Matambudziko Matanhatu Akazoteera

Mozesi na Aroni akaendazve koobhuya na Faraoo eciti: ‘Mwari abhuya kuti kana iwewe ukaramba kusiya kuti Aisraeri aende, iyena acadzadza Edjipitu no magunura.’ Hino mamiriyonji e magunura akapinda mu nyumba dze Aedjipitu. Asi magunura aazi kupinda mu nyumba dze Aisraeri. Dambudziko iri uye no amweni akazoteera ainga akasiyana. Matambudziko awona akaitika basi no Aedjipitu. Paakaona izvi, Faraoo wakabhuya kuti: ‘Mozesi, kumbira kuti Djehovha abvise magunura uye inini ndicasiya kuti imwimwi muende.’ Hino Djehovha akatsakatisa magunura ese. Asi Faraoo aazi kusiya kuti Aisraeri aende.

Ndiyo ndaa, Djehovha akabhuya kuti: ‘Kana Faraoo akaramba kusiya kuti anhu angu aende, zvipfuyo zve Aedjipitu zvicarhwara uye zvicafa.’ Izvi zvakaitika pa zuwa rakazoteera. Asi zvipfuyo zve Aisraeri zvakarumbwa zviciri zvipenyu. Kunyazi zvakadaro, Faraoo wakarumbwa eciomesa musoro, uye wakaramba kuti anhu aende.

Asi Djehovha akabvunza Mozesi kuti: ‘Bata marota uye kusira mudenga pamberi pa Faraoo.’ Mozesi wakaita izvona uye mudenga makadzara no bukuta re marota. Asi bukuta irona re marota paraimbwera pasi, Aedjipitu uye zvipfuyo zvawo akagara no mamota airhwadza maningi. Kunyazi zvakadaro, Faraoo aazi kusiya kuti Aisraeri aende.

Hino Djehovha akatumazve Mozesi kuti aende koobhuyazve na Faraoo kuti: ‘Sezvo iwewe audi kusiya kuti anhu angu aende, mangwana kucanaya masanza mu Edjipitu yese.’ Pa zuwa rakazoteera, Djehovha akaita kuti mvura ino simba inaye, masanza uye no mheni dzaicetuka dzecitinhira. Izvona zvainga zvisati zvakamboitika mu Edjipitu. Mvura yakatsakatisa miti dzese uye zvirimwa. Asi ku dii raigara Aisraeri akuzi kunaya mvura no masanza. Faraoo wakabvunza Mozesi kuti: ‘Ndapota, kumbira kuti Djehovha aimise mvura! Pedzepo mungakwanisa kuenda.’ Mozesi wakabhuya na Djehovha uye mvureyo yakaima, asi Faraoo wakacinja marangariro ake.

Hino Mozesi wakati: ‘Zvirimwa zvese zvisikazi kutsakatiswa ne mvura zvicarhyiwa no makwiza.’ Hino, mamiriyonji e makwiza akadzara mu Edjipitu uye akarhya miti dzese no zvirimwa zvainga zvasara. Faraoo wakabhuya kuti: ‘Ndapota, kumbira kuti Djehovha abudise makwiza aya.’ Djehovha akaita kuti makwiza apere, asi Faraoo aazi kusiya kuti Aisraeri aende.

Ndiyo ndaa, Djehovha akabvunza Mozesi kuti: ‘Tambaradza nyara yako mudenga.’ Mozesi paakaita izvona, ciriporipoco kese kakaita cidima. Ke mazuwa matatu, Aedjipitu ainga asikakwanisi kuona ciro cipi haco. Asi Aisraeri ndiwo ainga ano ciedza basi.

Faraoo wakadainza Mozesi uye wakabhuya kuti: ‘Iwewe uye anhu ako mungakwanisa kuenda. Asi n’ombe dzenyu uye mabira enyu anosara.’ Mozesi wakati: ‘Izvona zvinodikana kuenda na isusu. Isusu tinodikana kupasa zvipfuyo zvedu hinga cipo kuna Djehovha.’ Faraoo wakanyangadzwa maningi uye wakakhuwira Mozesi na Aroni eciti: ‘Budai pamberi pangu! Kana mukauyazve pano, ndicamuurayai.’