Masoko Akaseenzeswa mu Bhaibheri

A B C D E F G H I K M N O P R S T U W Z

A

• Aestoiko.

  Cikwata ce azii e firozofiya e Cigrego aitenda kuti mupfaro unobva pa kurarama maererano no marangariro uye masikirhwe. Awona aiti mwanarume uno uzii we zvirokwazvo wainga asina basa no marhwadzo kana mupfaro.​—Zvii 17:18.

• Afarisi.

  Cikwata ce citendero ce Cidjudha ce mu zana re makore rekutanga K.A. Awona ainga asiripi ana e apristi, asi ainyanya kuzwira Mutemo pa zviro zvese, uyewo aitoona kuti tsika dzinokosha maningi hinga Mutemo. (Mt 23:23) Afarisi aiphikisa tsika ipi hayo ye Cigrego, uye hinga azii e Mutemo uye e tsika, awona ainga ano simba guru ku anhu. (Mt 23:2-6) Amweni awo ainga ari nhengo yo Sinedriyo. Kakawanda kakhona, akareketedzana na Djesu ngezve kucengeta Sabudu, kuteera tsika, kushamwaridzana no ashaishi, uye no aripisi e musoho. Amweni awo akagara Akristu, hinga Sauro we ku Tarso.​—Mt 9:11; 12:14; Mk 7:5; Ruk 6:2; Zvii 26:5.

• Akaya.

  Mu Matarhwa e Cigrego e Cikristu, ii yainga iri provhinsiya yo Roma, yaigara katemaidumba ke Gresiya, thaundi guru rayo rainga riri Korinti. Akaya yaibatanidza Peroponezo yese uye dii ro pakati ro Gresiya.​—Zvii 18:12. Onai Apendi. B13.

• Akristu.

  Zina rakapaswa ateeri a Djesu Kristu na Mwari.​—Zvii 11:26; 26:28.

• Atongi e govherno.

  Mu nyika dzaitongwa no Roma, atongi e govherno ainga ari atungamiriri e utongi. Mabasa awo aibatanidza kucengetedza runyararo, kuonerera mare, kutonga anhu asikazwiri mutemo uye kupasa mutemo we kuphanica.​—Zvii 16:20.

• Amagedhoni.

  Soko iri rakabva pa soko re Cihebheru rokuti Har Meghid·dohnʹ, rinoreya “Dunhu re Megidho.” Soko iri rinocokuita no “hondo ye zuwa guru ra Mwari, we Masimba Ese” ekuti “madzimambo e nyika yese inogarhwa” acaungana kuti arhwe hondo na Djehovha. (Zva 16:14, 16; 19:11-21)​—Onai pakazwi KUTAMBUDZIKA KUKURU.

• Amedhiya; Medhiya.

  Anhu akabva ku ana a Madhai, mwana wa Djafeti; awona aigara ku mutanha uno matunhu we Iraniya, wakazogara mutanha wa Medhiya. Amedhiya akabatana no Bhabhironi pa kurhwisa Asiriya. Mu nguwa iyona, Persiya yainga iri provhinsiya yo Medhiya, asi Siro wakapanduka uye Medhiya yakabatana no Persiya, youmba umambo we Medhiya no Persiya. Umambo uu wakarhwisa umambo we Bhabhironi muna 1539 K.A.A. Amedhiya amweni ainga arimoo mu Djerusarema pa Pentekosti ya 33 K.A.​—Zvii 2:9.

• Ameni.

  “Ngazviitike,” kana kuti “ndizvodi kamare.” Soko iri rakabuda pa soko re Cihebheru rokuti ʼa·manʹ, rinoreya “kutendeseka, kugondeka.” Anhu aibhuya kuti “Ameni” kuti apangidze kuti aitenderana no kupikirhwa kunonga kaizwa, munamato, kana masoko anonga arekethwa. Mu bhuku ra Zvakapangidzwa, soko rokuti “Ameni” rinoseenzeswa recida kureya ngezva Djesu.​—Dhe 27:26; 1Mk 16:36; Aro 1:25; Zva 3:14.

• Areopago.

  Cainga ciri cidunhu cakareba, cainga ciri mu thaundi ro Atena, kakutsi ke Akropori. Raingawo riri zina re dare (tribhunari) raiungana ipona. Pauro wakaendeswa ku Areopago nge azii e cikwata ce Aestoiko uye Aepikureu kuti apanganidze zvaaitenda.​—Zvii 17:19.

• Areka yo citenderano.

  I bhokisi rakagadzirhwa no matabwa e mubaya mhondoro (mukesha we mushango) rakatsurutsuthwa no oro, raigara mu Mbuto Yakacenesesa yo tabhernakuro uye nokuhamba ke nguwa mu Mbuto Yakacenesesa yo tempro yakawakwa na Soromoni. Rainga rino cidumhaidzo ce oro yakanaka no makerubhi mairi padenga akaringirana. Zviro zvikuru zvainga zviri mariri, zvainga zviri zvimatabwa zviiri zve Mitemo Gumi. (Dhe 31:26; 1Md 6:19; Ahe 9:4)

• Arfa uye Omega.

  Iri i zina ro bhii rokutanga uye rokupedzesera ro mabhii e Cigrego; awona anoseenzeswa katatu kese ecida kureya ngezva Mwari mu bhuku ra Zvakapangidzwa. Pa mugariro uu, masoko aya anoda kureya ngezve “wokutanga uye wokupedzesera,” “maambo uye mugumo.”​—Zva 1:8; 21:6; 22:13.

• Arindi e mu Nyumba ya Mambo.

  Cikwata ce masurudado e Roma cakaumbwa kuti ciseenze hinga arindi e munhu kana kuti a Mambo. Murindi uu wakagara no simba rakakura re zvematongerhwe e nyika kuti atsigire kana kubvisa mambo pa mupando wake.​—Afi 1:13.

• Artari.

  I mbuto yakakwirira yakaizwa nge mavhu, mapuwe kana kuti matabwa akatsurutsuthwa no simbi. Pamusoro pe artari, paipirhwa zvibairo, kana kuti rusenzi pa kunamata. Pa berere rokutanga ro tabhernakuro uye ro tempro, painga pane “ciartari ce oro” caipirhwa ruseenzi, cakagadzirhwa no matabwa akatsurutsuthwa no oro. Pa ruwanze, painga pano “artari yo kobre,” artari ii yainga yakakura uye yaiseenzeswa pa kupisira zvibairo.​—Eki 39:38, 39; 1Md 6:20; Mt 5:23, 24; Ruk 1:11; Zvii 17:23.

• Asadhusi.

  Cikwata ce citendero ce Cidjudha cainga cino apfumi anobva mu mhuri dze pamusoro-soro no apristi ainga ano simba guru pa mabasa aiizwa mu tempro. Awona airamba tsika dzakawanda dze Afarisi uye zvaitendwa no Afarisi. Uyewo, ainga asikatendi kuti kuno rumuko kana ngirozi. Asadhusi aiphikisa Djesu.​—Mt 16:1; Zvii 23:8.

• Asamariya.

  Pakutanga zina iri raireya Aisraeri e umambo we madzinza gumi e kakutsi, asi mumasure mekuti Aasiriya anyisa Samariya muna 740 K.A.A., zina iri rainga raakuseenzeswawo pa anhu akatorhwa hinga aranda kuendeswa ku Samariya. Mu mazuwa a Djesu, zina iri rainga risisina ndaa no ganda ro munhu kana kuti no zvematongerhwe e nyika, asi raireya anhu e cikwata ce zvitendero zvainga zviri anyacigarisano e mathaundi e kare e Sikemu uye e Samariya. Uye ainga ano fundiso dzakasiyana no dze Cidjudha.​—Ju 8:48.

• Aserjeya.​—

  Onai pakazwi MUHAMBIRO UNOPSVERUSA.

• Ateeri a Herodhi.

  Aiziikanwawo hinga Aherodhi. Ainga ari cikwata co mu nyikeyo caitsigira zvematongerhwe e nyika; ana a Herodhi, aigadzwa no Roma. Asadhusi amweni pamweni aitsigirawo cikwateco. Aherodhi akabatana no Afarisi pa kuphikisa Djesu.​—Mk 3:6.

• Aziya.

  Mu Matarhwa e Cigrego e Cikristu, iri i zina re provhinsiya ye Roma yaibatanidza kumadokera ke Turkiya yo zvino, uye zvitsuwa zvimweni zve mu muceto me bahari, zvakaita hinga Samosi uye Patimosi. Thaundi guru re Aziya rainga riri Efeso. (Zvii 20:16; Zva 1:4)​—Onai Apendi. B13.

B

• Basa cena.

  Basa, kana kuti basa cena rinocokuita no kunamata Mwari.​—Aro 12:1; Zva 7:15.

• Berere ra Soromoni.

  Mu mazuwa a Djesu, ii yainga iri mbuto ye kuhambira yakapfurirhwa, yainga iri kumabvazuwa nge ku muceto ke ruwanze ro tempro. Zvinotendwa ngo anhu akawanda kuti po kuhambira apa painga paapo mu tempro ya Soromoni. Djesu akahamba pa berere iri ‘mu nguwa ye kutonhora,’ uye Akristu ekutanga aiungana ipona kuti anamate. (Ju 10:22, 23; Zvii 5:12.​—Onai Apendi. B11.

• Bhaari.

  Uu ndi mwari we Akanani waizwi muridzi we denga uye wainaisa mvura no kuita kuti zvirimwa zvibudirire. Soko rokuti “Bhaari” raiseenzeswawo recida kureya anamwari e mu nyikemo asikanyanyi kukosha. Mu Cihebheru soko iri rinoreya “Muridzi; Tenzi.”​—1Md 18:21; Aro 11:4.

• Buwe re pakhona.

  I buwe raikandwa pakhona pe nyumba, paisongana maparedhi kuti abatane. Pa fundasau, ndipo paikandwa buwe guru re pakhona; uye pa muru dze mathaundi no zviwakwa zvainseenzeswa no anhu akawanda. Soko rokuti buwe re pakhona, rinoseenzeswa ngo mushobo we kuezanisira recida kubhuya ngezve kusikwa ke nyika. Djesu anorekethwa nge zvake hinga buwe re “fundasau re pakhona” re ungano ye Cikristu, inoezaniswa no nyumba yo ku mwiya.​—Aef 2:20; Djob 38:6.

• Bherizebhu.

  I zina rakapaswa Sathani, mucinda, kana kuti mutungamiriri we madhimoni. Pamweni kugurisirhwa ke zina rokuti Bhaari-Zebhubhi, Bhaari wainamathwa no Afiristiya ku Ekroni.​—2Md 1:3; Mt 12:24.

C

• Cegumi.

  Zviro gumi, kana kuti zviro gumi pa zviro 100, caipaswa kana kuti cairiphwa hinga muripo, maka-maka pa zviro zvinocokuita no kunamata. (Mara 3:10; Dhe 26:12; Mt 23:23; Ahe 7:5) Mu Mutemo wa Mozesi, cegumi ce zvirimwa zve pa nyika, cegumi ce zvipfuyo uye cegumi ce n’ombe kana ce mabira anonga atunhudzirika, zvaipaswa Arevhi makore ese kuti aone kudziriritira. Arevhi aizobvisawo cegumi pa zvegumi izvona ecipasawo apristi, ana a Aroni, kuti aonewo zvekurarama nazvo. Painga pano zvegumi zvimweni zvaibviswawo. Kubvisa cegumi akubambidzirhwi ku Akristu.

• Ciaramaiko.

  Uu ndi mureketero wakada kuezana no Cihebheru, uye unoseenzesa mabhii amwewo no e Cihebheru. Aaramu ndiwo aireketa mureketero uu, asi nokuhamba ke nguwa wakazotanga kuseenzeswa pa kutengeserana uye pa kuita kuti anhu aigara mu nyika dzaitongwa no Asiriya uye no Abhabhironi azwirane. Uyezve, ndiwo mureketero waiseenzeswa no govherno mu nyika dzaitongwa no Umambo we Persiya. (Esd 4:7) Matii manganani e mabhuku a Esdra, Djeremiya, na Dhanyeri akatarhwa mu Ciaramaiko.​—Esd 4:8–6:18; 7:12-26; Dje 10:11; Dha 2:4b–7:28; Mk 14:36; Zvii 9:36.

• Cibairo.

  Mupiro waipirhwa kuna Mwari we kutenda zvaunonga waizirhwa, kutendera cishaishi, uye kuita kuti munhu agarezve no ushamwari wakanaka na Mwari. Kubvira pana Abheri, anhu akapasa zvibairo zvakasiyana-siyana nge kuda kawo, kutobatanidzawo zve zvinyama. Pa citenderano ce Mutemo wa Mozesi, kupasa cibairo wainga uri mutemo kamare. Mumasure mekuti Djesu apasa upenyu wake hinga cibairo cakakwana, zvibairo zve zvinyama zvainga zvisikacadikanwizve, asi Akristu anorumbwa ecipasa zvibairo zve kumwiya kuna Mwari.​—Ge 4:4; Ahe 13:15, 16; 1Ju 4:10.

• Cibairo co citema.

  Ici i cibairo caipaswa ngo munhu aishaisha asikazii nge ndaa ye kuremba ke nyama isikazi kukwana. Paiseenzeswa zvinyama zvakasiyana-siyana, kubvira ku n’ombe dakara ku njiwa, maererano no zvainga zvino munhu uye mugariro we zviro we munhu aita cishaishi ari kuda kurekererhwa.​—Re 4:27, 29; Ahe 10:8.

• Cibaiso.

  Muti wakareba, wekuti kumberi kawo kuno cisimbi cakapinza, unoseenzeswa no arimi kuti cinyama ciazwire. Masoko e muzii anoita kuti aya anonga ecimuzwa azwire mazano ake, anoezaniswawo no cibaiso. Masoko okuti “kudzipondera pa zvibaiso” anobva pa zviro zvinoizwa nge n’ombe isikazwiri painoshingirira kubaiwa no cibaiso, yecidzikuwadza iyona pacayo kamare.​—Zvii 26:14; Ato 3:31.

• Cidhindo; Cinamiro.

  Ciro caiseenzeswa kuti cidhinde (kakawanda kakhona nge ce dongo kana kuti co sera) kuti cipangidze ciro ce munhu ciri pa mutemo, kugondeka kana kuti citenderano. Zvidhindo zvokare zvaiizwa ngo zviro zvakabamba (buwe, nyanga dzo nzoo, kana tabwa) no mabhii kana kuti no madhezenyo akatarhwa nge mushobo wakaphidimudzwa, zvakaezana no karimbo. Soko iri ringaseenzeswawo nge mushobo we kuezanisira hinga cipangidzo ce kupangidza kugondeka, ciro ce munhu ciri pa mutemo, ciro cakafisika kana kuti cakaigika.​—Mt 27:66; Ju 6:27; Aef 1:13; Zva 5:1; 9:4.

• Cidhori; Kunamata cidhori.

  I mufanikiso, cipangidzo ce ciro kamare kana kuti ce kurangaridzira, cingaseenzeswa pa kunamata. Kunamata cidhori i kureremedza, kuda, kunamata, kupasa rukudzo cidhori kana kuti mufanikiso.​—Pis 115:4; Zvii 17:16; 1Ak 10:14.

• Cidumhaidzo ce mbuto yaipisirhwa rusenzi.

  Cidumhaidzo co Arka yo Citenderano, caiseenzeswa no mupristi mukuru pa kuwawaizira ngazi yo cibairo co citema pa Zuwa ro Kurekererhwa Zvitema. Soko iri mu Cihebheru, rinobva pa soko rokutanga recida kureya kuti “kufukidza (citema)” kana kuti pamweni “kufudza (citema).” Cidumhaidzo ici cainga cakaizwa no oro yakabamba no makerubhi mu dii rimwe na rimwe. Nguwa dzimweni cinondobhuiwa basi kuti “cidumhaidzo.”​—Eki 25:17-22; 1Mk 28:11; Ahe 9:5.

• Cierengo.

  Uku i kureketa ke ungwaru kana kuti ngano inopasa fundiso kana kuti inobudisa cokwadi cakadzika nge masoko padoko basi. Cierengo co mu Bhaibheri pamweni cinonga cecida kudzikisa nyaya kuti munhu azwisise kana kuti cinonga ciri cipare. Zvierengo zvimweni zvakagara masoko anonyanya kuziikanwa ngo kushora kana kupsvinyira.​—Mp 12:9; 2Pe 2:22.

• Cigrego; Mugrego.

  Cigrego ndi mureketero unorekethwa no anhu e ku Gresiya. Soko rokuti Mugrego rinoreya ngezve munhu wakabarhwa mu Gresiya kana kuti mu mhuri ye Cigrego. Mu Matarhwa e Cigrego e Cikristu, soko iri rinoreya zvakawanda, rinoreyawo anhu ese asiripi Adjudha kana aya anoteedzera tsika uye mireketero ye Cigrego.​—Jo 3:6; Ju 12:20.

• Cigubu ce kukandira vhinyu.

  I ciro caigadzirhwa no dehwe ro cinyama, cakaita hingana mbudzi kana bira, uye caiseenzeswa pa kuiga vhinyu. Vhinyu ipsva yaikandwa mu zvigubu zvipsva, ngokuti painopipira inodusa dióxido de carbono, zveciita kuti cigubuco citatamuke. Zvigubu zvipsva zvinotenda kutatamuka, asi zvigubu zvokare zvisikatendi kutatamuka zvinophatuka nge ndaa ye kupipira kunonga kaita vhinyu.​—Djs 9:4; Mt 9:17.

• Cikwata.

  Cikwata ce anhu caitsigira fundiso imweni kana kuti mutungamiriri eciteedzera fundiso dzaanotenda. Matii mairi e Cidjudha, Afarisi uye Asadhusi, aidainzwawo kuti zvikwata zve anhu. Anhu ainga asiripi Akristu aidainzawo Akristu kuti “cikwata” kana kuti “cikwata ce Anazareta,” pamweni aiaona hinga kuti ainga apanduka kubva mu Cidjudha. Nokuhamba ke nguwa, zvikwata zve apanduki zvakatanga kukura mu ungano ye Cikristu; “cikwata ca Nikorau” cinobhuiwa nge zvaco mu bhuku ra Zvakapangidzwa.​—Zvii 5:17; 15:5; 24:5; 28:22; Zva 2:6; 2Pe 2:1.

• Cikwata ce Aepikureu.

  Ainga ari ateeri e muzii we Cigrego waizwi Epikuro (341-270 K.A.A.). Aifundisa kuti cinangwa cikuru pa kurarama nge cekuti munhu apfadzwe no upenyu.​—Zvii 17:18.

• Cimutanda.

  Ciro caiseenzeswa pa kuphanica anhu. Amweni aisunga mirenje dze aya anonga apumhwa uye amweni aisunga moko pamwepo no mutsipa, ecikanda anhu pa mugariro unorhwadza.​—Dje 20:2; Zvii 16:24.

• Cinhekwe ce arabhasto.

  Iri i zina re zvinhekwe zvaikandirhwa mafuta anonuhwirira, izvona zvaiizwa no buwe raioneka dhuze no ku Arabhastroni, ku Edjipitu. Kakawanda kakhona, cinhekwe ici cainga cino muromo wakadodoka uye wakareba waiita kufunga, kuitira kuti mafutewo asapsveteke uye asamburuke. Buwe iri rakazoziikanwawo kuti Arabhasto.​—Mk 14:3.

• Cipangidzo.

  Ciro, ciito, mugariro, kana kuti kupangidzwa kusikazi kudjairika kunoseenza pa kupangidza ciro ciripo, kana kuti ciro cicauya.​—Mt 24:3; Zva 1:1.

• Cisviniro ce uvha.

  Kakawanda kakhona, ainga ari mathanki mairi aicerhwa nge mishobo yakasiyana-siyana pa buwe re karkariyo. Uvha dzaidzengenyeswa ku thanki rimwe rakakwirira, pedzepo muto wadzo waierera wecienda ku thanki riri ku dii rakaterera peciseenzeswa citubu caibatanidza mathanki mairi aya. Zvisviniro zve uvha zvaiseenzeswawo pa kugadzira azeiti. Soko iri rinoseenzeswa pa kuezanisira kana recida kubhuya ngezve matongero a Mwari.​—Zva 19:15.

• Citenderano.

  Ici i citenderano cinoizwa pakati pa Mwari no anhu kana kuti pakati pe anhu airi ecigondesana kuti acaita kana kuti aazoiti ciro. Nguwa dzimweni, munhu umwe basi ndiye waidikana kuita zvaanonga agondesa (nge mushobo uwona, citenderano caioniwa hingana gondeso kana kuti cipikirhwa). Nguwa dzimweni anhu airi ese, anodikana kuita maererano no zviya zvaanonga apangana (citenderano co anhu airi). Bhaibheri arindoreketi basi zvitenderano zvakaizwa na Mwari no anhu, asi rinoreketawo ngezve zvitenderano zvakaizwa pakati pe anhu, madzinza, nyika, kana kuti zvikwata zve anhu. Pa zvitenderano zvinokosha uye zvakatora nguwa yakareba maningi, ndi zviya zvakaizwa na Mwari na Abrahamu, na Dhavhidhi, no dzinza re Israeri (citenderano co Mutemo), uye no Israeri ya Mwari (citenderano cipsva).​—Ge 9:11; 15:18; 21:27; Eki 24:7; 2Mk 21:7; Ruk 22:29; Zvii 3:25; 2Ak 3:6; Ahe 8:6.

D

• Dangwe.

  Kakawanda kakhona, soko iri rinonga recireya mwana wokutanga wa baba, haiwa mwana wokutanga wa mai. Mu nguwa dze Bhaibheri, mwana we dangwe waireremedzwa maningi mu mhuri uye ndiye waisara ecitungamirira mhuri kana baba ake akafa. Soko iri rinoseenzeswawo pa cimwana cokutanga ce kono ce cinyama. Pane kugara basi dangwe ra Djehovha, Djesu ainga ari dangwe pa zvisikwa zvese uye dangwe kubva ku akafa.​—Ge 25:33; Eki 11:5; Ako 1:15; Zva 1:5.

• Dhekapori.

  Cikwata ce mathaundi e Gresiya, anoumbwa no mathaundi anokwana gumi (mu Cigrego, soko rokuti deʹka, rinonga recida kureya “gumi,” uye poʹlis, rinoreya “thaundi”). Uyewo rainga riri zina re mutanha we kumabvazuwa ke Bahari ro Garireya uye ke Murambo we Djorodhani, uko kainga kakawandira mathaundi akhona. Mu mathaundi aya, ndimona mainyanya kuizwa zve kutengeserana uye mainga makadzara no tsika dzo Cigrego. Djesu akadarika nge mutanha uu, asi apana pakatarhwa panopangidza kuti Djesu akavhakacira rimwe re mathaundi aya.​—Mt 4:25; Mk 5:20. Onai Apendi. A7 uye B10.

• Dhenariyo.

  Ii yainga iri mare ye ku Roma yo prata yairema magrama angakwana 3,85. Yainga ino mufanikiso wa Sezari ku dii rimwe. Yainga iri mare yaitambirhwa nge munhu paaiseenza zuwa rimwe uye i mare “yairiphwa musoho” waikumbirhwa Mudjudha umwe na umwe nge Aroma.​—Mt 22:17; Ruk 20:24.

• Dhiyabhurosi.

  Mu Matarhwa e Cigrego e Cikristu, iri i zina rinoenderana no mabasa a Sathani, irona rinoreya munhu “Unoreya Amweni.” Zina iri rakapaswa Sathani ngokuti ndiena mureyi mukuru uye mupumhi unonyepa ngezva Djehovha, ngezve soko Rake rakanaka, uye ngezve zina Rake cena.​—Mt 4:1; Ju 8:44; Zva 12:9.

• Djakobo.

  Mwana wa Izaki na Rabheka. Nokuhamba ke nguwa Mwari akamupasa zina rokuti Israeri, uye iyena wakagara tsekuru we anhu e Israeri (aidainzwawo Aisraeri uye nokuhamba ke nguwa akadainzwawo kuti Adjudha). Djakobo wainga ari baba e ana 12, ekuti ari pamwepo anewo, akaumba madzinza 12 e dzinza ro Israeri. Zina rokuti Djakobo rakarumbwa reciseenzeswa recida kureya dzinza uye anhu e Israeri.​—Ge 32:28; Mt 22:32.

• Djehovha.

  Bhaibheri re Nyika Ipsva re Matarhwa Macena rinoseenzesa zina rokuti “Djehovha” kanokwana kuita 237 mu Matarhwa e Cigrego e Cikristu. Sananguro yekukanda zina iri ra Mwari, yakatsamira pa zvinoteera:

  1. 1. Matarhwa e Cihebheru aiseenzeswa mu mazuwa a Djesu no aphostori ake ainga ano Tetagrama (kana kuti, zina ra Mwari reciimirirhwa no Mabhii marongomuna e Cihebheru יהוה) mukati me tsamba.

  2. 2. Mu mazuwa a Djesu no afundi ake, Mabhii marongomuna anoimirira zina ra Mwari, aionekawo mu turukiro ye Cigrego yo Matarhwa e Cihebheru.

  3. 3. Matarhwa e Cigrego e Cikristu, awona anobhuya kuti Djesu kajinji aiseenzesa zina ra Mwari uye airiziisa ku anhu amweni.​—Ju 17:6, 11, 12, 26.

  4. 4. Zvecioneka kuti Matarhwa e Cigrego e Cikristu akafemerhwawo, awona anotunhudzira dii re Matarhwa e Cihebheru. Ndiyo ndaa, kungara-ngara ke zina ra Djehovha, zvaizopangidza musiyano no zvainga zvakatarhwa kare.

  5. 5. Zina ra Mwari rinooneka rakagurisirhwa mu Matarhwa e Cigrego e Cikristu.​—Zva 19:1, 3, 4, 6.

  6. 6. Matarhwa e kutanga e Cidjudha, anopangidza kuti Akristu e Cidjudha, aiseenzesa zina ra Mwari mu matarhwa awo.

  7. 7. 7. Apsvakisisi amweni e Bhaibheri, anotendera kuti zina ra Mwari rinooneka mu Matarhwa e Cigrego e Cikristu, rakatorhwa mu mbuto yaioneka zina ra Mwari mu Matarhwa e Cihebheru.

  8. 8. Mabhaibheri e mireketero inodarika 100, ano zina ra Mwari mu Matarhwa e Cigrego e Cikristu.

  Apana mubvunzo kuti pano zvikonzero zviri pamhene zvokukandazve zina ra Mwari rokuti Djehovha mu Matarhwa e Cigrego e Cikristu. Izvi ndizvo kamare zvakaizwa no aturikiri e Bhaibheri re Nyika Ipsva. Awona anoreremedza maningi zina ra Mwari uye anothya kubvisa ciro cipi haco cainga ciri mu Matarhwa ekutanga.​—Zva 22:18, 19.

• Djira re Mbuto Cena.

  Kainga kuno djira raisiyanisa Mbuto Cena no Mbuto Yakacenesesa mu tabhernakuro kutobatanidzawo no mu tempro. Djira irona, rainga rakarungama maningi uye rainga rakarukirhwa makerubhi.​—Eki 26:31; 2Mk 3:14; Mt 27:51; Ahe 9:3.

• Djoki.

  Mutanda waikandwa pa maphewa e anhu no mitoro yainga iri ku matii mairi kana kuti djoki raikandwa pa mutsipa pe zvinyama zviiri (maka-maka n’ombe) kuti dzikweye zviro zvo kurima nazvo kana kuti ngoro. Kajinji aranda aiseenzesa djoki kuti athware mitoro dzinorema. Ndiyo ndaa, djoki raiseenzeswa pa kuezanisira kuda kureya uranda kana kudzikanda pasi po munhu umweni, uyewo kudzvinyirirhwa kana kutambudzwa. Kubvisa uye kugura djoki zvaireya kusudzunurhwa pa uranda uye pa kubathwa zvakashata.​—Re 26:13; Mt 11:29, 30.

• Djudha.

  Mwana wecirongomuna wa Djakobo waakabara no mukadzi wake Reya. Paainga aakuda kufa, Djakobo wakaphorofita kuti mambo unokosha uye waizotonga nokusikaperi waizobva ku ana a Djudha. Djesu paakauya hinga munhu, wainga ari mwana wakabarhwa mu dzinza ra Djudha. Zina irona rinoseenzeswa recireya dzinza, uye nokuhamba ke nguwa rakazoseenzeswawo recireya umambo we Djudha.​—Ge 29:35; 49:10; Ahe 7:14.

• Dziya ro muriro.

  Mbuto ye kuezanisira “inopisa no muriro uye enxofre,” inodainzwawo kuti “rufu rocipiri.” Ashaishi asikacinyuki, Dhiyabhurosi, kutobatanidzawo rufu, uye Guwa (kana kuti, Hadhesi) zvinokhandirhwa mu dziya iri. Sezvo cisikwa ce kumwiya, rufu uye Hadhesi zvisikakwanisi kupiswa no muriro, hino dziya iri ringakwanisa basi kugara dziya ro kuezanisira, haiwa mbuto ye kutambudzwa nokusikaperi, asi ye kutsakatiswa nokusikaperi.​—Zva 19:20; 20:14, 15; 21:8.

• Drakima.

  Mu Matarhwa e Cigrego e Cikristu, soko iri rinoreya mare yo prata ye ku Gresiya, yairema magrama 3,4 mu nguwa iyona.​—Mt 17:24.

E

• Etiyopiya.

  Nyika ye kare yaigara ku dii ro katemaidumba ke Edjipitu. Raibatanidza mutanha we katemaidumba ke Edjipitu ye mazuwa ano uye dii rimwe ro kakutsi ke Sudhau ye mazuwa ano.​—Zvii 8:27.

• Eufrati.

  Murambo wakareba uye unonyanya kukosha we murambo we pakati pe katemaidumba no kumabvazuwa ke Aziya, uye ndi umwe we murambo wakareba maningi pa mirambo miiri dze ku Mezopotamiya. Uwona unotanga kurekethwa pana Genesi 2:14 hinga umwe we murambo pa mirambo dze Edheni. Kakawanda kakhona waidainzwa kuti “Murambo.” (Ge 31:21) Uwona wainga uri ku mugano ke kakutsi ke mitanha yakapaswa Aisraeri.​—Ge 15:18; Zva 9:14; 16:12.

F

• Faraoo.

  Iri i zina ro kureremedza raipaswa madzimambo e ku Edjipitu. Mafaraoo mashanu anorekethwa mu Bhaibheri ndi (Sizaki, So, Tiraka, Neko, uye Ofra), asi mazina e Mafaraoo amweni kubatanidza aya akatonga mu nguwa ya Abrahamu, Mozesi, uye Zuzee, aarekethwi nge zvawo.​—Eki 15:4; Aro 9:17.

G

• Gehena.

  Iri i zina ro Cigrego ro Bani ro Hinoni, rainga riri pakati pe kakutsi uye katemaidumba ke Djerusarema ro kare. (Dje 7:31) Irona rakabhuiwa ngo uphorofita kuti raizogara mbuto yaizopsveterhwa mitumbi. (Dje 7:32; 19:6) Apana cinopangidza kuti zvinyama kana anhu aikhandirhwa mu Gehena kuti apiswe ari apenyu kana kutambudzwa. Hino, aringaimiriri mbuto isikaoneki inopisirhwa mwiya yo anhu no muriro nokusikaperi. Kusiya izvona, soko rokuti Gehena rakaseenzeswa na Djesu no afundi ake kuti aezanisire kuphanicwa kunozwi “rufu rocipiri,” kana kuti, kutsakatiswa zvacose.​—Zva 20:14; Mt 5:22; 10:28.

• Gonje.

  Zina iri rinoseenzeswa pakuda kureya ngezve mushobo umweni we mauswa akakora anooneka mu mbuto dzino mvura. Kakawanda kakhona, soko iri rinoreya gonje re umambo (Arundo donax).​—Mt 27:29; Zva 11:1.

• Guwa.

  Parinotanga kutarhwa no bhii doko, rinonga recida kureya mbuto inooneka no madziso kana kuti guwa re munhu umwe basi. Parinotanga kutarhwa no bhii guru, rinonga recida kureya guwa re anhu ese. Masoko anoenderana no soko iri nge ekuti “Sheori” mu Cihebheru uye “Hadhesi” mu Cigrego. Mu Bhaibheri, rinorekethwa hingana mbuto ye kuezanisira kana mugariro we zviro wekuti munhu aangakwanisi kuita basa kana kurangarira.​—Ge 47:30; Mp 9:10; Mt 27:61; Zvii 2:31.

• Gwanza.

  Soko rinoseenzeswa nge mushobo we kuezanisira mu Matarhwa, recida kureya maitiro kana kuti muhambiro unotenderhwa kana kuti usikatenderhwi na Djehovha. Aya akagara ateeri a Djesu Kristu aizwi nge e “Gwanza re Cokwadi,” kureya kuti airarama maererano no kutenda muna Djesu Kristu, eciteedzera muezaniso wake.​—Zvii 19:9.

• Gwiyo.

  Buwe rakaita bhororindo raikandwa pamusoro pe buwe rimweni rakaezana uye raiseenzeswa pa kukwiya tsangu dze zvirimwa kuti zvigare ufu. Muti waikandwa pakati po buwe ro pasi raiseenzeswa kuti ribate buwe ro pamusoro. Mu nguwa dze Bhaibheri, mu mizi dzakawanda anakadzi aiseenzesa gwiyo raaiseenzesa no nyara. Mutemo wa Mozesi wairambidza kutora gwiyo raiseenzeswa no nyara hinga mushobo we kubatisa pinyoro kana kuti kutora buwe re pamusoro re mhuri, ngokuti zvekurhya zve zuwa no zuwa zvawo zvaibva pa gwiyo iri raiseenzeswa no nyara. Magwiyo makuru akaezana pa kuumbwa aihambiswa no zvinyama.​—Dhe 24:6; Mk 9:42.

H

• Hadhesi.

  Soko re Cigrego rinoenderana no soko re Cihebheru rokuti “Sheori.” Rinoturikirhwa kuti “Guwa” (recitanga no bhii guru), kuitira kuti zvipangidze kuti pari kurekethwa ngezve guwa re anhu ese.​—Onai pakazwi GUWA.

• Herme.

  Uu ndi mwari we Agrego, wainga ari mwana wa Zeu. Sezvo mwari uu waioneka hinga mutumwa we anamwari uye mwari we uzii we kukwanisa kureketa, Pauro wakadainzwawo kuti Herme paainga ari ku Ristra.​—Zvii 14:12.

• Herodhi.

  I zina ro mhuri ye madzimambo aitonga Adjudha aigadzwa no Aroma. Herodhi Mukuru, wakanyanya kuziikanwa ngo kuwakisazve tempro yo Djerusarema uye ngo kupasa mutemo kuti auraise ana adoko eciedza kuuraya Djesu. (Mt 2:16; Ruk 1:5) Herodhi Arkerau na Herodhi Antipa, ainga ari ana a Herodhi Mukuru, akagadzwa kuti atonge mbuto dzimweni dzaitongwa na baba awo. (Mt 2:22) Antipa wainga ari umwe we madzimambo marongomuna, wainyanya kuziikanwa kuti “mambo,” iyena wakatonga pa nguwa ye makore matatu no hafu ye kuparidzira ka Kristu, uye wakaenderera mberi ecitonga dakara pa nguwa yakatarhwa pana Zviito 12. (Mk 6:14-17; Ruk 3:1, 19, 20; 13:31, 32; 23:6-15; Zvii 4:27; 13:1) Mumasure mekutonga kake, Herodhi Agripa wokutanga, muzukuru wa Herodhi Mukuru, wakauraiwa nge ngirozi ya Mwari mumasure me kutonga ke nguwa doko. (Zvii 12:1-6, 18-23) Mwana wake waizwi Herodhi Agripa wocipiri, wakatonga pa mbuto ya baba ake, dakara pa nguwa yekuti Adjudha akapandukira umambo we Roma.​—Zvii 23:35; 25:13, 22-27; 26:1, 2, 19-32.

• Hure.

  Mwanakadzi anoita zve pamaponde no munhu waasikazi kucata naye, maka-maka nge kuda mare. (Soko re Cigrego rokuti porʹne, rakaturikirhwa kuti “hure,” rinobva pa soko rinoreya kuti “kutengesa.”) Bhaibheri rinobhuyawo ngezve mahure e anarume. Uhure wainga usikatenderhwi no Mutemo wa Mozesi, uye mare yo uhure yainga isikatenderhwi kuita mupiro mu mbuto cena ya Djehovha, kusiyana no zvaiizwa ngo anhu ainga asikanamati zvezvirokwazvo, awo aiseenzesa mahure e anakadzi no mahure e anarume mu tempro kuti aone mare. (Dhe 23:17, 18; 1Md 14:24) Bhaibheri rinoseenzesawo soko iri zvokuezanisira, recida kureya anhu, madzinza, kana kuti masangano anodziti anamati a Mwari, asi ecibatanidzwawo mu zviro zvinocokuita no kunamata zvidhori. Hinga muezaniso, mubatanidzwa we magereja unodainzwa pana Zvakapangidzwa kuti “Bhabhironi Guru” unopanganidzwa hinga hure, ngokuti rinotsigira utongi we nyika ino kuti rione simba uye upfumi.​—Zva 17:1-5; 18:3; 1Mk 5:25.

I

• Iririkomu.

  I provhinsiya ye Roma inooneka pakati pe kakutsi no kumabvazuwa ke Gresiya. Azvinyasi kuziikanwa kuti Pauro wakaparidzira ku Iririkomu, asi pa basa rake re kuparidzira, iyena wakaita rhwendo dakara ku mbuto iyona.​—Aro 15:19. Onai Apendi. B13.

• Isopo.

  Iri i pfiba rino nhai no masakani akapfawa, raiseenzeswa pa kuwawaizira ngazi kana kuti mvura pa nguwa ye kucenesa. Pamweni rainga riri pfiba rinozwi manjerona (mu Cigrego, Origanum maru; Origanum syriacum). Isopo inorekethwa pana Juau 19:29, pamweni inoreya manjerona akasungwa pa nhai kana pa gonje (mu Cigrego, Sorghum vulgare), sezvo gonje re isopo rainga rakareba uye raikwanisa kugumisa esponja ino vhinyu pa muromo wa Djesu.​—Ahe 9:19.

• Israeri.

  Iri i zina rakapaswa Djakobo na Mwari. Pedzepo rakaseenzeswa ku ana ake ese. Ana a Djakobo ese 12 kajinji aidainzwa ana e Israeri, nyumba ya Israeri, anhu e Israeri, anarume e Israeri, kana kuti Aisraeri. Zina rokuti Israeri raiseenzeswawo recida kureya umambo we madzinza gumi e kakutsi, waiita cinyamugano no katemaidumba ke umambo we Djudha, uye nokuhamba ke nguwa, soko iri rakaseenzeswawo ku Akristu akadzodzwa, “Israeri ya Mwari.”​—Ag 6:16; Ge 32:28; Zvii 4:10; Aro 9:6.

K

• Kamuti kanowawa.

  Zvimiti zvakasiyana-siyana zvinowawa uye zvinonuhwirira maningi. Pana Zvakapangidzwa 8:11, “kamuti kanowawa” kanoimirira zviro zvinowawa kana kuti zviro zvino vheneno.

• Kardheya; Akardheu.

  I nyika uye anhu aigara mu mbuto inoparadzana no murambo we Tigre no we Eufrate. Mu nguwa ye kare, thaundi guru ro Akardheu rainga riri Uri, thaundi rakabarirhwa Abrahamu.​—Zvii 7:4.

• Koro.

  Mudida we kupima nawo zviro zvakaoma kana zviro zvakaita mvura-mvura. Uwona unopinda maritru anokwana 220, maererano no kuwanda ke mudida we bhato.​—1Md 5:11; Ruk 16:7, masoko e pasi.

• Kristu.

  Zina ra Djesu ro kureremedza, rinobva pa soko re Cigrego rokuti Khri·stosʹ, rinoenderana no soko re Cihebheru, parinoturikirhwa rinoda kubhuya “Mesiya,” kana kuti “Mudzodziwa.”​—Mt 1:16; Ju 1:41.

• Kubhiti.

  Mudida unoezana no kureba kakaita moko we munhu kubva pa cikokora dakara panoperera cikunwe co pakati. Aisraeri ainyanya kuseenzesa kubhiti rainga rakareba masentimetro angakwana 44,5. Asi aiseenzesawo kubhiti rakakura rainga rakapamhama hinga nyara kana kudarika uye rainga rakareba masentimetro angakwana 51,8.​—Ge 6:15; Mt 6:27; Ruk 12:25; Zva 21:17. Onai Apendi. B14.

• Kubvenga.

  Kubvenga kana kuponda eciseenzesa mushamu wakasungwa-sungwa kana kuti uno minzwa mu muceto.​—Ju 19:1.

• Kucema.

  Mushobo we kupangidza kurhwadziwa nge ndaa ye kufirhwa no munhu kana kuti ngo dambudziko rimweniwo. Mu nguwa dze Bhaibheri, zvainga zvakadjairika kucema ke nguwa yakareba. Pane kucema no izwi guru hinga cipangidzo ce kurhwadziwa, zvainga zvakadjairika kupfeka macira e mariro, kudzikanda marota mu musoro, kumwesa macira, uye kudziponda pa diti. Nguwa dzimweni, pa mariro paidainzwa anhu aiita basa re kucema kuti auye kuzocema.​—Est 4:3; Mt 11:17; Mk 5:38; Ju 11:33; Zva 21:4.

• Kucena.

  Mu Bhaibheri, soko iri arireyi basi kucena mu mwiri, asi rinoreyawo kurumbwa usina caunopumhwa kana kuti pakashatiswa uye usikazi kusvipa kana kushatiswa pa tsika dzako kana kuti pa kunamata. Soko irona rinoreyawo kucenesa zvinonga zvamboshatiswa kana kuti zvinonga zvambosvipiswa. Mu Mutemo wa Mozesi, soko iri rinoreya kunyasa kudzicenesa kamare peciseenzeswa mutemo uwona.​—Re 10:10; Pis 51:7; Mt 8:2; 1Ak 6:11.

• Kucinyuka.

  Mu Bhaibheri, zvinoreya kucinja maitiro zvecienderana no kutsukwara nge ndaa ye mararamiro e kare, nge zvishaishi, uye nge ndaa ye zviro zvaidikana kuizwa asi azvizi kuizwa. Kucinyuka ke zvirokwazvo kunobara mucero, kucinja maitiro.​—Mt 3:8; Zvii 3:19; 2Pe 3:9.

• Kudzipira no mwoyo wese kuna Mwari.

  Kureremedza Djehovha Mwari, kumunamata, uye kumuseenzera wakagondeka ku ucangamire wake.​—1Ti 4:8; 2Ti 3:12.

• Kudzodza.

  Soko iri rakabva mu Cihebheru uye rinoreya “kudzodza no zviro zvakaita mvura-mvura.” Paidururirhwa mafuta munhu kana ciro hinga cipangidzo cekuti ciroco kana munhuwo wasanangurhwa kuti aite basa rinokosha. Mu Matarhwa e Cigrego e Cikristu, soko iri rinoseenzeswazve pa kudururhwa ke mwiya mucena ku aya akasanangurhwa kuti agare no kariro ye kuenda kudenga.​—Eki 28:41; 1Sa 16:13; Ruk 4:18; Zvii 10:38; 2Ak 1:21.

• Kugadzirira.

  Zina re zuwa raitangira Sabudu. Pa zuwa irona, Adjudha aigadzirira zvaidiikanwa pa Sabudu. Zuwa iri raipera pa kudoka ke zuwa, rekuti zvino tinoridainza kuti Cishanu uye kaitotangawo Sabudu. Mazuwa e Cidjudha aitangira paibira zuwa dakara paibira zuwa ro zuwa rimweni.​—Mk 15:42; Ruk 23:54.

• Kuoneka.

  Mu Matarhwa amweni e Cikristu e Cigrego, soko iri rinoreya kuoneka ka Djesu Kristu hinga Mambo kubvira paakagadzwa kudenga hinga Mambo Mesiya uye kunorumbwa kuriyo mu mazuwa e kupedzesera e mugariro we zviro we nyika ino. Kuoneka ka Kristu akureyi kundouya no kuhwirira nokukasika, asi kunoitika ke nguwa yakareba yakagadzwa.​—Mt 24:3.

• Kupauka pa kunamata.

  Mu Cigrego, soko iri rinozwi (a·po·sta·siʹa) irona rinobva pa soko rinoda kureya kuti “kuparadzana no ciro.” Soko iri rinoda kureya “kusiya, kana kupanduka.” Mu Matarhwa e Cigrego e Cikristu, masoko ekuti “kupauka pa kunamata” anoseenzeswa maka-maka ecida kureya ngezve aya anosiya kunamata ke cokwadi.​—Zvie 11:9; Zvii 21:21; 2At 2:3.

• Kupera ke nyika.

  Masoko aya, anopangidza nguwa inotitora dakara pa kupera ke mugariro uno we zviro unotongwa na Sathani. Nguwa ii, ndiyo imweyo no nguwa ye kuoneka ka Kristu. Dzecitumwa na Djesu, ngirozi “dzinozoparadzanisa akashata no akanaka. (Mt 13:40-42, 49) Afundi a Djesu aida kuziya kuti “kupera ke nyika” kaizoitika riini. (Mt 24:3) Asati akwira kudenga, Djesu akagondesa afundi ake kuti aizonga anawo dakara pa nguwa ii.​—Mt 28:20.

• Kupika.

  Masoko e gondeso ekuti ici i cokwadi, kana kuti i gondeso yekuti munhu acaita here kana kuti aaiti ciro. Kakawanda kakhona inocokuita no mhiko ye kuitira munhu akakwirira, maka-maka kuna Mwari. Djehovha akaita mhiko kuti abambise citenderano cake kuna Abrahamu.​—Ge 14:22; Ahe 6:16, 17.

• Kupura.

  Kusiyanisa tsangu pa zvimuti uye pa marara; kupura uku kainga kuri kuponda no muti, kana zviri zviro zvakawanda paiseenzeswa ciro cakagadzirhwa kuti ciite basa irona. Nguwa dzimweni ciro caikweiwa no zvinyama. Ciro ici caipinda ngo padenga po tsangu yakabarariswa pa mbuto ye kupurira.​—Re 26:5; Isa 41:15; Mt 3:12.

• Kurarira ka Tenzi.

  Uku i kurhya kunobatanidza pau isina mbiriso uye vhinyu hinga cipangidzo co mwiri uye ngazi ya Kristu; cirangaridzo ce kuedzurira rufu ra Djesu. Maererano no Matarhwa, kucengeta ciitiko ici i mutemo ku Akristu, icona cinodainzwawo kuti “Cirangaridzo.”​—1Ak 11:20, 23-26.

• Kushaisha; Cishaishi.

  Kuposha mutemo wakagadzwa; ciito ce kuposha mutemo. Mu Bhaibheri, kushaisha kunoreyawo “citema.”​—Pis 51:3; Aro 5:14.

• Kusununguka; Kusudzunurhwa.

  Mu nguwa yaitonga Aroma, “munhu akasununguka” aibarhwa no citenderhwa co kugara Muroma. Nge dii rimweni, “munhu wakasudzunurhwa” wainga ari munhu akasudzunurhwa pa uranda. Munhu paaisudzunurhwa pa uranda zviri pa mutemo, waitambira citenderhwa ce kugara Muroma, asi wainga asina citenderhwa ce kugara no ubaba pa zvematongerhwe e nyika. Kusudzunurhwa uku kudai kainga kusikaripi zviri pa mutemo, uya wainga ari muranda wainga asikatambiri zvitenderhwa zvese zve kugara Muroma.​—1Ak 7:22.

• Kutambudzika kukuru.

  Soko re Cigrego rokuti “kutambudzika,” rinonga recida kureya kunetseka kana kuti kushuphika kunokonzerhwa no kubambidzirhwa nge ndaa ye mugariro we zviro. Djesu akareketa ngezve “kutambudzika kukuru” kusati kamboitika kaizouira Djerusarema, uye mu nguwa ye mberi kutambudzika ikona kaizouira anhu ese, uye ikona kunonga kunocokuita no ‘kuuya kake mu rukudzo.’ (Mt 24:21, 29-31) Pauro wakareketawo ngezve kutambudzika uku hinga ciitiko ce unatsi ca Djehovha kuno “aya asikazwiri Mwari, uye aya asikazwiri masoko akanaka” anoparidzwa ngezva Djesu Kristu. Mu kapituro 19 ya Zvakapangidzwa, Djesu anobhuiwa ecitungamirira anyahondo e kudenga pa kurhwisa “cikara no madzimambo e pa nyika pamwepo no anyahondo awo.” (2At 1:6-8; Zva 19:11-21) “Anhu akawanda maningi” anopona pa kutambudzika uku. (Zva 7:9, 14)​—Onai pakazwi AMAGEDHONI.

• Kutsanya.

  Kusiya kurhya ke kacinguwa. Aisraeri aitsanya pa Zuwa ro Kurekererhwa Zvitema, mu nguwa ye matambudziko uye paaida nhungamiriro ya Mwari. Adjudha aitsanya karongomuna pa gore kuitira kuti aedzurire matambudziko aakabatana nawo mu upenyu wawo. Akristu aabambidzirhwi kutsanya.​—Esd 8:21; Isa 58:6; Mt 4:2; 9:14; Ruk 18:12; Zvii 13:2, 3; 27:9.

• Kutsanzikira nyara.

  Paikandwa nyara pamusoro pe munhu kuti agadzwe kuti aite basa, kukomborera, kuporesa, kana kupasa cipo ce mwiya mucena.​—Nu 27:18; Zvii 19:6; 1Ti 5:22.

• Kusvipa.

  Zvinoreya munhu unopsvina mu mwiri wake kana kuti asikateedzeri tsika dzakacena. Asi mu Bhaibheri, soko iri kajinji rinoreya ciro cisikatenderhwi kana kuti ciro cakasvipa maererano no Mutemo wa Mozesi. (Re 5:2; 13:45; Mt 10:1; Zvii 10:14; Aef 5:5)​—Onai pakazwi RUCENO.

• Kutuka.

  Kuthyisidzira kana kuti kureketa zvakashata ngezve munhu kana kuti ciro cimweniwo. Kutuka, kajinji kakhona i masoko akashata anonga ecirekethwa ku munhu kana kuti zvakashata zvicaitika ku munhuwo. Kana kukaizwa na Mwari, kana no munhu akapaswa citenderhwa, kutuka uku kunokosha uye kuno simba re uphorofita.​—Ge 12:3; Nu 22:12; Mk 11:21; Zvii 23:12; Aro 12:14; Ag 3:10.

M

• Madhimoni.

  I zvisikwa zve kumwiya zvakashata, zvino simba kudarika ro anhu. Pana Genesi 6:2, zvisikwa izvi zvinozwi “ana a Mwari we zvirokwazvo” uye pana Djudha 6 zvinozwi “ngirozi.” Ngirozi idzi adzizi kusikwa dzeciita zviro zvakashata; idzona dzakagara azondi a Mwari, ngokuti adzizi kumuzwira mu mazuwa a Nowa uye dzakabatana na Sathani pa kupandukira Djehovha.​—Dhe 32:17; Ruk 8:30; Zvii 16:16; Tg 2:19.

• Maira.

  I mudida we mukuwo unorekethwa kamwe basi mu Matarhwa okutanga e Matarhwa e Cigrego e Cikristu, pana Mateu 5:41. Pamweni inoda kureya ngezve maira yo Ciroma yaikwana mametru 1479,5.​—Onai Apendi. B14.

• Makerubhi.

  Idzi i ngirozi dze pamusoro-soro dzinoita mabasa akasiyana no e ngirozi dzimweni. Idzona dzakasiyana no maserafi.​—Ge 3:24; Eki 25:20; Isa 37:16; Ahe 9:5.

• Makuwa e anoedzurirhwa.

  Mbuto yaikotswa munhu wafa. Soko iri rinobva pa soko re Cigrego rokuti mne·meiʹon, rinoreya “kuedzurira,” recipangidza kuti munhu akafa acaedzurirhwa.​—Ju 5:28, 29.

• Makwiza.

  Zvirombo zvaifuruka kuenda ku mutanha umweni zvakawanda. Mu Mutemo wa Mozesi izvona zvaioniwa hinga zvakacena kuti zvirhyiwe. Makwiza akawanda airhya zvese zvaaiona mu gwanza, zvecitsakatisa zviro zvakawanda, zvaioneka hinga dambudziko.​—Eki 10:14; Mt 3:4.

• Manaa.

  Zvokurhya zvainyanya kurhyiwa no Aisraeri paainga ari ku renje ke makore 40. Aizvipaswa na Djehovha. Djehovha aiita cishamiso ce kubudisa manaa pasi po beto macibesi ese, kusiya mu Sabudu basi. Aisraeri paakaaona ke kutanga, akati: “Zvinyi izvi?” kana kuti, mu Cihebheru, “man huʼ?” (Eki 16:13-15, 35) Djesu akabhuyawo ngezve manaa nge mushobo we kuezanisira.​—Ju 6:49, 50.

• Mapere; Nyamapere.

  Nhenda inothyisa yo ganda. Mu Matarhwa, nhenda ii inozwi mapere andiyopi yo mazuwa ano inoziikanwa no zina iri, ngokuti iyona yainga isikabati basi anhu, asi yaibatawo macira uye nyumba. Munhu ano nhenda ii yo mapere anozwi “nyamapere.”​—Re 14:54; Ruk 5:12.

• Marara.

  Mateko anosara panopurhwa kana kukurumurhwa tsangu. Marara anoseenzeswa ecida kuezanisira zviro zvisikabetseri uye zvisikadikanwi.​—Pis 1:4; Mt 3:12.

• Masedhoniya.

  Mutanha we kakutsi ke Gresiya wakagara no mbiri pa nguwa yokuti Areshandre Mukuru waitonga uye mutanhewo wainga wakasununguka dakara pawakakundwa nge Aroma. Muphostori Pauro paakavhakacira Europa ke kutanga, Masedhoniya yainga iri provhinsiya ye Roma. Pauro wakavhakacira mutanha uu katatu kese. (Zvii 16:9)​—Onai Apendi. B13.

• Masoko akanaka.

  Mu Matarhwa e Cigrego e Cikristu, aya i masoko akanaka e Umambo wa Mwari uye e kuponesa peciseenzeswa kutenda muna Djesu Kristu.​—Ruk 4:18, 43; Zvii 5:42; Zva 14:6.

• Matarhwa.

  Matarhwa macena e Soko ra Mwari. Soko iri rinooneka basi mu Matarhwa e Cigrego e Cikristu.​—Ruk 24:27; 2Ti 3:16.

• Mazuwa e kupedzesera.

  Masoko aya no amweni akaita hingana “pa kupera ke mazuwa,” anoseenzeswa mu uphorofita uri mu Bhaibheri zvecida kureya nguwa yekuti zviro kana kuti zviitiko zvaakuda kuguma ku magumo azvo. (Eze 38:16; Dha 10:14; Zvii 2:17) Zvecienderana no zvinonga zvecibhuiwa no uphorofita wakhona, zvingakwanisa kureya nguwa ye makore padoko kana kuti ye makore akawanda. Bhaibheri rinoseenzesa masoko aya, maka-maka recida kureya “mazuwa e kupedzesera” e mugariro uno we zviro, pa nguwa ye kuuya ka Djesu asikaoneki no anhu.​—2Ti 3:1; Tg 5:3; 2Pe 3:3.

• Mbiriso.

  I ciro caikandwa mu mukanyiwa kana kuti mu zviro zvakaita mvura-mvura kuti zvifufume; kakawanda kakhona zvinoreya maka-maka mukanyiwa we kare wakafufumiswa uye wocengethwa. Soko iri rokuti mbiriso kakawanda kakhona rinoseenzeswa mu Bhaibheri hinga cipangidzo ce citema uye ce udzvinyiriri. Rinoseenzeswa recida kupangidza kukura ke ciro cisikaoneki cinobararika mu matii ese.​—Eki 12:20; Mt 13:33; Ag 5:9.

• Mbuto Cena.

  Mbuto yokutanga uye yakakura yo tabhernakuro uye yo tempro, yakasiyana no mbuto yo mukati, yaizwi Mbuto Yakacenesesa. Mu Mbuto Cena yo tabhernakuro maigara cigadziko ce makandiyero ce oro, artari yo oro yo kupisira rusenzi, meza ino pau dzo kupira, uye midziyo minganani yo oro; mu Mbuto Cena yo tempro, maigara artari yo oro, zvigadziko gumi zve makandiyero zve oro, uye meza gumi dzainga dzino pau dzo kupira.​—Eki 26:33; Ahe 9:2.

• Mbuto yakacena.

  Kakawanda kakhona, soko iri rinoreya tabhernakuro kana kuti tempro mu Djerusarema. Soko iri rinoseenzeswawo recireya mbuto inogarhwa na Mwari kudenga.​—Eki 25:8, 9; 2Md 10:25; 1Mk 28:10; Zva 11:19.

• Mbuto Yakacenesesa.

  Mbuto yo mukati yo tabhernakuro uye yo tempro yaigara Areka Yocitenderano; iyona yaidainzwawo Mbuto Cena yo Acena. Maererano no Mutemo wa Mozesi, mupristi mukuru basi ndiye waitenderhwa kupinda mu Mbuto Yakacenesesa, uye iyena ndiye basi waipinda kamwe pa gore pa Zuwa ro Kurekererhwa Zvitema.​—Eki 26:33; Re 16:2, 17; 1Md 6:16; Ahe 9:3.

• Mbuto ye kupurira.

  Mbuto yakanaka, maka-maka pa mbuto ye pamusoro panoponda mhepo paipurirhwa zviro. (Mt 3:12)​—Onai pakazwi KUPURA.

• Mesiya.

  Soko rakabva pa soko re Cihebheru rinoreya kuti “akadzodzwa” kana kuti “mudzodziwa.” Soko iri rakaezana no rokuti “Kristu,” iro rakabva pa soko re Cigrego.​—Dha 9:25; Ju 1:41.

• Mhiko.

  Gondeso inoizwa no munhu kuna Mwari no mwoyo wese ye kuita ciro, kupasa mupiro kana cipo, kupinda mu basa, kana kuti kutama kuita zviro zvinganani zvekuti azvizi kushata. Kuita mhiko kainga kuno simba rimwero no kupika.​—Mt 5:33.

• Midjenya.

  Zvimapuwe kana kuti zvimatimbu zvidoko zve tabwa kana zve buwe zvaiseenzeswa pa kuita zvisananguro. Izvona zvaikandwa kunoperera djira kana mu ciro uye pedzepo zvaivhuruzwa. Kuya kacaimbwerera kana kuti uya waifurhwa naco, ndiyena wainga wasanangurhwa. Kakawanda kakhona, izvi zvaiizwa no munamato.​—Mt 27:35; Zvii 1:26.

• Midziyo ye kupisira rusenzi.

  Ii yainga iri midziyo ye oro, yo prata uye yo kobre, yaiseenzeswa mu tabhernakuro uye mu tempro kuti ipisirhwe rusenzi uye kubvisa masimbe e pa artari yaipisirhwa zvibairo uye usaru unonga wapera kupsva pa cigadziko ce makandiyero ce oro.​—Eki 37:23; 2Mk 26:19; Ahe 9:4.

• Mina.

  Mu Matarhwa e Cigrego e Cikristu, mina yaikwana 100 drakima uye yairema magrama 340.​—Ruk 19:13. Onai Apendi. B14.

• Mira.

  Mutotozvi unonuhwirira waibuda pa makwenzi akasiyana-siyana kana pa miti midoko. Mira cainga ciri cimwe ce zviro ce mafuta macena e kudzodza. Yaiseenzeswa kuti inuhwiririse zviro, macira, kana kuti kama, uye yaibatanidzwa pa mafuta e kuseenzesa pa kutowa kana kudzora mwiri. Mira yaiseenzeswawo kuti igadzirire mitumbi kuti ikotswe.​—Eki 30:23; Zvie 7:17; Mk 15:23; Ju 19:39.

• Moroki.

  Uu ndi mwari we Aamoni; pamweni wainga ari umwewo unozwi Markamu, Mirkomu, uye Moreki.​—Zvii 7:43.

• Mubati anoseenzera.

  Soko iri rinoturikirhwa kubva pa soko re Cigrego rokuti di·aʹko·nos, zvokuti kakawanda kakhona rinoturikirhwawo kuti “mubetseri” kana kuti “museenzi.” Soko rokuti “mubati anoseenzera” rinoreya munhu anoseenza hinga mubetseri we dare re akuru e ungano. Iyena unodikana kuita zvinorekethwa no Matarhwa kuti akwaniriswe pa basa iri rinokosha.​—1Ti 3:8-10, 12.

• Mucena; Ruceno.

  Djehovha ndi mucena; izvi zvinoda kureya kuti akacena mu makwanza ese uye pa zviro zvese zvaanoita. (Eki 28:36; 1Sa 2:2; Ju 17:11) Parinonga recireketa ngezve anhu (Mk 6:20; Zvii 3:21), zviro (Aro 7:12; 11:16; 2Ti 3:15), mbuto (Mt 4:5; Zvii 7:33; Ahe 9:1), uye zviitiko (Eki 36:4), soko iri re Cihebheru rinonga recida kureya kukanda pa dii, kusanangurhwa kana kuti kucengeterhwa kuita zvinoda Djehovha; kupirhwa kuita basa ra Djehovha. Mu Matarhwa e Cigrego e Cikristu, masoko akaturikirhwa kuti “mucena,” ruceno” uye “acena” angakwanisawo kureya kusanangurhwa kuita zvinoda Mwari. Masoko aya anoseenzeswawo pa kuda kureya tsika dzakacena.​—2Ak 7:1; 1Pe 1:15, 16.

• Mudjudha.

  Soko raiseenzeswa ku munhu we dzinza ra Djudha mumasure me kumbwera ke umambo we madzinza 10 e Israeri. (2Md 16:6) Mumasure me kubva ku utaphwa ku Bhabhironi, zina iri rakaseenzeswa ku Aisraeri e madzinza akawanda akahwirira ku Israeri (Esd 4:12) No kuhamba ke nguwa, zina iri rakazoseenzeswa kuti risiyanise Aisraeri no anhu e nyika dzimweni, pasinei no kaanogara. (Est 3:6) Muphostori Pauro wakaseenzesa zina iri mu kuezanisira paaipanganidza kuti mu ungano ye Cikristu, kakabarirhwa munhu akukoshi.​—Aro 2:28, 29; Ag 3:28.

• Mufemberi.

  Munhu unodziti unokwanisa kuziisa zvicaitika mune ramangwana. Bhaibheri rinobatanidza afemberi, aya anoita zve masarapita, azii e nyeredzi no amweniwo.​—Re 19:31; Dhe 18:11; Zvii 16:16.

• Mugariro we zviro.

  Maturikirhwe akaizwa soko re Cigrego rokuti ai·onʹ parinonga recireketa ngezve mugariro wakaita zviro wainga waapo kana kuti zviro zvinobhuya ngezve nguwa kana kuti mwaka. Bhaibheri rinoreketa ngezve “mugariro uno we zviro,” recireya ngezve mugariro we zviro we mu nyika yese kana kuti mararamiro e anhu ari mu nyika. (2Ti 4:10) Eciseenzesa citenderano ce Mutemo, Mwari akagadza mugariro we zviro wekuti amweni pamweni anoudainza kuti nguwa ye Aisraeri kana kuti ye Adjudha. Djesu Kristu eciseenzesa cibairo cake ce rusudzunuro akaseenzeswa na Mwari kuti atangise mugariro umweni we zviro, unocokuita no ungano ye Akristu akadzodzwa. Izvi zvakaita kuti nguwa imweni ipsva itange, yaioneka no kudzadzisa ke zviro zve kuezanisira no citenderano ce Mutemo. Soko iri parinotarhwa kuti “migariro ye zviro,” rinonga recireya migariro ye zviro yakawanda kana kuti migariro ye zviro yakasiyana-siyana, yakaoneka kana kuti icaoneka mu nguwa ye mberi.​—Mt 24:3; Mk 4:19; Aro 12:2; 1Ak 10:11.

• Muhambiro unopsverusa.

  Soko iri rinobva pa soko re Cigrego rokuti a·selʹgei·a, rinoda kureya maitiro anopangidza kuposha kakakura ke mitemo ya Mwari uye rinopangidza maitiro anopsverusa kana kuti asina rureremedzo; maitiro anopangidza kutama kureremedza kana kuti kutama kuzwira anyautongi, mitemo uye nhungamiriro. Soko iri aridi kureya maitiro akashata akareruka.​—Ag 5:19; 2Pe 2:7.

• Muhebheru.

  Zina rakatanga kuseenzeswa kuna Abramu (Abrahamu), recimusiyanisa no anyacigarisano ake Aamori. No kuhamba ke nguwa, soko iri rakaseenzeswa ku ana a Abrahamu peciseenzeswa muzukuru wake Djakobo. Mu nguwa ya Djesu, mureketero we Cihebheru waivhengerhwa no masoko e Ciaramaiko uye wainga uri mureketero wairekethwa na Djesu no afundi ake.​—Ge 14:13; Eki 5:3; Zvii 26:14.

• Muimiriri.

  Munhu anoimirira matii mairi kuti agarezve no ushamwari we padhuze. Mu Matarhwa, Mozesi unozwi muimiriri we citenderano co Mutemo, uye Djesu unozwi muimiriri we citenderano cipsva.​—Ag 3:19; 1Ti 2:5; Ahe 12:24.

• Muimiriri Mukuru.

  Iri i soko re Cigrego rinoreya “Mutungamiriri Mukuru.” Irona rinoreya ngezve basa ra Djesu Kristu re kusudzunura anhu akatendeka pa rufu rinokonzerhwa no citema uye kuatungamirira dakara ku upenyu usikaperi.​—Zvii 3:15; 5:31; Ahe 2:10; 12:2.

• Mukuru; Mwanarume wacembera.

  Mwanarume wakura. Mu Matarhwa, rinoreya maka-maka ku uya uno masimba uye uno ubaba mu mutanha kana kuti mudzinza. Mu bhuku ra Zvakapangidzwa, soko iri rinoseenzeswawo ku zvisikwa zve kudenga. Soko re Cigrego rokuti pre·sby’te·ros rinoturikirhwa kuti “mukuru” parinonga recireya aya ano basa re kutungamirira mu ungano.​—Eki 4:29; Zvie 31:23; 1Ti 5:17; Zva 4:4.

• Munazareta.

  Zina rakapaswa Djesu, ngokuti iyena ainga ari we thaundi ro Nazareta. Pamweni rakada kuezana no soko re Cihebheru rokuti “renovo” rinooneka pana Isaya 11:1. No kuhamba ke nguwa, soko iri rakazoseenzeswawo ku ateeri a Djesu.​—Mt 2:23; Zvii 24:5.

• Munhu wakatendeuka kugara Mudjudha.

  Munhu wakatendeuka. Mu Matarhwa, zvinoreya munhu wakatendeuka kugara Mudjudha. Ku anarume, izvi zvaitobatanidza kuizwa ucekeri.​—Mt 23:15; Zvii 13:43.

• Munhu anopesana na Kristu.

  Soko iri re Cigrego rinoreya zviro zviiri. Rinoreya munhu anoramba, kana kuti anophikisa Kristu. Rinoreyawo munhu anonyepedzera kugara Kristu, uya anodzikanda pa mbuto ya Kristu. Munhu upi hake, sangano ripi haro, no cikwata cipi haco cinodziti ndiwo Kristu kana Mesiya, kutobatanidzawo aya anophikisa Kristu no afundi ake, angakwanisa kudainzwa kuti anhu anopesana na Kristu.​—1Ju 2:22.

• Munhu asikabari; ngomwa.

  Mu Cigrego, soko iri rinoreya mwanarume wakathenwa. Kakawanda kakhona, anarume aya aisanangurhwa kuti aseenze pa nyumba ya mambo hinga abetseri kana kuti arindi a mambokadzi uye e akadzi a mambo e pa dii. Soko iri rinoreyawo mukuru-mukuru wakagadzwa kuti aite mabasa pa nyumba pa mambo, asi asiripi ngomwa kamare. Masoko okuti ‘aawaki nge ndaa ye Umambo,’ nge gwanza re kuezanisira ringakwanisa kureya munhu anodzibata, kuitira kuti anyase kukanda ndangariro dzake pa kuita basa ra Mwari.​—Mt 19:12; Est 2:15; Zvii 8:27.

• Muonereri.

  Mwanarume uno ubaba maka-maka we kudziirira uye kuusha ungano. Soko re Cigrego rokuti (e piʹsko·pos) rinoda kureya kuonerera ke kucengeta. Masoko ekuti “muonereri” uye “mukuru” (pre·sbyʹte·ros) anoda kureya basa rimwero re ubaba mu ungano. Soko rokuti “mukuru” rinonyanya kureya mawara e mwanarume wakakura wakagadzwa, asi soko rokuti “muonereri” rinoenderana no basa rinoizwa no munhu unonga agadzwa.​—Zvii 20:28; 1Ti 3:2-7; 1Pe 5:2.

• Muphostori.

  Soko iri rinoreya “munhu unonga atumwa,” uye rinoseenzeswawo pa kuda kureya ngezva Djesu uye ngezve anhu anonga atumwa kuti aseenzere amweni. Kakawanda kakhona, soko iri rinoseenzeswa recida kureya ngezve afundi 12 akasanangurhwa na Djesu kuti agare aimiriri ake akasanangurhwa.​—Mk 3:14; Zvii 14:14.

• Mupimo we nyara.

  Mupimo we nyara wakada kuezana no mukuwo unobva pa gunwe guru dakara pa cikunwe cidoko cekupedzesera, nyara painonga yakafununguka. Maererano no kubhiti raipima 44,5 cm, mupimo we nyara waizogara no 22,2 cm pa kureba. (Eki 28:16; 1Sa 17:4)​—Onai Apendi. B14.

• Mupiro unopiswa.

  Cibairo co cinyama caipisirhwa pa artari uye caipaswa cese hinga mupiro kuna Mwari; munhu waipasa mupiro iwona wainga asikagari no dii ripi haro ro cinyama icona (n’ombe, bira ro kono, gotokoto, gora, kana kuti njiwa doko).​— Eki 29:18; Re 6:9; Mk 12:33; Ahe 10:6.

• Mupiro we zvinomwiwa.

  Mupiro we vhinyu yaidururirhwa pa artari uye yaipaswa pamwepo no mipiro imweni yakawanda. Pauro wakaseenzesa soko iri kuti apangidze mushobo wake we kudzipira kana kuti we kuseenzesa upenyu wake kuti abetsere hama dzake dze Cikristu.​—Nu 15:5, 7; Afi 2:17.

• Mupristi.

  Mwanarume waiimirira Mwari zviri pa mutemo ku anhu, eciafundisa ngezva Mwari uye mitemo yake. Apristi aiimirirawo anhu pamberi pa Mwari, ecipasa zvibairo, eciakumbirira uye eciadeketerera. Mutemo wa Mozesi usati waapo, misoro ye mhuri ndiyo yaiseenza hinga apristi mu mhuri yawo. Mu Mutemo wa Mozesi, ana a Aroni, e dzinza ra Revhi ndiwo aiita basa re upristi. Arevhi amweni ainga ari abetseri awo. Citenderano cipsva pacakatanga, Israeri ye kumwiya yakagara dzinza re apristi na Djesu Kristu hinga Mupristi Mukuru.​—Eki 28:41; Ahe 9:24; Zva 5:10.

• Mupristi mukuru.

  Mu Mutemo wa Mozesi, uu ndiye waiimirira anhu kuna Mwari uye ndiye aitungamirira apristi amweni. Iyena basi ndiye wainga ano citenderhwa ce kupinda mu Mbuto Yakacenesesa, mbuto ye mukati yo tabhernakuro uye no kuhamba ke nguwa yo tempro. Iyena waiita izvona kamwe basi pa gore pa Zuwa ro Kurekererhwa Zvitema. Soko rokuti “mupristi mukuru” rinoseenzeswawo pana Djesu Kristu.​—Re 16:2, 17; 21:10; Mt 26:3; Ahe 4:14.

• Mupumburu.

  Phepha rakareba ro dehwe ro cinyama kana kuti ro nhokwe rakatarhwa ku dii rimwe, uye kajinji kakhona rakapomberedzwa pa ndonga. Matarhwa, akatarhwa uye akakopiyarhwi mu mupumburu, ekuti mu nguwa yakatarhwa Bhaibheri wainga uri mushobo we bhuku.​—Ruk 4:17-20; 2Ti 4:13.

• Mupumburu we dehwe.

  Dehwe ro bira, ro mbudzi kana kuti ro n’ombe, raigadzirirhwa hinga ciro ce kutarira. Wainga wakabamba maningi kudarika mupumburu we nhokwe wakaseenzeswa mu mipumburu ye Bhaibheri. Mipumburu yakakumbira Pauro kuti Timoti aunzise, pamweni yainga iri dii ye Matarhwa e Cihebheru. Mipumburu imweni yo Bahari Rakafa (Mar Morto) pamweni yakatarirhwa mu matehwe.​—2Ti 4:13.

• Murindi.

  Munhu unorumbwa akarinda, kakawanda kakhona cousiku kuti adziirire anhu kana zviro, uye pamweni paya unongwadza anhu kana pano ngozi. Arindi kakawanda aigara pa mbuto dzakakwirira dze mathaundi kuti akwanise kuona nge cekure zviro zviri kukhwedera zvisati zvatoguma padhuze. Ku hondo, kakawanda kakhona waidainzwa kuti mucengeti kana kuti murindiri.​—Mt 27:65; 28:4.

• Musengo-musengo.

  Soko iri mu Matarhwa e Cigrego e Cikristu rinoreya musoho unokumbirhwa ku munhu umwe na umwe.​—Ne 5:4; Aro 13:7.

• Mutambo we Kucenesa Tempro.

  Zuwa rimwe re pa gore raiedzurirhwa kuceneswa ko tempro mumasure me kusvipiswa kayakaizwa na Antiyoko Epifaniyo. Mutambo uu we mazuwa masere waitanga zuwa ra 25 ro mwedzi wa Khisireu.​—Ju 10:22.

• Mutambo we Pau Dzisina Mbiriso.

  Uu wainga uri mutambo wokutanga pa mitambo mitatu mikuru yaiizwa no Aisraeri pa gore. Waitanga mu zuwa ra 15 ya Nisani, mu zuwa raizoteera paiizwa Paskwa, uye wairumbwa weciizwa ke mazuwa manomwe. Pa nguwa iyona, Aisraeri aidikana kurhya basi pau dzisina mbiriso kuti aedzurire kubuda kaakaita mu Edjipitu.​—Eki 23:15; Mk 14:1.

• Mutambo we Zvitumba.

  Unoziikanwawo hinga Mutambo we Matenda, kana kuti Mutambo we Kuunganidza Zviro. Uwona waitanga mu zuwa ra 15 dakara mu zuwa ra 21 ro mwedzi wa Etanimo. Mutambo uu, wekuti waiizwa pa nguwa ye kukorora kana kuti pa kupera ke nguwa ye kurima ye Aisraeri, yainga iri nguwa ye mupfaro uye ye kutenda nge makomborero a Djehovha nge zvirimwa zvawo. Pa nguwa ye mutambo uu, Aisraeri airaramira mu zvitumba kana kuti mu zvinyumba zvidoko, kuitira kuti aedzurire kubuda kaakaita mu Edjipitu. Wainga uri umwe we mitambo mitatu yekuti anarume ese e Israeri aidikana kuenda ku Djerusarema.​—Re 23:34; Esd 3:4; Ju 7:2.

• Mutanda.

  Mutanda waiturikwa munhu wainga apumhwa. Mu madzinza amweni, waiseenzeswa pa kuuraiwa kana kuti pa kupangidza mutumbi hinga cipangidzo ku amweni kana kuti apsveruse munhuwo. Aasiriya, aiziikanwa nge kuita hondo dzawo dze utsinye, aitora aranda oakanda pa mutanda uye oabaya kubvira pa ndani dakara pa musana. Mu mutemo we Cidjudha, uya wainga ano ndaa yakaita hinga kutuka kana kuti kunamata mufanikiso, waitanga auraiwa nge kufurhwa no mapuwe kana kuti nge mushobo umweni, uye mumasure mazvo mitumbi dzawo dzaiturikwa pa mitanda kana kuti pa miti, hinga muezaniso we ngwadzo kuno amweni. (Dhe 21:22, 23; 2Sa 21:6, 9) Nguwa dzimweni, Aroma aisungira munhuwo pa mutanda uye pamweni waikwanisa kurarama mazuwa akawanda asati afa ecirhwadziwa, ecizwa mukaha, nzara, uye ecipiswa no zuwa. Mu zviitiko zvimweni, hingana pa kuuraiwa ka Djesu, awona aikhomera nyara uye mirenje dzo munhu anonga apumhwa pa mutanda. (Ruk 24:20; Ju 19:14-16; 20:25; Zvii 2:23, 36)​—Onai pakazwi MUTANDA WE KUTAMBUDZIKIRA.

• Mutanda we kutambudzikira.

  Iturikiro inobva pa soko re Cigrego rokuti stau·rosʹ, rinoreya muti wakaimiswa hinga wakakhomerhwa Djesu. Apana cinopangidza kuti soko iri re Cigrego rinoreya mucinjikwa, hinga zvaiseenzeswa no ahedheni pa kunamata makore akawanda Kristu asati auya. “Mutanda we kutambudzikira,” unopangidza zvaida kureya soko irona kamare re Cigrego, ngokuti soko iri rokuti stau·rosʹ rinoda kureya ngezve kutambudzwa no kupsverudzwa, kaizosongana no ateeri a Djesu. (Mt 16:24; Ahe 12:2)​—Onai pakazwi MUTANDA.

• Mutari.

  Munhu waiita makopiya e Matarhwa e Cihebheru. Mu mazuwa a Djesu, zina iri raipaswa anarume ainga afundiswa ngezve Mutemo. Awona aiphikisa Djesu.​—Esd 7:6, masoko e pasi; Mk 12:38, 39; 14:1.

• Mutemo.

  Parinotanga no bhii guru, soko iri kakawanda kakhona rinonga recireya Mutemo wa Mozesi kana kuti mabhuku mashanu e kutanga e Bhaibheri, parinotanga no bhii doko, ringakwanisa kureya maka-maka mutemo umwe pa Mutemo wa Mozesi kana kuti cokwadi cimwe cisikacinji co mutemo.​—Nu 15:16; Dhe 4:8; Mt 7:12; Ag 3:24.

• Mutemo wa Mozesi.

  Mutemo wakapasa Djehovha Aisraeri peciseenzeswa Mozesi ku renje ro Sinai muna 1513 K.A.A. Mabhuku mashanu e kutanga e Bhaibheri kakawanda kakhona anodainzwa kuti Mutemo.​—Mt 5:17; Ruk 24:44.

• Muti we upenyu.

  Muti wainga uri mu munda we Edheni. Bhaibheri aribhuyi kuti mucero we muti uu wainga uno simba re kupasa upenyu; zvezvirokwazvo, muti uu waiimirira gondeso ya Mwari ye kupasa upenyu usikaperi ku aya aaizotendera kurhya mucero we muti uu. Mu bhuku ra Zvakapangidzwa, i cipangidzo ce gadziriro ya Mwari ye upenyu unotsigirhwa.​—Ge 2:9; 3:22; Zva 2:7; 22:19.

• Mutungamiriri we apristi.

  Mu Matarhwa e Cihebheru, soko iri rinoseenzeswa recida kureya ngezve “mupristi mukuru.” Mu Matarhwa e Cigrego e Cikristu, soko rokuti “atungamiriri e apristi” raibhuya ngezve anarume anonyanya kukosha pakati pe apristi, aitobatanidzawo apristi akuru uye akuru e zvikwata 24 zve apristi.​—2Mk 26:20; Esd 7:5; Mt 2:4; Mk 8:31.

• Mutungamiriri we provhinsiya.

  Mutungamiriri mukuru we provhinsiya waitungamirirhwa no dare rinogadza mitemo ye Roma. Wainga ano simba re kutonga uye re anyahondo, uye wainga ano simba mu provhinsiya iyona, asi zviro zvaaiita zvaidikana kuongororhwa no dare iri rinogadza mitemo.​—Zvii 13:7; 18:12.

• Muumbi.

  Mugadziri we hari, paratu, vhazo, uye ciro cipi haco cinoizwa no dongo. Soko ro Cihebheru rokuti muumbi rinoreya “muiti.” Simba ro muumbi pa zviro zve dongo, kakawanda kakhona rinoseenzeswa kuti riezanisire ucangamire wa Djehovha pa anhu uye pa madzinza.​—Isa 64:8; Aro 9:21.

• Muzii we nyeredzi.

  Munhu anoongorora kuhamba ke zuwa, mwedzi, uye nyeredzi eciedza kuziisa zvicaitika mune ramangwana.​—Mt 2:1.

• Mwana wa Dhavhidhi.

  Soko rinonyanya kuseenzeswa pana Djesu, recida kureya kuti iyena ndiye akagara nhaka ye citenderano ce Umambo, waizobva mu dzinza ra Dhavhidhi.​—Mt 12:23; 21:9.

• Mwana we munhu.

  Masoko aya anooneka kanokwana 80 mu Mavhangeri. Awona anoseenzeswa pana Djesu Kristu, ngokubarhwa kaakaizwa pa nyama, iyena akagara munhu kamare, haiwa cisikwa ce kumwiya cakaphinduka kugara munhu. Masoko aya, anopangidzazve kuti Djesu aizodzadzisa uphorofita wakatarhwa pana Dhanyeri 7:13, 14. Mu Matarhwa e Cihebheru, masoko aya akasenzeswawo pana Ezekiyeri na Dhanyeri, ecida kupangidza musiyano uripo pakati pe aimiriri aya anofa, no Muridzi we masoko.​—Eze 3:17; Dha 8:17; Mt 19:28; 20:28.

• Mwedzi mupsva.

  Zuwa rokutanga ro mwedzi umwe na umwe ro karendariyo yo Cidjudha, rainga riri zuwa rokuti anhu aungane kuti aite mabiko uye kupira zvibairo zvinokosha. No kuhamba ke nguwa, zuwa iri rakagara rinokosha re mutambo we mu nyikemo, uye anhu ainga asikaseenzi pa nguwa ye mutambo uu.​—Nu 10:10; 2Mk 8:13; Ako 2:16.

• Mwiya.

  Soko rokuti “mwiya” rakaseenzeswa pa kuturikira soko re Cihebheru rokuti ruʹach uye ro Cigrego rokuti pneuʹma, uye rinoreya zviro zvakawanda. Zvese zvinopangidza kuti uwona auoneki nge madziso e anhu uye rinoreya simba rinonga reciseenza. Soko irona mu Cihebheru uye mu Cigrego rinonga recireya ngezve (1) mhepo, (2) simba rinoraramisa zvisikwa zve pa nyika, (3) simba rinobva mu mwoyo we kuezanisira we munhu uye rinomuita kuti arekete uye aite ciro nge mushobo umweni, (4) masoko anoita zve kufemerhwa, (5) zvisikwa zve kumwiya, uye (6) simba ra Mwari, kana kuti mwiya mucena.​—Eki 35:21; Pis 104:29; Mt 12:43; Ruk 11:13.

• Mwiya mucena.

  I simba rinoseenzeswa na Mwari kuti aite zvaanoda. Mwiya uu wakacena ngokuti unobva kuna Djehovha, uya akacenesesa uye munatsi kupinda munhu upi hake, uye ngokuti unoseenzeswa na Mwari kuti aite zviro zvakacena.​—Ruk 1:35; Zvii 1:8.

N

• Nardho.

  Mafuta anonuhwirira anodhura maningi ekupsvukirira, aibviswa pa muti uno zina rimwero (Nardostachys jatamansi). Nge ndaa ye kudhura kayo, kakawanda kakhona paisenzeswa nardho isiripi yezvirokwazvo kana kuti yaivhengezwa no mafuta asikakoshi. Zvinoshamisa kuti mu bhuku ra Marko uye ra Juau, panobhuya kuti “nardho yakanakisisa” yakaseenzeswa pana Djesu.​—Mk 14:3; Ju 12:3.

• Ndonga ye umambo.

  Ndonga yaibathwa no mutongi hinga cipangidzo ce simba rake.​—Ge 49:10; Ahe 1:8.

• Ngirozi.

  Soko iri rakabva pa soko re Cihebheru rokuti mal·ʼakhʹ uye pa soko re Cigrego rokuti agʹge·los. Masoko aya anoreya kuti “mutumwa,” asi paanoreya ngezve atumwa e kumwiya, awona anoturikirhwa kuti “ngirozi.” (Ge 16:7; 32:3; Tg 2:25; Zva 22:8) Ngirozi i zvisikwa zve kumwiya zvino simba, idzona dzakasikwa na Mwari kare-kare, Mwari asati asika anhu. Idzona dzinodainzwa mu Bhaibheri kuti “makumi e zviuru e acena,” “ana a Mwari,” uye “nyeredzi dze macibesi.” (Dhe 33:2; Djob 1:6; 38:7; Dju 14) Ngirozi adzizi kusikwa kuti dzibarane, asi idzona dzakasikwa imwe na imwe. Kuno ngirozi dzinodarika 100 mirionji. (Dha 7:10) Bhaibheri rinopangidza kuti ngirozi imwe na imwe ino zina uye unhu wakasiyana no dzimweni, dzecidzidodosa idzona dzinoramba kunamathwa, uye dzakawanda dzakhona adzitobhui mazina adzo. (Ge 32:29; Ruk 1:26; Zva 22:8, 9) Idzona dzino zvigaro zvakasiyana uye dzinoita mabasa akasiyana-siyana. Ngo muezaniso, dzinoseenza pa cigaro ce umambo ca Djehovha, dzinoziisa masoko, dzinobetsera aseenzi a Djehovha e pasi pano, dzinoita zvasanangurhwa na Mwari, uye dzinobetsera basa re kuparidzira masoko akanaka. (2Md 19:35; Pis 34:7; Mt 4:11; Ruk 1:30, 31; Zva 5:11; 14:6) Mune ramangwana, idzona dzicarhwa pamwepo na Djesu pa hondo ye Amagedhoni.​—Zva 19:14, 15.

• Ngirozi huru.

  Zvinoreya kuti “mukuru we ngirozi.” Soko re Cigrego rakaturikirhwa kuti “ngirozi huru” rinoreya kuti “anokosha kudarika amweni.” Masoko ekuti “ngirozi huru” anoseenzeswa mu Bhaibheri ecida kureya ngezve ngirozi imwe basi, izvi zvinopangidza kuti kuno ngirozi huru imwe basi. Bhaibheri rinopangidza kuti ngirozi iyona inozwi Migeri.​—Dha 12:1; Dju 9; Zva 12:7.

• Ngoro.

  I ngoro yo marodha mairi, yaikweiwa no kavharo, yaiseenzeswa maka-maka pa hondo.​—Eki 14:23; Ato 4:13; Zvii 8:28; Zva 9:9.

• Nhenda; Nhenda yakakura.

  Nhenda ipi hayo inopaswana uye inobararika nokukasika, ingakwanisa kubatanidza provhinsiya yese uye yokonzera rufu.​—Ruk 21:11.

• Nisani.

  Mumasure me kubuda mu Bhabhironi, iri rakazogara zina ro mwedzi wekutanga pa karendariyo cena yo Adjudha uye pa mwedzi wecinomwe yo karendariyo yo anhu ese. Pasati papaswa zina iri, uwona waidanzwa kuti Abhibhi, waitangira pakati po mwedzi wa Marso dakara pakati po mwedzi wa Abriri. (Ne 2:1) Paskwa yo Cidjudha yaipembererhwa pa zuwa 14 yo Nisani uye Djesu akaita kurarira ka Tenzi pa zuwa irona. (Ruk 22:15, 19, 20) Iyena wakauraiwa pa mutanda we kutambudzikira pa zuwa irona kamare.​—Ruk 23:44-46.

• Nyanga.

  Kureya nyanga dzo zvinyama dzaiseenzeswa hinga kopo, midziyo ye kukandira azeiti, tinta, uye zve kudzora. (1Sa 16:1, 13; 1Md 1:39; Eze 9:2) Kakawanda kakhona, “nyanga” dzaiseenzeswa hinga cipangidzo co simba uye kuwina.​—Dhe 33:17; Mik 4:13; Ruk 1:69.

• Nyanga yo artari.

  Zvimiti zvakaita hingana nyanga zvakaringira kunza mu matii marongomuna e artari dzinganani.​—Re 8:15; 1Md 2:28; Zva 9:13.

• Nyasha dza Mwari.

  Soko iri rinobva pa soko re Cigrego rinopasa marangariro e zviro zvinopfadza uye zvakanaka. Irona rinoseenzeswa kakawanda recida kureya cipo cakanaka kana kuti mushobo wakanaka we kupasa. Parinoreketa ngezve nyasha dza Mwari, soko iri rinoreya cipo cinopaswa na Mwari no mwoyo wese asikaetseri kuhwirinzirhwa. Ngokudaro, uu ndi mushobo we kupangidza rupo rikuru re rudo rikuru re unaki wa Mwari ku anhu. Soko re Cigrego rinoturikirhwawo hinga “kupasa usikabambidzirhwi” uye “cipo ce unaki.” I cipo cakanaka maningi cinoizwa nge munhu uya anopasa.​—2Ak 6:1; Aef 1:7.

• Nyeredzi yo macibesi.

  Ii i nyeredzi inopedzesera kubudikira kumabvazuwa pa nguwa yekuti zuwa arisati rabuda, painobuda zvinonga zvecipangidza kuti kunza kaakuedza.​—Zva 22:16; 2Pe 1:19.

O

• Oribhano.

  Mutotozvi wakakhota unobuda mu miti kana kuti mu makwenzi akasiyana-siyana e mukhaindi unozwi Boswellia. Oribhano payaipiswa, yaibudisa munuhwi unonuhwirira. Ainga ari mafuta aiseenzeswa pa kugadzira ruseenzi cena mu tabhernakuro uye mu tempro. Yaiperekedzwawo no mipiro ye zvirimwa uye yaikandwa pakati po pau yo kupangidzwa mu mbuto Cena.​—Eki 30:34-36; Re 2:1; 24:7; Mt 2:11.

P

• Paraizo.

  Mbuto yakanaka ino miti no maruwa. Paraizo yokutanga yainga iri yo Edheni, yakapaswa kazado yokutanga na Djehovha. Djesu paainga ari pa mutanda we kutambudzikira, akaita kuti mbavha yainga iri pa dii pake iziye kuti nyika yaizogara paraizo. Pana 2 Akorinti 12:4, pamweni pari kureketa ngezve paraizo icaoneka mune ramangwana, uye pana Zvakapangidzwa 2:7, pamweni pari kureketa ngezve paraizo ye kudenga.​—Ng 4:13; Ruk 23:43.

• Paskwa.

  Mutambo waiizwa kamwe pa gore pa zuwa ra 14 ro mwedzi wa Abhibhi (wekuti no kuhamba ke nguwa wakazozwi Nisani). Paskwa wainga uri mutambo we kuedzurira zuwa rakasudzunurhwa Aisraeri ku Edjipitu. Pa mutambo uu, anhu aiuraya bira no mbudzi uye aizvikoca, mumasure mazvo airhya no muriyo unowawa, pamwepo no pau dzisina mbiriso.​—Eki 12:27; Ju 6:4; 1Ak 5:7.

• Pau dze kupangidzwa.

  Pau 12 dzaiturikidzwa pa murhwi miiri uye murhwi umwe na umwe wainga uno pau dzitanhatu pa meza mu mbuto Cena yo tabhernakuro uye yo tempro. Dzaidainzwawo “pau dzakaturikidzana” uye “pau dze kupangidza.” Mu Masabudu ese, mupiro uu waiizirhwa Mwari waicinjwa uye pokandwa pau dzipsva. Kajinji kakhona, apristi ndiwo airhya pau dzaibviswemo.​—2Md 2:4; Eki 25:30; Re 24:5-9; Mt 12:4; Ahe 9:2.

• Pentekosti.

  Mutambo wecipiri pa mitambo mikuru mitatu yaiizwa yaidikana kupembererhwa mu Djerusarema no anarume ese e Cidjudha. Soko rokuti pentekosti rinoreya “(Zuwa) roci 50,” ndiro zina raiseenzeswa mu Matarhwa e Cigrego e Cikristu recireya Mutambo umwewo unodainzwa mu Matarhwa e Cihebheru kuti Mutambo we Kukorora kana kuti Mutambo we Masumana. Waipembererhwa pa zuwa roci 50 kubva pa zuwa 16 ro Nisani.​—Eki 23:16; 34:22; Zvii 2:1.

• Pirari.

  Ciro cakaimira ce kutsigira naco, kana kuti ciro cakaita hingana madziro. Mapirari e kutsigira akaseenzeswa mu tempro uye mu zviwako zve umambo zvakawakwa na Soromoni. Mu Matarhwa e Cigrego e Cikristu, rinoseenzeswawo pa kuezanisira hinga ce kutsigira (1Ti 3:15) kana kuti kurumbwa pa mugariro uwona.​—Zva 3:12; Ato 16:29; 1Md 7:21.

• Pisarema.

  Ngoma ye kukudza Mwari. Mapisarema ainga eciperekedzwa no zviridzwa uye aiembwa no anamati mu zviitiko zvakasiyana-siyana, kutobatanidzawo paainamata Djehovha Mwari mu tempro yake ku Djerusarema.​—Ruk 20:42; Zvii 13:33; Tg 5:13.

• Porneía.​—

  Onai pakazwi UHURE.

R

• Renje.

  Soko iri, ringakwanisa kureya ngezve mbuto dzisina mvura, dzisikagari anhu akawanda, dzisikarimwi, kana dzisina ndimo. Soko iri, arindorei mbuto ino madjeca basi.

• Repitoni.

  Mu nguwa ye Matarhwa e Cigrego e Cikristu, yainga iri mare ye mutengo wakadodoka maningi ye Cidjudha yaiizwa no kobre kana kuti bronze. Mu zviturikirhwa zvimweni zve Bhaibheri, inodainzwawo kuti “obhoro.”​—Mk 12:42; Ruk 21:2; masoko e pasi.

• Rindi rakadzikisisa.

  Soko iri rinobva pa soko re Cigrego rokuti aʹbys·sos, rinoreya kuti “kudzikisisa” kana kuti “risikaoneki parino perera, risina parino perera.” Mu Matarhwa e Cigrego e Cikristu, soko iri rinoseenzeswa pa kuda kureya mbuto kana mugariro usikakwanisiki kuita ciro. Ringareyawo guwa kana zviro zvimweniwo.​—Ruk 8:31; Aro 10:7; Zva 20:3.

• Revhi; Murevhi.

  Mwana wecitatu wa Djakobo waakabara no mukadzi wake Reya; uyewo kugadzwa ke dzinza rakatambira zina iri. Ana atatu a Revhi ndiwo akaumba zvikwata zvitatu zve Arevhi. Pamweni paya, soko rokuti “Arevhi” rinonga recida kureya dzinza rese, asi kakawanda kakhona aribatanidzi mhuri yo upristi ya Aroni. Pa kukowaniswa ke Nyika Yakapikirhwa, dzinza ra Revhi arizi kutambira kunyazi dii rimwe haro, asi rakatambira mathaundi anokwana 48 mukati me nyika dzakapaswa madzinza amweni.​—Dhe 10:8; 1Mk 6:1; Ahe 7:11.

• Rubhabhatidzo; Kubhabhatidza.

  Soko re Cigrego rokuti kubhabhatidza rinoreya “kunyika,” kana kuti kukanda pasi pe mvura. Djesu akabhuya kuti ateeri ake anodikana kubhabhatidzwa. Matarhwa anoreketawo ngezve rubhabhatidzo ra Juau, kubhabhatidzwa no mwiya mucena, kubhabhatidzwa no muriro uye no zvimweniwo.​—Mt 3:11, 16; 28:19; Ju 3:23; 1Pe 3:21.

• Rumuko.

  Kumuka kubva ku akafa, kuraramazve. Soko re Cigrego rokuti a·na’sta·sis kana rikaturikirhwa rinoreya kuti “kumuka; kuima.” Mu Bhaibheri munorekethwa ngezve anhu apfembamwe akamutswa, kutobatanidza rumuko ra Djesu, iro rakaizwa na Djehovha Mwari. Eriya, Erizeu, Djesu, Pedru, uye Pauro akamutsa anhu, asi zvishamiso izvi zviri pamhene kuti akazviita no simba ra Mwari. Rumuko re pa nyika re “anhu anatsi no asiripi anatsi,” i dii rinokosha re cinangwa ca Mwari. (Zvii 24:15) Bhaibheri rinoreketawo ngezve rumuko “rokutanga” kana kuti rumuko raizoitika “nokukasika,” kureya rumuko re anhu acaenda kudenga ro hama dza Djesu, akadzodzwa no mwiya.​—Afi 3:11; Zva 20:5, 6; Ju 5:28, 29; 11:25.

• Rusenzi.

  Mubatanidzwa we mutotozvi unobuda pa muti uye bharsamo rinonuhwirira uye rinopiswa padoko no padoko, recibudisa munuhwi wakanaka. Pa tabhernakuro no pa tempro paiseenzeswa rusenzi rainga rakavhenganidzwa no zviro zvirongomuna uye rainga rakanaka ngokuti rainga rakasiyana no rimweni. Raipiswa comacibesi uye cousiku pa artari yo rusenzi yaigara pa mbuto Cena. Pa Zuwa ro Kurekererhwa Zvitema, irona raipisirhwa mukati me mbuto Yakacenesesa. Raiimirira minamato inotenderhwa ye aseenzi akatendeka a Mwari. Akristu aabambidzirhwi kuseenzesa rusenzi pa kunamata.​—Eki 30:34, 35; Re 16:13; Zva 5:8.

• Rusudzunuro.

  Mutengo unoriphwa kuti pasudzunurhwe munhu pa usungwa, pa kuphanicwa, pa dambudziko, pa citema, kana kuti pa ciro caaidikana kuita. Rusudzunuro rainga risikariphwi basi nge mare. (Isa 43:3) Rusudzunuro raidikanwa pa mugariro wakasiyana-siyana. Ngo muezaniso, ku Israeri, matangwe ese e anarume uye e zvinyama zve kono, ainga ari a Djehovha, ndiyo ndaa rusudzunuro, kana kuti mutengo we rusudzunuro waidikana kuriphwa kuti uasudzunure, kuti zviseenzeswe nge mushobo wakakwana mu basa ra Djehovha. (Nu 3:45, 46; 18:15, 16) Kana n’ombe yakashata isikazi kusungirhwa uye youraya munhu, rusudzunuro raidikanwa kuti risudzunure muridzi we n’ombe ii kuti asauraiwe. (Eki 21:29, 30) Asi kainga kusikatenderhwi rusudzunuro ku munhu unouraya eciziya. (Nu 35:31) Bhaibheri rinopangidza kuti rusudzunuro rakakura, ndiro rakariphwa na Djesu Kristu paakafa kuti anhu anozwira, asudzunurhwe pa citema uye rufu.​—Pis 49:7, 8; Mt 20:28; Aef 1:7.

• Ruwanze.

  Ii yainga iri mbuto isikazi kupfurirhwa uye yakatenderedza tabhernakuro. No kuhamba ke nguwa, yakagara mbuto yakatenderedzwa no muru we nyumba inonyanya kukosha yo tempro. Artari yo kupisira zvibairo yainga iri pa ruwanze ro tabhernakuro uye no pa ruwanze ro mukati mo tempro. Bhaibheri rinobhuyawo ngezve ruwanze re nyumba uye no re nyumba huru.​—Eki 8:13; 27:9; 1Md 7:12; Mt 26:3; Mk 15:16; Zva 11:2.

S

• Sabudu.

  Soko iri rakabva pa soko re Cihebheru rinoreya kuti “kuzorora; kuima.” I zuwa rocinomwe pa sumana ye Cidjudha (rinotanga pa kudoka ke zuwa re Cishanu dakara pa kudoka ke zuwa ro Sabudu). Mazuwa amweni e kupemberera pa gore, akaita hinga gore rocinomwe uye gore roci 50, aidanzwawo kuti Sabudu. Mupristi basi ndiye waiita basa mu mbuto cena mu zuwa ro Sabudu. Mu makore e Sabudu, apana munhu waidikana kurima uye apana munhu waidikana kubambidzirhwa Muisraeri kuti aripe gaa. Mu Mutemo wa Mozesi, zviro zvainga zvisikatenderhwi kuizwa mu Sabudu zvainga zvisikazi kunyanya kushata, asi atungamiriri e magereja akatanga kutunhudzirawo zvimutemo zvimweni. Ngokudaro, mu mazuwa a Djesu, zvimutemo izvona zvaibambirira kuwanda, zvekutoti zvaitorema ku anhu.​—Eki 20:8; Re 25:4; Ruk 13:14-16; Ako 2:16.

• Saku.

  Djira rakakora raiseenzeswa pa kugadzira masaku, hinga aiseenzeswa pa kukandira zvirimwa. Kajinji kakhona, raigadzirhwa nge ukuse we mbudzi ye kusvipa. Saku iri raisimirhwa nge munhu paainga ecicema.​—Ge 37:34; Ruk 10:13.

• Samariya.

  Thaundi guru re umambo we madzinza gumi e Israeri ke makore angakwana 200 uye zina re nharaunda yese. Thaundi rakawakwa pa dunhu rainga rino zina rimwero. Mu mazuwa a Djesu, Samariya rainga riri zina ro dhistritu rainga riri ku Garireya kakutsi uye ku Djudhiya katemaidumba. Mu rhwendo rake, Djesu ainga asikanyanyi kuparidzira mu mutanha uwona, asi iyena akapinda na ikona mazuwa amweni uye akacedza no anhu e kweneyo. Pedru wakaseenzesa shavhi yocipiri ye kuezanisira ye Umambo Asamariya paakatambira mwiya mucena. (1Md 16:24; Ju 4:7; Zvii 8:14)​—Onai Apendi. B10.

• Sathani.

  Soko re Cihebheru rinoreya “Muphikisi.” Mu mireketero yakatanga kutarhwa nayo Bhaibheri, soko iri rinoreya Sathani Dhiyabhurosi, Muzondi mukuru wa Mwari.​—Djob 1:6; Mt 4:10; Zva 12:9.

• Sezari.

  Iri i zina re mhuri imweni ye Ciroma rakazoseenzeswa pa zina re kureremedza ku atongi e Roma. Agustu, Tibheriyo, uye Karaudhiyo anorekethwa nge mazina awo kamare mu Bhaibheri. Zina iri re kureremedza rinoseenzeswawo pana Nero, kunyazi iyena asikarekethwi nge zina rake kamare mu Bhaibheri. Mu Matarhwa e Cigrego e Cikristu, zina rokuti “Sezari” rinoseenzeswawo recida kureya utongi, kana kuti govherno.​—Mk 12:17; Zvii 25:12.

• Sinagoga.

  Soko iri rinoda kureya “kuunganidzwa kana kuti gungano.” Asi mu tsamba dzakawanda, rinoda kureya predhiyo kana kuti mbuto yaiunganira Adjudha kuti aerenge Matarhwa, nhungamiriro, kuparidzira, uye munamato. Mu mazuwa a Djesu, mu Israeri mu thaundi rimwe na rimwe rekuti rainga rakatokura padoko, mainga muno sinagoga rimwe uye mu mathaundi akakura mainga muno masinagoga akawanda.​—Ruk 4:16; Zvii 13:14, 15.

• Sinedriyo.

  Dare re pamusoro re Cidjudha mu Djerusarema. Mu mazuwa a Djesu raiumbwa no nhengo 71, kutobatanidzawo mupristi mukuru, aya ainga akambogara apristi akuru, nhengo dze mhuri dze apristi akuru, akuru, misoro dze madzinza uye mhuri, no atari.​—Mk 15:1; Zvii 5:34; 23:1, 6.

• Siriya; Asiriya.

  Mu Matarhwa e Cigrego e Cikristu, Siriya yainga iri provhinsiya ye Roma yo Antiyokiya hinga thaundi guru. Izvi zvaibatanidza dii guru ro nharaunda imweyo yo ku Siriya (yaidainzwawo kuti Aram) mu Matarhwa e Cihebheru. Govhernadhori we ku Siriya waionererawo Parestina yese.​—Ruk 2:2; Zvii 18:18; Ag 1:21.

• Sirte.

  Mbuto ino mvura isikazi kudzika, iri ku mbuto inoperera bahari pano mataka akaoma ku Ribhiya, Kakutsi ke Afrika. Ahambisi e navhiyo e kare aithya kuhamba no mu mbuto iyona nge ndaa ye madjeca aicinja-cinja nge ndaa ye mafungu makuru. (Zvii 27:17)​—Onai Apendi. B13.

T

• Tarento.

  Iri rainga rakakura kudarika zvimweni zvese zvaiseenzeswa pa kupima kurema ke zviro uye pa ukoshi we mare ye Cihebheru. Rairema makiru anokwana kuita 34,2. Tarento re Cigrego rainga rakadodoka, rairema makiru angada kukwana 20,4. (1Mk 22:14; Mt 18:24)​—Onai Apendi. B14.

• Tartaro.

  Mu Matarhwa e Cigrego e Cikristu, i mbuto yakaterera yakaezana no kadheya, mekuti makakhandirhwa ngirozi dziya dzisikazi kuzwira mu mazuwa a Nowa. Pana 2 Pedru 2:4, kuseenzeswa ke soko rokuti tar·ta·roʹo (ku “khandirhwa mu Tartaro”) akureyi kuti “ngirozi dziya dzakashaisha” dzakakhandirhwa mu Tartaro inoseenzeswa nge anhu asikanamati Mwari (kana kuti, kadheya yo pasi uye mbuto ino cidima inokandwa madzimwari asikanyanyi kukosha). Pane kudaro, tsamba ii inopangidza kuti ngirozi idzi dzakaruza zvigaro zvadzo zve kudenga uye dzoteredzwa na Mwari kubva pa zvigaro zvadzo zve kudenga dzokandwa mu mbuto ino cidima cakakura co ndangariro dzinocokuita no zvinangwa zva Mwari zvakadjeka. Cidima ici cinoreyawo mugumo wadzo, wekuti maererano no Matarhwa kunonga kuri kutsakatiswa nokusikaperi pamwepo no mutongi wadzo, Sathani Dhiyabhurosi. Hino Tartaro ii, inoimirira mugariro we kuteredzwa kakakura maningi kakaizwa ngirozi idzi dzisikazi kuzwira. Soko iri andiropi rimwero no rokuti “rindi rakadzikisisa” rinobhuiwa pana Zvakapangidzwa 20:1-3.

• Tempro.

  Nyumba yainga iri mu Djerusarema, yakatsiya tabhernakuro yaithwarhwa hinga mbuto ye kunamatira ye Aisraeri. Tempro yokutanga yakawakwa na Soromoni uye yakazotsakatiswa no Abhabhironi. Yocipiri yakawakwa na Zorobhabheri mumasure mekuti Adjudha abva ku Bhabhironi. Uye no kuhamba ke nguwa yakawakwazve na Herodhi Mukuru. Mu Matarhwa, tempro kajinji kakhona yaidainzwa kuti “nyumba.”​—Mt 21:13; Ruk 11:51; 1Mk 29:1; 2Mk 2:4; Mt 24:1.

• Tribhunari.

  Mu matii amweni e Matarhwa e Cigrego, inoreya ngezve mbuto yakakwirira iri pamhene inoita kuguma peciseenzeswa masikada, yaiseenzeswa no anyautongi kuti aime kuti arekete ku anhu akawanda kana kuziisa cisananguro cinonga caizwa. Masoko okuti “tribhunari ya Mwari” uye “tribhunari ya Kristu” anoimirira makwanza anoseenzeswa na Djehovha kuti atonge anhu.​—Aro 14:10; 2Ak 5:10; Ju 19:13.

• Tropito.

  Ciridzwa caiizwa zve kufuridzwa cakagadzirhwa no simbi, caiseenzeswa kuti cibudise cipangidzo kana kuridza ngoma. Kakawanda kakhona, kurira ke tropito kunoitika nge mushobo we kuezanisira pa kuziisa kutonga ka Djehovha kana kuti pa zviitiko zvimweni zvinokosha zvinobva kudenga.​—1Ak 15:52; Zva 8:7–11:15.

U

• Ucekeri.

  Kuita ucekeri i kubvisa ganda re mberi re nhengo ye kubara nayo ye munhu we mwanarume. Ciito ici caibambidzirhwa Abrahamu no ana ake ese, asi acibambidzirhwi ku Akristu. Soko iri rinoseenzeswawo pa kuezanisira mu migariro yakasiyana-siyana.​—Ge 17:10; 1Ak 7:19; Afi 3:3.

• Uhure.

  Kuturukirhwa ke soko re Cigrego rokuti porneía, rinoseenzeswa mu Matarhwa recida kureya kuita zve pamaponde kusikatenderhwi na Mwari. Irona rinobatanidza upombwe, kuita zve pamaponde ke anhu asikazi kucata, mwanarume no mwanarume, mwanakadzi no mwanakadzi, uye kuita zve pamaponde no zvinyama. Mu bhuku ra Zvakapangidzwa, soko rokuti hure rinoseenzeswa kuti riezanisire zvinoizwa no “Bhabhironi Guru.” Irona rinoezaniswa no hure ro zvitendero. Irona rinoita uhure no atungamiriri e nyika kuti rione simba no upfumi. (Zva 14:8; 17:2; 18:3; Mt 5:32; Zvii 15:29; Ag 5:19)​—Onai pakazwi HURE.

• Umambo wa Mwari.

  Masoko aya anonyaya kuseenzeswa ecida kureya ucangamire wa Mwari unoimirirhwa nge utongi we Mwana wake, Kristu Djesu.​—Mt 12:28; Ruk 4:43; 1Ak 15:50.

• Unatsi.

  Mu Matarhwa, soko iri rinoreya zviro zvakanaka, maererano no zvinozwi na Mwari kuti zvakanaka uye zvakashata. ​—Ge 15:6; Dhe 6:25; Ze 2:3; Mt 6:33.

• Ungano.

  Cikwata ce anhu cakaungana pamwepo no cinangwa cimweco kana kuti basa rimwero. Mu Matarhwa e Cihebheru, kajinji kakhona, rinonga recida kureya ngezve ana e Israeri. Mu Matarhwa e Cigrego e Cikristu, kakawanda kakhona rinonga recida kureya ungano yese ye Akristu, asi ringareyawo ungano imwe basi.​—1Md 8:22; Zvii 9:31; Aro 16:5.

• Uphorofita.

  Soko rakafemerhwa; ringagara re kupangidzwa ke kuda ka Mwari kana kuti kuziiswa karo. Uphorofita ungagara fundiso yakafemerhwa ye mararamiro akanaka, kana kuti masoko e zviro zviri kudiwa na Mwari kuti zviizwe, kana kuti kuziiswa ke zviro zviri kuda kuitika.​—Mt 13:14; 2Pe 1:20, 21.

• Upombwe.

  Kuita zve pamaponde ke anhu airi akapangana, asiripi mwamuna no mukadzi, asi awona akacata no munhu umweni.​—Eki 20:14; Mt 5:27; 19:9.

W

• Wakashata.

  Zina rinoseenzeswa kuna Sathani Dhiyabhurosi, unophikisa Mwari uye mitemo yake yese ye unatsi.​—Mt 6:13; 1Ju 5:19.

Z

• Zeu.

  Uu wainga ari mwari mukuru we Agrego. Ku Ristra, Bharnabhee wakadainzwawo kuti Zeu. Masoko akatarhwa kare akaoneka padhuze no ku Ristra, anobhuya ngezve “apristi a Zeu” uye “Zeu mwari we zuwa.” Navhiyo yakakwira Pauro paaibva ku citsuwa ce Marta, nge mberi kainga kuno mufanikiso we “Ana a Zeu,” kureya manyambiri Kastro uye Poruksi.​—Zvii 14:12; 28:11.

• Ziyoni; Dunhu re Ziyoni.

  Zina ra Djebhusi, thaundi rakabamba re Adjebhusi, rainga riri pa dunhu re kumadokera ke Djerusarema. Mumasure me kukundwa ndi Dhavhidhi uye mumasure me kuwaka nyumba ya mambo imona, Ziyoni rakazodainzwa kuti “Thaundi ra Dhavhidhi.” (2Sa 5:7, 9) Dhavhidhi paakacinja Arka oiendesa ikona, Ziyoni rakazogara dunhu cena ra Djehovha. No kuhamba ke nguwa, zina rokuti Ziyoni rakazopedzesera rooseenzeswa kureya mbuto yo tempro yainga iri mu Dunhu ro Moriya, uye nguwa dzimweni rinoseenzeswa recida kureya ngezve mathaundi ese e Djerusarema. Mu Matarhwa e Cigrego e Cikristu, kakawanda kakhona rinoseenzeswa pa kuezanisira.​—Pis 2:6; 1Pe 2:6; Zva 14:1.

• Zuwa re Kutongwa.

  Zuwa, kana kuti nguwa yakasanangurhwa, yekuti zvikwata zve anhu, madzinza, kana kuti anhu ese anodikana kudzidairira kuna Mwari. Ingagarawo nguwa ye kuuraiwa ku aya akasisira kufa. Asi kutongwa kungapasawo mukana amweni kuti aponeswe uye awine upenyu usikaperi. Djesu Kristu no aphostori ake akareketa ngezve “Zuwa re Kutongwa” re mune ramangwana ricabatanidza haiwa basi apenyu, asiwo aya akafa.​—Mt 12:36.

• Zuwa ro Kurekererhwa Zvitema.

  Iri ndiro zuwa cena rainyanya kukosha ku Aisraeri, raidainzwawo kuti Yom Kippur (rakabva pa soko re Cihebheru rokuti yohm hak·kip·pu·rimʹ, rinoreya kuti “zuwa re kufukidza”), raipembererhwa mu zuwa gumi ro Etanimo. Iri i zuwa rimwe pa gore raipindwa no mupristi mukuru mu Mbuto Yakacenesesa yo tabhernakuro uye no kuhamba ke nguwa yo tempro. Imona, mupristi mukuru waipira ngazi ye zvibairo zve zvitema zvake, zvitema zve Arevhi, uye zvitema zve anhu. Zvibairo izvi zvaiendesa ku cibairo ca Djesu, ico cakafukidza zvacose zvitema zve anhu ese e pa nyika kamwe basi, zvecipasa anhu ese mukana wekuti agarezve no ushamwari we padhuze na Djehovha. Rainga riri zuwa ro magungano macena uye mutsanyo. Uyewo rainga riri Sabudu, zuwa rekuti anhu ainga asikaiti mabasa aaisoita.​—Re 23:27, 28; Zvii 27:9; Ako 1:20; Ahe 9:12.

• Zvakaigika zva Mwari.

  Zviro zvinocokuita no cinangwa ca Mwari cinobva kudenga, caanotama kuziisa anhu dakara nguwa yokuti Mwari asanangura kupangidza ku aya basi aanonga asanangura.​—Mk 4:11; Ako 1:26.

• Zvemasarapita.

  Kutenda mu ciitiko kana kuti kupfuridzirhwa ke masimba makuru kana kuti e zvemasarapita. Mu Cigrego, soko rokuti kuita zvemasarapita nge rokuti phar·ma·kiʹa, rinoreya kuseenzesa “mutombo dze masimba.” Mu nguwa dze kare, mutombo dze masimba dzaiseenzeswa pa kukumbira simba re madhimoni, kuitira kuti aite zveuroyi. Ndiyo ndaa, soko re Cigrego rakazogara rinocokuita no zvemasarapita. (Ag 5:20; Zva 21:8)​—Onai pakazwi ZVEMUDZIMU uye ZVEUROYI.

• Zvemudzimu.

  Fundiso yekuti munhu uno mwiya unoita kuti arumbwe ecirarama mumasure me kufa uye kuti unokwanisa kureketa no aya aciri apenyu, maka-maka peciseenzeswa munhu unonga ecipaswa simba no mwiya wakhona. (Ag 5:20; Zva 21:8)​—Onai pakazwi ZVEMASARAPITA uye ZVEUROYI.

• Zveuroyi.

  Kuseenzeswa ke masimba anoziikanwa kuti anobva ku mwiya yakashata. (Zvii 13:6)​—Onai pakazwi ZVEMUDZIMU uye ZVEMASARAPITA.

• Zvibereko zvokutanga.

  Zvibereko zvinotanga kuibva pa nguwa ye kukorora; uyewo, zvinotanga kuoneka pa zvirimwa kana kuti pa zvinyama. Djehovha akabvunza dzinza ra Israeri kuti apase zvibereko zvokutanga zve anhu, zvinyama, uyewo zvirimwa. Hinga dzinza, Aisraeri aipasa zvibereko zvokutanga pa Mutambo we Pau Dzisina Mbiriso uyewo pa Mapentekosti. Soko rokuti “zvibereko zvokutanga” ringakwanisawo kuseenzeswa nge mushobo wekuezanisira kuna Kristu uyewo ku ateeri ake akadzodzwa.​—1Ak 15:23; Nu 15:21; Zvie 3:9; Zva 14:4.

• Zvipfeko zve murhwi we hondo.

  Zvipfeko zvaipfekwa no musurudado kuti adzidziirire pa hondo, zvaibatanidza kapaseti, cidziiriro ce pa diti, bhande, cidziiriro ce murenje, uye civhikhiro cikuru.​—1Sa 31:9; Aef 6:13-17.

• Zvipo zve usisi.

  Zvipo zvaipaswa kuti zvibetsere munhu ainga asina zvakawanda. Kunyazi zvisikanyasi kubhuiwa mu Matarhwa e Cihebheru, Mutemo waipasa nhungamiriro yakadjeka Aisraeri ngezve kupasa arombo.​—Mt 6:2.

• Zvishamiso; Mabasa e simba.

  Zviito kana kuti zviitiko zvinodarika masimba ese anoziikanwa no anhu uye anoizwa no zvisikwa zve kumwiya. Masoko ekuti “cipangidzo,” uye “zvishamiso” nguwa dzimweni anoseenzeswa hinga cishamiso mu Bhaibheri.​—Mt 11:20; Zvii 4:22; Ahe 2:4.

• Zvisina mbiriso.

  Zvinoreya pau dzakaizwa dzisina mbiriso.​—Dhe 16:3; Mk 14:12; 1Ak 5:8.