Dhongi ra Bharami Rinoreketa

Aisraeri ainga ari ku renje ke makore anoda kukwana 40. Awona akawina hondo dzakawanda ecirhwisana no mathaundi ano simba. Parizvino, ainga awaka musasa ku bani Moabhi kumabvazuwa ke Murambo we Djorodhani, yainga yaa nguwa yokuti mu Nyika Yakapikirhwa. Mambo we ku Moabhi waizwi Bharaki wakathya kurhwisana no Aisraeri uye wakathya kunyiswa. Ndiyo ndaa iyena wakadainza mwanarume umweni waizwi Bharami kuti auye ku Moabhi kuti atuke Aisraeri.

Asi Djehovha akabvunza Bharami kuti: ‘Usatuke Aisraeri.’ Ndiyo ndaa, Bharami aazi kuenda ku Moabhi. Pedzepo, mambo Bharaki wakamudainzazve kocipiri uye wakamugondesa kuti waizomupasa zvese zvaaida. Kunyazi zvakadaro Bharami aazi kuenda ku Moabhi. Asi Djehovha akamubvunza kuti: ‘Enda, asi unodikana kureketa zvandicakubvunza.’

Hino Bharami wakakwira dhongi rake uye iyena wakaita ku Moabhi, asi wakaronga kuti waizotuka Aisraeri, kunyazi wainga abvunzwa na Djehovha kuti asaite kudaro. Ndiyo ndaa, ngirozi ya Djehovha yakabudira mu gwanza kanokwana katatu. Bharami aazi kukwanisa kuona ngirozi iyona asi dhongi rake rakaiona. Pokutanga, dhongi rake rakabuda mu gwanza uye Bharami wakariponda. Ngo pamberi, ngirozi yakabudirazve. Dhongi parakaedza kupaukira ngirozi, irona rakadzitsikirira pamuru uye rotsikirirawo murenje wa Bharami pa muru. Iyena wakaripondazve. Pedzepo, ngirozi yakabudirazve. Asi pa nguwa iyona, dhongi arizi kukwanisa kupauka. Ndiyo ndaa, irona rakawata pakati po gwanza. Hino Bharami wakaripondazve.

Pa nguwa iyona, Djehovha akaita kuti dhongi rirekete. Irona rakabvunzisa Bharami kuti: ‘Urikundiponderei?’ Bharami wakadaira eciti: ‘Ngokuti iwewe urikuita kuti inini ndipsveruke. Kudai ndainga ndino supada pano, ndaida kutokuuraya.’ Uye dhongi rakati: ‘Iwewe unosondikwira mazuwa ese. Ndakambokuitira izvona here?’

Pedzepo Djehovha akaita kuti Bharami aone ngirozi. Ngirozi yakabhuya kuti: ‘Djehovha akakungwadza kuti iwewe usabhuye ciro cipi haco cakashata ngezve Aisraeri, andizvopi?’ Hino Bharami wakadaira kuti: ‘Ndashaisha, ndaakupetuka hangu kumba.’ Asi ngirozi yakati: ‘Iwewe enda ku Moabhi, asi reketa zvaucabvunzwa ndi Djehovha.’

Kodi Bharami wakafundei no zvese izvi? Apana zvaakafunda. Paakaguma ku Moabhe, iyena wakaedza kutuka Aisraeri. Uye wakaedza kuita izvona katatu kese. Asi Djehovha akaita kuti Bharami abhuye kuti zviro zvakanaka zvaizoitika no Aisraeri. Pedzepo, Aisraeri paakarhwisa Moabhi, Bharami wakauraiwa. Kudai Bharami wakazwira Djehovha kubvira pakutanga iyena wainga asikazofi, andizvopi?