Tete Kɔkɔbɔ bi

Yehowa remma kwan mma nnebɔneyɛfo nsɛe Paradise no. Ne nnamfo nkutoo na wɔbɛtra hɔ. Dɛn na ɛbɛba nnebɔneyɛfo so? Ma yensusuw Noa asɛm a esii ankasa no ho na ama yɛanya mmuae no. Noa traa ase mfe mpempem pii a atwam ni. Ná ɔyɛ onipa pa a ɔbɔɔ mmɔden denneennen bere nyinaa sɛ ɔbɛyɛ Yehowa apɛde. Nanso nnipa foforo a na wɔwɔ asase so no yɛɛ nneɛma bɔne. Enti, Yehowa ka kyerɛɛ Noa sɛ Ɔde nsuyiri bɛba abɛsɛe saa nnebɔneyɛfo no nyinaa. Ɔka kyerɛɛ Noa sɛ ɔmpam adaka na sɛ Nsuyiri no ba a ɔne n’abusua anwu.—Genesis 6:9-18.

Noa ne n’abusua pam adaka no. Noa bɔɔ nkurɔfo kɔkɔ sɛ Nsuyiri no reba, nanso wɔantie no. Wɔkɔɔ so yɛɛ nneɛma bɔne. Bere a wɔpam adaka no wiei no, Noa de mmoa kɔɔ adaka no mu, na ɔne n’abusua nso kɔɔ mu. Afei Yehowa maa ahum kɛse bi tui. Osu tɔe nnafua 40 awia ne anadwo. Nsu no yiri faa asase so nyinaa.—Genesis 7:7-12.

Nnebɔneyɛfo no hweree wɔn nkwa, nanso wogyee Noa ne n’abusua nkwa. Yehowa koraa wɔn so wɔ Nsuyiri no mu na ɔde wɔn kɔɔ asase a wɔapopa nsɛmmɔnedi afi so so. (Genesis 7:22, 23) Bible ka sɛ bere bi bɛba bio a Yehowa bɛsɛe wɔn a wɔnyɛ nea ɛteɛ no. Wɔrensɛe nnipa pa. Wɔbɛtra ase daa wɔ Paradise asase so.—2 Petro 2:5, 6, 9.

Nnipa pii yɛ nneɛma bɔne nnɛ. Ɔhaw ahyɛ wiase ma. Yehowa soma N’adansefo mpɛn pii ma wɔkɔbɔ nkurɔfo kɔkɔ, nanso wɔn mu dodow no ara mpɛ sɛ wotie Yehowa asɛm. Wɔmpɛ sɛ wɔsakra wɔn akwan. Wɔmpɛ sɛ wogye nea Onyankopɔn ka fa nea ɛteɛ ne nea ɛnteɛ ho no tom. Dɛn na ɛbɛba nnipa yi so? So wɔbɛsakra da bi? Wɔn mu pii rensakra da. Bere no reba a wɔbɛsɛe nnebɔneyɛfo nyinaa na wɔrentra ase bio.—Dwom 92:7.

Wɔrensɛe asase; wɔbɛma adan paradise. Wɔn a wɔbɛyɛ Onyankopɔn nnamfo no bɛtra ase daa wɔ Paradise wɔ asase so.—Dwom 37:29.