Akorinti Wekutanga
12 Hama dzangu, panocokuita no zvipo zvo mwiya mucena, andidi kuti mugare musikazvizii. 2 Imwimwi munozviziya kuti pamainga muri anhu e madzinza amweni,* maicengedzwa no kuendeswa koonamata zvidhori zvisikareketi, mecizviteera kese kazvaimuendesai. 3 Hino, ziyai kuti akuna munhu anobhuya nge mwiya wa Mwari kuti: “Djesu ngaatukwe!” akunazve anobhuya kuti: “Djesu ndiye Tenzi!” asikaseenzeswi nge mwiya mucena.
4 Kuno zvipo zvakasiyana-siyana, asi kuno mwiya umwe basi; 5 kuno mishobo yakasiyana-siyana ye kuseenzera,* asi Tenzi ndi umwe basi; 6 uye kuno mabasa akasiyana-siyana, asi Mwari umwe basi ndiena anoitisa kuti anhu ese aite zviro zvese. 7 Asi kubetsera kunoita mwiya mucena, kunonyasa kuoneka pa munhu umwe na umwe no cinangwa cakanaka. 8 Ngokuti munhu umwe unopaswa cipo ce ungwaru* ngo mwiya, umweni unopaswa cipo ce ruziyo maererano no mwiya umwewo, 9 umweni wakapaswa kutenda nge mwiya umwewo, umweni wakapaswa zvipo zve kuporesa nge mwiya umwewo, 10 umweni wakapaswa cipo co kuita mabasa anoshamisa, umweni cipo co kuphorofita, umweni wakapaswa cipo co kuzwisisa masoko akafemerhwa, umweni wakapaswa cipo co kubhuya mireketero dzakasiyana-siyana, uye umweni wakapaswa cipo co kududzira* mireketero yakasiyana-siyana. 11 Asi mwiya umwewo ndiwona unoita mabasa ese aya, wecipasa munhu umwe na umwe maererano no zvaunoda.
12 Sezvo mwiri uri umwe basi asi uno nhengo dzakawanda, uye nhengo dzese dzo mu mwiri, kunyazi dzakawanda, dziri mu mwiri umwe basi, hinga zvakaitawo Kristu. 13 Ngokuti tese isusu takabhabhatidzwa ngo mwiya umwe basi kuti tiumbe mwiri umwe, kunyazi tiri Adjudha, Agrego, aranda no asiripi aranda, tese takaizwa kuti titambire mwiya uwona.
14 Ngokuti mwiri auzi kuumbwa no nhengo imwe basi asi wakaumbwa no nhengo dzakawanda. 15 Kana tsoka ikareketa kuti: “Inini andiripi nyara, ngokudaro andiiti dii ro mwiri,” izvi azvingaitisi kuti itame kugara dii ro mwiri. 16 Kana nzee ikareketa kuti: “Sezvo inini andiripi dziso, andiiti dii ro mwiri,” izvi azvingaitisi kuti itame kugara dii ro mwiri. 17 Kudai mwiri wese wainga uri dziso, munhu waizozwa nei? Kudai mwiri wese wainga uri nzee, munhu waizozwa kudini munuhwi? 18 Asi zvirokwazvo nge zvekuti, Mwari akaronga dii rimwe na rimwe ro mwiri maererano no zvaaida.
19 Kudai dzese dzainga dziri nhengo imwe basi, mwiri ungadai uri kupi? 20 Asi zvirokwazvo nge zvekuti uwona uno nhengo dzakawanda, asi mwiri ndi umwe basi. 21 Dziso aringabvunzi moko kuti: “Andina basa newe,” uye, musoro aungabvunzi tsoka kuti: “Andina basa newe.” 22 Asi nhengo dzo mwiri dziya dzinooneka hinga dzakaremba idzona dzino basa, 23 uye nhengo dzo mwiri dzatinorangarira kuti adzireremedzwi isusu tinodzireremedza maningi, nhengo dzedu dzinopsverusa ndidzona dzinobathwa no rureremedzo, 24 asi nhengo dzedu dzatinoona kuti dzakanaka atinyanyi kudzireremedza. Kunyazi zvakadaro, Mwari akagadzira mwiri wakadaro, ecipasa kukudzwa kukuru ku nhengo yainga isikareremedzwi, 25 kuti pasaoneke kuparadzana mu mwiri, asi kuti nhengo dzawo dzicengetane. 26 Kana nhengo imwe ikatambudzika, nhengo dzimweni dzese dzinotambudzika pamwepo nayo; kana kuti kana nhengo imwe ikakudzwa, nhengo dzimweni dzese dzinopfara pamwepo nayo.
27 Imwimwi muri mwiri wa Kristu, uye umwe na umwe wenyu i nhengo yawo. 28 Mwari akakanda anhu akasiyana-siyana mu ungano: Kutanga, aphostori; pa mbuto yecipiri, aphorofita; pa mbuto yecitatu, afundisi; pedzepo mabasa e simba; pozouya zvipo zve kuporesa; mabasa e kubetsera; kukwanisa kutungamirira; mireketero dzakasiyana-siyana. 29 Kodi ese ndi aphostori here? Ese ndi aphorofita here? Ese ndi afundisi here? Ese anoita mabasa e simba here? 30 Kodi ese ano zvipo zve kuporesa here? Ese anoreketa ngo mireketero dzakasiyana-siyana here? Ese anokwanisa kududzira* mireketero here? 31 Asi rumbwai mecipsvaka zvipo zvikuru. Inini ndinozomupangidzai gwanza rinopinda makwanza ese.