ADESUA 11

Ma Wo Kasa Mu Nyɛ Hyew

Romafo 12:11

NSƐNTITIRIW: Ma wo kasa mu nyɛ hyew ma ɛnkanyan w’atiefo na empusuw wɔn.

Ma ɛnka wo koma. Sɛ woresiesie wo dwumadi no a, dwinnwen ho hwɛ mfaso a ɛwɔ asɛm a worekɔka no so. Sua wo dwumadi no yiye pa ara na ama woatumi afi wo komam akasa.
Dwen w’atiefo no ho. Asɛm a worekɔkenkan anaa worekɔkyerɛkyerɛ mu no, dwinnwen ho hwɛ sɛnea w’atiefo benya so mfaso. Hwehwɛ akwan horow a wobɛfa so ayɛ wo dwumadi no ama w’atiefo anya asɛm no ho anisɔ kɛse.
Ma wo kasa mu nyɛ hyew. Worekasa a ma anigye mmra mu. Sɛnea wode wo nipadua si nsɛm so dua ne sɛnea woyɛ w’anim no, ma emfi wo komam na atiefo nhu sɛnea wote nka.

Ɛnsɛ sɛ wofa ɔkwan koro no ara so de wo nipadua si nsɛm so dua na ankɔyɛ sɛ ɛyɛ biribi a aka wo hɔ. Sɛnea wode wo nipadua si nsɛm so dua no, ma ɛmfata asɛm a woreka no. Sɛ worekyerɛkyerɛ nsɛntitiriw mu anaa worekanyan w’atiefo ma wɔayɛ biribi a, saa bere no pa ara na ɛsɛ sɛ woma wo kasa mu yɛ hyew. Sɛ wode ɔhyew kasa ma ɛboro so wɔ wo kasa no nyinaa mu a, ebedu baabi no, na w’atiefo abrɛ.