Djoshuwa
17 Hino dzinza ra Manase rakapaswa nhaka peciseenzeswa mudjenya, ngokuti ndiye wainga ari dangwe ra Zuzee. Sezvo Makiri, dangwe ra Manase uye baba a Giriyadhi, wainga ari murhwi, iyena wakapaswa Giriyadhi no Bhazani. 2 Uye mudjenya wakawirawo ku ana amweni ese a Manase, maererano no mhuri dzawo: Ana a Abhiezeri, ana a Ereke, ana a Asrieri, ana a Sikemu, ana a Eferi, uye ana a Semidha. Aya ndiwo ainga ari ana e anarume a Manase mwana wa Zuzee, maererano no mhuri dzawo. 3 Asi Zerofeadhi mwana wa Eferi, mwana wa Giriyadhi, mwana wa Makiri, mwana wa Manase, aazi kubara ana e anarume, asi wakabara ana e anakadzi basi, uye mazina awo ndi aya: Maara, Nowa, Ogra, Mirka, na Tirza. 4 Hino awona akaenda kainga kuno mupristi Ereazari, na Djoshuwa mwana wa Nuni, uye no akuru, oabvunza kuti: “Djehovha ndiye akabvunza Mozesi kuti atipase nhaka pakati pe hama dzedu.” Ngokudaro, ecizwira mutemo wa Djehovha, iyena akaapasa nhaka pakati pe hama dza baba awo.
5 Uye matii gumi akapaswa Manase, pasikabatanidzwi nyika yo Giriyadhi uye yo Bhazani, yainga iri ku dii rimweni* ro Djorodhani, 6 ngokuti ana e anakadzi a Manase aazi kutambira nhaka pamwepo no ana e anarume ake, uye nyika ye Giriyadhi yakapaswa ana amweni a Manase hinga nhaka.
7 Uye mugano we mutanha wa Manase waibva ku Azeri dakara ku Mikimetati, iri mberi ke Sikemu, uye mugano uwona waienderera mberi ku dii re katemaidumba* dakara ku nyika yo agari e mu Eni-tapuwa. 8 Nyika ye Tapuwa yakaenda kuna Manase, asi thaundi re Tapuwa rainga riri pa mugano no nharaunda ya Manase, rainga riri re ana a Efraimu. 9 Uye mugano uwona waiterera wecienda ku Murambo* we Kanani, katemaidumba ke bani irona. Painga pano mathaundi a Efraimu pakati pe mathaundi a Manase, uye mugano we nharaunda ya Manase wainga uri kakutsi ke bani, uye waiperera mu bahari. 10 Nharaunda ye katemaidumba yainga iri ya Efraimu, uye nharaunda ye kakutsi yainga iri ya Manase, uye bahari ndiro rainga riri mugano wake; uye ngece kakutsi nharaunda ya Manase yaiguma* ku Azeri, uye ngece kumabvazuwa yaiguma ku Isakari.
11 Mu nharaunda ya Isakari no ya Azeri, Manase wakapaswa Bheti-seani no mathaundi madoko ainga akaitenderedza, Ibreyamu no mathaundi madoko ainga akaitenderedza, agari e ku Dhori no mathaundi madoko ainga akaitenderedza, agari e ku Eni-Edhori no mathaundi madoko ainga akaitenderedza, agari e ku Taanaki no mathaundi madoko ainga akaitenderedza, uye agari e ku Mejidho no mathaundi madoko ainga akaitenderedza, mbuto nhatu dzainga dzino zvimatunhu zvidoko dzainga dziri dzake.
12 Asi ana a Manase aazi kukwanisa kutora mathaundi aya, ngokuti Akanani akarumbwa ecigara mu nyika ii. 13 Aisraeri paakagara no simba, akaita kuti Akanani aite basa re kubambidzirhwa, asi aazi kuadzingira zvacose.
14 Ana a Zuzee akabvunza Djoshuwa kuti: “Ngei matipasa dii rimwe hinga nhaka? Isusu tiri anhu akawanda, ngokuti Djehovha ari kutikomborera dakara zvino. 15 Djoshuwa wakaadaira kuti: “Kana muri anhu akawanda, endai ku gwasha, moocenesa mbuto yenyu ikona mu nyika yo Aperezi no yo Arefaimu, sezvo mutanha we matunhu we Aefraimu wakamudodokerai.” 16 Ana a Zuzee akati: “Mutanha we matunhu autikwaniri, uye Akanani ese ari kugara mu nyika iri mu bani ano ngoro dze hondo no sikeyo dze simbi,* kutobatanidzawo no aya ari mu Bheti-seani no mathaundi madoko ainga akaitenderedza pamwepo no aya ari mu Bani re Jezreeri.” 17 Ngokudaro, Djoshuwa wakati ku nyumba ya Zuzee, kureya Efraimu na Manase: “Imwimwi muri anhu akawanda, uye muno simba guru. Amuzopaswi dii rimwe basi, 18 asi mutanha we matunhu wese ucagara wenyu. Kunyazi hazvo riri gwasha, mucaricenesa, uye ricagara dii re nharaunda yenyu. Ngokuti imwimwi mucadzingira Akanani, kunyazi hazvo awona akabamba uye ano ngoro dze hondo no sikeyo dze simbi.”*