛmu na yɛdwennwen ho. Yɛbɔ ho mmɔden saa a, ɛma yɛn nimdeɛ mu dɔ, ɛhyɛ yɛn gyidi den, na yenya ahoɔden wɔ honhom mu. (Mmeb. 2:3-5) Enti bere a yɛreboa afoforo no, na yɛrehyɛ yɛn ho den.—1 Tim. 4:15, 16.

⁴ “Onyankopɔn akode nyinaa” a yɛde ko tia Ɔbonsam ne n’adaemone no fã titiriw ne ɔsom adwuma a yɛde nsi yɛ no. (Efe. 6:10-13, 15) Yɛyere yɛn ho wɔ ɔsom adwuma no mu a, ɛma yɛde yɛn adwene si nneɛma pa so na yɛkwati Satan wiase mu nnebɔne no. (Kol. 3:2) Bere a yɛrekyerɛ nkurɔfo Yehowa akwan no, ɛkae yɛn bere nyinaa sɛ ehia sɛ yɛn nso yɛbɔ bra pa.—1 Pet. 2:12.

⁵ Onyankopɔn na Ɔhyɛ Yɛn Den: Nea etwa to ne sɛ, asɛmpaka adwuma a yɛyɛ no ma yɛde yɛn ho to Yehowa so. (2 Kor. 4:1, 7) Eyi yɛ nhyira ampa! Yenya saa ahotoso yi a, ɛboa yɛn ma yegyina tebea biara a ɛbɛto yɛn no ano na yewie yɛn som adwuma no. (Filip. 4:11-13) Nokwarem no, Yehowa a yɛde yɛn ho bɛto ne so no na ɛbɛma yɛanya boasetɔ. (Dw. 55:22) Asɛnka adwuma a yɛyɛ no boa ma yetumi gyina pintinn wɔ akwan horow so.

Ɔfã 10—Bible Adesua a Etu Mpɔn a Yɛbɛyɛ

Tete Asuafo Wɔ Afie Afie Asɛnka Adwuma Mu

¹ Sɛ mpanyimfo no gye tom sɛ Bible suani bi afata sɛ ɔdawurubɔfo a ɔmmɔɔ asu a, obetumi afi ase aka anuanom ho ne wɔn akɔ asɛnka. (Hwɛ Nhyehyɛe a Wɔayɛ Ma Yɛde Ayɛ Yehowa Apɛde, kr. 79-81.) Yɛbɛyɛ dɛn aboa osuani no ma watumi ayɛ afie afie asɛnka?

² Mommom Nsiesie Mo Ho: Ahosiesie pa a mobɛyɛ ho hia yiye. Ma osuani no nhu Yɛn Ahenni Som ne Reasoning nhoma no mu baabi a nsɛm a wɔde fi asɛnka ase no wɔ, na boa no ma ɔmpaw nea ɛyɛ tia a ɛfata ma mo asasesin no. Hyɛ no nkuran mfitiase no ara ma ɔmfa Bible no nni dwuma wɔ n’asɛnka mu.—2 Tim. 4:2.

³ Asɛm a wodi kan bobɔ so no boa ɔdawurubɔfo foforo paa. Bere a osuani no de nsɛm a ɔbɛka no yɛ ɔyɛkyerɛ no, ma onhu sɛnea ɔde anifere bedi nsɛm a nkurɔfo taa ka wɔ asasesin no mu no ho dwuma. (Kol. 4:6) Ma ɔnte ase sɛ yɛnhwɛ kwan sɛ Kristofo asomfo behu ofiewura bi nsɛmmisa nyinaa ho mmuae wɔ hɔ ara. Ɔkwan pa ne sɛ wɔbɛkɔ akɔyɛ nsɛmmisa a ɛtete saa ho nhwehwɛmu na wɔasan aba ne no abesusuw ho.—Mmeb. 15:28.

⁴ Mommom Nkɔ Asɛnka: Bere a edi kan a wo ne osuani no bɛkɔ asɛnka no, ma ɔnhwɛ sɛnea wobɛka asɛm a moabom asiesie no akyerɛ ofiewura no. Afei ma ɔno nso nka bi. Ebia ɛbɛyɛ papa sɛ woma ɔdawurubɔfo foforo no ka ɔfã bi nko ara, sɛ ebia ɔbɛkenkan kyerɛwsɛm biako akyerɛkyerɛ mu. Susuw sɛnea osuani no suban ne ne mmɔdemmɔ te ho. (Filip. 4:5) Bere a woretete no nkakrankakra wɔ asɛnka adwuma no afã horow mu no, kɔ so kamfo no yiye wɔ mmɔden a ɔbɔ no ho.

⁵ Ɛho hia sɛ woboa ɔdawurubɔfo foforo ma ɔyɛ ɔsom adwuma no ho bere nhyehyɛe pa a ɛbɛma watumi akɔ asɛnka ntoatoaso, sɛ ɛbɛyɛ yiye a, nnawɔtwe biara. (Filip. 3:16) Monyɛ nhyehyɛe pɔtee a mode bɛkɔ asɛnka abom, na hyɛ no nkuran ma ɔne anuanom afoforo a wɔyɛ nnam nso nyɛ ɔsom adwuma no. Bɔ a ɔne wɔn bɛbɔ ahu wɔn nhwɛso no bɛboa ma ne ho akokwaw na wanya afie afie asɛnka no mu anigye.