Onyankopɔn Nnamfo Yɛ Papa

Sɛ wowɔ adamfo a wopɛ n’asɛm na wubu no a, wobɔ mmɔden sɛ wobɛyɛ sɛ ɔno. Bible ka sɛ: “Yehowa ye na ɔteɛ.” (Dwom 25:8) Sɛ yɛbɛyɛ Onyankopɔn nnamfo a, ɛsɛ sɛ yɛyɛ papa ne nea ɛteɛ. Bible ka sɛ: “Munsuasua Onyankopɔn sɛ mma adɔfo, na monkɔ so nnantew ɔdɔ mu.” (Efesofo 5:1, 2) Akwan a wobɛfa so ayɛ saa no bi ni:

Boa afoforo. “Momma yɛnyɛ nnipa nyinaa yiye.”—Galatifo 6:10.

Yere wo ho yɛ adwuma. “Mma ɔkorɔmfo nnwia ade bio, na mmom ɔnyɛ adwumaden, mfa ne nsa nyɛ adwuma pa.”—Efesofo 4:28.

Ma wo ho ntew wɔ honam ne abrabɔ mu. “Momma yɛnhohoro yɛn ho mfi ɔhonam ne honhom mu fi nyinaa ho, na yɛn ahotew adi mũ Onyankopɔn suro mu.”—2 Korintofo 7:1.

Dɔ w’abusuafo na bu wɔn. “Mo mu biara nnɔ ne yere sɛ ne ho; na ɔyere de, onnya obu kɛse mma ne kunu. Mma, muntie mo awofo asɛm.”—Efesofo 5:33–6:1.

Dɔ afoforo. “Momma yɛnnodɔ yɛn ho, efisɛ ɔdɔ fi Onyankopɔn.”—1 Yohane 4:7.

Di ɔman mmara so. “Momma ɔkra biara mmrɛ ne ho ase nhyɛ [aban] ase . . . Momfa nea ɛsɛ obiara mma no, tow mma nea tow sɛ no.”—Romafo 13:1, 7.