Djoshuwa
5 Madzimambo ese e Aamori ainga ari ku dii re kumadokero ke Djorodhani uye madzimambo ese e Akanani ainga ari dhuze no bahari akazwa kuti Djehovha ainga aomesa mvura ye mu Djorodhani pamberi pe Aisraeri dakara awona apedza kubira. Paakandozwa izvona, akaora mwoyo uye akagara asina ushingi* nge ndaa ye Aisraeri.
2 Pa nguwa iyona, Djehovha akati kuna Djoshuwa: “Gadzira mapanga e mapuwe uye itazve ucekeri anarume e Israeri.” 3 Ngokudaro, Djoshuwa wakagadzira mapanga e mapuwe uye wakaita ucekeri anarume e Israeri ku Jibheyati-araroti. 4 Izvi ndizvo zvakaita kuti Djoshuwa aaite ucekeri: Ku anhu ese akabuda ku Edjipitu, anarume ese, anarume e hondo* ainga afa ku renje, pa rhwendo raakaita ecibva ku Edjipitu. 5 Ese ainga abuda ku Edjipitu ainga akaizwa ucekeri, asi ese akabarhwa paaiita rhwendo ecibva ku Edjipitu ainga asikazi kuizwa ucekeri. 6 Aisraeri ainga ahamba ke makore 40 ku renje dakara dzinza rese rapera kufa, kureya anarume e hondo ainga abva ku Edjipitu uye asikazi kuzwira Djehovha. Djehovha ainga akapikira kuti ainga asikazoasii eciona nyika yakapikirhwa na Djehovha ku madzitsekuru edu kuti aizotipasa nyika inoerera mukaka no uci. 7 Ngokudaro, pa mbuto pawo akakanda ana awo, ainga aizwa ucekeri na Djoshuwa; awona ainga asikazi kuizwa ucekeri, ngokuti aazi kuizwa ucekeri paaiita rhwendo.
8 Mumasure mekuti dzinza rese raizwa ucekeri, awona akagara mu mbuto dzawo mu musasa dakara zvironda zvawo zvapora.
9 Hino Djehovha akati kuna Djoshuwa: “Nyamasi ndabvisa kupsveruswa kenyu no Edjipitu.” Ndiyo ndaa, mbuto iyona inodainzwa kuti Jirigari* dakara na nyamasi.
10 Aisraeri akarumbwa ari mu musasa we Jirigari, uye pa zuwa 14 re mwedzi uwona, kaakudoka, akapemberera Paskwa ku renje re Djeriko. 11 Uye pa zuwa rakazoteera mumasure me Paskwa, pa zuwa irona kamare, akatanga kurhya zvirimwa zve mu nyika, pau dzisina mbiriso uye tsangu dze kukangwa. 12 Manaa akapera pa zuwa irona raakatanga kurhya zvirimwa zve mu nyika; Aisraeri aazi kuonazve manaa, asi awona akatanga kurhya zvirimwa zve mu nyika ye Kanani kubvira mu gore irona.
13 Djoshuwa paainga ari dhuze no Djeriko, wakaringira mberi kake uye wakaona mwanarume wakaima akabata supada mu nyara yake. Djoshuwa wakamukhwederera uye wakamubvunzisa kuti: “Iwewe uri ku dii redu kana kuti uri ku dii re azondi edu?” 14 Iyena wakadaira kuti: “Inini ndiri pano hinga mucinda* we anyahondo a Djehovha.” Paakazwa izvona, Djoshuwa wakahwarara wogodama akaringira pasi uye wakati: “Tenzi wangu, cinyi camunoda kubvunza museenzi wenyu?” 15 Mucinda we anyahondo a Djehovha wakati kuna Djoshuwa: “Khumura masandarya, ngokuti pawakatsika i mbuto cena.” Djoshuwa wakaita izvona ciriporipoco.