Djoshuwa

20 Hino Djehovha akabvunza Djoshuwa kuti: 2 “Bvunza Aisraeri kuti: ‘Dzisanangurirei mathaundi e kutizira, andakamubvunzai nge zvawo peciseenzeswa Mozesi, 3 kuitira kuti kana munhu unouraya munhu* umweni asina cinangwa ce kumuuraya kana kuti nge ndaa ye tsaona,* atizire ikona. Awona acaseenza kamuri hinga mbuto ye kutiza uya unonga ecida kutsiya ngazi. 4 Iyena unodikana kutizira ku rimwe re mathaundi awona, woima pa musuwo pe thaundiro, wobvunza nyaya yake ku akuru e mu thaundiro. Hino awona anodikana kumutambira mu thaundimo uye omupasa mbuto kuti agare pakati pawo. 5 Kana mutsii we ngazi akamuteera, awona aadikani kutora munhu waurayewo munhu umweni womukanda mu nyara dze mutsii we ngazi, ngokuti iyena wakauraya munhu umweni nge ndaa ye tsaona,* haiwa ngokuti waimuzonda. 6 Iyena ucadikana kurarama mu thaundi irona dakara waenda pamberi pe ungano kootongwa, uye iyena ucadikana kugaremo dakara mwanarume unonga eciseenza hinga mupristi mukuru pa nguwa iyona wafa. Hino mwanarume wakaurayewo munhu umweni, ungakwanisa kuhwirira ku thaundi raakatiza, wopinda mu thaundi, uye mu nyumba yake.’”

7 Ngokudaro, awona akasanangura* Kedhesi ku Garireya, ku mutanha we matunhu e Nafitari; Sikemu, ku mutanha we matunhu e Efraimu; uye Kiriyati-arbha, kureya Hebroni, ku mutanha we matunhu e Djudha. 8 Ku mutanha we Djorodhani nge kumabvazuwa ke Djeriko, awona akasanangura Bhezani iri ku renje, mu mbuto yakazverera mu nyika ye dzinza ra Rubheni, Ramoti ku Giriyadhi mu nyika ye dzinza ra Gadhi, uye Gorani ku Bhazani mu nyika ye dzinza ra Manase.

9 Aya akagara mathaundi akasanangurhwa kuitira Aisraeri ese uye ese aigara ku Israeri hinga agari e nyika dzimweni, kuitira kuti kana munhu upi hake akauraya munhu* umweni asikadi, akwanise kutizira ikona uye asauraiwe no mutsii we ngazi asati aenda pamberi pe ungano kootongwa.