ADESUA 13

Ma Asuade a Ɛwɔ Asɛm No Mu Nna Adi

Mmebusɛm 3:21

NSƐNTITIRIW: Boa w’atiefo ma wonhu sɛnea asɛm a woreka no fa wɔn asetena ho, na boa wɔn ma wonhu sɛnea wɔde nea wɔresua no bɛyɛ adwuma.

Dwen w’atiefo no ho. Dwinnwen nea enti a ɛho hia sɛ w’atiefo te asɛm a worekɔka no ho, na hwɛ sɛ asɛm no fã bɛn na ɛbɛboa wɔn pa ara.
Asɛm a woreka no nyinaa mu no, ma w’atiefo nhu nea ɛsɛ sɛ wɔyɛ. W’asɛm no mfiase pɛɛ no, ɛsɛ sɛ obiara a ɔretie wo no hu sɛ, ‘Asɛm yi de, ɛfa me ho.’ Worekyerɛkyerɛ asɛntitiriw biara mu a, ma atiefo nhu sɛnea wobetumi de asɛm no ayɛ adwuma. Mfa wo nsɛm no nwadawada; ka asuade pɔtee bi ho asɛm.

Sɛ worekyerɛ sɛnea w’atiefo de Bible mu nnyinasosɛm bi bɛyɛ adwuma a, yɛ no wɔ ɔkwan bi so a ɛbɛma wɔahu sɛ wudwen wɔn ho na wote wɔn ase. Sɛ́ anka wobɛma wɔabu wɔn ho fɔ no, hyɛ ɔdɔ ne gyidi a wɔwɔ no mu den, na nya ahotoso sɛ wɔn koma bɛkanyan wɔn ma wɔayɛ nea ɛteɛ.