Djoshuwa
4 Mumasure mekuti anhu ese adarika murambo we Djorodhani, Djehovha akabvunza Djoshuwa kuti: 2 “Sanangura anarume 12 pakati pe anhu, pa dzinza rimwe na rimwe mwanarume umwe, 3 uye abvunze kuti: ‘Torai mapuwe anokwana 12 pakati pe murambo we Djorodhani, pa mbuto yainga yakaima apristi, atorei muende nawo pa mbuto yamucawatira.’”
4 Hino Djoshuwa wakadainza anarume 12 ainga agadzwa pakati pe Aisraeri, ku dzinza rimwe na rimwe mwanarume umwe, 5 uye Djoshuwa wakati kaari: “Endai pakati po Djorodhani pamberi po Areka ya Djehovha Mwari wenyu, uye umwe na umwe wenyu unodikana kuthwara buwe pa phewa rake maererano no kuwanda ke madzinza e Israeri, 6 kuti cigare cipangidzo pakati penyu. Kana ana enyu akazomubvunzisai kuti: ‘Ngei mapuwe aya ari pano?’ 7 imwimwi munozoadaira kuti: ‘Mapuwe aya ari pano ngokuti mvura ye murambo we Djorodhani, yakaimiswa pamberi po Areka yo Citenderano ya Djehovha. Areka payakabira murambo we Djorodhani, mvura ye murambo we Djorodhani yakaimiswa. Mapuwe aya acagara ciedzuriro ku dzinza ro Israeri kwenda no kwenda.’”
8 Hino Aisraeri akaita maererano no zviya zvainga zvabhuiwa na Djoshuwa. Akatora mapuwe 12 pakati pe murambo we Djorodhani, maererano no zviya zvainga zvabvunzwa Djoshuwa na Djehovha, ku dzinza rimwe na rimwe buwe rimwe. Awona akaatora oenda nawo ku mbuto yaaizowatira uye akaakanda ipona.
9 Djoshuwa wakaimisawo mapuwe 12 pakati pe murambo we Djorodhani pa mbuto yainga yakatsika apristi akathwara Areka yo Citenderano, uye mapuwe aya ariyo ikona dakara nyamasi.
10 Apristi aithwara Areka akarumbwa akaima pakati pe murambo we Djorodhani, dakara zvese zvakabhuiwa na Djehovha kuti anhu aite eciseenzesa Djoshuwa zvaitika, maererano no zvese zvakabvunzwa Djoshuwa na Mozesi. Pa nguwa iyona, anhu aibira nokukasika. 11 Anhu paakapedza kubira, apristi akabirawo no Areka ya Djehovha, anhu ese eciona. 12 Uye Arubheni, Agadhi, uye hafu yo dzinza ra Manase akabira akagadzirira kurhwa pamberi pe Aisraeri amweni, hinga zvaainga abvunzwa na Mozesi. 13 Masurudado angakwana kuita 40 000 ainga akagadzirira kurhwa akabira pamberi pa Djehovha ecienda ku renje re Djeriko.
14 Pa zuwa irona, Djehovha akakudza Djoshuwa pamberi po Israeri yese, uye awona akamureremedza* maningi ke upenyu wake wese, hinga mushobo waakareremedza maningi Mozesi.
15 Hino Djehovha akati kuna Djoshuwa: 16 “Bvunza apristi akathwara areka yo Upupuri kuti abude mu murambo we Djorodhani.” 17 Ngokudaro, Djoshuwa wakabvunza apristi kuti: “Budai mu murambo we Djorodhani.” 18 Apristi ainga akathwara Areka yo Citenderano ya Djehovha paakabuda pakati pe murambo we Djorodhani, uye tsoka dzawo padzakatsika pasi pakaoma, mvura ye murambo we Djorodhani yakatangazve kuerera uye yakatangazve kudzarisa maningi uye kupsvetekera ku matii ese hinga mushobo wayaiita kare.
19 Anhu akabira murambo we Djorodhani pa zuwa recigumi re mwedzi wekutanga uye awona akawaka musasa ku Jirigari, pa mugano we kumabvazuwa ke Djeriko.
20 Mapuwe 12 aakatora mu murambo we Djorodhani, Djoshuwa wakaakanda ku Jirigari. 21 Hino iyena wakati ku Aisraeri: “Mune ramangwana kana ana akabvunzisa abereki awo kuti: ‘Mapuwe aya anoreyei? 22 imwimwi mucaapanganidzira kuti: ‘Aisraeri akabira murambo we Djorodhani nge pasi pakaoma 23 Djehovha Mwari wenyu paakaomesa murambo we Djorodhani pamberi pawo dakara awona abira, hinga zvakamboizwa na Djehovha Mwari wenyu no Bahari Rokupsvuka paakariomesa pamberi pedu dakara tese tabira. 24 Iyena akaita izvona kuti anhu ese e pa nyika aziye kuti nyara ya Djehovha ino simba uye kuti imwimwi nguwa dzese muthye Djehovha Mwari wenyu.’”