Akorinti Wekutanga
1 Inini Pauro, ndakadainzwa kuti ndigare muphostori wa Kristu Djesu nge kuda ka Mwari, uye Sostene hama yedu, 2 ndiri kutarira ungano ya Mwari iri Mukorinti, kamuri imwimwi makaceneswa mu rubatano na Kristu Djesu, makadainzwa kuti mugare acena, pamwepo no anhu ari ku matii ese ari kudainza zina ra Tenzi wedu Djesu Kristu, Tenzi wawo no wedu:
3 Nyasha no runyararo zvinobva kuna Mwari Baba edu na Tenzi wedu Djesu Kristu ngazvigare na imwimwi.
4 Nguwa dzese ndinogara ndecitenda Mwari wangu nge ndaa yenyu, pandinorangarira ngezve nyasha dzamakapangidzirhwa na Mwari peciseenzeswa Kristu Djesu; 5 ngokuti imwimwi makapfumiswa pa zviro zvese maari, pa kunyasa kukwanisa kureketa uye pa ruziyo rakakura, 6 imwimwi makagara no upupuri pa masoko anoreketa ngezva Kristu, 7 kuitira kuti musaruze cipo cipi haco, pamunonga mecietsera no mwoyo wese kupangidzwa ka Tenzi wedu Djesu Kristu. 8 Iyena acamubambisaiwo dakara pa mugumo, kuti mutame camunopumhwa pa zuwa ra Tenzi wedu Djesu Kristu. 9 Mwari, uya akamudainzai kuti mugare muri murubatano no Mwana wake Djesu Kristu Tenzi wedu, ndi Mwari akagondeka.
10 Hino ndinomukohomedzesai hama, mu zina ra Tenzi wedu Djesu Kristu, kuti munodikana kureketa zvinopindirana uye kuti apadikani kuoneka kuparadzana pakati penyu, asi munodikana kunyasa kubatana pa marangariro enyu no maonero amunoita zviro. 11 Ngokuti anhu amweni e pa nyumba pa Krowe akandibvunza nge zvenyu imwimwi hama dzangu, kuti amuripi kupindirana pakati penyu. 12 Zvandinoda kubhuya nge zvekuti, umwe na umwe wenyu unobhuya kuti: “Inini ndiri wa Pauro,” “Inini ndiri wa Aporo,” “Inini ndiri wa Kefasi,”* “Inini ndiri wa Kristu.” 13 Kureya kuti Kristu akaparadzana here? Kodi Pauro wakamufirai pa mutanda here? Kana kuti makabhabhatidzwa mu zina ra Pauro here? 14 Ndinotenda Mwari kuti apana kana umwe wenyu wandakabhabhatidza kunza ka Krispo na Gayo, 15 kuti pasaoneke unobhuya kuti inini ndakabhabhatidzwa mu zina ra Pauro. 16 Izvirokwazvo kuti ndakabhabhatidzawo e pa nyumba ya Estefana. Asi ku amweni ese, andicazviedzuriri kuti pano amweni andakabhabhatidza. 17 Ngokuti Kristu aazi kundituma kuti ndiuye kuzobhabhatidza, asi akandituma kuti ndiziise masoko akanaka; uye ndisikaseenzesi uzii we anhu, kuitira kuti mutanda we kutambudzikira* wa Kristu utame kuoneka hinga usikabetseri.
18 Ngokuti kureketa ngezve mutanda we kutambudzikira* ndi upenzi kuno aya ari kuenda kootsakatiswa, asi katiri isusu tiri kuponeswa, i simba ra Mwari. 19 Ngokuti zvakatarhwa kuti: “Ndicazopedza uzii we anhu akangwara, uye ndicaramba ungwaru we anhu ano uzii wakakura.” 20 Ari kupi munhu akangwara? Mutari* ari kupi? Munhu ano hasha we nyika ino ari kupi? Mwari aazi kuita kuti uzii we nyika ino ugare upenzi here? 21 Ngokuti nyika yakakonerhwa kuziya Mwari kunyazi no uzii wayo wese. Asi Mwari no uzii wake, akaona kuti zvakanaka kuti aseenzese upenzi unoparidzirhwa kuti aponese aya anotenda.
22 Ngokuti Adjudha anokumbira zvipangidzo uye Agrego anopsvaka uzii; 23 asi isusu tinoparidzira ngezva Kristu akafa pa mutanda, masoko aya anokuhunyisa Adjudha uye anhu e madzinza amweni anozviona hinga upenzi. 24 Asi kuno aya akadainzwa, Adjudha no Agrego, Kristu ndiena simba ra Mwari uye uzii wa Mwari. 25 Ngokuti ciro ca Mwari cinooneka hinga co upenzi, cakangwara kupinda ciro cinooneka no anhu kuti cakangwara; ciro ca Mwari cinooneka hinga cakaremba, cakabamba kupinda ciro cinooneka no anhu hinga cakabamba.
26 Ngokuti hama, muri kuona kudainza kaakamuitai, kuti akuna azii akawanda pa maonero e anhu, akuna akawanda ano simba, akuna akawanda e nyumba huru,* 27 asi Mwari akasanangura zviro zvo upenzi zve nyika kuti apsverudze anhu ano uzii; uye Mwari akasanangura zviro zvisikazi kubamba zvo nyika kuti apsverudze zviro zvakabamba; 28 uye Mwari akasanangura zviro zvisikakoshi zvo nyika no zviro zvisikareremedzwi, osanangura zviro zvisiripopi, kuti atsakatise zviro zviripo, 29 kuitira kuti patame kuoneka munhu unodzikudza pamberi pa Mwari. 30 Asi ndiena akaita kuti mugare mu rubatano na Kristu Djesu, uwo akazogara katiri uzii unobva kuna Mwari, uyewo unatsi,* kuceneswa no kusudzunurhwa nge rusudzunuro, 31 kuti zviitike hinga kutarhwa kazvakaizwa kuti: “Munhu unodzikudza, ngaadzikudze muna Djehovha.”*