Nkurɔfo Repɛ Mmuae

“Bere a yɛahu ‘sɛnea’ yɛbɛhwɛ yɛne yɛn mmusua, na yɛanya nneɛma pa a yɛanna anso ho dae da—mfiri a ɛma ɔdan mu dwo, mfiri pa a yɛde bɔ nnwom, ne kar papa bi—no, ɛma yesusuw ‘nea enti’ a yɛte ase ho. Dɛn nti na ɛsɛ sɛ yɛhaw yɛn ho saa? Dɛn na yebenya afi mu?”—David G. Myers, adwene ne nneyɛe ho ɔbenfo a ɔwɔ Hope College, Holland, Michigan, U.S.A.

WUBEYI nsɛm a ɔbenfo yi bisae no ano dɛn? Ebia ebinom besusuw sɛ ɛho nhia sɛ wɔhwehwɛ ho mmuae. Nanso sɛ woammɔ mmɔden ampɛ nsɛmmisa yi ho mmuae a, ɛbɛyɛ te sɛ nea abosea akɔhyɛ wo mpaboa mu no—wubetumi akɔ so anantew de, nanso wurennya ahotɔ.

Ɛnyɛ wo nko na ebia woabisa nea enti a yɛte ase. Adwumakuw bi a wɔyɛ nnipa abrabɔ mu nhwehwɛmu yɛɛ nhwehwɛmu bi, na wɔkyerɛ sɛ nnipa a wɔwɔ aman pii so resusuw “nea enti a yɛte ase” ho.

Sɛ wopɛ sɛ wunya asomdwoe ankasa a, ɛho hia sɛ wunya nsɛmmisa abiɛsa a ɛho hia ho mmuae.

Ɛyɛɛ dɛn na yɛbae?

Dɛn nti na yɛte ase?

Dɛn na ɛbɛba daakye?

Ɛhe na wubenya nsɛmmisa a ɛho hia yi ho mmuae a ɛyɛ nokware? Wo de, nhaw wo ho nkyerɛ w’adwene. Nkratafa a edidi so no bɛma ɛho mmuae a ɛwɔ Onyankopɔn Asɛm Bible mu. Yɛhyɛ wo nkuran sɛ bue wo Bible na w’ankasa hwɛ nea ɛka.