Akatarhwa na Marko
12 Hino iyena akatanga kureketa nawo eciseenzesa miezaniso eciti: “Mwanarume umweni wakasima munda we uvha, wakautenderedza no ukutira, wakacera mu mundemo cisviniro ce vhinyu, wakagadzira nyumba yakareba ye kurindira; pedzepo wakausiira arimi woita rhwendo. 2 Payakaguma nguwa ye kuibva ke micero, wakatuma muranda umwe kuti apaswe micero minganani yo munda we uvha. 3 Asi awona akamubata, omuponda, omuendesa asina ciro. 4 Wakaatumirazve muranda umweni, uye awona akamuponda musoro omupsverudza. 5 Hino wakaatumirazve umweni, uye awona akamuuraya, pedzepo wakaatumirazve amweni akawanda, amweni awo akaaponda uye amweni akaauraya. 6 Wainga wasarirhwazve no umwe, mwana wake we pa mwoyo. Pokupedzesera wakamutumira kaari, eciti: ‘Acareremedza mwana wangu.’ 7 Asi arimi aya akabvunzana pacawo eciti: ‘Uu ndiye mugari we nhaka. Uyai, ngatimuuraye, uye nhaka yake icagara yedu.’ 8 Ngokudaro awona akamubata, omuuraya uye akamukhandira kunza ke munda we uvha. 9 Muridzi we munda we uvha acaitei? Iyena acahwirira wouraya arimi uye acapasa munda we uvha uu arimi amweni. 10 Amuzi kuerenga here mu Matarhwa kuti: ‘Buwe rakarambwa no awaki, ndiro rinozogara buwe guru re pakhona.* 11 Irona rinobva kuna Djehovha,* uye rinoshamisa mu madziso edu?”
12 Ngokudaro awona aida kumusunga,* ngokuti aizviziya kuti iyena abhuya ngezve muezaniso uwona ecirangarira nge zvawo, asi aithya anhu. Ndiyo ndaa akamusiya, oenda.
13 Akazomutumira Afarisi anganani no ateeri a Herodhi kuti amubate pa masoko ake. 14 Paakaguma, awona akamubvunza kuti: “Mufundisi, tinozviziya kuti imwimwi munoreketa zvirokwazvo uye kuti amuedzi kupfadza anhu, ngokuti amuoni zvakaita munhu nge cekunza, asi munofundisa makwanza a Mwari maererano no zvirokwazvo. Zvinotenderhwa here kana kuti haiwa kuripa musoho kuna Sezari? 15 Tinodikana kuripa, kana kuti haiwa?” Eciziya ngezve ucengedzi wawo, iyena akaabvunza kuti: “Ngei muri kuda kundiedza? Unzisai kuno dhenariyo* rimwe kuti ndirione.” 16 Awona akauya naro, uye iyena akaabvunzisa kuti: “Mufanikiso no masoko akatarhwa apa nge zvaani?” Awona akadaira kuti: “Nge zva Sezari.” 17 Hino Djesu akati: “Pasai zva Sezari kuna Sezari, asi zviro zva Mwari kuna Mwari.” Uye awona akashamiswa nazvo.
18 Hino Asadhusi, anhu anobhuya kuti akuna rumuko, akauya omubvunzisa kuti: 19 “Mufundisi, Mozesi wakatitarira kuti kana mwanarume akafa asina ana, hama yake inodikana kuwaka mufirhwakadziwo kuti abarire hama yake ana. 20 Painga pano hama dzinokwana 7. Wekutanga wakawaka, asi wakafa asina ana. 21 Uye wecipiri wakawaka mufirhwakadziwo, asi wakafawo asina ana uye zvimwezvo zvakaitikawo no wecitatu. 22 Ese 7 akafa asina ana. Uye pakupedzesera, mwanakadziwo wakazofawo. 23 Hino pa rumuko, acagara mukadzi waani? Ngokuti ese 7 akambogara amuna ake.” 24 Djesu akaabvunza kuti: “Apa andipopi pamakapsveteka here, ngokusaziya kenyu Matarhwa kana simba ra Mwari? 25 Ngokuti paanomutswa kubva ku akafa, anarume aawaki uye anakadzi aawakwi, asi anonga akaita hinga ngirozi dze kudenga. 26 Panocokuita no kumutswa ke akafa, imwimwi amuzi kuerenga mu bhuku ra Mozesi, panobhuya ngezve pfiba, apo Mwari paakati: ‘Inini ndiri Mwari wa Abrahamu, Mwari wa Izaki uye Mwari wa Djakobo’? 27 Iyena ndi Mwari we apenyu haiwa we akafa. Imwimwi makapsveteka.”
28 Mutari umweni wainga wakhwedera uye wazwa ecimuitira hasha, eciona kuti ainga aadaira zvakanaka, akamubvunzisa kuti: “Ndiupi mutemo wekutanga* pa yese?” 29 Djesu akamudaira kuti: “Wekutanga unoti: ‘Izwa, iwe Israeri, Djehovha* Mwari wedu ndi Djehovha* umwe basi, 30 ida Djehovha* Mwari wako no mwoyo wako wese, no upenyu* wako wese, no ndangariro dzako dzese uye no simba rako rese.’ 31 Wecipiri unoti: ‘Ida mudoni wako hinga mushobo waunodziita.’ Apana mutemo umweni wakakura kupinda ii.” 32 Mutari uya wakati kaari: “Mufundisi, mareketa zvakanaka, uye mareketa zvinoenderana no cokwadi cekuti: ‘Iyena ndi Umwe basi, uye akuna umweni kunza kake; 33 uye kumuda no mwoyo wese, no kuzwisisa kese, no simba rese uye kuda mudoni hinga zvaunodziita zvinokosha kudarika mipiro yese inopiswa no zvibairo.” 34 Djesu paakaona kuti wainga wadaira zvakanaka, akati kaari: “Auripi kure no Umambo wa Mwari.” Ngokudaro, apana munhu akagara no ushingi wokumuitazve mibvunzo.
35 Asi paairumbwa ecifundisa mu tempro, Djesu akati: “Ngei atari ecibhuya kuti Kristu ndi mwana wa Dhavhidhi? 36 Dhavhidhi ecitungamirirhwa no mwiya mucena, wakati: ‘Djehovha* akati kuna Tenzi wangu: “Gara ku moko kwawo wangu dakara ndakanda azondi ako pasi pe tsoka dzako.”’ 37 Dhavhidhi pacake anomudainza kuti Tenzi, hino zvingaitika kudini kuti iyena agare mwana wake?”
Uye anhu akawanda aimupurutana ecipfara. 38 Uye iyena aifundisa eciti: “Ngwarirai atari anoda kuhamba-hamba akapfeka macira akareba uye anoda kucungamidzwa mu mabazari, 39 anoda kugara pa mbuto dzekutanga* mu masinagoga uye mbuto dzinonyasa kuoneka pa mabiko. 40 Awona anotorera afirhwakadzi zviro, uye ecida kuoneka anoita minamato yakareba. Awona anozotambira muphanico wakakura kudarika anhu ese.”
41 Iyena akagara pa mbuto yaaikwanisa kuona midziyo ye kukandira mare,* akatanga kuona anhu ecikanda mare mu midziyo ye kukandira mare, uye anhu akawanda akapfuma aikandemo mare yakawanda. 42 Uye pakagumawo mufirhwakadzi umweni murombo uye wakakanda mu mudziyo wo kukandira mare zvimare zviiri zve mutengo wakadodoka.* 43 Hino Djesu akadainza afundi ake, oabvunza kuti: “Ndinomubvunzai zvirokwazvo kuti mufirhwakadzi uu murombo, wakanda mu mudziyo wo kukandira mare zvakawanda kupindira anhu amweni ese. 44 Ngokuti ese akanda mare yainga yasara kuseenzesa pa upfumi wawo, asi mufirhwakadzi uu pa urombo wake, wakanda zvese zvaainga anazvo, zvese zvaainga anazvo mu upenyu wake.”