Ku Aroma
11 Hino, ndinobvunzisa kuti, zvinoreya kuti Mwari akaramba anhu ake here? Haiwa! Ngokuti ininiwo ndiri Muisraeri, mwana* wa Abrahamu, we dzinza ra Bhenjamii. 2 Mwari aazi kuramba anhu ake, aakatanga kuziya. Amuzvizii here zvinorekethwa no Matarhwa ngezva Eriya, paakadeketera kuna Mwari ngezva Israeri? Iyena wakati: 3 “Djehovha,* awona akauraya aphorofita enyu, akaputsa artari dzenyu, inini basi ndini ndasara, uye zvino ari kupsvaka kundiuraya.”* 4 Asi Mwari akamubvunzei? “Ndicino anhu anokwana 7000 asikazi kugodamira Bhaari.” 5 Ngo mushobo umwewo, pa nguwa ino, pano aciripo maererano no kusanangurhwa kakaizwa nge nyasha dza Mwari. 6 Hino kudai akasanangurhwa nge nyasha dza Mwari, azvicazwi akasanangurhwa nge ndaa ye mabasa; ngokuti kana zvikadaro, nyasha dza Mwari dzinonga dzisiripizve nyasha dza Mwari.
7 Hino totii? Aisraeri aazi kuona caaipsvaka no mwoyo wese, asi akasanangurhwa, akaciona. Amweni ese akagara no mwoyo wakaoma, 8 hinga kutarhwa kazvakaizwa kuti: “Mwari akaita kuti abathwe no hope huru, oapasa madziso asikaoni uye nzee dzisikazwi, dakara nyamasi uno.” 9 Dhavhidhi wakareketawo kuti: “Meza yawo ngaigare murau, buwe rinokuhunyisa uye ciro cinoapangira. 10 Madziso awo ngaagare no cidima kuti atame kuona uye itai kuti misana yawo igare yakakotama.”
11 Hino ndinobvunzisa kuti: Awona akakuhunyika uye ombwera zvacose here? Haiwa! Asi kushaisha kawo kuri kuita kuti anhu e madzinza amweni aone ruponeso, kuti awona agare no shanje. 12 Hino kana kushaisha kawo kecireya upfumi ku nyika uye kupunguka kawo kecireya upfumi ku anhu e madzinza amweni, kucaoneka upfumi wakawanda nge ndaa ye kuwanda kawo!
13 Pari zvino ndiri kureketa na imwimwi anhu e madzinza amweni. Ngokuti ndiri muphostori we madzinza amweni, ndinokudza basa rangu re kuparidzira 14 kuti kana zvecibvira, ndikwanise kuita kuti Adjudha agare no shanje uye ndoponesa amweni awo. 15 Ngokuti kana kurambwa kawo keciita kuti nyika igare no ushamwari we padhuze na Mwari, kutambirhwa kawo kaizoreyei? Zvaizoita hinga kuti amutswa kubva ku akafa otambira upenyu. 16 Uyezve, kudai dimbu rokutanga ro pau riri kuizwa mupiro rikagara rakacena, pau yese yakacenawo; kudai mudzi ukagara wakacena, nhai dzese dzakacenawo.
17 Asi, kana nhai dzimweni dzikatemwa uye kunyazi iwewe uri muorivhi we mushango, ukabatanidzwa pakati pawo, wotanga kuona upfumi wo mudzi we muorivhi, 18 usadadire nhai. Asi kana ukadzidadira, edzurira kuti iwewe andiwepi uri kuthwara mudzi, asi mudzi ndiwo uri kukuthwara. 19 Hino iwewe unozoti: “Nhai dzimweni dzakatemwa kuti inini ndibatanidzwe.” 20 Izvirokwazvo! Idzona dzakatemwa ngokuti adzizi kupangidza kutenda, asi iwewe wakaima nge ndaa ye kutenda. Usadzikudze, asi gara munhu unothya. 21 Ngokuti kana Mwari asikazi kusiya nhai dzo mutiwo dziripo, iyena aazokusiiwo. 22 Hino, cimborangarirai ngezve nyasha dza Mwari uye shungu dzake. Iyena anopangidza shungu ku anhu akambwera, asi anokupangidzira nyasha dzake, kudai ukarumbwa uri mu nyasha dzake; kana iwewe ukatama kudaro, unozotemwawo. 23 Uye, awona acabatanidzwa kana akagarazve no kutenda, ngokuti Mwari anokwanisa kuabatanidzazve pa mbuto pawo. 24 Ngokuti kana iwewe wakatemwa pa muorivhi we mushango uye wobatanidzwa pa muorivhi we mu munda, zviro zvekuti azvisooitiki, hino nhai dzo muorivhi kamare dzingakonerhwa here kubatanidzwa pa muti we muorivhi wadzakabva?
25 Ngokuti andidi kuti imwimwi hama, mutame kuziya zvakaigika zva Mwari izvi, kuitira kuti musadzione hinga makangwara: Aisraeri amweni akaomesa mwoyo yawo, dakara anhu ese e madzinza amweni akasanangurhwa apinda, 26 uye nge mushobo uu Aisraeri ese anozoponeswa. Hinga kutarhwa kazvakaizwa kuti: “Muponesi unozobva mu Ziyoni, wobvisa maitiro akashata kuna Djakobo. 27 Uye ici ndico citenderano candinozoita nawo, pandinozobvisa zvitema zvawo.” 28 Izvirokwazvo kuti, kana tecireketa ngezve masoko akanaka, awona ndi azondi a Mwari kuti zvimubetserei; asi tecireketa ngezve kusanangura ka Mwari, awona anodiwa nge ndaa ye madzitsekuru awo. 29 Ngokuti Mwari aatsumbi nge zvipo zvaanonga apasa uye no kuadainza kaanonga aaita. 30 Ngokuti kuitawo hingana imwimwi mainga musikazwiri Mwari, asi zvino moizirhwa usisi nge ndaa ye kutama kuzwira kawo, 31 awonawo aazi kuzwira, zvoita kuti imwimwi muizirhwe usisi, kuitira kuti awonawo aizirhwe usisi. 32 Ngokuti Mwari akaita kuti ese agare aranda okutama kuzwira, kuitira kuti ese aizirhwe usisi.
33 Upfumi wa Mwari, ungwaru wake no ruziyo rake zvezvirokwazvo zvakadzika maningi! Ndiani anokwanisa kuzwisisa kutonga kake uye ndiani anokwanisa kuzwisisa makwanza ake? 34 Kodi “ndiani akaguma pa kuziya ndangariro dza Djehovha,* kana kuti ndiani angamupasa mazano?” 35 Kana kuti, “ndiani akatanga kumupasa ciro zvekuti anodikana kumuhwirinzira?” 36 Ngokuti zviro zvese zvinobva kaari zvakaizwa ndiye uye nge zvake. Iyena ngaakudzwe nokusikaperi. Ameni.