Akatarhwa na Marko
9 Djesu akaabvunzazve eciti: “Ndinomubvunzai zvirokwazvo kuti amweni enyu ari pano aazofi asati aona Umambo wa Mwari watouya no simba.” 2 Mumasure me mazuwa 6, Djesu akatora Pedru, Tiyago na Juau oenda nawo mu dunhu rakarebesesa ari oga. Uye iyena akaphinduka pamberi pawo; 3 macira ake akadjeka, ocena zvokuti apana pa nyika munhu anokwanisa kuphadza macira ocena kudaro. 4 Afundi akaonawo Eriya na Mozesi ecicedza na Djesu. 5 Hino Pedru wakati kuna Djesu: “Rabhi zvakanaka kuti tiri pano. Hino ticagadzira zvitumba zvitatu, cimwe cenyu, cimwe ca Mozesi, no ca Eriya.” 6 Zvezvirokwazvo, ainga asikazii cokuita, ngokuti awona aithya maningi. 7 Pakaoneka gore rakaafukidza, uye pakazwika izwi recibuda mu gore reciti: “Uu ndiye Mwana wangu, mudisiswa. Mupurutanei.” 8 Pedzepo awona akaringira-ringira mu matii ese uye apana waakaona kunza ka Djesu basi.
9 Paainga ecicita mu dunhu, Djesu akaabvunza kuti asabvunze munhu nge zviya zvaainga aona dakara Mwana we munhu wamutswa kubva ku akafa. 10 Awona akacengeta masoko aya mu mwoyo mawo,* asi akabvunzana pacawo kuti kumutswa uku ku akafa kunoreyei. 11 Uye akamubvunzisa kuti: “Ngei atari ecireketa kuti Eriya anodikana kutanga kuuya?” 12 Iyena akaadaira eciti: “Zvezvirokwazvo Eriya anotangadi kuuya ogadzirisa zviro zvese; asi ngei zvakatarhwa ngezve Mwana we munhu kuti anodikana kusongana no matambudziko akawanda uye oshorhwa? 13 Asi ndinoti kamuri, Eriya wakatouya, uye awona akaita zvaainga ecida naye, hinga zvakatarhwa nge zvake.”
14 Paakaguma painga pano afundi amweni, akaona anhu akawanda akaaunganira, uye atari ainga eciaitira hasha. 15 Asi anhu paakamuona, akashamiswa, uye akagogoma ecienda koomucungamidza. 16 Hino iyena akaabvunzisa kuti: “Muri kureketedzana nawo ngezvei?” 17 Umwe wawo wakamudaira eciti: “Mufundisi, ndauya no mwana wangu kamuri, ngokuti iyena ano mwiya unoita kuti akonerhwe kureketa. 18 Uye pese paunomubata, mwiyewo unomumbwedzera pasi, uye iyena unobuda mafuro mukanwa, unorumanisa mazino ake, uye unopera simba. Ndakumbira afundi enyu kuti adzingire mwiya uu, asi awona azvikonerhwa.” 19 Djesu akaadaira eciti: “Imwi mubarirhwana usina kutenda, ndicagara na imwimwi dakara rini? Ndicashingirira maitiro enyu dakara rini? Muunzisei kuno.” 20 Hino akaenda naye kuna Djesu, asi pawakaona Djesu, mwiyewo wakambwedzera pasi murumbwanewo uye wakaita kuti atange kupfudza. Mumasure me kumbwera pasi, iyena waimburumbuka ecibuda mafuro mukanwa. 21 Hino Djesu akabvunzisa baba ake kuti: “Iyena waano nguwa yakareba kudini eciita kudai?” Babewo akamudaira kuti: “Kubvira aciri mwana mudoko, 22 uye kajinji mwiyewo unosomumbwedzera pa muriro uye mu mvura kuti umuuraye. Asi kana pano zvamunokwanisa kuita, tizwireiwo usisi uye tibetserei.” 23 Djesu akamudaira kuti: “Ngei wabhuya kuti ‘kana pano zvamunokwanisa kuita!’ Zviro zvese zvinokwanisika kuno uya ano kutenda.” 24 Ciriporipoco baba e murumbwanewo akakhuwa eciti: “Inini ndino kutenda! Ndibetserei kuti ndibambise kutenda kangu!”
25 Djesu paakaona kuti anhu aimukhwederera nokukasika, iyena akatuka mwiya uya usikazi kucena, eciti kauri: “Iwe mwiya unoita kuti munhu akonerhwe kureketa no kuzwa, ndinoti kauri, buda uye usapindezve mu munhu uu!” 26 Mumasure me kukhuwa uye mumasure me kuita kuti murumbwanewo apfudze kakawanda, mwiyewo wakabuda, uye murumbwanewo wakaita hinga wakafa, zvokuti anhu akawanda akabhuya kuti: “Iyena wafa!” 27 Asi Djesu akabata nyara yake omumutsa, uye iyena wakaima. 28 Mumasure me kupinda mumba, afundi ake akamubvunzisa pawo oga eciti: “Ngei isusu takonerhwa kuudzingira?” 29 Iyena akaadaira kuti: “Mukhaindi uu unobuda no munamato basi.”
30 Akabuda ipona uye akapinda no ku Garireya, asi ainga asikadi kuti zviziikanwe, 31 ngokuti iyena aifundisa afundi ake uye aiabvunza kuti: “Mwana we munhu acatengeswa mu nyara dze anhu, uye awona acamuuraya, asi kunyazi akamuuraya, iyena acamutswa pa zuwa rocitatu.” 32 Asi awona ainga asikazwisisi zvaaireketa, uye aithya kumubvunzisa.
33 Uye akaguma mu Kafarnau. Paainga aamumba, akaabvunzisa kuti: “Mainga mecireketedzana ngezvei mu gwanza?” 34 Awona akarumbwa akanyarara, ngokuti mu gwanza aireketedzana nge zvekuti ndiani mukuru pakati pawo. 35 Hino iyena akagara pasi akadainza afundi 12 uye akaabvunza kuti: “Kana munhu ecida kugara wekutanga anodikana kugara we kupedzesera uye museenzi we ese.” 36 Ngokudaro, iyena akadainza mwana mudoko omukanda pakati pawo, omukhumbatira uye oabvunza kuti: 37 “Munhu wese anotambira mwana mudoko wakaita hinga uu mu zina rangu anonditambirawo; uye munhu anonditambira aatambiri inini basi, asi anotambirawo Uya akandituma.”
38 Juau wakamubvunza kuti: “Mufundisi, takaona munhu umweni waidzingira madhimoni mu zina renyu, uye takaedza kumurambidza, ngokuti iyena wainga asikatiteeri.” 39 Asi Djesu akati: “Musaedze kumurambidza, ngokuti apana munhu ungaita mabasa e simba mu zina rangu pedzepo ototanga kushaisha kundireketa. 40 Ngokuti wese asikapesani na isusu ari ku dii redu. 41 Uye ndinomugondesai kuti munhu wese anomupasai kopo yo mvura kuti mumwe ngokuti muri anhu a Kristu, iyena aazomboruzi mubairo wake. 42 Asi uya anokuhunyisa umwe we adoko aya anotenda, zviri nani kuti asungirhwe mu mutsipa make gwiyo rinotenderedzwa no dhongi uye okhandirhwa mu bahari.
43 “Kana nyara yako yeciita kuti ushaishe,* igure. Zviri nani kuti uone upenyu wakaremara pane kuti uende no nyara mbiri mu Gehena,* mu muriro usikadzimisiki. 44* —— 45 Uye kana murenje wako weciita kuti ushaishe,* ugure. Zviri nani kuti uone upenyu wecikhabinya pane kuti uende no mirenje miiri mu Gehena.* 46* —— 47 Uye kana dziso rako reciita kuti ushaishe,* rikhandire kure. Zviri nani kuti upinde mu Umambo wa Mwari uno dziso rimwe pane kuti ukhandirhwe uno madziso mairi mu Gehena,* 48 muno honye dzisikafi uye muriro usikadzimisiki.
49 “Ngokuti munhu wese anodikana kurungwa no muriro. 50 Munyu wakanaka, asi kana munyu ukatama kurungura ndiani ucaita kuti urungurezve? Garai no munyu mukati menyu, uye rumbwai muri murunyararo pakati penyu.”