Djehovha Akaphanica Apanduki

Mumasure me kanguwa, Aisraeri paainga aciri ku renje, anarume anganani akapanduka. Awona ainga asikacadi kuzwira Mozesi. Mazina awo ainga ari Kora, Dhatani na Abhiramu uye no anarume amweni anokwana kuita 250 akagarawo ku dii rawo. Awona akabvunza Mozesi kuti: ‘Taremba nemwi! Ngei iwewe wega ndiwe unodikana kugara mutungamiriri wedu uye ngei Aroni basi ndiye unodikana kugara mupristi mukuru? Djehovha aaripi newe basi, iyena ana isusuwo.’ Djehovha aazi kuzvipfarira. Kuna Djehovha anarume aya akapandukira iyena kamare!

Mozesi wakadaira Kora no anarume amweni eciti: ‘Uyai mangwana ku tabhernakuro, uye unzisai rusenzi kuti mupise, Djehovha acapangidza uya waakasanangura.’

Pa zuwa rakazoteera, Kora no anarume anokwana kuita 250 akaenda koosongana na Mozesi ku tabhernakuro. Uye akatanga kupisa rusenzi, asi izvona zvaidikana kuizwa no apristi basi. Hino Djehovha akabvunza Mozesi na Aroni kuti: ‘Budai padhuze na Kora uye no shamwari dzake.’

Pa nguwa iyona, Dhatani na Abhiramu ainga ari mu tenda dzawo. Awona aazi kuzwira Mozesi uye aazi kuenda ku tabhernakuro. Pedzepo Djehovha akabvunza anhu ese kuti abude padhuze no tenda ya Kora, Dhatani, uye Abhiramu. Anhu ese akaita izvona kusiya Dhatani, Abhiramu uye no mhuri dzawo. Asi pa nguwa yaainga asikakariri, Djehovha akafunungura rindi rakakura uye akaita kuti apanduki aya awiremo. Pedzepo, Djehovha akaita kuti muriro ubve ku denga uye wakapisa Kora no anarume 250 ainga ari mu tabhernakuro.

Pedzepo, Djehovha akabvunza Mozesi kuti: ‘Tora ndonga 12, imwe na imwe inoimirira dzinza rimwe re Aisraeri. Tara pa ndonga zina re mutungamiriri we dzinzero. Asi pa ndonga ye dzinza re Arevhi tara zina ra Aroni. Kanda ndongedzo mu tabhernakuro, inini ndicaita kuti pamere maruwa pa ndonga ye mwanarume wandicasanangura kuti agare mupristi mukuru.’

Pa zuwa rakazoteera, Mozesi wakaenda ku tabhernakuro kootora ndongedzo. Unoziya kuti zvinyi zvakazoitika? Pakamera maruwa pa ndonga ya Aroni. Mozesi wakapangidza ndongedzo ku anarume anokosha e dzinza rimwe na rimwe. Ngokudaro anhu ese akagara no cokwadi cekuti Djehovha ainga asanangura Aroni kuti agare mupristi mukuru.