Ku Aroma
9 Ndiri kureketa zvirokwazvo muna Kristu; andiripi kunyepa, ngokuti hana yangu iri kundipupurira maererano no mwiya mucena, 2 kuti ndiri kutsukwara maningi uye ndiri kurhwadziwa maningi mu mwoyo mangu. 3 Ndaida kuti inini kudai zvaiita, ndiparadzaniswe na Kristu hinga munhu akatukwa kuti zvibetsere hama dzangu, hama dzangu pa nyama, 4 Aisraeri. Akatorhwa kuti agare hinga ana a Mwari, opaswa kukudzwa, citenderano, Mutemo, basa cena uye gondeso. 5 Awona akabva ku madzitsekuru, uye Kristu akabva kaari pa nyama. Mwari, ari pamusoro po zvese, ngaakudzwe nokusikaperi. Ameni.
6 Asi, izvi azvireyi kuti soko ra Mwari rakaposheka. Ngokuti andiopi ese akabarhwa no Aisraeri anonga ari “Aisraeri kamare.” 7 Uye azvireyi kuti ese ndi ana ngokuti akabva kuna Abrahamu; asi, “Uya ucazwi mwana* wako, ucauya peciseenzeswa Izaki.” 8 Zvecireya kuti, ana e pa nyama aanapi kamare a Mwari, asi ana e gondeso ndiona ana kamare a Abrahamu mu maonero a Mwari. 9 Ngokuti masoko akagondeswa ainga ekuti: “Ndicahwirira pa nguwa yakaita hingana ino uye Sara ucabara mwana we mwanarume.” 10 Izvi azvizi kuitika pa nguwa iyona basi, asi zvakaitikawo na Rabheka paakagara no mimba yo manyambiri, yo mwamuna wake Izaki, tsekuru edu; 11 ana aya paainga asati abarhwa, awona ainga asikaiti ciro cipi haco cakanaka kana kuti cakashata, kuti Mwari abvunze madzitsekuru edu ngo pamusoro pa uya waizosanangurhwa, ngokuti Mwari anosanangura munhu waanoda, haiwa nge mabasa ake. 12 Ndiyo ndaa, Mwari akabvunza Rabheka kuti: “Mukuru ucagara muranda we mudoko.” 13 Hinga kutarhwa kazvakaizwa kuti: “Ndakada Djakobo, asi ndakazonda Izau.”
14 Hino toti kudini? Mwari aatongi zve unatsi here? Haiwa, anotonga zve unatsi! 15 Ngokuti iyena akati kuna Mozesi: “Ndicazwira usisi uya wandinoda kuzwira usisi, uye ndicapangidzira nyasha uya wandinoda kupangidzira nyasha.” 16 Izvi azvitsamiri pa cido ce munhu kana pa kupeta masimba kake, asi kuna Mwari ano usisi. 17 Ngokuti Matarhwa anoti kuna Faraoo: “Ndaita kuti urumbwe wecirarama nge ndaa ye cikonzero ici: Kuti ndikuseenzese pa kupangidza simba rangu uye kuti zina rangu riziiswe pa nyika yese.” 18 Hino, iyena anozwira usisi uya waanoda, asi anosiya waanoda eciomesa mwoyo.
19 Mucazondibvunzisa kuti: “Ngei iyena aciri kupumha anhu? Ndiani angaphikisa kuda kake?” 20 Asi ndiwe ani, iwewe munhu kuti uphikisane na Mwari? Zvingaita kuti ciro cakaumbwa cibvunze wakaciumbewo kuti: “Ngei wakandiumba kudai?” 21 Kodi imwimwi amuzvizii here kuti muumbi ano simba rokuita zvaanoda no dongo, kuti aumbe mushobo wese we hari kuti imweni iseenzeswe ngo mushobo unokudzwa, uye imweni iseenzeswe ngo mushobo usikakudzwi? 22 Zvimwezvoo na Mwari, iyena anoda kupangidza shungu uye simba rake ku anhu anoita zviro zvakashata. Kunyazi zvakadaro, iyena ari kupangidza mwoyo unononoka kutsamwa ku anhu aakanyangadzwira akasisira kutsakatiswa. 23 Uye akaita izvi kuti aziise upfumi we kukudzwa kake pa midziyo ye usisi, yaainga agadzirira kuti azoikudze, 24 kureya isusu, akadainzwa kubva pakati pe Adjudha no pakati pe anhu e madzinza amweni. 25 Hinga zvaakareketa mu bhuku ra Ozeya kuti: “Aya ainga asiripi anhu angu ndicaadainza kuti ‘anhu angu,’ uye aya ainga asikadiwi ndicaadainza kuti, ‘anodiwa’; 26 uye pa mbuto yaakazwi: ‘Imwimwi amuripi anhu angu,’ acazwi ‘ana a Mwari mupenyu.’”
27 Kupinda izvona, Isaya wakadainzira ngezva Israeri kuti: “Kunyazi ana e Israeri akawanda hinga madjeca o mu bahari, padoko awo ndiwo acaponeswa. 28 Ngokuti Djehovha* acaita kuti anhu ari pa nyika adzidairire, acaita izvona nge mushobo wakakwana uye asikanonoki.” 29 Uye, Isaya wakareketazve kuti: “Kudai Djehovha* we anyahondo asikazi kutisiira mwana,* taizoita hinga Sodhoma uye toezana no Gomora.”
30 Hino toti kudini? Anhu e madzinza amweni, kunyazi ainga asikapsvaki unatsi, akauona unatsi, unatsi unobva mu kutenda; 31 asi Aisraeri, kunyazi aipsvaka mutemo we unatsi, awona aazi kuuona. 32 Nge ndaa yei? Ngokuti awona, aazi kuupsvaka nge kutenda, asi akaupsvaka nge mabasa. Awona akakuhunyika nge “buwe rinokuhunyisa”; 33 hinga kutarhwa kazvakaizwa kuti: “Ona! Ndiri kukanda mu Ziyoni buwe rinokuhunyisa uye rinombwedza, asi munhu anotenda mariri aazotsumbi.”