Cishamiso Cakaitika pa Bahari re Kupsvuka

Faraoo paakaziya kuti Aisraeri ainga abuda mu Edjipitu, iyena wakacinja marangariro ake uye oda kuahwirinza. Iyena wakabvunza anyahondo ake kuti: ‘Gadzirirai ngoro dzangu dze hondo, ngatiateere! Isusu tainga tisikadikani kusiya anhu aya ecienda.’ Faraoo no anyahondo ake akatanga kuteera Aisraeri.

Pa nguwa iyona, Djehovha aipangidzira Aisraeri gwanza raiidikana kuhamba naro. Unozviziya kuti aizviita kudini? Comasikati aiseenzesa gore uye cousiku aiseenzesa murazvi we muriro. Mumasure me kacinguwa, Aisraeri akaguma ku Bahari re kupsvuka, Djehovha akaabvunza kuti amboime padoko.

Ipona, Aisraeri akaona Faraoo no anyahondo ake eciuya nge ce sure kawo. Awona ainga asina ko kuenda. Mberi kawo kainga kuno Bahari re Kupsvuka uye sure kainga kune Aedjipitu. Aisraeri akathya maningi zvekuti akareketa kuti aida kuhwirira ku Edjipitu. Asi Mozesi waigonda Djehovha uye wakaabvunza kuti: ‘Musathye. Ngatietsere toona kuti Djehovha acatibetsera kudini.’

Hino, Djehovha akabvunza Aisraeri kuti agadzirire kuti aenderere mberi no rhwendo. Pedzepo, Djehovha akaita kuti gore rainga riri mberi ke Aisraeri riende sure kawo. Gore rakagara mberi ke Aedjipitu. Ngokudaro, ku dii re Aisraeri kainga kakadjeka asi ku dii re Aedjipitu kainga kune cidima.

Djehovha akabvunza Mozesi kuti atambaradze nyara yake mu Bahari re Kupsvuka. Pedzepo, Djehovha akaita kuti dutu rino simba rivhuvhute mu Bahari ke usiku wese. Nge ndaa ye dutu irona, Bahari rakapatsanurhwa rogara matii mairi aiita hingana maparedhi akareba akaizwa no mvura. Pakati pe maparedhi awona mairi, pakaoneka gwanza. Mamiriyonji e Aisraeri akapinda no gwanza irona ecihamba pa mataka akaoma kamare, dakara aguma ku dii rimweni ro Bahari.

Faraoo no anyahondo ake akateera Aisraeri nge gwanza rainga rafunungurhwa na Djehovha pakati pe Bahari. Asi Djehovha akaita kuti anyahondo a Faraoo atame kupindirana uye akaita kuti marodha e ngoro dzake dze hondo agudjuke. Aedjipitu akatanga kukhuwa eciti: ‘Ngatibude pano! Djehovha ari kurhwira Aisraeri.’

Hino Djehovha akabvunza Mozesi kuti atambaradzezve nyara yake ku Bahari re Kupsvuka. Mozesi paakaita izvona, maparedhi aya e mvura akaondomoka pa nguwa imweyo pamusoro pe Aedjipitu. Faraoo ne anyahondo ake ese akafa. Apana kunyazi umwe hake wakasara.

Nge dii rimweni ro bahari, Aisraeri akaona zvainga zvaizwa na Djehovha. Hino kuti amutende, anakadzi akatanga kutamba uye ese akaemba eciti: “Emberai Djehovha, ngokuti nyamasi ese aziya kuti iyena ano simba guru. Iyena akhandira mu bahari makavharo no ahambisi e makavharo.” Anhu ese ainga ecipfara maningi. Parizvino Aisraeri ainga akasudzunuka zvezvirokwazvo.