Akatarhwa na Ruka
7 Paakapedza kureketa zvaaida kubvunza anhu, iyena akapinda mu Kafarnau. 2 Museenzi we mutungamiriri we masurudado wairhwara maningi, zvekutoda kufa, museenzi iyena waidiwa maningi na tenzi wake. 3 Mutungamiriri we masurudado paakazwa ngezva Djesu, wakatuma akuru anganani e Adjudha kuti aende koomukumbira kuti auye kooporesa museenzi wake. 4 Awona akaenda kuna Djesu uye akatanga kumudeketerera no mwoyo wese eciti: “Iyena akasisira kuti abetserhwe ndimwi, 5 ngokuti iyena anoda anhu e nyika yedu uye ndiye wakatigadzirira sinagoga.” 6 Hino Djesu akaenda nawo. Asi paainga aapadhuze, mutungamiriri we masurudado wakatuma shamwari dzake kuti dzimubvunze kuti: “Tenzi, musanetseke henyu, ngokuti andizi kusisira kuti mupinde mumba mangu. 7 Ndiyo ndaa ndaona kuti andizi kusisira kuti ndiuye kamuri. Asi bhuyai soko rimwe basi, uye museenzi wangu ucaporeswa. 8 Ngokuti inini ndinosotumwawo uye ndino masurudado ari pasi pangu, kana ndikabvunza umwe kuti: ‘Enda!’ iyena unoenda, kana ndikabvunza umweni kuti: ‘Uya!’ iyena unouya, uye kana ndikabvunza muranda wangu kuti: ‘Ita ici!’ iyena unoita.” 9 Djesu paakazwa izvona, akashamiswa, uye eciringira anhu aimuteera, iyena akati: “Ndinomubvunzai kuti: Andizi kuona munhu ano kutenda kakakura kudai mu Israeri.” 10 Uye aya ainga atumwa paakahwirira kumba, akagumira museenzi uya wainga waano uthongo wakanaka.
11 Mumasure mazvo iyena akaita rhwendo ecienda ku thaundi rinozwi Naini, uye afundi ake pamwepo no anhu akawanda aienda naye. 12 Paainga aapadhuze no musuwo we thaundi, akasongana no anhu ainga ecithwara mutumbi ecibuda nawo kunza ke thaundi, iyena wainga ari mwana wakabarhwa ega wa mai ake. Uyezve, maiwo ainga ari mufirhwakadzi. Anhu akawanda e mu thaundi aiaperekedza. 13 Tenzi paakaona maiwo, akaazwira usisi, uye akati kaari: “Musaceme.” 14 Ngokudaro, iyena akakhwedera, obata makha, uye aya ainga akauthwara akaima. Hino iyena akati: “Djaha, ndinoti kauri, muka!” 15 Mudjaha wainga wakafa, wakagara pasi wotanga kureketa uye Djesu akamupasa kuna mai ake. 16 Anhu ese akathya maningi, uye akatanga kukudza Mwari eciti: “Pakati pedu paguma muphorofita mukuru,” uye aitizve: “Mwari arangarira anhu ake.” 17 Uye zvaakaita izvi zvakabararika mu Djudhiya yese no mitanha yese yakaitenderedza.
18 Juau wakabvunzwa zvese izvi no afundi ake. 19 Hino Juau wakadainza afundi ake airi uye wakaatuma kuna Tenzi kuti amubvunzise kuti: “Ndimwi Anozouya, kana kuti tinodikana kuetsera umweni?” 20 Anarume aya paakaguma kaari, akamubvunza kuti: “Tatumwa na Juau Mubhabhatidzi kuti timubvunzisei kuti: ‘Ndimwi Anozouya, kana kuti tinodikana kuetsera umweni?’” 21 Pa nguwa iyona iyena akaporesa anhu akawanda airhwara, anhu ainga ano nhenda dzakakura, anhu ainga ano mwiya yakashata, no kuita kuti mapofu akawanda aone. 22 Djesu akaadaira kuti: “Endai koobvunza Juau zvamazwa no kuona: Mapofu aakuona, akaremara aakuhamba, ano mapere ari kuporeswa, asikazwi aakuzwa, akafa ari kumutswa uye arombo ari kuziiswa masoko akanaka. 23 Anopfara uya asikakuhunyiki nge ndaa yangu.”
24 Anhu akatumwa na Juau paakaenda, Djesu akatanga kubvunza anhu ngezva Juau eciti: “Makaenda koonei ku renje? Gonje raizungunuswa no mhepo here? 25 Hino makaenda koonei? Munhu wakapfeka macira akanakisisa here? Ngokuti aya anopfeka macira akanakisisa uye akagarika ari mu nyumba dze madzimambo. 26 Hino makaenda koonei ikona? Koona muphorofita here? Honde, ndinomubvunzai kuti, iyena unotodarika muphorofita. 27 Uu ndiye wakarekethwa nge zvake kuti: ‘Ona! Ndiri kutuma mutumwa wangu, unozogadzirira gwanza pamberi pako.’* 28 Ndinomubvunzai kuti, pakati pe anhu akabarhwa nge anakadzi apana munhu mukuru kupinda Juau, asi munhu mudoko mu Umambo we kudenga mukuru kupinda iyena.” 29 (Anhu ese no arongosi e musoho paakazwa izvi, akatendera kuti Mwari munatsi, ngokuti awona ainga abhabhatidzwa no rubhabhatidzo ra Juau. 30 Asi Afarisi no aya ainyasa kuziya Mutemo akaramba zano ra Mwari,* ngokuti ainga asikazi kubhabhatidzwa na Juau.)
31 “Anhu e mubarirhwana uu ndingaaezanisa naani, uye akaezana naani? 32 Akaita hinga ana adoko akagara pa bazari ecidainzira adoni awo, eciti: ‘Takamuridzirai mutoriro, asi imwimwi amuzi kutamba; isusu takatsumba, asi imwimwi amuzi kucema.’ 33 Ngo mushobo umwewo, Juau Mubhabhatidzi wakauya asikarhyi pau kana kumwa vhinyu, asi imwimwi munototi: ‘Iyena ano dhimoni.’ 34 Mwana we munhu akauya ecirhya no kumwa, asi imwimwi munoti: ‘Onai! Munhu uu anorhyisa uye anomwisa vhinyu, shamwari yo arongosi e musoho no ashaishi!’ 35 Asi ungwaru unopangidza kuti wakanaka nge mabasa awo.”*
36 Mufarisi umweni wairumbwa ecimukumbira kuti arhye naye. Hino iyena akapinda mumba me Mufarisiwo uye akagara kuti arhye. 37 Mwanakadzi umweni waiziikanwa mu thaundi kuti mushaishi wakaziya kuti iyena airhya* mumba me Mufarisi, uye wakatora cinhekwe ce arabhasto cino mafuta anonuhwirira. 38 Wakauya nge sure kake kainga kuno tsoka dzake, wakacema uye wakatanga kutotesa tsoka dzake no misodzi dzake, ecidzipukuta no tsitsi rake. Uyewo, waipsvoda tsoka dzake padoko no padoko uye waidzidzodza mafuta anonuhwirira. 39 Mufarisi wainga apika Djesu paakazviona, wakati nge ce mumwoyo make: “Dai mwanarume uu wainga ari muphorofita we zvirokwazvo, angadai aziya kuti mwanakadzi uu ari kumubata ndiani uye kuti wakaita kudini, angadai azviziya kuti iyena ndi mushaishi.” 40 Asi Djesu akamubvunza kuti: “Simoni, ndino ciro candiri kuda kukubvunza.” Iyena wakati: “Mufundisi, bhuyai henyu!”
41 “Anarume airi aifiyari mwanarume umweni; umwe wawo waifiyari madhenariyo* 500, asi umweni 50. 42 Paakakonerhwa kuripa magaa awo, wakaarekerera ese. Hino pa airi aya, ndi upi ucanyanya kumuda?” 43 Simoni wakadaira kuti: “Ndinoona kuti ndi uya wakarekererhwa gaa rakakura.” Djesu akamubvunza kuti: “Wadaira zvakanaka.” 44 Hino iyena akaringira kuno mwanakadzi uya, akati kuna Simoni: “Uri kuona mwanakadzi uu? Ndapinda mumba mako; uye iwewe auzi kundipasa mvura ye kusuka tsoka dzangu. Asi mwanakadzi uu watotesa tsoka dzangu no misodzi yake uye wadzipukuta no tsitsi rake. 45 Iwewe auzi kundipsvoda, asi mwanakadzi uu aazi kumboima kupsvoda tsoka dzangu kubvira pandapinda muno. 46 Iwewe auzi kudurura mafuta mu musoro mangu, asi mwanakadzi uu wadurura mafuta anonuhwirira pa tsoka dzangu. 47 Ndiyo ndaa ndinokubvunza kuti, zvishaishi zvake kunyazi zvakawanda,* zvarekererhwa, ngokuti iyena wapangidza rudo rakakura. Asi uya unorekererhwa padoko, unopangidza rudo padoko.” 48 Hino iyena akabvunza mwanakadziwo kuti: “Zvishaishi zvako zvarekererhwa.” 49 Aya ainga ecirhya pamwepo naye akatanga kubvunzana eciti: “Kodi mwanarume uu ndiani wekuti anotokwanisa kurekerera zvitema?” 50 Asi iyena akabvunza mwanakadzi uya kuti: “Kutenda kako kakuponesa; enda hako mu runyararo.”