Akatarhwa na Ruka
8 Mumasure me kacinguwa, Djesu akatanga kuhamba mu thaundi rimwe na rimwe uye mu mutanha umwe na umwe, eciparidza uye eciziisa masoko akanaka e Umambo wa Mwari. Uye afundi 12 ainga ari pamwepo naye, 2 no anakadzi amweni ainga aporeswa pa mwiya yakashata uye pa nhenda dzakasiyana-siyana: Mariya waizwi Madharena, uya wainga wabuda madhimoni 7; 3 Juana mukadzi wa Kuza, mutungamiriri we nyumba ya Herodhi; Suzana; uye anakadzi amweni akawanda, ekuti aibetsera Djesu no afundi ake no zviro zvawo.
4 Anhu akawanda paainga akaungana pamwepo no aya aaihamba nawo mu mathaundi, iyena akareketa eciseenzesa muezaniso eciti: 5 “Murimi umweni wakaenda kookusa mbeu. Paainga ecikusa, mbeu dzimweni dzakambwerera pa muceto pe gwanza dzotsikwa, uye shiri dzo kudenga dzakauya dzopera kurhya. 6 Dzimweni dzakhona dzakambwerera pa buwe, uye mumasure me kumera, dzakaoma ngokuti painga pasina mutota. 7 Mbeu dzimweni dzakambwerera pakati pe minzwa, minzwa padzakakura dzakapingaidza kukura ke mbeu dziya. 8 Asi dzimweni dzakhona dzakambwerera pa mataka akanaka, uye mumasure me kumera, dzakabara zvibereko zvakapethwa ka 100.” Mumasure me kubhuya izvi, akati no izwi guru: “Ano nzee dzo kuzwa, ngaazwe.”
9 Asi afundi ake akamubvunzisa kuti muezaniso uwona unoreyei. 10 Iyena akati: “Imwimwi munotenderhwa kuzwisisa zvakaigika zve Umambo wa Mwari, asi ku anhu amweni zvese zvinoziiswa peciseenzeswa miezaniso, kuti aringire, asi asaone, uye kuti apurutane, asi asazwisise. 11 Muezaniso uu unoreya kuti: Mbeu i soko ra Mwari. 12 Dziya dzakambwerera pa muceto pe gwanza dzinoimirira aya anozwa soko, uye mumasure mazvo Dhiyabhurosi unouya, wobvisa soko irona mu mwoyo mawo kuti asatende uye asaponeswe. 13 Mbeu dziya dzakambwerera pa buwe dzinoimirira aya anozwa soko oritambira no mupfaro, asi aana midzi. Anototenda ke cinguwa, asi pa nguwa yo kuedzwa, anopauka. 14 Mbeu dzakambwerera pa minzwa, dzinoimirira aya anozwa soko ra Mwari, asi nge ndaa yo kudzirhya mwoyo, upfumi, no zviro zvinodakadzisa zve upenyu, awona anotsikirirhwa uye otama kubara zvibereko zvinoguma pa kuibva. 15 Mbeu dziya dzakambwerera pa mataka akanaka, dzinoimirira aya ekuti, mumasure me kuzwa soko no mwoyo unoda uye wakanaka, anoricengeta uye anobara zvibereko ecishingirira.
16 “Apana munhu anobatidza cibani kakucidumhaidza kana kucikanda pasi pe kama, asi anocikanda pakanyasa kukwirira kuti anhu ese anopinda mumba avhenekerhwe. 17 Ngokuti apana cakafisika cisikazobudi pamhene, uyezve apana cakanyasa kuigwa cisikazozikaniki uye cotama kubuda pamhene. 18 Hino, ngwarirai mushobo wamunopurutana, ngokuti aya anazvo anozopaswa zvakawanda, asi aya asina, anozotorerhwa kunyazi zvaanorangarira kuti anazvo.”
19 Mai ake no hama dzake akauya, asi aazi kukwanisa kuguma paainga ari nge ndaa yo kuwanda ke anhu. 20 Hino Djesu akabvunzwa kuti: “Mai enyu no hama dzenyu ari kunzeyo, ari kuda kumuonai.” 21 Iyena akaadaira kuti: “Mai angu no hama dzangu ndiwo awona aya anozwa soko ra Mwari, oriseenzesa.”
22 Pa zuwa rimweni, iyena no afundi ake akakwira mu bharko, uye iyena akaabvunza kuti: “Ngatiende ku n’ombera ko bahari.” Ngokudaro akaenda. 23 Asi paainga ecienda, Djesu akabathwa no hope. Dutu rino simba rakatanga kuitika mu bahari, bharko rakatanga kupinda mvura uye rainga riri pa ngozi. 24 Nge ndaa yazvo, akamutsungudza eciti: “Mufundisi, Mufundisi, taakuda kufa isusu!” Iyena akamuka uye akasumurura dutu no mvura ino simba, izvona zvakaima uye zvakaterama. 25 Hino iyena akati kaari: “Kutenda kenyu kuripi?” Asi awona akathya maningi oshamisika, uye aibvunzana pacawo eciti: “Mwanarume uu ndiani kamare? Ngokuti iyena anobvunza dutu no mvura zvokuita, uye izvona zvinomuzwira.”
26 Uye awona akaguma n’ombera ku mutanha we Agerasa, ku dii rimweni ro bahari re Garireya. 27 Djesu paakacita mu bharko, mwanarume umweni we muthaundi irona wainga ano madhimoni wakaenda kaari. Iyena wainga waano nguwa yakareba asikasimiri macira, uye wainga asikagari pa muzi, asi waigara ku makuwa.* 28 Paakaona Djesu, iyena wakagodama pamberi pake, uye wakakhuwa no izwi guru eciti: “Uri kudei na inini,* Djesu, Mwana wa Mwari we Kumusoro-soro? Ndinokudeketerera kuti usanditambudze.” 29 (Ngokuti Djesu ainga abvunza mwiyewo kuti ubude mu mwanarumewo. Mwiyewo wainga wakamubata kakawanda,* uye iyena wainga wakasungwa kakawanda no makorenti mu nyara no mu mirenje uye wairindwa, asi iyena waidadzura makorenti uye dhimoniro raimutora recimuendesa kusina anhu.) 30 Djesu akamubvunzisa kuti: “Unozwi ani?” Iyena wakati: “Cikwata,” ngokuti wainga wapindwa no madhimoni akawanda. 31 Uye aimudeketerera kuti asaaendese mu rindi rakadzikisisa. 32 Painga pano nguruwe dzakawanda dzaiushwa mu dunhu, ndiyo ndaa awona akadeketera kuna Djesu kuti apinde mu nguruwedzo, uye iyena akaatendera. 33 Madhimoni akabuda mu mwanarumewo uye akapinda mu nguruwe, uye nguruwedzo dzakadzvika pa gwirindi dzombwerera mu bahari uye dzofiremo. 34 Asi aushi e nguruwe paakaona zvainga zvaitika, akatiza uye akaenda koozvipanganidzira anhu e mu thaundi no e mutanha.
35 Anhu akaenda koona zvainga zvaitika. Paakakhwedera kuna Djesu akaona mwanarume uya wainga wabuda madhimoni, wakapfeka uye wainga waa munhu kwaye, wakagara padhuze na Djesu; uye awona akathya. 36 Aya ainga azviona akaapanganidzira kuti mwanarume wainga ano madhimoni wainga waporeswa kudini. 37 Anhu akawanda e mutanha we Agerasa akakumbira kuti Djesu abudemo, ngokuti ainga ecithya maningi. Hino iyena akakwira bharko kuti aende. 38 Asi mwanarume uya wainga wabuda madhimoni wakarumbwa ecikumbira Djesu kuti arumbwe anaye, asi iyena akabvunza mwanarumewo kuti aende, eciti kaari: 39 “Hwirira kumba, uye rumbwa wecibvunza amweni zvawaizirhwa na Mwari.” Hino iyena wakaenda eciziisa mu thaundi rese zvaainga aizirhwa na Djesu.
40 Djesu paakahwirira, anhu akamutambira zvakanaka ngokuti anhu ese ainga ecimuetsera. 41 Pakaguma mwanarume umweni waizwi Djairosi; mwanarume iyena wainga ari mutungamiriri we sinagoga. Iyena wakahwararira Djesu uye wakatanga kumudeketerera kuti aende naye kumba kake, 42 ngokuti mwana wake we mwanakadzi wakabarhwa ega, uwo wainga ano makore 12, wainga asara padoko kuti afe.
Djesu paaihamba ecienda, anhu aimutenderedza ecitsikirirana. 43 Painga pano mwanakadzi umweni wakapedza makore 12 ecitambudzika no nhenda ye kubuda ngazi, uye apana munhu wainga wakwanisa kumurapa. 44 Mwanakadziwo wakakhwedera nge sure kake, wopsvasa zviusaru zve djira ra Djesu, uye nhenda yake ye kubuda ngazi yakapera ciriporipoco. 45 Ngokudaro, Djesu akabvunzisa kuti: “Ndiani wandipsvasa?” Ngokuti anhu ese airambira, Pedru wakati: “Tenzi, anhu akamutenderedzai ecimutsikirirai.” 46 Asi Djesu akati: “Pane wandipsvasa, ngokuti ndinozviziya kuti simba rabuda mandiri.” 47 Paakaona kuti wainga wabatika, mwanakadziwo wakaenda kaari ecitetemera, wakamuhwararira uye wakabhuya pamberi pe anhu ese kuti ngei wainga wamupsvasa uye mushobo waakaporeswa ciriporipoco. 48 Asi Djesu akati kaari: “Mwanangu, kutenda kako kakuporesa. Enda mu runyararo.”
49 Paainga ecireketa, pakaguma muimiriri we mutungamiriri we sinagoga uye wakati: “Mwana wenyu wafa; musanetsezve henyu Mufundisi.” 50 Paakazvizwa, Djesu akamudaira kuti: “Usathye, iwewe tenda basi, uye iyena acaponeswa.” 51 Paakaguma pa nyumba pa Djairosi, aazi kutendera kuti munhu upi hake apinde naye, kunza ka Pedru, Juau, Tiyago, uye baba na mai e musikanewo. 52 Asi ese aicema eciponda pa diti ecirhwadziwa nge ndaa yo musikanewo. Ngokudaro, Djesu akati: “Musaceme, ngokuti iyena aazi kufa asi wakawata.” 53 Hino awona akatanga kumuseka, ngokuti aizviziya kuti musikanewo wainga wafa. 54 Asi iyena akamubata nyara yake, omudainza eciti: “Musikana, muka!” 55 Simba re upenyu rakahwirira maari,* uye musikanewo wakamuka ciriporipoco, uye Djesu akaabvunza kuti amupase zvokurhya. 56 Abereki ake aikonerhwa kudzibata ngo mupfaro, asi Djesu akaabvunza kuti asabvunze munhu upi hake nge zviya zvainga zvaitika.