Matambudziko Matatu Okutanga ku Edjipitu

Ku Edjipitu Aisraeri aibambidzirhwa kuti aseenze hinga aranda. Kuti abetsere anhu ake, Djehovha akatuma Mozesi uye Aroni kuti abvunze Faraoo kuti: ‘Siya kuti anhu angu abude ku Edjipitu. Inini ndinoda kuti awona andinamate ku renje.’ Asi Faraoo nge kudzikudza aazi kuda kuzwira Djehovha. Iyena wakabhuya kuti: ‘Inini andina basa no zvarekethwa na Djehovha, adisii kuti Aisraeri aende.’ Ngo ndaa ye shungu, Faraoo wakaita kuti Aisraeri aseenze maningi. Hino unoziya kuti Djehovha akaitei? Iyena akaita kuti paoneke zviro gumi zvakashata maningi ku Aedjipitu, zvinodainzwa kuti matambudziko. Djehovha akabvunza Mozesi kuti: ‘Bvunza Faraoo kuti, sezvo iwewe audi kundizwira, mvura yese ye Murambo we Niro icagara ngazi.’ Mozesi wakaenda kooreketa na Faraoo. Uye Aroni paakaponda mvura ye Murambo we Niro no ndonga yake, mvura yakacinja yogara ngazi. Mvureyo yakanuhwa maningi uye howe dzese dzakafa. Zvainga zvisikacaitizve kumwa mvura we Niro. Kunyazi eciona zvese izvi zveciitika, Faraoo aazi kuda kusiya Aisraeri kuti aende.

Mu masure mekudarika sumana, Djehovha akabvunzazve Mozesi kuti: ‘Enda kooreketazve na Faraoo. Mubvunze kuti kana iyena akatama kusiya anhu angu kuti aende, Edjipitu icagara no macerhye.’ Faraoo aazi kuda kuzwira Djehovha. Hino Aroni wakamutsa ndonga yake uye Edjipitu yakadzara no macerhye. Macerhye ainga akadzara ku mbuto yese, mukati me nyumba, padenga po kama uye mu matijera. Izvona pazvakaitika, Faraoo wakabvunza Mozesi kuti: ‘Ndapota kumbira Djehovha kuti abvise macerhye aya. Inini ndinogondesa kuti ndicasiya Aisraeri ecienda.’ Hino, Djehovha akaimisa dambudziko irona uye macerhye ese akapera kufa. Edjipitu yese yakatanga kunuhwa. Aedjipitu akaunganidza murhwi dzakawanda dzo macerhye akafa. Kunyazi zvakadaro Faraoo aazizve kusiya kuti Aisraeri aende.

Ndiyo ndaa, Djehovha akabvunzazve Mozesi kuti: ‘Bvunza Aroni kuti aponde ndonga yake pasi uye bukuta ricacinja kugara nhunga.’ Hino Aroni wakaita izvona. Mamiriyonji e nhunga dzakaoneka ipona. Aedjipitu paakaona nhunga dzakawanda, akabvunza Faraoo kuti: ‘Izvi zvinobva kuna Mwari.’ Asi Faraoo aazi kuda kusiya Aisraeri kuti aende.