Djoshuwa
18 Hino ungano yese ye Aisraeri yakaungana ku Siro, uye akawaka tenda re kuunganira, ngokuti awona ainga akunda nyikeyo. 2 Asi painga paciri no madzinza manomwe e Aisraeri ainga asati apaswa nhaka yawo. 3 Zvokuti Djoshuwa wakati ku Aisraeri: “Dakara riini mucaetsera kuenda kootora nyika yamakapaswa na Djehovha, Mwari we madzitsekuru enyu? 4 Sanangurai anarume atatu pa dzinza rimwe na rimwe kuti ndiatume; awona anodikana kuenda uye ohamba mu nyikeyo yese ecitarira zvayakaita kuti izopaswe madzinza hinga nhaka. Kana awona akapedza, anodikana kuhwirira kandiri. 5 Awona anodikana kupatsanura nyikeyo ke matii manomwe. Djudha unodikana kurumbwa ari mu nharaunda yake katemaidumba, uye e nyumba ya Zuzee anodikana kurumbwa ari mu nharaunda yawo kakutsi. 6 Imwimwi tarirai zvakaita nyika iyona, moipatsanura mu matii manomwe; pedzepo iunzisei kandiri, uye inini ndicamukhandirirai mudjenya pamberi pa Djehovha Mwari wedu. 7 Asi Arevhi aadikani kupaswa dii pakati penyu, ngokuti upristi wa Djehovha ndiyo nhaka yawo; uye Gadhi, Rubheni, no hafu ye dzinza ra Manase akatambira nhaka yawo kumabvazuwa ke Djorodhani, yaakapaswa na Mozesi museenzi wa Djehovha.”
8 Anarume aida kuenda kootarira zvainga zvakaita nyikeyo akagadzirira kuti aende, uye Djoshuwa wakaabvunza kuti: “Endai, mohamba mu nyikeyo, uye tarirai zvayakaita; pedzepo hwirirai kandiri, uye inini ndicamukhandirirai mudjenya pamberi pa Djehovha kuno ku Siro.” 9 Hino anarumewo akaenda uye akahamba nyika iyona, eciitarira yese. Awona akaipatsanura ke matii manomwe, maererano no mathaundi ayo ecitarira zvese mu bhuku. Pedzepo akahwirira kuna Djoshuwa ku musasa ku Siro. 10 Djoshuwa wakaakhandirira mudjenya ku Siro pamberi pa Djehovha. Ari ipona Djoshuwa wakakowanisa nyika ku Aisraeri, maererano no zvaidiwa ku dzinza rimwe na rimwe.
11 Mudjenya wakawira ku dzinza ra Bhenjamii, maererano no mhuri dzawo, uye akapaswa nharaunda yainga iri pakati pe dzinza ra Djudha no anhu e ka Zuzee. 12 Ku dii re kakutsi, mugano wawo waitangira ku Djorodhani, uye waienda dakara kumuterero we kakutsi ke Djeriko, waikwidza no pa dunhu wecienda ku dii ro kumadokero, uye waienda dakara ku renje re Bheti-avheni. 13 Uye mugano uwona waibva ipona wecienda ku Ruzi, kumuterero we katemaidumba ke Ruzi, kureya Bheteri; uye mugano waiterera wecienda ku Ataroti-adhari, mu dunhu riri katemaidumba ke Bheti-oroni ye Kumuterero. 14 Uye mugano uwona waibva ku dii ro kumadokero uye waikhona kuenda katemaidumba wecienda ku dunhu riri mberi ke Bheti-oroni nge katemaidumba; waiperera ku Kiriyati-bhaari, kureya Kiriyati-jearimu, thaundi ra Djudha. Iri rainga riri dii re kumadokero.
15 Dii re katemaidumba raitangira kunoperera Kiriyati-jearimu, uye mugano uwona waienda dakara kumadokero; waienderera mberi dakara ku manyuku e mvura e Nefitoa. 16 Mugano uwona waiterera dakara kunoperera dunhu riri mberi ke Bani re Mwana wa Hinomi, riri mu Bani re Refaimu nge kakutsi, uye waiterera dakara ku Bani ra Hinomi, wecienda kumuterero we katemaidumba ke Ajebhuzi, uye waiterera dakara ku Eni-rojeri. 17 Waienda kakutsi uye woenderera mberi dakara ku Eni-semesi uyezve woenda dakara ku Jeriroti, iri mberi ke mutunhu we Adhumimu, uye waiterera dakara ku buwe ra Bhoani mwana wa Rubheni. 18 Uye waidarika wecienda kumuterero we kakutsi mberi ke Arabha uye waiterera wecienda ku Arabha. 19 Uye mugano uwona waienderera mberi dakara kumuterero we kakutsi ke Bheti-ogra, uye waiperera mu muceto ngece kakutsi ke Bahari re Munyu,* panoperera Murambo we Djorodhani ngece katemaidumba. Uu ndiwo wainga uri mugano we katemaidumba. 20 Dii re kumabvazuwa, mugano wawo wainga uri Murambo we Djorodhani. Idzi ndidzona dzainga dziri migano dze nhaka ye ana a Bhenjamii, maererano no mhuri dzawo.
21 Uye mathaundi e dzinza ra Bhenjamii, maererano no mhuri dzawo, ainga ari aya: Djeriko, Bheti-ogra, Emeki-kezizi, 22 Bheti-arabhaa, Zemaraimu, Bheteri, 23 Avhimu, Para, Ofra, 24 Khefari-Amoni, Ofini, uye Jebha, mathaundi 12 no mizi dzawo.
25 Jibhiyoni, Rama, Bheroti, 26 Mizipa, Khefira, Moza, 27 Rekemi, Iriperi, Tarara, 28 Zera, A-erefi, Jebhuzi, kureya Djerusarema, Jibheya, uye Kiriyati, mathaundi 14 no mizi dzawo.
Ii ndiyo yainga iri nhaka ye ana a Bhenjamii, maererano no mhuri dzawo.