Dɛn Nti na Nkurɔfo Bɔ Mpae?

Wotaa bɔ mpae? Nnipa pii taa bɔ mpae; wɔn mu binom mpo nnye Onyankopɔn nni. Dɛn koraa na ɛma nkurɔfo bɔ mpae? Nhwehwɛmu bi a wɔyɛe wɔ France ma ɛbɛdaa adi sɛ, sɛ woyi Francefo baanu biara si hɔ a, wɔn mu biako de, ɛwom ara a, ɔbɔ mpae anaa ɔtena ase dwinnwen nneɛma ho na “ama ne ho atɔ no kɛkɛ.” Ɛno kyerɛ sɛ, ɛnyɛ Onyankopɔn nti na wɔbɔ mpae. Mmom no, wɔbɔ mpae sɛnea ɛbɛyɛ a “wɔn ho bɛsan wɔn.” Saa na Europefo bebree nso te nka. Gyidifo binom nso, gye sɛ wohia mmoa ansa na wɔakɔ Onyankopɔn anim. Wɔbɔ mpae nso a, na wɔregye ho mmuae denneennen.—Yesaia 26:16.

Wo nso ɛ? Wubu mpaebɔ sɛ ɛyɛ biribi a ɛboa wo ma wuyi w’adwene fi wo haw so kɛkɛ? Sɛ wugye Onyankopɔn di a, wuhu biribi a ɛkyerɛ sɛ otie wo mpaebɔ anaa? Anaasɛ ɛyɛ wo sɛ Onyankopɔn ntie wo mpaebɔ? Bible betumi aboa wo ama woahu sɛ mpaebɔ nyɛ biribi a yɛyɛ ma yɛn ho bae yɛn kɛkɛ, na mmom ɛboa yɛn paa ma yɛbɛn Onyankopɔn.