Tempro ya Djehovha

Soromoni paakagara mambo we Aisraeri, Djehovha akamubvunzisa kuti: ‘Soromoni, cinyi caunoda kuti ndikupase?’ Soromoni wakadaira eciti: ‘Tenzi wangu Djehovha, inini ndiciri mudjaha uye andina zvakawanda zvandinoziya. Ndapota, ndipaseiwo uzii kuti ndikwanise kucengeta zvakanaka anhu enyu.’ Djehovha paakazwa izvona, iyena akati: ‘Ngekuti iwewe wakumbira uzii, inini ndicaita kuti ugare munhu uno uzii kupinda munhu wese pa nyika. Ndicaitawo kuti ugarewo ne upfumi wakawanda. Uye kana ukandizwira, ucararamawo makore akawanda.’

Soromoni wakatangisa kuwakisa tempro. Anarume akawanda no anakadzi, aiseenza eciseenzesa zviro zvekuwaka nazvo zvakanakisisa. Mumasure mekupera makore 7, tempro yakapera. Soromoni wakapasa tempro Djehovha. Iyena wakakanda zvipo pamusoro pe artari, wakagodama uye wakaita munamato eciti: ‘Djehovha Tenzi, makasisira mbuto yakanyasa kunaka kudarika tempro ii, asi ndapota tambirai mbuto ino uye izwai minamato yaticaita mu mbuto ino.’ Unoziya kuti Djehovha akaitei kuti apangidze kuti ainga apfarira tempro? Mumasure mekuti Soromoni wapedza kuita munamato, Djehovha akatuma muriro kuti ubve kudenga uye uwona wakapisa zvese zvainga zviri pamusoro pe artari. Aisraeri paakaona izvi, awona akapfara maningi.

Mambo Soromoni wakagara no mbiri nge ndaa ye uzii. Anhu e mu mbuto dzese, aienda kuna Soromoni uye aimukumbira kuti agadzirise nyaya dzawo. Kunyazi mambokadzi unogara ku mbuto iri kure inozwi Sebha, wakaenda kooreketa na Saromoni. Iyena waida kuziya kuti zvezvirokwazvo wainga ano uzii here. Mumasure me kucedza na Soromoni, mambokadziwo wakati: ‘Anhu paakandibvunza kuti imwimwi mainga muno uzii wakakura, inini andizi kuzvitendera, asi zvino ndaa kuziya kuti izvirokwazvo. Djehovha Mwari wenyu, ana imwimwi uye ari kumubetserai.’ Upenyu mu Israeri wainga wakanaka uye anhu aipfara. Asi zviro zvaizocinja nokukasika.