Dambudziko re Cigumi

Mozesi wakangodesa Faraoo kuti wainga asikazohwiririzve kaari. Asi asati aenda kumba, Mozesi wakamubvunza kuti: ‘Pakati po usiku, ana ese e dangwe e Edjipitu acafa, kubvira ku dangwe ra Faraoo uye kutobatanidzawo ana e dangwe e aranda ake.’

Hino, Djehovha akabvunza Aisraeri kuti aite mabiko anokosha pa usiko uwona. Mwari akati: ‘Urayai bira kana kuti mbudzi ino gore rimwe re kubarhwa uye kandai ngazi padoko pa misuwo ye nyumba dzenyu. Kocai nyama yakhona uye moirhya no pau isina mbiriso. Garai makagadzirira kuenda. Usiku wa nyamasi uno, inini ndicamudusai mu Edjipitu.’ Rangaridza mupfaro wakazwa Aisraeri! Awona ainga ooda kubuda mu Edjipitu.

Pakati pe usiku, ngirozi ya Djehovha yakapinda mu nyumba dzese mu Edjipitu. Iyona payaisama kuona ngazi pamberi pe musuwo we nyumba, yaipinda uye yaiuraya mwana we dangwe we mhuri iyona. Ngirozi iyona payaiguma pa nyumba yainga ino ngazi pa musuwo, yainga isikapindimo. Ndiyo ndaa, mu mhuri dzese dze Aedjipitu kutobatanidzawo apfumi no arombo akafirhwa no ana awo e dangwe. Asi apana mwana umwe we Aisraeri wakafa.

Kunyazi mwana wa Faraoo wakafa. Faraoo aazi kukwanisa kushingirira zviro izvi. Ndiyo ndaa iyena wakatuma munhu kuti adainze Mozesi na Aroni nokukasika uye iyena wakati: ‘Imwimwi uye no anhu enyu mungaenda henyu. Endai uye namatai Mwari wenyu. Torai zvipfuyo zvenyu uye budai pano nokukasika!’

Hino pa usiku uwona, mwedzi wainga wakadjeka uye Aisraeri akabuda mu Edjipitu. Asi akabuda akaita zvikwata. Painga pano anarume Eciisraeri 600 000 no anakadzi akawanda uye ana adoko. Uye anhu akawanda ainga asiripi Aisraeri akaendawo kuti anamate Djehovha. Parizvino Aisraeri ainga asudzunuka!

Kuti asakanganwe kununurhwa kaakaizwa na Djehovha ku Edjipitu, Aisraeri aiita mabiko anokosha makore ese. Awona aidainza mabiko aya kuti Paskwa.