TETE WƆ BI KA
Sɛnea Yɛboa Nnipa Wɔ Wiase Baabiara Ma Wɔhu Akenkan Ne Akyerɛw
Obi a wɔfrɛ no Agostinho a ɔte Brazil kaa sɛ: “Ná yɛwɔ afuw wɔ akuraa bi ase, na ɛhɔ na minyinii. Ná yedi hia buruburoo. Enti migyaee sukuu kɔyɛɛ adwuma de boaa yɛn abusua no.” Agostinho dii mfe 33 ansa na ɔresua akenkan ne akyerɛw. Ɔkaa sɛ: “Akenkan ne akyerɛw a misuae no boaa me ma minyaa ahotoso.”
Nnipa bɛboro 250,000 a mfe 70 ne akyi ni Yehowa Adansefo akyerɛ wɔn akenkan ne akyerɛw no, Agostinho ka ho. Adɛn nti na Yehowa Adansefo yɛ nhyehyɛe kyerɛ nkurɔfo akenkan ne akyerɛw? Ɔkwan bɛn so na nkurɔfo anya saa nhyehyɛe no so mfaso?
Wunnim Akenkan Ne Akyerɛw a Worentumi Nnya Nkɔanim
Eduu afe 1935 no, na Yehowa Adansefo aka asɛm no wɔ aman 115 so. Adansefo a wɔyɛ asɛmpatrɛwfo no, na wɔpɛ sɛ wɔka asɛm no bi kyerɛ nnipa a ɛsono wɔn kasa. Enti ɔman a wɔkɔɔ so no, Bible ho ɔkasa a wɔakyerɛ ase kɔ ɛhɔfo kasa mu a wɔakyere agu afiri so no, na wɔbɔ kyerɛ wɔn. Ɛtɔ da mpo a, na wɔtumi kyekyɛ nhoma ma ɔmanfo no wɔ wɔn kurom kasa mu. Ná nkurɔfo ani gye Bible ho paa, nanso na dodow no ara nnim akenkan ne akyerɛw, enti na wɔntumi nnya nkɔanim wɔ Bible no a wɔresua no mu.
Esiane sɛ na nkurɔfo ntumi nkenkan Bible nti, na ɛyɛ den sɛ wɔde Bible mu nsɛm bɛbɔ wɔn bra. (Yosua 1:8; Dwom 1:2, 3) Afei nso, asɛde a Onyankopɔn de ahyɛ Kristofo nsa nso, na ɛyɛ den ma wɔn sɛ wɔbɛyɛ. Ɛho nhwɛso ne sɛ, esiane sɛ awofo ntumi nkenkan nti, na ɛyɛ den ma wɔn sɛ wɔbɛkyerɛkyerɛ wɔn mma. (Deuteronomium 6:6, 7) Wɔn a wɔabɛyɛ Adansefo a wɔnnim akenkan nso, sɛ wɔpɛ sɛ wɔde Bible kyerɛkyerɛ nkurɔfo a, na ayɛ asɛm.
Wɔyɛɛ Nhyehyɛe De Kyerɛɛ Nkurɔfo Akenkan Ne Akyerɛw
Afe 1940 kosi afe 1950 mu hɔ baabi no, wɔn a na wɔdi Yehowa Adansefo anim no mu mmienu, Nathan H. Knorr ne Milton G. Henschel tutuu akwan kɔboa maa wɔyɛɛ asɛnka adwuma no ho ntotoe wɔ mmeaemmeae. Aman a emu nnipa pii nnim akenkan ne akyerɛw no, anuanom mmienu no ka kyerɛɛ Betel a ɛhwɛ adwuma no so wɔ hɔ no sɛ, wɔnyɛ akenkan ne akyerɛw adesua ho nhyehyɛe mma nsafo ahorow a ɛwɔ saa man no mu no.
Wɔayi nhoma bi adi wɔ nhyiam bi ase wɔ Chingola, Zambia, 1954. Ɛyɛ nhoma a yɛde sua akenkan wɔ Cinyanja kasa mu
Betel ahorow de akwankyerɛ kɔmaa nsafo a ɛhyɛ wɔn ase no na ama wɔahu ɔkwan a wɔbɛfa so akyerɛ akenkan ne akyerɛw no. Aman bi so mpo de, na aban no wɔ nhyehyɛe a wɔde kyerɛ akenkan ne akyerɛw, enti Adansefo no faa aban nhyehyɛe no so kyerɛɛ nkurɔfo akenkan ne akyerɛw. Brazil sei, aban no brɛɛ ɛhɔ Betel no nhoma ne nneɛma foforo a wɔde kyerɛ ade ma wɔde kɔmaa nsafo no. Aman foforo nso de, na ɛsɛ sɛ Adansefo no ankasa pɛ kwan a wɔbɛfa so akyerɛ akenkan ne akyerɛw.
Akenkan ne akyerɛw ho nhyehyɛe a wɔyɛe no, na mmea ne mmarima, mmofra ne mpanyin nyinaa tumi kɔ bi. Nea enti a wɔyɛɛ saa nhyehyɛe no ne sɛ, na wɔpɛ sɛ wɔboa wɔn a wɔresua ade no ma wɔtumi kenkan kasa a wɔde twaa wɔn funuma no. Ɛtɔ da a asafo baako mu no, na wɔtumi kyerɛ akenkan ne akyerɛw wɔ kasa dodow bi mu.
Nhyehyɛe a Ɛboa Nkurɔfo
Sɛn na akenkan ne akyerɛw nhyehyɛe yi aboa nkurɔfo? Ɔdansefo bi a ofi Mexico kaa sɛ: “Seesei mitumi te Bible ase yiye, na wei ma emu nsɛm no ka me koma. Akenkan a mahu no aboa me ama mitumi ka asɛm no a minsuro, na ama mitumi ka Bible mu asɛm kyerɛ nnipa bebree.”
Akenkan ne akyerɛw nhyehyɛe no aboa nkurɔfo ama wɔate Bible no ase, na asan aboa wɔn ama wɔtumi yɛ nneɛma pii. Isaac fi Burundi. Ɔkaa sɛ: “Akenkan ne akyerɛw a misuae no aboa me ama matumi asua sɛnea yesi dan. Seesei adwuma a meyɛ ne sɛ misisi adan, na merekasa yi, mehwɛ adwuma kɛse bi a esisi adan so.”
Afe 2014; wɔrekyerɛ nkurɔfo akenkan wɔ Chichewa kasa mu wɔ Ahenni Asa bi so wɔ Lilongwe, Malawi
Jesusa fi Peru. Bere a ofii ase suaa akenkan ne akyerɛw no, na wadi mfe 49. Ɔkaa sɛ: “Meyɛ ɔbea warefo, na sɛ merekodi gua a, ehia sɛ mihu nneɛma a merekɔtotɔ no ne ne bo, na sɛ mihu sɛ yɛakyerɛw abɔ ho a, matumi akan. Bere bi a atwam no, na wei yɛ den ma me. Nanso akenkan ne akyerɛw a masua nti, seesei sɛ merekodi gua abrɛ m’abusua a, minsuro koraa.”
Mmɔden a Yehowa Adansefo abɔ de aboa nnipa bebree ama wɔahu akenkan ne akyerɛw no, aban mpanyimfo a wɔwɔ aman ahorow so akamfo wɔn mfe pii. Ɛnnɛ, Yehowa Adansefo da so ara kyerɛ akenkan ne akyerɛw, na nhyehyɛe ne nneɛma a wɔde kyerɛ ade no, ɛwɔ mu ara a wɔsakra mu na ama atu mpɔn. Wɔasan nso ayɛ nhoma a wɔde boa nkurɔfo ma wɔsua akenkan, ne nea wɔde boa wɔn a wɔn nhomasua nkɔ anim, na wɔaprente nhoma ahorow yi bɛyɛ ɔpepem 224 wɔ kasa 720 mu.a
a Ɛho nhwɛso ne sɛ, nhoma a wɔato din Sua Akenkan ne Akyerɛw no, wɔayɛ no wɔ kasa 123 mu. Saa ara na wɔayɛ nhoma a wɔato din Tie Onyankopɔn no nso wɔ kasa 610 mu.