Djoshuwa
19 Hino mudjenya wecipiri wakawira kuna Simioni, ku dzinza ra Simioni, maererano no mhuri dzawo. Uye nhaka yake yaibatanidzwa pa nhaka ya Djudha. 2 Nhaka yake yainga iri Bheeri-sebha na Sebha, Moradha, 3 Azari-suari, Bharaa, Ezemu, 4 Eritoradhi, Bheturi, Orma, 5 Zikragi, Bheti-markabhoti, Azari-suza, 6 Bheti-rabhaoti, uye Sarueni, mathaundi 13 no mizi dzawo; 7 Aini, Rimoni, Eteri, uye Asani, mathaundi marongomuna no mizi dzawo; 8 uye mizi dzese dzaitenderedza mathaundi aya dakara Bhaarati-bheeri na Ramaa ye katemaidumba. Ii ndiyo yainga iri nhaka yo dzinza ra Simioni, maererano no mizi dzawo. 9 Nhaka ye ana a Simioni yakatorhwa pa dii re nhaka ya Djudha, ngokuti dii ra Djudha rainga rakaakurira maningi. Hino ana a Simioni akapaswa dii re nhaka yawo.
10 Mudjenya wecitatu wakawira ku ana a Zebhuroni, maererano no mhuri dzawo, uye mugano we nhaka yawo waienda dakara Saridhi. 11 Mugano wawo waienda ku dii re kumadokero dakara ku Mareyari, waiguma ku Dhabheseti uye waienderera dakara ku bani rainga riri mberi ke Jokeneamu. 12 Uye waibva ku Saridhi wecienda kumabvazuwa, dakara ku mugano we Kiziroti-tabhori, woenderera ku Dhabherati uye waikwidza dakara ku Djafiya. 13 Kubva ikona waienderera mberi ngece kumabvazuwa ku Gati-eferi uye Eti-kazini, uye waienderera ku Rimoni, woguma ku Neya. 14 Mugano waikhonera kakutsi wecienda ku Anatoni uye waiperera ku Bani re Ifita-eri, 15 uye ku Katati, Naarari, Simironi, Idhara, uye Bheterehema, mathaundi 12 no mizi dzawo. 16 Ii ndiyo yainga iri nhaka ye ana a Zebhuroni, maererano no mhuri dzawo. Aya ndiwo ainga ari mathaundi no mizi dzawo.
17 Mudjenya wecirongomuna wakawira kuna Isakari, ku ana a Isakari maererano no mhuri dzawo. 18 Uye mugano wawo waienda dakara Jezreeri, Khesuroti, Sunemu, 19 Afaraimu, Sioni, Anarati, 20 Rabhiti, Kisioni, Ebhezi, 21 Remeti, Eni-Ganimu, Eni-hadha, uye Bheti-pazezi. 22 Mugano waiguma dakara Tabhori, Saazuma, Bheti-semesi, uye waiperera ku Djorodhani, mathaundi 16 no mizi dzawo. 23 Ii ndiyo yainga iri nhaka ye dzinza ra Isakari, maererano no mhuri dzawo, mathaundi awo uye mizi dzawo.
24 Hino mudjenya wecishanu wakawira ku dzinza ra Azeri, maererano no mhuri dzawo. 25 Uye mugano wawo wainga uri Erikati, Ari, Bheteni, Akisafi, 26 Aramereki, Amadhi uye Mishari. Nge ku dii re kumadokero waiguma ku Karmero uye Siori-ribhinati, 27 waihwirira ngece kumabvazuwa wecienda ku Bheti-dhagoni, waiguma ku Zebhuroni, ku dii re kakutsi ke Bani re Ifita-eri, uye waiguma ku Bheti-eneki uye ku Neieri. Hino waienderera dakara ku Kabhuri, nge ku moko boshwe, 28 uye dakara ku Ebroni, Reobhi, Hamoni uye Kanaa, waienderera mberi dakara Sidhoni Huru. 29 Mugano waihwirira ku Ramaa, dakara ku thaundi rakabamba re Tiro. Pedzepo mugano waihwirira ku Osa, uye waiperera mu bahari, ku nharaunda ye Akizibhi, 30 Umaa, Afeki, uye Reobhi, mathaundi 22 no mizi dzawo. 31 Ii ndiyo yainga iri nhaka ye dzinza ra Azeri maererano mhuri dzawo. Aya ndiwo ainga ari mathaundi no mizi dzawo.
32 Mudjenya wecitanhatu wakawira ku ana a Nafitari, ku ana a Nafitari maererano no mhuri dzawo. 33 Mugano we nharaunda yawo waitangira ku Erefi, pa muti mukuru we Zaananimu, waipinda no ku Adhami-nekebhi uye Jabhineri, waienda ku Rakumu uye waiperera ku Djorodhani. 34 Mugano uwona waihwirira ku madokero e Azinoti-tabhori uye waienderera kubva ipona dakara ku Ukoki, uye waiguma ku Zebhuroni, nge katemaidumba uye ku Azeri, nge kumadokero, uye Djudha ku Djorodhani nge kumabvazuwa. 35 Uye mathaundi akatenderedzwa no muru ainga ari Zidhimu, Zeri, Amati, Rakati, Kinereti, 36 Adhama, Rama, Azori, 37 Kedhesi, Edhirei, Eni-hazori, 38 Ironi, Migidha-eri, Oremi, Bheti-anati, uye Bheti-semesi, mathaundi 19 no mizi dzawo. 39 Ii ndiyo yainga iri nhaka ye dzinza ra Nafitari maererano no mhuri dzawo, mathaundi awo uye mizi dzawo.
40 Mudjenya wecinomwe wakawira ku dzinza ra Dhani maererano no mhuri dzawo. 41 Uye mugano we nhaka yawo wainga uri Zora, Eshataori, Iri-semesi, 42 Sarabhini, Aijaroni, Itira, 43 Eroni, Timina, Ekroni, 44 Eriteke, Jibetoni, Bhaarati, 45 Jeudhi, Bhene-Bheraki, Gati-rimoni, 46 Me-jarikoni, uye Rakoni, no mugano uri dhuze no Jope. 47 Asi nharaunda ya Dhani yainga yakaadodokera maningi. Nge ndaa yazvo, awona akaenda koorhwisana na Rezemu uye akaitora eciirhwisa no supada. Pedzepo akagaremo, uye akapasa Rezemu zina rokuti Dhani, maererano no zina ra tsekuru awo, Dhani. 48 Ii yainga iri nhaka ye dzinza ra Dhani maererano no mhuri dzawo. Aya ainga ari mathaundi awo no mizi dzawo.
49 Ngokudaro akapedza kukowanisana nyika hinga nhaka maererano no nharaundedzo. Hino Aisraeri akapasa Djoshuwa, mwana wa Nuni, nhaka pakati pawo. 50 nge mutemo wa Djehovha, akamupasa thaundi raakakumbira, Timinati-sera, ku mutanha we matunhu ye Efraimu, uye Djoshuwa wakawakisazve thaundi uye wakagaremo.
51 Idzi ndidzo nhaka dzokuti Ereazari mupristi, Djoshuwa mwana wa Nuni, uye misoro ye mhuri dze madzinza e Israeri akakoanisana eciseenzesa mudjenya ku Siro pamberi pa Djehovha, pa musuwo we tenda re kuunganira. Ngokudaro akapedza kukowanisa nyika.