Genesi
29 Mumasure mazvo, Djakobo wakaenderera mberi no rhwendo rake uye wakaenda ku nyika ye anhu e Kumabvazuwa.* 2 Hino iyena wakaona cimbo mu shango uye no zvikwata zvitatu zve mabira zviri padhuze no cimbo icona, ngokuti pacimboco paiuya koopaswa* mvura zvipfuyo. Cimboco caifungwa no buwe rakakura. 3 Zvipfuyo zvese pazvaiunganidzwa ipona, aushi aibvisa buwe pa cimboco, uye aipasa mvura zvipfuyo; mumasure mazvo, aihwirinzazve buwero pa cimboco.
4 Djakobo wakaabvunzisa kuti: “Hama dzangu, muri kubva kupi?” Awona akamudaira kuti: “Tiri kubva ku Harani.” 5 Iyena wakaabvunzisa kuti: “Munomuziya Rabhani, muzukuru wa Naori?” Awona akamudaira kuti: “Tinomuziya.” 6 Ngokudaro, iyena wakaabvunzisazve kuti: “Iyena unotamba here?” Awona akamudaira kuti: “Unotamba. Uye mwana wake we mwanakadzi Rakeri, ndiye uwo uri kuuya no mabira!” 7 Hino iyena wakati kaari: “Aciri masikati. Ii ainguwapi ye kuunganidza zvipfuyo. Pasai mabira mvura, uye pedzepo hwiriraizve koausha.” 8 Nge ndaa yazvo, awona akati: “Atitenderhwi kuita izvona dakara zvikwata zvese zve zvipfuyo zvaunganidzwa pamwepo, tozobvisa buwe pa cimbo. Ndipona patinozopasa mvura mabira.”
9 Paainga aciri kureketa nawo, Rakeri wakaguma no mabira a baba ake, ngokuti iyena wainga ari muushi. 10 Djakobo paakaona Rakeri mwana wa Rabhani, hama ya mai ake, uye mabira a Rabhani, nokukasika iyena wakakhwedera, wobvisa buwe rainga riri pa cimbo, uye wakapasa mvura mabira a Rabhani, hama ya mai ake. 11 Hino Djakobo wakapsvoda Rakeri uye wakatanga kucema no izwi guru. 12 Djakobo wakabvunza Rakeri kuti iyena wainga ari nyaukama* wa baba ake uye mwana wa Rabheka. Rakeri wakagogoma koobvunza baba ake.
13 Rabhani paakazwa masoko ngezva Djakobo mwana wa yaya ake, wakagogoma koosongana naye. Iyena wakamukhumbatira, womupsvoda uye wakamutora woenda naye kumba kake. Uye Djakobo wakapanganidzira Rabhani zvese zvainga zvaitika kaari. 14 Rabhani wakati kaari: “Zvezvirokwazvo, isusu tiri e ngazi imweyo.”* Ngokudaro, Djakobo wakagara naye ke mwedzi wese.
15 Hino Rabhani wakati kuna Djakobo: “Audikani kundiseenzera nyore nge ndaa yekuti uri nyaukama* wangu. Ndibvunze, unoda kuti ndikutambirise marei?” 16 Rabhani wainga uno ana airi e anakadzi. Mukuru waizwi Reiya, uye mudoko waizwi Rakeri. 17 Reiya wainga ano madziso asikanyetukiri, asi Rakeri wainga ano ciimo cakanaka uye wakarungama maningi. 18 Djakobo wainga apfarira maningi Rakeri, zvekuti wakati: “Ndakagadzirira kumuseenzerai ke makore manomwe kuti mundipase Rakeri, mwana wenyu mudoko.” 19 Hino Rabhani wakati: “Zviri nani kandiri kuti ndipase iwewe pane kupasa mwanarume umweni. Rumbwa wecigara na inini.” 20 Djakobo wakaseenza ke makore manomwe kuti apaswe Rakeri, asi makore aya waiaona hingana mazuwa manganani, ngokuti waimuda maningi.
21 Pedzepo Djakobo wakati kuna Rabhani: “Ndipasei mukadzi wangu kuti ndiwate naye, ngokuti makore manomwe apera.” 22 Ngokudaro, Rabhani wakaunganidza anarume ese e mu mbuto iyona uye wakaita mabiko. 23 Asi cousiku, wakatora Reiya, mwana wake we mwanakadzi uye wakamupasa Djakobo kuti awate naye. 24 Uyewo Rabhani wakatora museenzikadzi wake Zirpa, wakamupasa Reiya, mwana wake we mwanakadzi kuti agare museenzikadzi wake. 25 Comacibesi, Djakobo wakaona kuti wainga ari Reiya! Hino iyena wakati kuna Rabhani: “Zvinyi zvamandiitira? Andizi kumuseenzerai kuti mundipase Rakeri here? Ngei mandicengedza?” 26 Rabhani wakadaira kuti: “Kuno, azvitenderhwi kuwakisa mwana we mwanakadzi mudoko dangwe risati rawakwa. 27 Pfara no mukadzi uu ke sumana ino yese. Mumasure mazvo ucatambirazve mukadzi umweni, asi ucadikanazve kundiseenzera makore manomwe.” 28 Djakobo wakaita izvona kamare uye wakapfara ke sumana yese no mukadzi uu, mumasure mazvo Rabhani wakazomupasa Rakeri, mwana wake we mwanakadzi, kuti agare mukadzi wake. 29 Uyewo, Rabhani wakatora museenzikadzi wake Bhira womupasa Rakeri, mwana wake we mwanakadzi kuti agare museenzikadzi wake.
30 Hino Djakobo wakawatawo na Rakeri; iyena waida maningi Rakeri kupinda Reiya, uye wakaseenzerazve Rabhani ke makore amweni manomwe. 31 Djehovha paakaona kuti Reiya wainga asikadiwi,* akaita kuti iyena abate pamwiri,* asi Rakeri wainga asikabari. 32 Ngokudaro, Reiya wakabata pamwiri uye wakabara mwana we mwanarume, wakamududza zina rokuti Rubheni,* ngokuti iyena wakati: “Izvi zvaitika ngokuti Djehovha aona kutambudzika kangu, ngokuti kubvira zvino mwamuna wangu ucatanga kundida.” 33 Iyena wakabatazve pamwiri uye wakabara mwana we mwanarume; iyena wakati: “Izvi zvaitika, ngokuti Djehovha andipurutana, sezvo inini ndainga ndisikadiwi; hino wandipasazve uu.” Ndiyo ndaa wakamududza zina rokuti Simiyoni.* 34 Uye iyena wakabatazve pamwiri uye wakabara mwana we mwanarume; iyena wakati: “Parizvino, mwamuna wangu ucabatana na inini, ngokuti ndamubarira ana atatu.” Ngokudaro, iyena wakamududza zina rokuti Revhi.* 35 Uye wakabatazve pamwiri uye wakabara mwana we mwanarume; iyena wakati: “Parizvino, ndicakudza Djehovha.” Ngokudaro, wakamududza zina rokuti Djudha.* Mumasure mazvo, iyena wakaima kubara.