Akorinti Wekutanga
2 Pandakauya kamuri hama kuti ndimuziisei zvakaigika zva Mwari, andizi kureketa na imwimwi ndeciseenzesa masoko kana ungwaru unoshamisira. 2 Ngokuti ndakasanangura kusama kuziya ciro cipi haco pakati penyu, kunza ka Djesu Kristu, akakhomerhwa pa mutanda. 3 Uye ndakauya kamuri ndisina simba, ndecithya uye ndecitetemera maningi; 4 uye zvandaireketa no zvandaiparidzira zvainga zvisina masoko e kucengedza e uzii, asi cainga cipangidzo co mwiya mucena no simba, 5 kuti kutenda kenyu kusatsamire pa uzii we anhu, asi pa simba ra Mwari.
6 Tinoreketa ngezve uzii pakati pe aya akakura pa kunamata, haiwa uzii we nyika ino kana we atongi e nyika ino, ekuti acatsakatiswa. 7 Asi tinoreketa ngezve uzii wa Mwari unopangidzwa mu zvakaigika zva Mwari, uzii wakaigika, wakarekethwa kare na Mwari nyika ino yakashata isati yaapo, kuti isusu tikudzwe. 8 Uzii uu ndiwona usikazi kuziikanwa no atongi e nyika ino yakashata, ngokuti kudai akauziya, ainga asikadi kuzouraya* Tenzi wedu anokudzwa. 9 Asi hinga kutarhwa kazvakaizwa kuti: “Dziso arizi kuona, nzee adzizi kuzwa, uye mwoyo wo munhu auzi kuzwisisa zviro zvakagadzirirhwa na Mwari kuti apase aya anomuda.” 10 Ngokuti tisu isusu takazvipangidzwa na Mwari eciseenzesa mwiya wake, ngokuti mwiya wake unoongorora zviro zvese, kutobatanidzawo no zviro zvakadzika zva Mwari.
11 Pane munhu angaziya ndangariro dze munhu umweni here? Haiwa, izvi zvinoziikanwa basi no mwoyo we munhu iyena. Nge mushobo umwewo, apana unokwanisa kuziya ndangariro dza Mwari, kunza ke mwiya wa Mwari. 12 Isusu atizi kutambira mwiya we nyika, asi takatambira mwiya unobva kuna Mwari, kuti tiziye zviro zvatakapaswa na Mwari no nyasha dzake. 13 Tinoreketawo zviro izvi, haiwa nge masoko anofundiswa no uzii we anhu, asi no aya anofundiswa no mwiya, tecipanganidza zviro zve mwiya teciseenzesa masoko e mwiya.
14 Asi munhu we nyama aatendi zviro zve mwiya wa Mwari, ngokuti ngezve upenzi kaari; uye iyena aakwanisi kuzviziya, ngokuti zvinoongororhwa no mwiya mucena. 15 Asi munhu we mwiya unoongorora zviro zvese, asi iyena aaongororhwi no munhu. 16 Ngokuti “ndiani akaguma pa kuziya ndangariro dza Djehovha,* zvokuti amufundise?” Asi isusu tinorangarira hingana Kristu.