Genesi
50 Pedzepo Zuzee wakawira baba ake, wakacema akaakhumbatira uye wakaapsvoda. 2 Mumasure mazvo, Zuzee wakabvunza aseenzi ake no arapi kuti aomese mutumbi wa baba ake kuti usaore. Ngokudaro, arapi akagadzirira mutumbi wa Israeri, 3 uye akatora mazuwa 40 kuti aite izvona, ngokuti ii ndiyo nguwa yaaipedza ecigadzirira mutumbi kuti utame kuora uye Aedjipitu akarumbwa ecimucema* ke mazuwa 70.
4 Mazuwa e mariro paakapera, Zuzee wakabvunza macinda a* Faraoo kuti: “Kana ndazwirhwa nyasha pamberi penyu, ndiri kukumbirawo kuti muende koobvunza mambo Faraoo masoko aya: 5 ‘Baba angu akaita kuti ndipike, awona akati: “Inini ndiri kufa. Iwewe unodikana kuenda koondikotsa mu bako rangu, randakacera mu nyika yo Kanani.” Ndapota, ndiri kukumbirawo kuti ndiende kookotsa baba angu, uye mumasure mazvo ndicahwirira.’” 6 Faraoo wakadaira eciti: “Enda kookotsa baba ako hinga zvawakaapikira.”
7 Ngokudaro, Zuzee wakaenda kookotsa baba ake, uye aseenzi ese a Faraoo akaenda pamwepo naye, kutobatanidzawo no akuru e umambo wake uye akuru e nyika yese yo Edjipitu, 8 uyewo no ese e pa nyumba pa Zuzee, hama dzake uye no ese e pa nyumba pa baba ake. Asi akasiya basi ana awo, mabira awo uye n’ombe dzawo mu nyika yo Gozeni. 9 Ngoro uye ahambisi e makavharo, akaenda pamwepo naye; cikwata ici ce anhu cainga cakakura maningi. 10 Akazoguma pa mbuto ye kupurira ye Atadhi, iri ku mutanha we Djorodhani, uye ipona akaita mariro akakura maningi;* Zuzee wakacema baba ake ke mazuwa manomwe. 11 Agari e nyika iyona, Akanani, akaona kucema kawo pa mbuto ye kupurira ye Atadhi, uye akakhuwa* eciti: “Aya i mariro akakura maningi ku Aedjipitu!” Ndiyo ndaa mbuto iyona iri mu mutanha we Djorodhani, yakapaswa zina rokuti Abheri-miziraimu.*
12 Ngokudaro, ana ake akaita hinga zvaainga abvunzwa. 13 Ana ake akamuthwara oenda naye ku nyika yo Kanani uye akamukotsa mu bako riri mu munda we Makipera, munda uri mberi ke Mamere, wakatengwa na Abrahamu kuna Efroni Muhiti, kuti ugare mbuto yaizoseenzeswa hinga masiye. 14 Mumasure me kukotsa baba ake, Zuzee wakahwirira ku Edjipitu no hama dzake uye no ese ainga aenda naye kookotsa baba ake.
15 Paakaona kuti baba awo ainga afa, hama dza Zuzee dzakabvunzana kuti: “Zvingaita kuti Zuzee acakaticengetera bundu uye iyena ucatihwirinzira zvakashata zvese zvatakamuitira.” 16 Ndiyo ndaa, awona akatumira masoko kuna Zuzee eciti: “Baba ako asati afa akabhuya kudai: 17 ‘Munodikana kubvunza Zuzee kudai: “Ndinokudeketerera: Ndapota, rekerera kushaisha ke hama dzako uye citema caakaita nge kukuitira zvakashata.”’ Parizvino tapota, rekererai kushaisha ke aseenzi a Mwari wa baba enyu.” Uye Zuzee wakacema paakabvunzwa masoko aya. 18 Mumasure mazvo, hama dzake dzakauyawo uye dzakahwarara pamberi pake uye dzakati: “Tiri pano hingana aranda enyu!” 19 Zuzee wakaabvunza kuti: “Musathye. Kodi inini ndiri Mwari here kuti ndimutongei? 20 Kunyazi hazvo maida kundiitira zvakashata, Mwari aita kuti zvihambe zvakanaka uye kuti upenyu we anhu akawanda ucengetedzwe, uye izvona ndizvo zviri kuitika dakara nyamasi uno. 21 Hino musathye. Inini ndicarumbwa ndecimupasai zvekurhya, imwimwi pamwepo no ana enyu.” Ngokudaro, iyena wakaanyaradza uye ngo masoko awona wakaagondesa kuti apana zviro zvakashata zvaizoitika.
22 Zuzee wakarumbwa ecirarama mu Edjipitu, iyena pamwepo no nyumba ya baba ake, uye Zuzee wakararama makore anokwana 110. 23 Zuzee wakaona mubarirhwana wecitatu we ana a Efraimu, uyewo we ana a Makiri mwana wa Manase. Zuzee waiaona hinga ana ake kamare.* 24 Pakupedzesera, Zuzee wakati ku hama dzake: “Inini ndaakuda kufa, asi zvezvirokwazvo Mwari acamurangarirai, uye zvezvirokwazvo acamubvisai mu nyika ino omuendesai ku nyika yaakapikira kupasa Abrahamu, Izaki, uye Djakobo.” 25 Ndiyo ndaa, Zuzee wakati ku ana a Israeri: “Zvezvirokwazvo Mwari acamurangarirai. Pamucabuda mu nyika ino, munodikana kubuda no makodo angu. Ngokudaro, Zuzee wakaita kuti awona apike kuti aizoita izvona.” 26 Uye Zuzee wakafa ano makore anokwana 110; hino awona akaita kuti uomeswe mutumbi wake kuti usaore, uye akaukanda mu kashau ku Edjipitu.