Genesi
48 Mumasure me zviro izvi, Zuzee wakaziiswa kuti: “Baba ako ari kupera simba.” Nge ndaa yazvo, iyena wakaenda kooaona uye wakatora ana ake airi Manase na Efraimu. 2 Ngokudaro, Djakobo wakaziiswa kuti: “Mwana wenyu Zuzee wauya koomuonai.” Hino Israeri wakapeta masimba, ogara pa kama yake. 3 Djakobo wakabvunza Zuzee kuti:
“Mwari we Masimba Ese akadzipangidza kandiri ku Ruzi ku nyika yo Kanani uye akandikomborera. 4 Iyena akati kandiri: ‘Ndicakuita kuti ubare ana, ndicakuita kuti uwande, ndicakuita kuti ugare baba we madzinza, uye ndicapasa nyika ino ana* ako kuti igare nyika yawo nokusikaperi.’ 5 Parizvino, ana ako airi e anarume awakabara mu nyika yo Edjipitu ndisati ndauya mu nyika yo Edjipitu, nge angu. Efraimu na Manase acagara ana angu, hingana Rubheni na Simioni. 6 Asi ana aucabara mumasure me aya, acagara ako, uye awona acatambira nhaka peciseenzeswa zina re hama dzawo. 7 Pandainga ndecibva ku Padhani, Rakeri wakafa pa dii rangu mu nyika yo Kanani, painga pacino mukuwo wakareba kuti tigume ku Efrati. Hino ndakamukotsa ikona mu gwanza rinoenda ku Efrati, kureya Bheterehema.”
8 Hino Israeri wakaona ana a Zuzee uye wakamubvunzisa kuti: “Aya ndiani?” 9 Zuzee wakadaira baba ake kuti: “Ndi ana angu andakapaswa na Mwari mu nyika ino.” Hino iyena wakati: “Ndapota, aunzise pano kuti ndiakomborere.” 10 Madziso a Israeri ainga asikacakwanisi kuona zvakanaka, ngokuti wainga acembera. Ngokudaro, Zuzee wakatora ana ake oaendesa padhuze naye, Israeri wakaapsvoda uye oakhumbatira. 11 Israeri wakati kuna Zuzee: “Ndainga ndisikarangariri kuti ndaizoonazve hope yako, asi Mwari andiita kuti ndionewo ana* ako.” 12 Hino Zuzee wakaabvisa pa mabvi a Israeri, uye wakahwarara.
13 Pedzepo, Zuzee wakatora ana ake airi: Wakabata Efraimu no moko kwawo wake, kuti agare ku moko boshwe wa Israeri, uye Manase wakamubata no moko boshwe kuti agare ku moko kwawo wa Israeri, pedzepo wakaaendesa pamberi pa baba ake. 14 Asi kunyazi Efraimu ndiye wainga ari mudoko, Israeri wakatambaradza moko kwawo wake outsanzika pamusoro wake, uye moko boshwe wake wakautsanzika pamusoro wa Manase. Wakatsanzika moko dzake kudaro ecizviziya, kunyazi hazvo Manase ndiye wainga ari dangwe. 15 Hino Djakobo wakakomborera Zuzee uye wakati:
“Mwari wezvirokwazvo, wekuti abereki angu, Abrahamu uye Izaki, akahamba pamberi pake,
Mwari wezvirokwazvo, uya akanditungamirira mu upenyu wangu wese dakara nyamasi uno,
16 Ngirozi yaindinunura mu matambudziko angu ese, ngaikomborere arumbwana aya.
Awona ngaadainzwe no zina rangu uye no zina ro madzibaba angu, Abrahamu na Izaki,
Awona ngaatunhudzirike dakara awanda pa nyika.”
17 Zuzee paakaona kuti moko kwawo wa baba ake wairumbwa uri pamusoro pa Efraimu, iyena aazi kuzvipfarira, ndiyo ndaa, wakaedza kubata nyara ya baba ake, kuti aibvise pamusoro pa Efraimu uye aitsanzike pamusoro pa Manase. 18 Zuzee wakati kuna baba ake: “Musaite kudaro baba angu, ngokuti dangwe ndi iri. Tsanzikai moko kwawo wenyu pamusoro pake.” 19 Asi baba ake airamba kuita izvona uye aiti: “Ndinozviziya mwana wangu, ndinozviziya. Iyenawo ucagara dzinza uye ucagara mukuru. Asi mudoko wake ucagara mukuru maningi kupinda iyena, uye ana* a Efraimu acawanda oezana no madzinza akawanda.” 20 Ngokudaro, wakarumbwa eciakomborera pa zuwa irona, eciti:
“Anhu a Israeri ngaarekete mazina enyu paanonga ecikomborera, eciti:
‘Mwari ngaaite kuti ugare hinga Efraimu uye Manase.’”
Ngokudaro, iyena wakarumbwa ecikanda Efraimu mberi ka Manase.
21 Mumasure mazvo, Israeri wakati kuna Zuzee: “Inini ndiri kufa, asi zvezvirokwazvo Mwari acarumbwa anemwi uye acamuhwirinzai ku nyika yo madzitsekuru enyu. 22 Asi inini, ndinozokupasa nyika yakakura kudarika hama dzako, iyo yandakatorera Aamori ndeciseenzesa supada yangu uye uta wangu.”